Go na content

Go na a tra menu

Go na table of contents

Yehovah Kotoigi

Sranantongo

A Waktitoren  |  Nr. 1 2016

San yu kan du efu yu e firi leki sma no lobi yu

San yu kan du efu yu e firi leki sma no lobi yu

WAN nyunyun beibi abi yepi fanowdu fu di a no man du noti gi ensrefi. Te wan pikin gebore, na en papa nanga en mama musu sorgu taki ala sani waka bun nanga en. Te a e leri fu waka, a e si sma di a no sabi. A e frede den fu di den bigi omeni tron moro en. Ma te en papa noso mama de krosibei èn den e hori en anu, a no e frede moro.

Sani e go bun nanga wan pikin te en papa nanga en mama lobi en èn te den e gi en deki-ati. Te a e si taki en papa nanga en mama lobi en, dan a no e frede taki ogri o miti en. Te papa nanga mama e gi a pikin a firi taki a e du bun, dan a e kisi deki-ati fu tan meki muiti èn a e firi moro bun.

Te a kon moro bigi, a e kisi bun mati di e gi en a firi tu taki den lobi en. A e firi bun te a de nanga den èn a no e frede te a de na skoro nanga den.

Ma a no ala pikin abi so wan bun libi. Son yonguwan abi wan tu bun mati nomo èn furu pikin no abi papa nanga mama di e meki ten gi den. Melissa * taki: „Solanga mi si fowtow fu osofamiri di e du sani makandra, dan mi e prakseri: ’Mi winsi taki mi ben abi dati tu di mi ben pikin.’” Kande yu e firi so tu.

SAN KAN PASA TE WAN PIKIN NO KWEKI NANGA LOBI

Kande di yu ben yongu, yu ben prakseri taki yu no man du nowan sani bun. Kande na fu di sma no ben sori furu lobi gi yu èn den no ben e gi yu deki-ati. A kan taki yu e memre fa yu papa nanga mama ben e feti èn fa den broko trow te fu kaba. Kande yu ben feni taki na yu meki dati pasa. A kan tu taki wan moro ogri sani pasa nanga yu. Fu eksempre, kande yu papa noso mama ben e kosi yu noso fon yu ala ten.

San son pikin e du te den sortu sani disi miti den? Son yonguwan e bigin gebroiki drugs noso den e dringi sopi pasa marki. Trawan e tron memre fu wan grupu ogriman fu di den wani de nanga sma di e teki den leki fa den de. Yonguwan e suku wan vriend noso wan vriendin, soso fu di den wani wan sma di lobi den. Ma a no e teki langa fosi den e prati èn dati e meki taki den e firi moro brokosaka.

Ma awansi son yonguwan no e du den sani disi, toku den kan abi a firi taki den no warti noti. Ana e fruteri: „Mi bigin denki taki mi no ben warti noti fu di mi mama ben e taigi mi a sani dati ibri tron baka.  Mi no man memre o ten mi mama prèise mi noso sori lobi gi mi.”

Ma a no soso a fasi fa wi kweki kan gi wi a firi taki wi no warti noti. Kande yu e firi so fu di yu broko trow, fu di yu kon owru, noso fu di yu feni taki yu no moi. Awansi fa a no fa, den sani disi kan meki taki wi no e firi koloku èn a kan pori a matifasi di wi abi nanga trawan. San wi kan du te wi abi den firi disi?

GADO E BROKO EN EDE NANGA WI

A bun fu sabi taki yepi de. Wi alamala abi wan sma di kan yepi wi èn di wani yepi wi. A sma dati na Gado.

Gado ben meki a profeiti Yesaya skrifi: „No frede, bika mi de nanga yu. No luku leki yu e frede, bika mi na yu Gado. Mi o meki yu kon tranga. Mi o yepi yu trutru. Iya, mi o hori yu nanga mi reti-anu fu retidu” (Yesaya 41:10, 13). A de wan trowstu trutru fu sabi taki Gado wani hori wi anu! Wi no abi fu broko wi ede!

Bijbel e taki fu anbegiman fu Gado di ben abi broko-ede, ma di leri fu hori Gado anu. Hana, a mama fu Samuel, ben e firi leki a no warti noti fu di a no ben man meki pikin. Sma ben gwenti spotu en fu a sani dati. Dati meki Hana no ben wani nyan moro èn a ben e krei furu (1 Samuel 1:6, 8). Ma baka di a taigi Gado fa a ben e firi, a no ben e sari moro.1 Samuel 1:18.

Son leisi, a psalm skrifiman David ben e lasi-ati tu. Furu yari langa, Kownu Saul ben e suku fu kiri en. Wan tu leisi sma misi fu kiri David èn son leisi a ben e firi leki a no man moro (Psalm 55:3-5; 69:1). Toku a ben skrifi: „Mi o kanti didon èn mi o sribi, sondro fu broko mi ede nanga wan sani. Bika na yu, Yehovah, yu wawan kan kibri mi.”Psalm 4:8.

Hana nanga David trowe den hebi na tapu Yehovah èn den si taki a yepi den trutru (Psalm 55:22). Fa wi kan du a srefi tu?

