Go na content

Go na a tra menu

Go na table of contents

Yehovah Kotoigi

Sranantongo

Studie-Waktitoren  |  november 2016

„Na wan bigi wroko”

„Na wan bigi wroko”

A TEN doro fu hori wan prenspari konmakandra na Yerusalem. Kownu David kari ala den edeman fu den lo, den sma di e wroko na kownu-oso nanga den legre-edeman fu en kon na wán. Den breiti srefisrefi te den e yere sortu moi sani David e meki bekènti. Yehovah taigi Salomo, a manpikin fu David, fu bow wan moi oso pe sma ben o anbegi a tru Gado. Gado ben taigi David fa na oso musu bow èn na owru kownu disi fu Israel e fruteri Salomo san Gado wani. David e taki: „Na wan bigi wroko, bika na oso no de gi libisma, ma gi Yehovah Gado.”1 Kron. 28:1, 2, 6, 11, 12; 29:1.

Baka dati David e poti na aksi disi: „Suma fu unu wani gi Yehovah wan presenti tu?” (1 Kron. 29:5) Efu yu ben drape, dan san yu ben o piki? Yu ben o wani horibaka gi a bigi wroko disi? Wantewante den Israelsma opo du wan sani. Den ben e prisiri, fu di den ben man tyari presenti kon gi Yehovah nanga den heri ati.1 Kron. 29:9.

Hondrohondro yari baka dati, Yehovah seti wan moro bigi sani leki a tempel. A seti wan agersi tempel. Disi e meki taki libisma kan anbegi en nanga yepi fu Yesus ofrandi (Hebr. 9:11, 12). Fa Yehovah e yepi en pipel fu kon bun baka nanga en na ini a ten disi? A e du dati nanga yepi fu a wroko di sma e du fu meki disipel (Mat. 28:19, 20). Dati meki ibri yari milyunmilyun Bijbelstudie e hori, dusundusun sma e teki dopu èn hondrohondro nyun gemeente e seti.

Sobun, moro buku musu druk èn moro Kownukondre zaal musu bow èn ondrow. Boiti dati, moro presi de fanowdu fu hori kring konmakandra nanga kongres. Yu no feni taki a wroko fu preiki a bun nyunsu na wan moi sani di e meki wi firi koloku?Mat. 24:14.

Fu di Gado pipel lobi Yehovah nanga tra sma èn fu di den sabi o prenspari a Kownukondre preikiwroko de, meki den e gi moni leki ’wan presenti gi Yehovah’. Wi breiti fu „gi Yehovah grani nanga den gudu di [wi] abi”. Wi breiti tu te wi e si fa den brada e gebroiki a moni dati na wan koni fasi so taki wi man du a moro bigi wroko di oiti du dyaso na grontapu!Odo 3:9.