Go na content

Go na a tra menu

Go na table of contents

Yehovah Kotoigi

Sranantongo

A Waktitoren  |  Nr. 1 2016

Yu ben sabi a sani disi?

Yu ben sabi a sani disi?

Fa sma ben e meki bukulolo na ini Bijbel ten èn fa den ben e gebroiki den?

A Bijbel buku Ester di skrifi na ini bukulolo di meki fu metibuba nanga papira. Den bukulolo disi skrifi sowan 1700 yari Baka Krestes

A Bijbel buku Lukas e taki dati Yesus ben opo a bukulolo fu Yesaya, a leisi wan pisi fu en, dan a lolo en tapu baka. Sosrefi na apostel Yohanes ben taki fu wan bukulolo. Na a kaba fu a Bijbel buku Yohanes, a ben taki dati a no ben o man skrifi ala den wondru fu Yesus na ini a bukulolo disi.Lukas 4:16-20; Yohanes 20:30; 21:25.

Fa sma ben e meki bukulolo? Den ben e plak pisi metibuba noso papirus kon na wán, so taki a ben tron leki wan langa pisi papira di den ben e lolo na wan tiki. Na inisei fu a lolo den ben e skrifi na ini syatu rij, sei na sei. Efu a lolo ben langa, den ben e poti wan tiki na ala tu sei. A sma di ben e leisi a bukulolo ben kan gebroiki den tiki disi fu lolo a buku opo nanga wan anu, èn a ben kan lolo en tapu nanga a tra anu teleki a feni a pisi di a ben wani leisi.

Wan Bijbel wortubuku e taki: „Wan bukulolo ben langa nofo fu skrifi wan heri buku na tapu (nofo tron a ben de sowan 10 meter). Te den ben lolo en tapu, dan a no ben bigi tumusi fu tyari” (The Anchor Bible Dictionary). Sma e denki taki wan bukulolo fu sowan 9.5 meter ben o de fanowdu gi a buku Lukas. Son leisi den ben e koti a tapusei lanki nanga na ondrosei lanki fu a bukulolo, dan den ben meki en kon grati nanga wan sortu ston. Baka dati den ben e kloru en.

Suma ben de den „edeman fu den priester” di den Kresten Griki buku fu Bijbel e taki fu den?

Na a bigin, di a priestergrupu fu Israel ben seti, wán man nomo ben e wroko leki granpriester en heri libi langa (Numeri 35:25). Aron ben de a fosi granpriester. Te a granpriester ben dede, dan a moro owru manpikin ben e teki a presi fu en (Eksodes 29:9). Furu fu den mansma di ben de bakapikin fu Aron ben wroko leki priester, ma wan tu nomo tron granpriester.

Di Israel kon na ondro a makti fu wan tra kondre, dan den tiriman di no ben de Israelsma ben e bosroiti suma den ben o poti leki Dyu granpriester èn suma den ben o puru. Ma soleki fa a sori, dan nofo tron den ben e meki sma fu wan tu heihei famiri nomo tron granpriester. Furu fu den granpriester disi ben de fu a famiri fu Aron. Soleki fa a sori, dan a wortu „edeman fu den priester” abi fu du nanga den moro prenspari sma fu a priester famiri. A kan taki sonwan fu den edeman fu den priester ben de edeman fu den 24 priestergrupu. Kande sonwan fu den ben de prenspari memre fu den famiri pe den granpriester ben komoto. A kan tu taki sonwan fu den ben de granpriester fosi, soleki Anas.1 Kroniki 24:1-19; Mateyus 2:4; Markus 8:31; Tori fu den apostel 4:6.