Go na content

Go na a tra menu

Go na table of contents

Yehovah Kotoigi

Sranantongo

Studie-Waktitoren  |  november 2016

Wi orga leki fa Gado Wortu e taki

Wi orga leki fa Gado Wortu e taki

„Na Yehovah seti a fondamenti fu grontapu nanga koni. Nanga a koni fu man si sani krin, a seti hemel na so wan fasi, taki a no man seki.”ODO 3:19.

SINGI: 105, 107

1, 2. (a) San son sma e taki te den yere taki Gado abi wan organisâsi? (b) San wi o go luku na ini na artikel disi?

GADO abi wan organisâsi? Kande son sma e taki: „Yu no abi wan organisâsi fanowdu fu tiri yu. Solanga yu nanga Gado na mati, dan a bun kaba.” A denki disi bun? Fa sani de trutru?

2 Na ini na artikel disi wi o luku fu san ede wi kan taki dati Yehovah na wan Gado di man orga sani heri bun èn di no lobi te sani bruya. Wi o luku tu fa wi musu si den rai di Yehovah en organisâsi e gi wi (1 Kor. 14:33, 40). Na ini a ten fu den fosi Kresten èn na ini a ten fu wi, wi e si fa Bijbel yepi a pisi fu Yehovah en organisâsi di de na grontapu fu preiki a bun nyunsu na ala sei. Fu di wi e du san Bijbel e taki èn wi e teki den rai fu Gado organisâsi, meki a gemeente e tan krin èn freide nanga wánfasi de na mindri Gado pipel.

YEHOVAH NA A GADO DI MAN ORGA SANI HERI BUN

3. Fu san ede yu e bribi taki Yehovah na a Gado di man orga sani heri bun?

3 Te wi e luku den sani na hemel nanga grontapu, dan wi e si taki Yehovah na wan Gado di man orga sani heri bun. Bijbel  e taki: „Na Yehovah seti a fondamenti fu grontapu nanga koni. Nanga a koni fu man si sani krin, a seti hemel na so wan fasi, taki a no man seki” (Odo 3:19). Wi sabi ’soso wan tu sani nomo di Gado du’. Den sani di a du furu so te taki wi no man sabi den alamala (Yob 26:14). Toku a pikinso di wi sabi fu den planeiti, den stari nanga den starisistema, nofo kaba fu man si taki den sani disi orga heri bun (Ps. 8:3, 4). Den starisistema abi milyunmilyun stari èn nowan fu den e boks nanga makandra. Den planeiti krosibei fu grontapu e drai lontu a son na wan orga fasi, neleki na wan sma e taigi den fa den musu drai. Iya, a kefalek moi fasi fa stari nanga planeiti orga, e yepi wi fu si taki Yehovah „meki hemel [nanga grontapu] nanga koni”. Fu dati ede wi musu prèise en, wi musu gi yesi na en èn wi musu anbegi en.Ps. 136:1, 5-9.

4. Fu san ede sabiman no man piki furu prenspari aksi?

4 Sabiman kon sabi furu fu den stari, den planeiti nanga a grontapu fu wi èn disi tyari furu wini kon gi wi. Ma wan lo aksi de di sabiman no man piki. Fu eksempre, den sabiman di e ondrosuku den stari, no man taki soifri fa den stari nanga den planeiti kon de noso fu san ede libi de na grontapu. Furu sma no man taki tu fu san ede libisma e angri fu libi fu têgo (Preik. 3:11). Fu san ede so furu prenspari aksi de di sma no man piki? Wan reide na taki sabiman nanga tra sma e leri trawan taki Gado no de èn taki na evolutie tru. Ma na ini Bijbel, a Wortu fu Yehovah, wi kan feni piki tapu ala den aksi di muilek gi libisma.

5. Fu san ede wi e frutrow den wet di Gado meki gi grontapu?

5 Fu di den wet di Yehovah meki gi grontapu nanga den tra planeiti no e kenki, meki wi kan frutrow den wet disi. Furu sma, soleki elektroman, bowman, datra, temreman, noso piloot, kan gebroiki den wet disi fu du a wroko fu den. Fu eksempre, te datra o koti wan sma, den sabi taki den no abi fu suku pe a sma ati de fu di nofo tron ala libisma skin meki na a srefi fasi. Boiti dati, wi alamala e lespeki den wet di Gado seti gi grontapu. Dati meki nowan fu wi ben o dyompo komoto fu wan hei presi, fu di wi sabi taki wi o fadon kon na gron èn wi kan dede.

