Go na content

Go na a tra menu

Go na table of contents

Yehovah Kotoigi

Sranantongo

A Waktitoren  |  Nr. 1 2017

 BIJBEL E KENKI SMA LIBI

Mi no ben wani dede!

Mi no ben wani dede!
  • A GEBORE NA INI: 1964

  • KONDRE: INGRISIKONDRE

  • MI BEN DE WAN YONGU MAMA DI BEN E LIBI WAN YAYOLIBI

A LIBI FU MI FOSI

Mi gebore na Paddington, wan presi na ini Londen, na Ingrisikondre. Furu sma e libi drape. Mi nanga ete dri bigi sisa ben e tan nanga wi mama. Fu di mi papa ben de wan sopiman, meki wanwan leisi nomo wi ben e si en. A no ben sorgu gi wi.

Di mi ben yongu, mi mama leri mi fu begi ibri neti. Mi ben abi wan pikin Bijbel di ben abi soso den Psalm. Mi ben meki poku gi den psalm disi fu kan singi den. Mi kan memre taki mi ben leisi wan sani na ini wan buku èn noiti moro mi frigiti a sani dati. A buku taki: „Wan dei o kon pe tamara no o de moro.” A sani disi meki taki mi no ben man sribi te neti. Mi ben e prakseri fa a libi fu mi o waka. Mi ben e denki: ’A libi disi no kan de ala. Fu san ede mi de na grontapu?’ Mi no ben wani dede!

Mi ben kon lobi sani di abi fu du nanga bonu. Mi ben e pruberi fu taki nanga dedesma. Mi nanga wan tu skoromati ben e go na beripe, èn wi ben e luku spuku felem. Wi ben lobi du den sani disi, ma den ben e meki wi frede tu.

Mi bigin libi wan yayolibi di mi ben abi 10 yari nomo. Mi bigin smoko èn fosi yu denki mi no ben man tapu moro. Bakaten mi bigin smoko marwana srefi. Di mi ben abi 11 yari, mi bigin dringi sopi. Mi no ben lobi a tesi fu en, ma mi ben e firi switi te mi ben drungu. Mi ben lobi poku tu nanga dansi. Solanga mi ben man, mi ben e go na fesa nanga dansi. Mi ben gwenti boro go te neti èn leti fosi dei broko mi ben e boro kon na oso baka. Fu di mi ben weri a mamanten fu en, meki mi ben e spijbel fu skoro. Den wawan leisi te mi ben go na skoro, mi ben e dringi sopi fosi mi go na ini klas.

A lasti yari di mi go na skoro mi kisi soso lagi cijfer. Mi mama ben mandi tapu mi èn a ben feni taki na fu soso a e seni mi go na skoro. Ma a no ben sabi sortu ogri mi ben e du. Mi nanga en kisi trobi èn mi gowe libi oso. Wan pisi ten mi ben e tan nanga mi vriend Tony di ben de wan Rastaman. A ben e fufuru, a ben e seri drugs èn ala sma ben sabi taki a  ben gwenti feti. A no teki langa fosi mi hori beri èn mi kisi a boi fu wi di mi ben abi 16 yari nomo.

A FASI FA BIJBEL KENKI MI LIBI

A fosi leisi di mi miti nanga Yehovah Kotoigi, mi ben e libi na wan presi pe mama di no trow èn di abi beibi e tan. Lanti ben gi mi wan kamra drape. Tu frow di ben de Kotoigi ben gwenti kon na wan tu fu den tra yongu uma drape. Wan dei mi go sidon arki den. Mi ben wani sori taki Kotoigi e leri sma sani di no tru. Ma den no haritaki nanga mi. Den gebroiki Bijbel fu piki ala den aksi di mi ben abi. Den ben abi switifasi èn a sani dati ben e hari mi. Dati meki mi ben wani taki den studeri Bijbel nanga mi tu.

