Go na content

Go na a tra menu

Go na table of contents

Yehovah Kotoigi

Sranantongo

A Waktitoren  |  Nr. 1 2017

Fu san ede a prenspari fu frustan Bijbel bun?

Fu san ede a prenspari fu frustan Bijbel bun?

Wan pikin meisje ben si smoko e komoto fu den peipi fu wan fabriki go na loktu. Gi a meisje a smoko ben gersi wolku. Dati meki a ben denki taki a fabriki dati ben e meki wolku. Te wan pikin-nengre e denki den sortu sani disi fu di a no e frustan wan sani, dan wi kan lafu fu en. Ma te wi no e frustan wan prenspari sani, dan dati kan abi krakti tapu wi heri libi. Fu eksempre, efu wi no e leisi bun san skrifi na tapu a batra fu wan dresi, dan wi kan kisi bigi problema.

Ma wan moro seryusu sani na te wi no e frustan son leri fu Bijbel bun. Fu eksempre, son sma no ben frustan den leri fu Yesus bun (Yohanes 6:48-68). Na presi taki den leri moro fu Yesus, den no ben wani arki en moro. Dati na wan sari tori!

Yu e leisi Bijbel fu di yu wani taki a tiri yu libi? Dati na wan bun sani. Ma a de so taki yu leisi wan sani di yu no frustan bun? A sani disi e pasa nanga furu sma. Luku dri sani di skrifi na ini Bijbel èn di furu sma no e frustan bun.

  • Bijbel e taki dati wi musu „frede Gado”. Son sma no e frustan den wortu disi bun. Den e denki taki wi musu frede Gado fu di a e strafu sma gi ala pikinpikin fowtu di den e meki (Openbaring 14:7). Ma Gado no wani taki den sma di e dini en musu denki so fu en. A e taki: „No frede, bika mi de nanga yu. No luku leki yu e frede, bika mi na yu Gado. Mi o meki yu kon tranga. Mi o yepi yu trutru” (Yesaya 41:10). Den wortu „frede Gado” wani taki nomo dati wi musu abi bigi lespeki gi en.

  • Grontapu o bron nanga faya?

    Son sma no e frustan den wortu disi bun: „Gi ala sani wan ten de, . . . wan ten de fu meki pikin èn wan ten de fu dede.” Den e denki taki Gado bosroiti kaba o ten wan sma o dede (Preikiman 3:1, 2). Ma a tekst disi e sori nomo fa a libi e waka: Libisma e gebore èn te fu kaba den e dede. Gado Wortu e leri wi tu taki den bosroiti di wi e teki kan syatu wi libi, noso den kan meki taki wi libi moro langa. Fu eksempre, Bijbel e taki: „Bigi lespeki gi Yehovah o meki wan sma libi moro langa” (Odo 10:27; Psalm 90:10; Yesaya 55:3). Fa so? Efu wi e lespeki Gado Wortu, dan wi no o du sani di kan meki wi kon siki. Wi no o dringi sopi teleki wi kon drungu èn wi no o libi wan yayolibi.1 Korentesma 6:9, 10.

  • Bijbel e taki dati Gado libi hemel nanga grontapu „fu bron den nanga faya”. Son sma e denki taki Gado o pori a grontapu disi pe wi e libi nanga faya trutru (2 Petrus 3:7). Ma Gado pramisi taki noiti a planeiti grontapu o kisi pori. Gado „seti grontapu na tapu wan steifi fondamenti. Fu ala ten, iya, fu têgo nowan sma o man seki en” (Psalm 104:5; Yesaya 45:18). Sobun, na den ogrisma di e libi na grontapu o kisi pori fu têgo, a no a planeiti. Te Bijbel e gebroiki a wortu hemel, dan a kan abi fu du nanga a trutru hemel, den stari na loktu noso a presi pe Gado e tan. Nowan fu den sani disi o pori.

FU SAN EDE SMA NO E FRUSTAN BIJBEL BUN SON LEISI?

Soleki fa den eksempre disi e sori, dan furu tron sma no e frustan son tekst di den e leisi na ini Bijbel. Ma fu san ede Gado ben o gi pasi taki disi pasa? Kande son sma e denki: ’Efu Gado abi ala koni èn efu a sabi ala sani, dan a ben o meki wan buku di skrifi na so wan fasi taki ala sma man frustan en. Fu san ede a no du dati?’ Luku dri reide fu san ede furu sma no e frustan Bijbel bun.

