Go na content

Go na a tra menu

Go na table of contents

Yehovah Kotoigi

Sranantongo

A Waktitoren  |  Nr. 2 2016

Kresten musu go na santapresi fu anbegi Gado?

Kresten musu go na santapresi fu anbegi Gado?

IBRI yari moro leki siksi milyun sma e go na Shima, wan farawe presi na ini Yapan pe wan busi fu sedrebon de. Na ini a busi disi wan presi de di sma e kari a Gran Santapresi fu Ise. Drape sma e anbegi a son-gado Amaterasu Omikami. Sowan tu dusun yari kaba sma e go drape fu anbegi na umagado disi fu a Syinto bribi. Den sma di e kon drape e wasi den anu nanga den mofo fosi fu krin densrefi. Te den e tanapu na fesi a presi pe sma e anbegi na umagado disi, dan den e boigi, den e naki anu èn den e begi. * Sma di abi a Syinto bribi mag abi tra bribi tu. Son Budasma, son sma di e kari densrefi Kresten èn sma di abi tra bribi no e si en leki wan problema fu du ala den sani dati gi a Syinto gado disi.

Furu fu den bigi kerki na grontapu abi santapresi * pe milyunmilyun sma e go. Na ini kondre pe furu sma e kari densrefi Kresten, furu kerki nanga santapresi de pe sma e anbegi Yesus, Maria noso tra santawan. Son santapresi de na kontren pe prenspari sani pasa na ini Bijbel ten. Trawan de na presi pe sma taki dati wan wondru pasa na ini a ten fu wi. Na son santapresi sma poti prenspari sani di den e si leki santa sani fu a bribi fu den. Furu sma e go na den presi disi fu di den e bribi taki drape Gado o wani arki den begi fu den. Tra sma e teki waka wan heri pisi ten fu doro na den santapresi, fu di den feni taki na so fasi den e sori taki den e dini a gado fu den fayafaya.

Sma di e go na a Gran Santapresi fu Ise na ini Yapan èn na a Bergi-olo fu Massabielle na ini Lourdes na Fransikondre

A de so taki te sma e begi Gado na den santapresi dati, a o wani piki den begi fu den? Gado breiti te sma e waka bun langa pasi fu go anbegi en na wan santapresi? Wan moro prenspari aksi na disi: Kresten musu anbegi Gado na wan santapresi? Den piki tapu den aksi disi o sori wi fa wi musu denki fu na anbegi di sma e anbegi na den santapresi. Den o yepi wi fu frustan tu sortu fasi fu anbegi Gado feni bun.

ANBEGI GADO „NANGA YEPI FU A SANTA YEYE ÈN NANGA YEPI FU SAN TRU”

San Yesus ben wani sori wi di a taki dati wi musu anbegi Gado „nanga yepi fu a santa yeye èn nanga yepi fu san tru”?

Wan takimakandra di Yesus ben abi nanga wan uma fu Samaria e sori fa Gado e si na anbegi di sma e anbegi na santapresi. Wan leisi di Yesus ben e waka pasa na ini Samaria, a go rostu na wan peti krosibei fu a foto Sikar. A bigin taki nanga wan uma di ben kon drape fu teki watra na ini a peti. Di den ben e taki, na uma taki fu wan sani di e sori taki na anbegi fu den Dyu ben de heri tra fasi leki a di fu den Samariasma. Na uma taki: „Den afo fu wi ben anbegi Gado na tapu a bergi disi, ma unu e taki dati Yerusalem na a presi pe sma musu anbegi Gado.”​—Yohanes 4:5-9, 20.

Na uma ben e taki fu Gerisim-bergi di ben de sowan 50 kilometer na a noordsei fu Yerusalem. Fosi, den Samariasma ben abi wan tempel drape pe den ben e hori fesa soleki a Paskafesa. Ma Yesus no haritaki nanga na uma fu a tori disi. Na presi fu dati a taki: „Uma, yu kan bribi mi: A yuru o kon taki unu  no o anbegi a Tata na tapu a bergi disi, noso na ini Yerusalem” (Yohanes 4:21). A sani di Yesus taki na wan moi sani, spesrutu te yu e prakseri taki a ben de wan Dyu. Fu san ede den Dyu no ben o anbegi Gado moro na a tempel na ini Yerusalem?

Yesus taki moro fara: „A ten o kon èn a de nownow kaba taki den tru anbegiman o anbegi a Tata nanga yepi fu a santa yeye èn nanga yepi fu san tru, bika a Tata e suku den sortu sma disi fu anbegi en” (Yohanes 4:23). Hondrohondro yari langa den Dyu ben si a moi tempel na ini Yerusalem leki a moro prenspari presi pe den ben musu anbegi Gado. Dri leisi wan yari den ben e teki waka go drape fu tyari ofrandi gi Yehovah, a Gado fu den (Eksodes 23:14-17). Ma Yesus taki dati ala den sani disi ben o kenki. A taki dati „tru anbegiman” ben o dini Gado „nanga yepi fu a santa yeye èn nanga yepi fu san tru”.