GADO ORGA EN PIPEL BUN

6. Fu san ede wi kan fruwakti taki den anbegiman fu Yehovah orga bun?

6 Soleki fa wi si, dan den stari nanga den planeiti orga heri bun. Sobun, wi kan fruwakti tu taki Yehovah wani taki den anbegiman fu en orga bun. Na fu dati ede a gi wi a Wortu fu en fu tiri wi. Efu wi no ben abi Gado en organisâsi nanga den wet fu en, wi no ben o de koloku srefisrefi.

7. San e sori taki Bijbel na wan buku di seti bun?

7 Son sabiman e taki dati na wan tu buku fu den Dyu nanga den Kresten, sma tyari kon na wán, dan den kari en „Bijbel”. Ma dati no de so. Bijbel na wan buku di seti bun, fu di na Gado meki sma skrifi en. Ibriwan fu den buku na ini Bijbel abi fu du nanga makandra. Bigin fu Genesis te go miti Openbaring, wi e si fa Bijbel e taki fu a wán prenspari sani disi: Yehovah o gebroiki a Kownukondre fu sori taki na en abi a reti fu tiri èn fu du san a abi na prakseri gi grontapu. Wi sabi taki na Yesus, a „pikin” di Gado ben pramisi, na Kownu fu a Kownukondre disi.Leisi Genesis 3:15; Mateyus 6:10; Openbaring 11:15.

8. Fu san ede wi kan taki dati den Israelsma ben orga bun?

 8 Den Israelsma na wan moi eksempre fu wan pipel di ben orga bun, fu di den ben e du san a Wet fu Moses taki. Fu eksempre, yu ben abi uma „di ben e wroko na a mofodoro fu a konmakandra-tenti” èn den ben orga bun (Eks. 38:8). Te den Israelsma ben musu hari go na wan tra presi èn den ben musu tyari a tabernakel gowe, dan disi no ben e pasa bruyabruya. Bakaten, Kownu David ben orga den Leifisma nanga den priester na ini grupu di ben sabi du a wroko fu den (1 Kron. 23:1-6; 24:1-3). Boiti dati, te den Israelsma ben e gi yesi na Yehovah, dan a ben e sorgu taki sani no ben e go bruyabruya èn taki freide nanga wánfasi de.Deut. 11:26, 27; 28:1-14.

9. Fa wi du sabi taki den fosi Kresten ben orga bun?

9 Den fosi Kresten ben orga bun tu èn den ben e kisi furu wini fu a rai fu den apostel di ben de a tiri skin (Tori 6:1-6). Bakaten tra brada tron wan memre fu a tiri skin disi tu (Tori 15:6). Yehovah ben meki sonwan fu den brada disi nanga tra brada di ben e wroko makandra nanga den, skrifi brifi di den ben e seni go na den gemeente fu gi den rai nanga leri (1 Tim. 3:1-13; Tit. 1:5-9). Sortu wini den gemeente ben e kisi te den ben teki a rai fu a tiri skin?

10. San ben de a bakapisi te den gemeente na ini a ten fu den apostel ben e teki a rai fu a tiri skin? (Luku a prenki na a bigin fu na artikel.)

10 Leisi Tori fu den apostel 16:4, 5. Brada di ben e go luku den gemeente, ben e fruteri den „sortu bosroiti den apostel nanga den owru man na ini Yerusalem ben teki”. Te den gemeente ben e du san a tiri skin taki, dan dati ben e „tranga a bribi fu a gemeente trutru èn dei fu dei moro nanga moro sma ben e tron bribiman”. San wi di de na ini Yehovah organisâsi kan leri fu a Bijbel tori disi?

YU E TEKI A TIRI FU GADO ORGANISÂSI?

11. San brada di abi frantwortu musu du te den e kisi rai fu Gado organisâsi?

11 San den brada fu wan Bijkantoro Komte noso wan Kondre Komte, den kring-opziener nanga den gemeente owruman musu du te den e kisi rai fu Gado organisâsi na ini a ten disi? Bijbel, a buku di Yehovah gi wi, e leri wi taki wi alamala musu gi yesi na den wan di e teki fesi èn wi musu saka wisrefi na den ondro (Deut. 30:16; Hebr. 13:7, 17). Presi no de na ini Gado organisâsi gi sma di abi a gwenti fu krutukrutu noso di no wani arki, fu di disi ben o pori a freide nanga a wánfasi na ini den gemeente. Nowan reti-ati futuboi fu Gado wani de leki Diotrefes di no ben e sori lespeki gi den brada di e teki fesi. (Leisi 3 Yohanes 9, 10.) Sobun, wi kan aksi wisrefi: ’Mi e gi trawan deki-ati fu gi yesi na Yehovah? Mi de gaw fu teki a rai fu den brada di e teki fesi èn fu horibaka gi den?’

