KON MEKI WI TAKI DATI yu na wan Kresten di e libi na ini a ten fu den apostel. Yu gemeente kisi wan brifi fu na apostel Paulus. Te wan sma e leisi a brifi, dan yu e yere furu tron taki Paulus e taki fu sani di skrifi na ini „den Santa Buku”, noso den Hebrew Buku fu Bijbel (2 Timoteyus 3:15). Yu e taigi yusrefi: „Mi ben o wani si pe fu Gado buku den sani di a taki skrifi.” Ma dati no ben o makriki. Fu san ede?

FOSI BIJBEL NO BEN ABI KAPITEL NANGA VERS

Kon meki wi luku fa den difrenti pisi fu „den santa buku” na ini a ten fu Paulus ben de. Na tapu a bladzijde disi wi kan si wan pisi fu a bukulolo fu Yesaya di sma feni krosibei fu a Dede Se. San yu e si? Soso wortu, nowan punt èn nowan nomru fu kapitel noso vers. A no de leki den Bijbel buku na ini a ten disi.

Den Bijbel skrifiman no ben e prati a boskopu fu den na ini kapitel noso vers. Den ben e skrifi a heri boskopu fu Gado, so taki den leisiman ben kan leisi a heri boskopu. Den no ben musu leisi pisipisi fu en. Na dati yu e du te yu kisi wan prenspari brifi fu wan sma di yu lobi, a no so? Yu e leisi a heri brifi, yu no e leisi pisipisi fu en.

Ma fu di den Bijbel buku no ben prati na ini kapitel nanga vers, meki dati ben de wan problema. A wan-enkri fasi fa Paulus ben kan sori sma pe fu Gado Wortu den sani di a taki skrifi, na fu taki sani soleki „Gado Buku taki” noso „Yesaya ben taki na fesi” (Romesma 3:10; 9:29). A ben o muilek tu fu feni den pisi dati efu yu no ben sabi ala „den santa buku” finifini.

Boiti dati, den „santa buku” no ben de wán boskopu nomo fu Gado. A pisi ten fu a yari 100 Baka Krestes, 66 fu den santa buku disi ben de. Furu sma di e leisi Bijbel na ini a ten disi breiti taki den buku prati na ini kapitel nanga vers. Disi e yepi den fu feni spesrutu pisi na ini Bijbel, soleki den furu pisi fu Bijbel di Paulus kari na ini den brifi fu en.

Kande yu e aksi yusrefi: ’Suma poti den kapitel nanga den vers na ini Bijbel?’

SUMA POTI DEN KAPITEL NA INI BIJBEL?

Sma e taki dati na Ingrisi kerki fesiman Stephen Langton poti den kapitel na ini Bijbel. Bakaten a man disi tron a Granbeskopu fu Canterbury. A ben poti den kapitel na ini Bijbel syatu baka a yari 1200 di a ben e gi leri na a Universiteit fu Parijs na ini Fransikondre.

Fosi a ten fu Langton, sabiman ben pruberi na difrenti fasi fu prati Bijbel na ini moro pikin pisi noso kapitel. Soleki fa a sori, dan den ben wani du dati fu feni son pisi moro makriki. Yu kan frustan taki a ben o moro makriki fu feni wan pisi na ini Bijbel efu yu ben musu suku en na ini wán kapitel nomo na presi fu suku en na ini wan heri buku soleki a buku Yesaya di abi 66 kapitel.

Ma fu prati Bijbel na ini kapitel ben de wan problema. A fasi fa den sabiman ben prati Bijbel na ini kapitel ben difrenti èn disi ben e bruya sma. Fu eksempre, na ini wan fu den Bijbel na Evangelietori fu Markus ben prati na ini sowan 50 kapitel. A no ben abi 16 kapitel soleki fa a de now. Na ini a ten fu Langton, furu studenti fu tra kondre ben de na ini Parijs èn den ben abi a Bijbel fu den eigi kondre. Ma te  den leriman nanga den studenti ben e taki fu wan pisi fu Bijbel, dan a no alamala ben man feni a pisi dati makriki. Fu san ede? Fu di a fasi fa den difrenti Bijbel ben prati na ini kapitel no ben de a srefi.

Dati meki Langton feni wan nyun fasi fu prati Bijbel na ini kapitel. Wan buku e taki dati ’sabiman nanga tra sma di ben e leisi Bijbel ben lobi san a du èn furu sma na ini Europa bigin du a srefi’ (The Book​—A History of the Bible). A fasi fa Bijbel prati na ini kapitel na ini a ten disi kon fu Langton.

SUMA POTI DEN VERS NA INI BIJBEL?

Sowan 300 yari baka dati, na a ten fu a yari 1550, a Fransiman Robert Estienne di ben sabi druk buku, meki sani moro makriki. A ben wani taki moro sma studeri Bijbel. A ben si taki a ben o de wan bigi yepi efu ala Bijbel ben abi den srefi kapitel nanga vers.

Ma a no Estienne kon nanga a prakseri fu prati Bijbel na ini vers. Tra sma ben du dati kaba. Fu eksempre, wan tu hondro yari na fesi, Dyu sabiman di ben e skrifi Bijbel abra ben poti vers na ini ala den Hebrew Buku fu Bijbel, noso a pisi fu Bijbel di sma e kari na Owru Testamenti. Den no ben poti kapitel na ini. Ma neleki fa a ben de nanga den kapitel, a no ala den sabiman ben poti den vers na a srefi presi.

Estienne ben feni wan nyun fasi fu prati den Kresten Griki Buku fu Bijbel noso a Nyun Testamenti, na ini vers. Baka dati a teki den Hebrew Buku fu Bijbel di ben abi vers kaba, dan a meki wán Bijbel. Na ini 1553, a tyari a fosi Bijbel kon na doro (na ini Fransitongo) di ben abi kapitel nanga vers, soleki fa a de na ini furu Bijbel fu a ten disi. Son sma no ben lobi a sani disi. Fu di den vers ben e prati Bijbel na ini pikinpikin pisi, meki den ben feni taki Bijbel no ben de wán buku moro, ma a ben gersi difrenti pisi tori di no ben abi noti fu du nanga makandra. Ma heri esi tra sma di ben e druk buku bigin prati Bijbel na ini kapitel nanga vers tu neleki fa Estienne du dati.

WAN BIGI YEPI GI SMA DI E STUDERI BIJBEL

Kande yu feni taki a no de so wan kefalek sani taki sma prati Bijbel na ini kapitel nanga vers. Ma disi e yepi wi fu sabi krin pe fu Bijbel wi kan feni ibri tekst. A tru taki a no Gado meki sma prati Bijbel na ini kapitel nanga vers èn son kapitel noso vers e bigin na presi pe yu no ben o fruwakti. Ma toku den e yepi wi fu feni son tekst makriki. Te wan tekst prenspari gi wi, dan wi kan poti wan marki drape noso wi kan taki fu en nanga tra sma. Na dati wi e du tu te wi wani memre wan sani di wi leisi na ini wan buku, a no so?

Aladi den kapitel nanga den vers na wan bigi yepi gi wi, toku wi musu hori na prakseri ala ten taki a moro prenspari fu frustan a heri boskopu di Gado gi wi. Du muiti ala ten fu leisi a heri tori. No leisi wanwan tekst nomo. Te yu e du disi, dan safrisafri yu o kon sabi ala „den Santa Buku di kan meki yu kon koni, so taki yu kan kisi frulusu”.​—2 Timoteyus 3:15.