A Dyu tempel ben de wan spesrutu presi pe den Dyu ben e go fu anbegi Gado. Ma te wan sma e anbegi Gado nanga yepi fu a santa yeye èn nanga yepi fu san tru, dan a no abi wan spesrutu presi fanowdu. Sobun, Yesus ben wani sori na uma taki tru Kresten no ben o abi fu go na wan spesrutu presi soleki Gerisim-bergi, a tempel na ini Yerusalem noso na iniwan tra santapresi, soso fu anbegi Gado.

Di Yesus ben e taki nanga a Samaria uma, a sori en tu taki ’a ten ben o kon’ pe sma ben o anbegi Gado tra fasi. O ten dati ben o pasa? Disi pasa di Yesus gi en libi leki wan ofrandi. Na so a tyari wan kaba kon na a fasi fa den Dyu ben e anbegi Gado, soleki fa a Wet di Gado ben gi Moses ben taki (Romesma 10:4). Ma Yesus ben taki tu: „A ten . . . de nownow kaba.” Fu san ede? Fu di na a ten dati en leki a Mesias ben e meki disipel kaba di ben o gi yesi na den wortu disi: „Gado na wan Yeye èn den sma di e anbegi en, musu anbegi en nanga yepi fu a santa yeye èn nanga yepi fu san tru” (Yohanes 4:24). Ma san a wani taki fu anbegi Gado nanga yepi fu a santa yeye èn nanga yepi fu san tru?

Di Yesus ben taki dati sma ben o anbegi Gado nanga yepi fu a santa yeye, dan a ben wani sori taki a santa yeye fu Gado ben o tiri den. Wan fu den sani di a santa yeye ben o du, na taki a ben o yepi den fu frustan Bijbel (1 Korentesma 2:9-12). Di Yesus taki dati sma ben o anbegi Gado nanga yepi fu san tru, dan a ben wani sori taki sma ben o sabi soifri san Bijbel e leri. Fu dati ede, efu sma wani taki Gado feni na anbegi fu den bun, dan den no abi fu go na wan spesrutu presi fu anbegi en. San prenspari, na taki den  musu du san Bijbel e leri èn den musu meki a santa yeye tiri den.

FA KRESTEN MUSU SI DEN SANTAPRESI?

Fa Kresten musu si den santapresi èn a waka di sma e waka go na den presi disi fu anbegi Gado? Soleki fa wi si kaba, dan Yesus taki dati tru anbegiman musu anbegi Gado „nanga yepi fu a santa yeye èn nanga yepi fu san tru”. Te wi e prakseri a sani disi, dan a de krin taki wi Tata na hemel no e si en leki wan bigi sani te sma e go anbegi en na wan santapresi. Boiti dati, Bijbel e taki krin fa Gado feni en te sma e gebroiki popki na ini na anbegi fu den. Bijbel e taki: „Wai pasi gi afkodrei” èn „luku bun nanga kruktugado” (1 Korentesma 10:14; 1 Yohanes 5:21). Fu dati ede tru Kresten no musu anbegi Gado na iniwan presi di sma e si leki wan santapresi noso na iniwan presi pe sma e anbegi popki. Fu di den santapresi meki spesrutu gi den sani dati, meki tru Kresten no e go na den presi disi fu anbegi Gado.

Ma Bijbel no e taki dati sma no mag abi wan spesrutu presi pe den e begi, pe den e studeri Bijbel noso pe den e denki dipi fu san den leri. Te wan konmakandra presi krin èn a seti bun, dan a moro makriki gi sma fu leri sani fu Gado èn fu taki fu den sani disi. Bijbel no e sori tu taki a fowtu fu poti wan grebiston noso wan monumenti fu memre wan sma di dede noso fu sori taki den lobi en. Ma te sma e si so wan presi leki wan santapresi noso te den e poti popki noso tra sani fu anbegi den, dan den e du sani di no e kruderi kwetikweti nanga den wortu fu Yesus.

Sobun, yu no abi fu go na wan santapresi fu di yu wani taki Gado arki den begi fu yu. Boiti dati, Gado no o breiti te yu e teki waka go na wan santapresi èn a no o blesi yu fu a sani dati. Bijbel e taki dati Yehovah Gado, a ’Masra fu hemel nanga grontapu no e tan na ini tempel di libisma meki’. Ma toku Gado no de fara fu wi. Awinsi pe wi de, a e arki wi te wi e begi en, fu di „a no de fara fu nowan fu wi”.​—Tori fu den apostel 17:24-27.

^ paragraaf 2 Na difrenti santapresi fu a Syinto bribi sma abi tra sortu gwenti.

^ paragraaf 3 Luku a faki di nen „ Santapresi