12. Sortu kenki kon na ini a fasi fa brada e kisi a frantwortu fu dini leki owruman noso dinari?

12 Luku wan kenki di a Tiri Skin tyari kon no so langa pasa. A Waktitoren fu 15 november 2014, ben taki na ini „Aksi fu leisiman” fu wan kenki di kon na ini a fasi fa brada e kisi a frantwortu fu dini leki owruman noso dinari. Na artikel ben sori taki a tiri skin na a ten fu den apostel ben e gi brada di ben e go luku den gemeente, a frantwortu fu poti brada leki owruman noso dinari. Fu dati ede, sensi 1 september 2014, na den kring-opziener abi a frantwortu fu poti brada di kan dini leki owruman noso dinari. A kring-opziener  e pruberi fu leri sabi den brada di den owruman feni bun fu kisi a frantwortu disi èn efu a kan, a e wroko makandra nanga den na ini a preikiwroko. A e luku tu fa na osofamiri fu a brada e tyari ensrefi (1 Tim. 3:4, 5). Baka dati den owruman fu a gemeente nanga a kring-opziener e sidon makandra fu luku den Bijbeltekst di e sori san de fanowdu gi wan brada di wani tron dinari noso owruman.1 Tim. 3:1-10, 12, 13; 1 Petr. 5:1-3.

13. Fa wi kan sori taki wi e teki a rai fu den owruman èn taki wi e horibaka gi den?

13 Wi musu teki den Bijbel rai di wi e kisi fu den owruman. Den brada disi e meki a „soifri leri” di de fu feni na ini Gado Buku tiri den (1 Tim. 6:3). Luku sortu rai Paulus gi den gemeente fu sori den fa den ben musu taki nanga sma di no ben e tyari densrefi na wan fasi di fiti. Sonwan fu den sma disi ’no ben e wroko, ma den ben e bumui nanga tra sma tori’. Kande den owruman ben gi den rai, ma den no ben wani teki a rai disi. San a gemeente ben musu du nanga so wan sma? Paulus ben taki: „Luku bun nanga en. No bumui nanga en moro.” Ma a ben taigi den tu taki den no ben musu si so wan sma leki wan feanti (2 Tes. 3:11-15). Na ini a ten disi den owruman kan bosroiti fu hori wan lezing te wan sma e tan du wan sani di no bun èn di kan pori a gemeente. Kande a e hori nanga wan sma di no de wan Kotoigi (1 Kor. 7:39). San yu e du te den owruman feni en fanowdu fu hori wan lezing fu den sortu tori disi? Te yu sabi taki wan sma na ini a gemeente e du wan sani di den owruman taki fu en, yu o tan bumui nanga so wan sma ete? Te yu no e bumui moro nanga a sma, dan yu e sori taki yu lobi en èn taki yu wani a kenki. [1]

SORGU TAKI A GEMEENTE TAN KRIN ÈN TAKI FREIDE NANGA WÁNFASI DE

14. Fa wi kan sorgu taki a gemeente tan krin?

14 Te wi e teki den rai fu Gado Wortu, dan wi kan sorgu taki a gemeente tan krin. Luku wan eksempre. Paulus ben preiki fayafaya na ini a foto Korente èn a ben lobi den salfu brada fu en drape (1 Kor. 1:1, 2). Ma a kon yere taki wan sma na ini a gemeente ben e libi wan hurulibi èn a gemeente no ben du noti. Wi kan frustan taki Paulus sari di a yere a tori disi. Dati meki a taigi den owruman fu libi a sma dati gi Satan. Sobun, den ben musu puru en fu a gemeente, so taki a gemeente tan krin (1 Kor. 5:1, 5-7, 12). Te den owruman puru wan sma fu a gemeente fu di a no wani sori berow, dan wi musu horibaka gi a bosroiti di den teki. Na so wi e sorgu taki a gemeente tan krin èn kande dati o yepi a sma fu sori berow èn fu aksi Yehovah fu a gi en pardon.

