Go na content

Go na a tra menu

Go na table of contents

Yehovah Kotoigi

Sranantongo

A Waktitoren  |  Nr. 1 2016

 BIJBEL E KENKI SMA LIBI

Mi aksi Gado fu gi mi wan koloku libi, awinsi wán yari nomo

Mi aksi Gado fu gi mi wan koloku libi, awinsi wán yari nomo
  • A GEBORE NA INI: 1971

  • KONDRE: FRANSIKONDRE

  • MI BEN E DU WAN LO OGRI-ATI SANI ÈN MI BEN E LIBI WAN YAYOLIBI NANGA WAN DRUGS-LIBI

A LIBI FU MI FOSI:

Mi famiri ben e libi na ini Tellancourt, wan dorpu na a noord-owstusei fu Fransikondre. Mi papa ben de fu Fransikondre èn mi mama ben de fu Italiakondre. Di mi ben abi aiti yari, wi froisi go tan na Italiakondre, na wan presi krosibei fu Rome pe furu pôtisma e tan. Drape a libi na oso ben kon muilek. Mi papa nanga mama ben e feti nanga makandra fu di den ben abi moni problema.

Di mi ben abi 15 yari, mi mama taigi mi fu no tan nomo na ini na oso, ma fu go suku mati. Dati meki mi bigin gowe fu oso moro nanga moro èn mi ben e tan na strati moro langa. Heri esi mi bigin moksi nanga takru mati. Wan dei, wan man kon taki nanga mi na wan switi fasi. Di a gi mi drugs, mi teki en fu di mi ben wani du leki mi bigi kaba. Fosi yu denki, mi bigin libi wan drugs-libi èn wan yayolibi. Furu leisi bigisma ben abi seks nanga mi, aladi mi no ben wani dati. Mi no ben span efu mi ben de na libi noso efu mi ben dede. Mi ben e firi leki mi ben de mi wawan. Di mi ben abi 16 yari, mi pruberi fu kiri misrefi. Mi dringi wan batra whiskey, dan mi dyompo go na ini wan liba. Dri dei langa mi ben de na ini wan coma.

Aladi mi bigin si a libi leki wan warti sani, toku mi bigin du ogri-ati sani èn mi ben lai triki. Mi ben aksi sma efu den wani abi seks nanga mi. Ma te mi ben go nanga den na oso, mi ben e gi den drugs fu flaw den, dan mi ben furu iniwan diri sani di den ben abi. Bigi drugs organisâsi ben e meki mi tyari drugs go na difrenti presi na ini Italiakondre. Furu tron skowtu ben hori mi. Mi heri libi ben bruya, ma toku mi ben e bribi taki a no fu soso mi de na libi. Mi begi Gado fu gi mi wan koloku libi, awinsi wán yari nomo.

A FASI FA BIJBEL KENKI MI LIBI:

Di mi ben abi 24 yari, mi bosroiti fu go tan na Ingrisikondre. Fu di mi ben e wroko gi sma di ben e seri drugs, meki sma ben e suku fu kiri mi. Fosi mi gowe, mi go luku mi mama. Mi skreki di mi si wan man drape e taki nanga en fu Bijbel. A man disi ben nen Annunziato Lugarà. * Fu di mi ben sabi a man disi leki wan ogri man, meki mi bigin frede èn mi aksi en fu san ede a de na mi mama oso.  A fruteri mi taki a tyari bigi kenki tyari kon na ini en libi fu tron wan Yehovah Kotoigi. A meki mi pramisi en taki mi ben o taki nanga den Kotoigi te mi ben doro na ini Ingrisikondre. Mi taigi en taki mi ben o du dati. Ma di mi doro drape, a no teki langa fosi mi bigin libi mi owru libi baka.

Wan dei di mi ben de na ini wan strati na ini Londen pe furu sma e waka, mi miti wan Kotoigi di ben e prati den tijdschrift Waktitoren nanga Ontwaakt! gi sma. Fu di mi prakseri baka san mi ben pramisi Annunziato, meki mi aksi a Kotoigi fu studeri Bijbel nanga mi.

Den sani di mi leri fu Bijbel naki mi ati trutru. Fu eksempre, mi ben lobi den wortu fu 1 Yohanes 1:9 di e taki disi fu Gado: „Gado e du ala ten san a e pramisi èn a e du san reti. Sobun, efu wi taki krin san na wi sondu, dan a o gi wi pardon fu den sondu fu wi èn a o krin wi.” A tekst dati ben abi furu krakti na mi tapu, fu di mi ben e tegu gi a fasi fa mi ben e libi. Wantewante mi bigin go na den konmakandra na ini wan Kownukondre zaal fu Yehovah Kotoigi. Den Kotoigi gi mi wan switikon. Mi si fa den sma drape ben de bun mati fu makandra èn disi na wan sani di mi ben wani ala ten. Dati meki mi ben wani tron wan memre fu a gemeente dati di ben de leki wan bigi famiri.

A no ben muilek tumusi gi mi fu tapu nanga drugs èn nanga a yayolibi fu mi. Ma a ben moro muilek fu kenki den fasi fu mi. Mi kon si taki mi ben musu leri fu sori lespeki nanga switifasi gi sma. Fu taki en leti, mi e feti ete nanga wan tu fasi fu mi di no bun. Ma Yehovah yepi mi fu tyari kenki kon safrisafri. Siksi mun baka di mi bigin studeri Bijbel, mi teki dopu èn mi tron wan Yehovah Kotoigi. Dati ben de na ini 1997.

DEN WINI DI MI KISI:

Baka di mi dopu, mi trow nanga wan yongu uma di nen Barbara. En srefi ben tron wan Yehovah Kotoigi no so langa pasa. Di wan fu den owru mati fu mi si fa mi kenki, a bigin studeri Bijbel tu. Bakaten en nanga en sisa tron Kotoigi. Baka dati, mi granmama en sisa, di ben pasa 80 yari kaba, bigin studeri Bijbel tu. A teki dopu fosi a dede.

Now mi e dini leki owruman na ini wan gemeente dyaso. Mi nanga mi wefi e preiki sowan 70 yuru ibri mun. Wi e studeri Bijbel nanga sma na ini Londen di e taki Italiatongo. Son leisi te mi e prakseri a libi di mi ben abi fosi, dan mi e firi brokosaka. Ma Barbara na wan bigi yepi gi mi. Now fosi mi abi a bun osofamiri-libi èn a lobi-ati Papa di mi ben wani abi ala ten. Mi ben aksi Gado fu gi mi wan koloku libi, awinsi wán yari nomo. Ma a gi mi moro leki dati srefi!

Now fosi mi abi a bun osofamiri-libi èn a lobi-ati Papa di mi ben wani abi ala ten

^ paragraaf 10 Luku na artikel „Bijbel e kenki sma libi—Noiti mi ben e waka sondro mi gon”, soleki fa Annunziato Lugarà fruteri na ini A Waktitoren fu 1 yuli 2014, bladzijde 8, 9.