Go na content

Go na a tra menu

Go na table of contents

Yehovah Kotoigi

Sranantongo

A Waktitoren  |  Nr. 1 2016

 OWRUTEN RAI GI A TEN DISI

No broko yu ede

No broko yu ede

RAI FU BIJBEL: „No broko un ede moro nanga un libi.”Mateyus 6:25.

San disi wani taki? Yesus ben gi a rai disi di a ben hori wan prenspari lezing na tapu wan bergi. Soleki fa wan Bijbel wortubuku e taki, dan a Griki wortu di vertaal nanga „broko yu ede” kan abi fu du nanga „a fasi fa wan sma e firi te a pôti, te a no abi noti fu nyan, noso te tra problema e miti en na ini a libi”. Nofo tron sma e broko den ede nanga sani di kan pasa na ini a ten di e kon. A no fowtu fu broko wi ede nanga san wi abi fanowdu èn nanga den lobiwan fu wi. Fu taki en leti, a fiti taki wi e poti prakseri na den sani disi (Filipisma 2:20). Ma di Yesus taki, „noiti un musu broko un ede”, dan a ben e gi den bakaman fu en a rai fu no broko den ede tumusi. Wan sma di e broko en ede tumusi e frede srefisrefi san o pasa tamara èn a sani dati kan meki taki a lasi prisiri na ini a libi.Mateyus 6:31, 34.

A rai disi e wroko na ini a ten disi? A de wan koni sani te wi e gi yesi na a rai fu Yesus. Fu san ede? Son buku e taki dati sma di e broko den ede tumusi, e stress doronomo. A sani disi „e meki taki den e kon siki na den maag noso na den ati èn den no man blo bun”.

Yesus e sori wi taki a no bun fu broko wi ede tumusi, fu di a sani dati na fu soso. A ben aksi: „Suma fu unu di e broko en ede nanga sani, kan meki en libi kon pikinso moro langa?” (Mateyus 6:27) Awansi wi e broko wi ede nanga den problema fu wi, toku dati no o meki wi libi wan sekonde moro langa. Wi libi no o kon moro betre tu. Boiti dati, furu tron sani e waka heri tra fasi leki fa wi ben denki. Wan sabiman ben taki en so: „Te wi e broko wi ede tumusi nanga tamara, dan dati na lasi ten. Nofo tron sani no ogri so leki fa wi e denki.”

San wi kan du fu no broko wi ede tumusi? A fosi sani, na taki wi musu frutrow tapu Gado. Efu Gado kan gi fowru nyanyan èn efu a kan moi den bromki, dan yu no denki taki a o sorgu gi den sma di e poti na anbegi fu en na a fosi presi na ini den libi? (Mateyus 6:25, 26, 28-30) A di fu tu sani, na taki yu musu luku fa yu kan lusu den problema fu tide. Yesus ben taki: „Noiti un musu broko un ede nanga tamara, bika tamara o abi en eigi broko-ede.” Yu no feni tu taki „ibri dei abi nofo fu en eigi ogri”?Mateyus 6:34.

Te wi e teki a koni rai fu Yesus, dan wi no o abi fu kisi son siki fu di wi e stress. Boiti dati, wi o abi wan korostu firi. Na disi Bijbel e kari „a freide fu Gado”.Filipisma 4:6, 7.

Kon sabi moro

A WAKTITOREN

Yu o frutrow tapu Gado?

Kon si sortu wini a abi fu kon sabi Gado leki wan bun mati.