Go na content

Go na a tra menu

Go na table of contents

Yehovah Kotoigi

Sranantongo

Studie-Waktitoren  |  november 2015

Sori taki yu e warderi en taki Yehovah e gi wi so furu sani

Sori taki yu e warderi en taki Yehovah e gi wi so furu sani

YEHOVAH na wan Gado di lobi gi sma sani (Yak. 1:17). Ala den stari di de na hemel nanga a grasi di e tapu a doti fu grontapu e sori taki Yehovah lobi gi wi sani. Na wan agersi fasi a de neleki ala den sani di a meki e singi fu prèise en fu di a lobi gi sani.Ps. 65:12, 13; 147:7, 8; 148:3, 4.

A psalm skrifiman ben warderi en Mekiman Yehovah so te taki a skrifi wan singi fu prèise en fu den wroko fu en. Leisi Psalm 104 èn luku efu yu no e denki a srefi leki en. A ben taki: „Mi heri libi langa mi o singi gi Yehovah. Solanga mi de na libi, mi o singi prèisesingi gi a Gado fu mi” (Ps. 104:33). A no dati yu wani du tu?

A MORO BUN EKSEMPRE FU WAN SMA DI LOBI GI TRAWAN SANI

Yehovah wani taki wi musu de sma di lobi gi trawan sani, neleki en. A e sori wi tu fu san ede a bun taki wi abi a fasi dati. Luku san a meki na apostel Paulus skrifi: „Taigi den sma di gudu na ini a grontapu disi taki den no musu abi bigifasi èn taki den no musu frutrow na tapu gudu di kan lasi gowe, ma na tapu Gado. Ala sani di e gi wi prisiri, a e gi wi bogobogo. Taigi den taki den musu du bun, iya, den musu du furu bun sani, den musu lobi fu gi sma sani èn den musu de klariklari fu prati san den abi nanga trawan. Dan den o seti wan bun fondamenti gi a tamara. A o de neleki wan gudu di den kibri gi densrefi. Na so fasi den kan grabu a trutru libi hori bun steifi.”1 Tim. 6:17-19.

Di Paulus skrifi a di fu tu brifi fu en gi a gemeente na Korente, a sori fa wi musu denki fu a tori disi. Paulus taki: „Meki ibri sma gi soleki fa a bosroiti na ini en ati. A no musu du dati nanga krutukrutu noso fu di sma dwengi en, bika Gado lobi a sma di e gi sani nanga prisiri” (2 Kor. 9:7). Baka dati, Paulus taki suma na den sma di e kisi wini te wi lobi gi sma sani. A sori taki den wan di e kisi yepi e kisi wini, ma den wan di e gi a yepi e kisi blesi fu Yehovah tu.2 Kor. 9:11-14.

Na a kaba fu kapitel aiti nanga neigi fu a brifi fu en Paulus e taki fu a moro bigi buweisi di wi abi taki Yehovah lobi fu gi sma sani. A skrifi: „Tangi fu Gado taki a gi wi wan kado di bigi pasa marki” (2 Kor. 9:15). A no de fu taki dati a kado disi abi fu du tu nanga ala den bun sani di Yehovah du gi en pipel nanga yepi fu Yesus Krestes. A kado disi bigi so te taki wortu no de di kan fruteri o warti a de gi wi.

Fa wi kan sori taki wi e warderi ala den sani di Yehovah nanga en Manpikin du gi wi? Èn fa wi kan sori warderi gi den sani di den o du gi wi ete? Wan fasi fa wi kan du dati na te wi e gi wi ten, wi krakti, nanga den gudu fu wi fu meki a tru anbegi fu Yehovah go na fesi. A no abi trobi o furu wi man gi, solanga wi e gi ala san wi man.1 Kron. 22:14; 29:3-5; Luk. 21:1-4