Go na content

Go na a tra menu

Go na table of contents

Yehovah Kotoigi

Sranantongo

Studie-Waktitoren  |  oktober 2015

Yu e si san Gado e du gi yu?

Yu e si san Gado e du gi yu?

„Den futuboi fu Yehovah o si san a o du gi den.”YES. 66:14.

SINGI: 65, 26

1, 2. San son sma e denki fu Gado?

FURU sma e denki taki Gado no e span nanga san den e du. Son sma e denki srefi taki Gado no e broko en ede nanga san e pasa nanga libisma. Baka di a bigi draiwinti Haiyan pori wan heri kontren na mindrisei fu den Filippijnen-èilanti na ini november 2013, a komsarsi fu wan bigi foto taki: „A musu fu de taki Gado ben de na wan tra presi.”

2 Tra sma e denki taki Gado no man si san den e du (Yes. 26:10, 11; 3 Yoh. 11). Den de leki den sma di na apostel Paulus ben taki fu den. A taki: „Den no ben wani kon sabi Gado finifini.” Den sortu sma disi ben e ’du wan lo kruktudu nanga ogridu. Den ben abi bigi-ai èn den ben e du takrudu’.Rom. 1:28, 29.

3. Sortu aksi di abi fu du nanga Gado wi wani poti gi wisrefi?

3 Fa a de nanga wi? Wi no de leki den sma di Paulus ben taki fu den, fu di wi sabi taki Yehovah e si ala san wi e du. Ma wi man si tu taki a e broko en ede nanga wi èn taki a e yepi wi? Wi na wan fu den sma di e „si Gado” leki fa Yesus taki? (Mat. 5:8) We, meki wi go luku wan tu eksempre fu sma na ini Bijbel di si san  Gado du gi den èn fu trawan di ben weigri fu si dati. Disi o yepi wi fu kon sabi san a wani taki fu „si Gado”. Baka dati wi o leri fa wi srefi kan si krin san Gado e du gi wi. Te wi o luku den sani disi, dan hori na prakseri fa Gado e gebroiki en makti fu yepi den futuboi fu en èn fu feti nanga den feanti fu en.Leisi Deuteronomium 26:8.

DEN BEN WEIGRI FU SI A KRAKTI FU GADO

4. Fu san ede wi kan taki dati den feanti fu Israel ben weigri fu si taki na Gado ben e yepi en pipel?

4 Na ini Israel fu owruten, sma ben abi na okasi fu si èn fu yere fa Gado gebroiki en makti fu yepi a pipel fu en. Yehovah du wondru fu fri en pipel komoto na ini Egepte èn fu wini furu fu den kownu fu a Pramisi Kondre (Yos. 9:3, 9, 10). Aladi furu fu den kownu na west-sei fu Yordan-liba yere èn si san Gado du gi a pipel fu en, toku „den alamala span anu makandra fu go feti nanga Yosua èn nanga den Israelsma” (Yos. 9:1, 2). Srefi baka di den kownu disi bigin feti nanga Gado pipel, den kisi furu okasi fu si taki Gado ben e yepi den Israelsma. Na Yehovah ben taigi „a son [fu] tan leti drape pe a ben de èn a mun [fu] no dribi, teleki a pipel fu Israel wini ala den feanti fu den” (Yos. 10:13). Ma ’Yehovah gi pasi taki den sma fu den foto dati kon tranga-ede, so taki den ben wani feti nanga den Israelsma’ (Yos. 11:20). Den feanti fu Israel ben weigri fu si taki Gado ben e feti gi a pipel fu en èn taki na en ben meki den lasi a strei.

5. San na ogri Kownu Akab ben weigri fu bribi?

5 Bakaten, na ogri Kownu Akab ben kisi furu okasi fu si fa Gado e gebroiki en krakti. Wan leisi Elia taigi en: „Nowan dow noso alen o fadon, boiti te mi e taki so!” (1 Kow. 17:1) Aladi a ben de krin taki na Yehovah ben taki a sani disi, toku Akab ben weigri fu bribi. Wan tra leisi Elia begi taki faya komoto na hemel fu bron na ofrandi fu en èn Akab si fa a faya komoto na hemel. Baka dati Elia sori en taki na Yehovah ben o tyari wan kaba kon na a dreiten. A taigi Akab: „Saka komoto fu a bergi esi-esi, so taki na alen no wasi yu gowe!” (1 Kow. 18:22-45) Ala den sani disi Akab si, ma toku a weigri fu bribi taki na Gado ben sori a makti fu en na a bigi fasi disi. Na eksempre disi nanga den wan di wi taki fu en kaba e leri wi wan prenspari sani. Te Yehovah e du wan sani gi wi, dan wi musu man si taki na en e yepi wi.