A no teki langa fosi mi leri wan sani na ini Bijbel di kenki mi libi. Sensi di mi ben yongu, mi ben e frede fu dede. Ma now mi kon sabi taki Yesus e leri taki dedesma o kon na libi baka (Yohanes 5:28, 29). Mi leri tu taki Gado e broko en ede nanga mi (1 Petrus 5:7). Wan sani di naki mi ati srefisrefi, na san skrifi na Yeremia 29:11: „Yehovah taki: ’Mi sabi heri bun fa mi e prakseri fu unu. Mi no wani taki rampu miti unu, ma mi wani taki un musu abi wan bun libi. Mi wani taki sani waka bun gi unu na ini a ten di e kon èn mi wani taki un musu abi howpu.’” Now mi ben e bribi taki mi ben kan abi a howpu fu libi fu têgo na ini wan paradijs na grontapu.Psalm 37:29.

Den Yehovah Kotoigi sori taki den lobi mi trutru. A fosi leisi di mi go na wan konmakandra fu den, mi ben e firi bun fu di ala sma drape ben abi switifasi (Yohanes 13:34, 35). Den ben de heri tra fasi leki a kerki pe mi ben e go. Den Kotoigi no ben luku a fasi fa mi de, ma den ben breiti taki mi kon. Den meki ten gi mi èn den ben yepi mi tu. Mi ben e firi leki mi kon na ini wan bigi famiri di lobi mi.

Fu di mi ben studeri Bijbel, mi kon si taki mi ben musu kenki mi libi fu man du san Gado wani. A ben muilek gi mi fu tapu smoko tabaka. Na a srefi ten mi ben kon si taki son poku ben e gi mi a firi fu smoko marwana, èn dati meki mi stop arki den poku dati. Fu di mi no ben wani kon drungu moro, meki mi no ben e go na fesa nanga dansi pe mi ben kan dringi sopi. Mi meki nyun mati tu di ben e yepi mi fu libi soleki fa mi leri na ini Bijbel.Odo 13:20.

A pisi ten dati, Tony srefi bigin studeri Bijbel nanga Yehovah Kotoigi. Fu di den Kotoigi gebroiki Bijbel fu piki den aksi fu en, meki ensrefi bigin bribi taki den sani di a e leri na tru tori. A kenki en heri libi. A no ben e moksi moro nanga den ogri mati fu en, a no ben e fufuru moro èn a tapu fu smoko marwana. Fu di wi ala tu ben wani du san Yehovah e aksi fu wi, meki wi ben si taki wi ben musu tyari moro kenki kon. Wi ben wani tu taki a boi fu wi kweki na ini wan bun osofamiri. Dati meki wi trow na ini 1982.

„Mi no e tan na ai heri neti moro fu prakseri fa a libi fu mi o waka èn mi no e frede dede moro”

Mi kan memre ete taki mi ben e suku artikel na ini Waktitoren nanga Ontwaakt! * di ben e taki fu sma di ben tyari den srefi kenki kon di mi ben wani tyari. Na eksempre fu den yepi mi furu! Mi ben kisi deki-ati fu tan meki muiti èn fu no gi abra. Mi ben e begi Yehovah fu tan yepi mi. Mi nanga Tony dopu na ini yuli 1982 èn wi tron Yehovah Kotoigi.

DEN WINI DI MI KISI

Fu di mi tron wan mati fu Yehovah Gado, meki mi no lasi mi libi. Yehovah yepi mi nanga Tony na ini muilek ten tu. Wi leri fu frutrow na tapu Yehovah na ini muilek ten èn ala ten wi si taki a sorgu wi osofamiri.Psalm 55:22.

Mi ben e prisiri tu te mi ben e yepi mi boi nanga mi meisje fu kon sabi Yehovah. Now mi e breiti te mi e si taki den pikin fu den e leri sabi Gado tu.

Mi no e tan na ai heri neti moro fu prakseri fa a libi fu mi o waka èn mi no e frede dede moro. Mi nanga Tony abi furu fu du. Ibri wiki wi e go na difrenti gemeente fu Yehovah Kotoigi fu gi den brada nanga sisa deki-ati. Wi nanga den e go leri sma taki efu den e bribi na ini Yesus, dan den srefi kan libi fu têgo.

^ paragraaf 19 Na Yehovah Kotoigi e meki den tijdschrift disi.

Kon sabi moro

FA WI E STUDERI BIJBEL NANGA SMA

Fu san ede wi musu studeri Bijbel?

Na heri grontapu, milyunmilyun sma e feni piki tapu prenspari aksi fu a libi, na ini Bijbel. Yu wani de wan fu den tu?