DRI SANI DI KAN YEPI WI FU FIRI MORO BUN

1. Leri fu frutrow tapu Yehovah èn si en leki yu Papa.

Yesus gi wi a deki-ati fu leri sabi en Papa, „a wan-enkri tru Gado” (Yohanes 17:3). Na apostel Paulus  gi wi a dyaranti disi: „A no de fara fu nowan fu wi” (Tori fu den apostel 17:27). Yakobus skrifi: „Kon krosibei na Gado èn a o kon krosibei na unu.”Yakobus 4:8.

Wan prenspari sani di kan yepi wi fu no broko wi ede tumusi, na te wi sabi taki wi abi wan Papa na hemel di lobi wi èn di e broko en ede nanga wi. A tru taki a kan teki ten fu leri fu frutrow na en tapu. Ma furu sma ondrofeni taki den no abi so furu broko-ede te den e frutrow tapu Gado. Caroline e taki: „Di mi bigin si Yehovah leki mi Papa, dan fosi mi ben abi wan sma di mi ben kan fruteri san de na tapu mi ati. A sani disi meki mi firi moro bun!”

Rachel e taki: „Yehovah na a sma di yepi mi fu no lasi-ati di mi papa nanga mama gowe libi mi. Mi ben kan taki nanga en èn mi ben kan aksi en fu yepi mi nanga den problema fu mi. A yepi mi trutru.” *

2. Suku sma di o lobi yu leki den eigi famiri.

Yesus leri den disipel fu en fu si makandra leki brada nanga sisa. A taigi den: „Un alamala na brada” (Mateyus 23:8). A ben wani taki den tru bakaman fu en lobi makandra èn taki den de leki wan bigi famiri.Mateyus 12:48-50; Yohanes 13:35.

Den brada nanga sisa na ini den gemeente fu Yehovah Kotoigi e du ala muiti fu sori trutru lobi gi makandra èn fu trowstu makandra (Hebrewsma 10:24, 25). Furu sma kon si taki te den de na den gemeente konmakandra, dan den e frigiti den broko-ede fu den èn den e firi moro bun.

Eva taki: „Mi ben abi wan bun mati na ini a gemeente fu mi. A ben e frustan fa mi ben e firi. A ben e arki mi, a ben e leisi Bijbel gi mi èn a ben e begi nanga mi. A ben e sorgu taki mi no ben de mi wawan. A yepi mi fu taki fu den sani di ben e gi mi broko-ede. Na fu di a yepi mi, meki mi bigin firi moro bun.” Rachel taki tu: „Mi feni wan ’mama nanga wan papa’ na ini a gemeente. Den gi mi a firi taki den lobi mi trutru èn taki sani ben o waka bun nanga mi.”

3. Sori lobi nanga switifasi gi trawan.

Te wi e sori lobi nanga switifasi gi trawan, dan wi kan tron bun mati fu den. Yesus ben taki: „Wan sma  sa de moro koloku te a e gi sani, leki te a e kisi sani” (Tori fu den apostel 20:35). A no de fu taki dati o moro lobi wi e sori gi trawan, o moro den o sori lobi gi wi. Yesus ben taigi den disipel fu en: „Abi a gwenti fu gi sma sani, dan sma sa gi unu sani tu.”Lukas 6:38.

Te wi e sori lobi gi trawan èn te trawan e sori lobi gi wi, dan dati e yepi wi fu no broko wi ede tumusi. A de soleki fa Bijbel e taki: „Lobi no e kaba noiti” (1 Korentesma 13:8). Maria e taki: „Mi sabi taki son takru denki di mi abi fu misrefi no tru kwetikweti. Te mi e yepi trawan èn te mi no e poti tumusi furu prakseri na misrefi, dan mi no e denki takru fu misrefi. Ala ten mi e firi bun te mi e du sani gi trawan.”

ALA SMA O DE KOLOKU

Den dri sani di wi taki didyonsro no o puru ala den broko-ede fu wi wantewante. Ma den kan de wan bigi yepi. Caroline e taki: „Te now ete mi e firi brokosaka son leisi. Ma now mi no e firi leki mi no warti noti. Mi sabi taki Gado e broko en ede nanga mi èn mi abi furu bun mati di e gi mi a firi taki den lobi mi.” Rachel e firi a srefi fasi. A e taki: „Ten na ten mi e sari srefisrefi. Ma mi abi Kresten brada nanga sisa pe mi kan go suku rai. Den e yepi mi fu si a bun sei fu a libi. San moro moi, na taki mi abi wan Papa na hemel. Mi kan taki nanga en ibri dei. Dati e yepi mi trutru.”

Bijbel e taki dati wan nyun grontapu o kon pe nowan fu wi o frede noso sari

Wan ten o kon pe ala problema o lusu fu ala ten. Bijbel e taki dati wan nyun grontapu o kon pe nowan fu wi o frede noso sari. Gado Wortu e pramisi: „Ibriwan sma o sidon na ondro en eigi droifibon nanga en eigi figabon. Nowan sma o meki den frede” (Mika 4:4). Na a ten dati, nowan sma o meki wi frede èn nowan sma o du wi ogri. „Wi no o memre” srefi den ogri di ben miti wi fosi (Yesaya 65:17, 25). Gado nanga en Manpikin, Krestes Yesus, o sorgu taki ’trutru retidu o de’. Dan „ala sma o de korostu ala ten èn den no o abi broko-ede”.Yesaya 32:17.