DEN SI SAN YEHOVAH DU GI DEN

6, 7. San son sma na ini Yosua ten ben man si krin?

6 Ma yu ben abi tra sma tu di no ben de leki den ogri kownu disi, aladi den ben de na ini a srefi situwâsi. Den ben man si san Gado du fu yepi en pipel. Teki na eksempre fu den Gibeonsma. Na ini a ten fu Yosua, furu fu den pipel na ini a kondre Kanan ben e feti nanga a pipel fu Gado. Ma den Gibeonsma suku fu meki freide nanga den Israelsma. Fu san ede? Den taki: „Wi na futuboi fu yu. . . . Wi yere fa sma e taki fu a nen fu Yehovah yu Gado èn wi yere ala sani di a du” (Yos. 9:3, 9, 10). A ben de wan koni sani taki den ben man si taki na Yehovah ben e horibaka gi Israel.

7 Rakab srefi si fa Gado gebroiki a makti fu en. Baka di a yere fa Yehovah frulusu en pipel, a taigi den tu spion fu Israel: „Mi sabi taki Yehovah o gi unu a kondre disi.” Aladi Rakab ben kan lasi en libi te a ben o teki a bosroiti fu teki Gado sei, toku a sori taki a ben e bribi taki Yehovah ben o man frulusu en nanga en osofamiri.Yos. 2:9-13; 4:23, 24.

8. Fa son Israelsma kon si taki na Gado gebroiki en makti fu yepi en pipel?

 8 Soleki fa wi si, dan na ogri Kownu Akab ben weigri fu bribi taki na Yehovah ben meki faya komoto na hemel di Elia ben begi fu dati. Ma son Israelsma ben e bribi taki na Gado ben du dati. Di den si taki a faya di ben komoto fu Yehovah bron na ofrandi, den bari taki: „Yehovah na a tru Gado!” (1 Kow. 18:39) A sani di den si ben de wan buweisi gi den taki na Gado ben e gebroiki en makti na a fasi dati.

9. Fa wi na ini a ten disi kan si Yehovah èn a fasi fa a e gebroiki en makti?

9 Wi si bun eksempre nanga takru eksempre di kan yepi wi fu frustan san a wani taki fu si Gado èn fa a e gebroiki en makti fu yepi sma. Te wi e kon sabi Yehovah èn den fasi fu en, dan disi e ’opo wi ati, so taki wi kan si’ san a e du gi wi (Ef. 1:18). Iya, wi wani de leki den sma fu owruten nanga den wan fu a ten disi di si krin taki Yehovah e horibaka gi en pipel. Ma wi abi buweisi taki Gado e yepi sma na ini a ten disi?

BUWEISI TAKI GADO E YEPI SMA NA INI A TEN DISI

10. Sortu buweisi wi abi taki Yehovah e yepi sma na ini a ten disi? (Luku a prenki na a bigin fu na artikel.)

10 Wi abi nofo buweisi di e sori taki Yehovah e yepi sma te now ete. Someni leisi wi yere fu ondrofenitori di e sori fa sma begi Gado fu yepi den èn san a du gi den (Ps. 53:2). Fu eksempre, wan dei Allan ben e preiki oso-fu-oso na wan pikin èilanti na den Filippijnen. Di a fruteri wan uma taki en na wan Yehovah Kotoigi na uma bigin krei. Allan e fruteri: „A mamanten dati na uma begi Yehovah fu meki den Kotoigi feni en. Di a ben yongu, a ben studeri Bijbel nanga den Kotoigi. Ma di a trow èn a froisi go na a èilanti dati, a no miti nanga den moro. Gado piki a begi fu en so esi, taki disi naki en ati.” Na ini wán yari, a gi en libi abra na Yehovah.