  1. Soso sma di abi sakafasi èn di de klariklari fu teki leri, man frustan Bijbel. Yesus  ben taigi en Papa: „Mi e prèise yu na fesi ala sma, mi Tata, Masra fu hemel nanga grontapu, bika yu kibri den sani disi bun gi den koniman nanga den sabiman, ma yu meki den nyofiwan kon sabi disi” (Lukas 10:21). Bijbel skrifi na so wan fasi taki soso sma di abi sakafasi man frustan a boskopu na ini. Nofo tron sma di abi heimemre no man frustan Bijbel bun èn furu fu „den koniman nanga den sabiman” abi a fasi disi. Ma sma di abi sakafasi èn di de klariklari fu teki leri neleki yongu pikin, e kisi a grani fu frustan Gado Wortu. A no de fu taki dati Gado meki Bijbel na wan koni fasi!

  2. Bijbel meki gi sma di wani taki Gado yepi den fu frustan en. Yesus sori taki sma ben o abi yepi fanowdu fu frustan den sani di a leri den. Fa den ben o kisi a yepi disi? Yesus taki: „A yepiman, sobun a santa yeye di a Tata o seni kon na ini mi nen, o leri unu ala sani” (Yohanes 14:26). Dati meki Gado e gi sma en santa yeye, noso a krakti fu en, fu yepi den frustan san den e leisi na ini Bijbel. Ma Gado no e gi en santa yeye na sma di no e frutrow na en tapu. Dati meki furu sma feni taki Bijbel muilek fu frustan. A santa yeye e meki taki Kresten di sabi Bijbel e yepi tra sma di wani frustan Bijbel moro bun.Tori fu den apostel 8:26-35.

  3. Sma kan frustan son Bijbeltekst soso te a ten doro fu frustan en. A profeiti Danièl ben musu skrifi wan boskopu gi a ten di e kon. Na engel taigi en: „Yu, Danièl, musu tapu a buku nanga wan stampu. No meki nowan sma kon sabi san skrifi na ini, teleki a ten fu a kaba.” Hondrohondro yari langa sma leisi a Bijbel buku Danièl, ma den no ben man frustan en trutru. Danièl di ben abi sakafasi no ben man frustan san a ben skrifi. A ben taki: „Aladi mi yere san a man taki, toku mi no ben e frustan san den sani dati ben wani taki.” Te fu kaba sma ben o man frustan den profeititori di Gado meki Danièl skrifi, ma soso na a ten di Gado ben bosroiti. Na engel ben taki: „Go, Danièl, bika a buku tapu nanga wan stampu. Nowan sma musu kon sabi san skrifi na ini, teleki a ten fu a kaba.” Suma o frustan a boskopu fu Gado? „Nowan enkri ogri sma o man frustan den tori disi. Ma den wan di man si a dipi fu den tori disi, o man frustan den” (Danièl 12:4, 8-10). Sobun, soso te a yoisti ten doro Gado e yepi sma fu frustan son pisi na ini Bijbel.

A de so taki Yehovah Kotoigi no ben frustan wan sani bun fu di a ten no ben doro ete fu sma frustan en? Iya. Ma di a ten doro taki Gado yepi den Kotoigi fu frustan sani moro krin, den ben de klariklari fu tyari kenki kon na ini a fasi fa den fruklari son sani. Den feni taki na so fasi den e teki na eksempre fu den apostel fu Krestes di ben abi sakafasi èn di ben kenki den denki di Yesus yepi den fu frustan sani moro bun.Tori fu den apostel 1:6, 7.

A fowtu denki di a pikin meisje na a bigin fu na artikel ben abi, no ben de so wan seryusu sani. Ma den leri fu Bijbel prenspari srefisrefi. Dati meki wan sma no musu pruberi fu frustan Bijbel na en fasi te a e leisi en. Sobun, suku yepi fu frustan san yu e leisi. Suku sma di abi sakafasi èn di e studeri Bijbel nanga wan krin ati. Suku sma di e meki Gado en santa yeye yepi den fu frustan Bijbel, sma di abi na overtoigi taki den e libi na ini wan prenspari ten pe Gado wani taki sma frustan Bijbel. Yu kan taki nanga Yehovah Kotoigi noso yu kan leisi sani na a website fu den, jw.org. Den sani di skrifi drape na sani di den ondrosuku bun. Bijbel e pramisi: ’Bari kari frustan, dan yu o kon leri sabi Gado.’Odo 2:3-5.