15. Fa wi kan sorgu taki freide de na ini a gemeente?

15 Ma ete wan problema ben de na ini a gemeente fu Korente. Son Kresten ben e tyari den brada fu den go na fesi krutu. Paulus aksi den: „Fu san ede unu no e libi a trawan fu du kruktu sani nanga unu?” (1 Kor. 6:1-8) Den sortu sani disi e pasa tu na ini a ten disi. Son leisi brada di e du bisnis nanga makandra e kisi trobi fu di wan fu den lasi moni noso a feni taki a trawan bedrigi en. Son leisi a e pasa srefi taki a wan e tyari a trawan go na krutu. Ma Bijbel e sori taki a moro bun fu lasi moni, leki fu gi Gado porinen noso fu pori a freide na ini a gemeente. [2] Fu taki en leti, a rai fu Yesus e sori fa wi kan lusu trobi nanga seryusu problema. (Leisi Mateyus 5:23, 24; 18:15-17.) Te wi e du dati, dan wi e sorgu taki freide de na mindri den anbegiman fu Yehovah.

16. Fu san ede wi kan fruwakti taki Gado pipel orga bun?

16 A Wortu fu Yehovah e sori fu san  ede wi kan fruwakti taki en pipel orga bun. A psalm skrifiman ben singi: „Luku o bun èn o switi a de te brada e libi makandra leki wán famiri!” (Ps. 133:1) Te den Israelsma ben e arki Yehovah, dan a ben e orga den bun èn den ben abi wánfasi. Luku san Gado ben taki fu a pipel fu en: „Mi o meki den de wán leki wan ipi skapu na ini wan pen” (Mika 2:12). Boiti dati, na ini wan profeititori Yehovah ben meki Sefanya taki: „Mi o leri den pipel wan soifri tongo, so taki den alamala kan kari a nen fu Yehovah èn dini en makandra leki wán man” (Sef. 3:9). Wi breiti taki wi abi a grani fu dini Yehovah leki wán man!

Owruman e pruberi fu yepi wan sma di meki wan fowtu (Luku paragraaf 17)

17. San den owruman musu du efu den wani taki wánfasi de na ini a gemeente èn taki a tan krin?

17 Efu den owruman wani taki wánfasi de na ini a gemeente èn taki a tan krin, dan den no musu draidrai fu piri-ai gi wan sma na wan lobi-ati fasi te a du wan seryusu sondu. Paulus ben sabi taki aladi Gado lobi wi, toku a no e tapu en ai gi ogri di sma e du (Odo 15:3). Dati meki di Paulus skrifi en fosi brifi gi den brada nanga sisa na Korente, a no ben frede fu piri-ai gi den, aladi a du dati na wan lobi-ati fasi. A di fu tu brifi di a skrifi gi den, wan tu mun baka dati, e sori taki sani ben e go moro bun na ini a gemeente fu di den owruman ben teki a rai fu Paulus. Efu wan Kresten meki wan fowtu sondro fu a sabi, dan den owruman musu pruberi na wan safri-ati fasi fu tyari so wan sma kon na tapu a reti pasi baka.Gal. 6:1.

18. (a) Fa den rai fu Gado Wortu ben yepi den fosi Kresten? (b) San wi o go luku na ini a tra artikel?

18 Soleki fa wi si, dan den rai fu Gado Buku yepi den fosi Kresten na Korente èn na tra presi fu hori a gemeente krin èn fu sorgu taki freide nanga wánfasi de (1 Kor. 1:10; Ef. 4:11-13; 1 Petr. 3:8). Disi meki taki den brada nanga sisa fu wi na a ten dati ben man du furu. Fu taki en leti, Paulus taki dati a bun nyunsu ben „preiki gi ala sma na grontapu” (Kol. 1:23). Na ini a ten disi, Gado pipel orga bun tu fu du a preikiwroko leki wán man èn dati meki den man fruteri sma na heri grontapu sortu moi sani Gado o du na ini a ten di e kon. Na ini a tra artikel, wi o si taki Gado pipel abi furu lespeki gi Bijbel èn taki den e du ala san den man fu gi grani na Yehovah, a Moro Hei Masra.Ps. 71:15, 16.

^ [1] (paragraaf 13) Luku Wi orga fu du a wani fu Yehovah, blz. 134-136.

^ [2] (paragraaf 15) Efu yu wani sabi na ini sortu situwâsi wan Kresten kan bosroiti fu tyari wan tra Kresten go na fesi krutu, dan luku a fosi futuwortu tapu blz. 254 fu a buku Meki Gado tan lobi yu.