Yu man si krin na sortu fasi Yehovah e yepi en pipel na ini a ten disi? (Luku paragraaf 11-13)

11, 12. (a) Na sortu fasi Yehovah e yepi den futuboi fu en? (b) Fruteri wan ondrofenitori fu wan sisa di ben kisi yepi fu Gado.

11 Furu futuboi fu Gado si krin fa a yepi den fu tapu nanga takru gwenti soleki smoko, gebroiki drugs noso luku porno. Son sma e taki dati fosi den tron wan Kotoigi, den ben pruberi omeni leisi kaba fu tapu, ma den no ben man. Ma di den suku yepi na Yehovah, a gi den „a krakti di bigi pasa marki”. Te fu kaba, den ben man tapu nanga den takru gwenti fu den.2 Kor. 4:7; Ps. 37:23, 24.

12 Yehovah yepi furu futuboi fu en di ben de na ini muilek situwâsi. Teki Amy fu eksempre. A ben kisi a grani fu go yepi bow wan Kownukondre zaal nanga wan zendeling-oso na wan pikin èilanti fu a Stille Oceaan. A taki: „Wi ben tan na ini wan pikin hotel èn ibri dei te wi ben e go na a presi pe den ben e bow, wi ben e waka na ini strati di ben sungu.” Wan tra sani na taki Amy ben musu gwenti a kulturu fu den sma drape èn nofo tron watra nanga stroom no ben de. A e taki: „San meki en moro erg, na taki mi bari wan fu den sisa di ben e wroko makandra nanga wi. Di mi go na oso, mi ben abi a firi taki noti mi no man du bun. Na ini a dungru fu mi hotel kamra, mi taigi Yehovah ala san ben de na tapu mi ati èn mi aksi en fu a yepi mi.” Di stroom kon baka, Amy teki wan Waktitoren. Na ini a tijdschrift disi wan artikel ben de di ben taki fu a programa di e hori te den studenti klari a Gileadskoro. Na artikel ben e taki fu ala den sani di ben de wan hebi gi Amy, soleki wan tra kulturu, a misi di a ben e misi en famiri nanga en mati èn taki a ben musu kon gwenti nyun sma. Amy taki: „A neti dati a  ben de gi mi leki na Yehovah ben e taki nanga mi. Na artikel gi mi deki-ati fu go doro nanga a wroko di mi ben kisi fu du.”Ps. 44:25, 26; Yes. 41:10, 13.

13. Sortu buweisi wi abi taki Yehovah yepi en pipel fu opo taki gi a reti di den abi fu preiki?

13 Wan tra sani di e sori taki Yehovah de nanga en pipel na taki a yepi den fu man ’opo taki gi a bun nyunsu èn fu du ala san den man fu meki lanti gi den a reti fu preiki’ (Fil. 1:7). Son kondre pruberi fu tapu a wroko fu Gado pipel. Ma Yehovah Kotoigi wini sowan 268 krutu-afersi. Tutenti na fo fu den na krutu-afersi di den wini sensi a yari 2000, na a Krutubangi fu Europa di e feti gi den reti fu libisma. Disi e sori wi krin taki nowan sma man tapu Gado fu du san a abi na prakseri.Yes. 54:17; leisi Yesaya 59:1.

14. Sortu tra buweisi wi abi taki Gado e yepi en pipel?

14 A bun nyunsu di e preiki na heri grontapu e buweisi taki na Gado e yepi wi (Mat. 24:14; Tori 1:8). Wan tra sani di e sori taki Yehovah e yepi en pipel na ini a ten disi na a wánfasi fu den di de fu si na heri grontapu. Den sma fu grontapu no man abi a wánfasi disi. Dati meki wi kan frustan fu san ede den e taki: „Gado de trutru na un mindri” (1 Kor. 14:25). Sobun, wi abi nofo buweisi taki Gado de nanga en pipel èn taki a e yepi den. (Leisi Yesaya 66:14.) Ma fa a de nanga yu? Yu man si krin san Yehovah e du gi yu?

YU E SI SAN YEHOVAH E DU GI YU?

15. Fruklari fu san ede a kan pasa son leisi taki wi no man si krin fa Yehovah e yepi wi.

15 Fa a du kon taki son leisi wi no man si krin fa Gado e yepi wi? Te wi abi furu problema, wi kan frigiti taki Yehovah yepi wi omeni leisi kaba. Di na umakownu Iseibel taigi a profeiti Elia taki a o kiri en, dan srefi Elia frigiti taki Gado ben yepi en kaba. Bijbel e taki fu Elia: „A aksi Gado fu dede” (1 Kow. 19:1-4). San ben o yepi Elia? A ben musu suku yepi na Yehovah fu kisi deki-ati.1 Kow. 19:14-18.

16. San wi kan du fu si Gado leki fa Yob ben e si en?

 16 Yob ben poti so furu prakseri na en eigi problema taki a frigiti fu si sani leki fa Gado e si den (Yob 42:3-6). Neleki Yob, wi srefi musu meki moro muiti fu si Gado. San kan yepi wi fu si san Gado e du gi wi? Wi musu denki dipi fu san Bijbel e taki. Disi o yepi wi fu si fu san ede wi e kisi problema èn san na a lusu. Te wi e frustan fa Yehovah e yepi wi, dan moro nanga moro a o tron wan trutru sma gi wi. Dan neleki Yob wi o taki: „Mi ben yere fu yu, ma now mi eigi ai e si yu.”

Yehovah e gebroiki yu fu yepi trawan fu si en? (Luku paragraaf 17, 18)

17, 18. (a) Na sortu fasi wi man si taki Yehovah e yepi wi? (b) Fruteri wan ondrofenitori di e sori fa Gado e yepi wi na ini a ten disi.

17 Fa wi kan si taki Yehovah e yepi wi? Luku wan tu eksempre: Kande yu abi a firi taki na Gado yepi yu fu kon sabi a tru leri fu Bijbel. Oiti yu go na wan fu den konmakandra fu wi èn yu yere wan sani drape, dan yu taki: „Ai, na disi mi ben abi fanowdu”? Kande yu si fa Gado piki wan fu den begi fu yu. Noso kande yu bosroiti fu du moro na ini a diniwroko èn yu ben fruwondru fu si fa Yehovah yepi yu fu du san yu ben abi na prakseri. Kande a pasa wan leisi taki yu suku wan tra wroko fu di yu no ben abi ten moro gi a diniwroko fu Yehovah. Di yu teki a bosroiti dati, yu si fa Gado yepi yu èn fa a du san a pramisi. A ben gersi leki a ben taigi yu: „Noiti mi o gowe fu yu” (Hebr. 13:5). Te wi abi wan bun matifasi nanga Yehovah, dan wi o si krin na omeni fasi a e yepi wi.

18 Sarah, wan sisa fu Kenia, e fruteri san a ondrofeni. A taki: „Mi ben abi a firi taki wan Bijbelstudenti fu mi no ben e warderi den sani di a ben e leri. Dati meki mi begi gi en èn mi aksi Yehovah efu mi ben musu stop a studie. Syatu baka di mi taki ’Amen’, a studenti bel mi fu aksi mi efu a ben kan kon nanga mi na den konmakandra. A sani disi naki mi ati!” Te yu de na ai, dan yu srefi o si na sortu fasi Gado e yepi yu. Rhonna, wan sisa di e libi na Asia, e taki: „A no de fu taki dati a e teki pikinso ten fosi wi man si krin fa Yehovah e yepi wi. Ma te yu du dati, dan yu o fruwondru fu si fa a e broko en ede nanga wi.”

19. San moro wi musu du fu man si Gado?

19 Yesus ben taki: „Koloku fu den sma di abi wan krin ati, bika den o si Gado” (Mat. 5:8). Fa wi kan sori taki wi „abi wan krin ati”? Wi musu sorgu taki wi abi wan krin denki èn wi musu tapu fu du sani di no bun. (Leisi 2 Korentesma 4:2.) Na ini na artikel disi, wi leri taki efu wi wani si Gado, wi musu tan meki muiti fu abi wan bun matifasi nanga en. Na ini a tra artikel wi o si taki wi abi bribi fanowdu fu kan si san Yehovah e du gi wi na ini a ten disi.