Go na content

Go na a tra menu

Go na table of contents

Yehovah Kotoigi

Sranantongo

Studie-Waktitoren  |  september 2015

Yu e meki muiti fu kon lepi dorodoro neleki Krestes?

Yu e meki muiti fu kon lepi dorodoro neleki Krestes?

„Kon . . . lepi dorodoro leki Krestes.”EF. 4:13.

SINGI: 69, 70

1, 2. Sortu muiti ibri Kresten musu meki? Gi wan eksempre.

TE WAN uma e go bai froktu gi en osofamiri, dan a no ala ten a e bai den moro bigiwan noso den moro bunkopuwan. Na presi fu dati, a e teki froktu di e tesi bun èn di de gosontu. A no e teki froktu di grun noso di kruwa, ma di gro bun èn di lepi.

2 Na so a de tu taki Gado wani taki den futuboi fu en gro bun èn taki den tron lepi sma. Dati meki ala Kresten di gi densrefi abra na Gado èn teki dopu, musu tan gro fu tron wan lepi futuboi fu Gado. A gro di so wan sma e gro no wani taki dati a e kon moro owru, ma taki a e du muiti fu meki a matifasi di a abi nanga Yehovah kon moro bun. Na apostel Paulus ben skrifi den brada nanga sisa fu Efeise taki den ben musu tron lepi Kresten. A ben gi den deki-ati fu meki muiti ’fu kon de wán na ini a bribi, teleki den alamala ben o sabi a Manpikin fu Gado bun. Na so den ben kan kon de leki wan bigisma di lepi dorodoro leki Krestes.’Ef. 4:13.

3. Fa a situwâsi ben de na ini a gemeente na Efeise èn fa a de na ini a ten disi na mindri Yehovah en pipel?

3 Di Paulus skrifi a brifi gi den brada nanga sisa na Efeise,  a gemeente drape ben de wan tu yari kaba. Furu sma na ini a gemeente dati ben de lepi Kresten kaba di ben abi ondrofeni. Ma toku wan tu fu den ben musu du muiti fu meki a matifasi di den ben abi nanga Yehovah kon moro tranga. Na so a de tu nanga son Kotoigi fu Yehovah na ini a ten disi. Furu brada nanga sisa e dini Gado langa ten kaba èn den tron lepi Kresten. Ma soleki fa a sori, dan a no de so nanga ala brada nanga sisa. Fu eksempre, dusundusun sma e dopu ibri yari. Sobun, wan tu brada nanga sisa de ete di musu meki muiti fu tron lepi Kresten. Fa a de nanga yu?Kol. 2:6, 7.

FA WAN KRESTEN KAN GRO?

4, 5. Fa lepi Kresten kan difrenti fu makandra, ma san den alamala abi? (Luku a prenki na a bigin fu na artikel.)

4 Te wan sma e luku den lepi froktu di a wani bai, dan a o si taki a no alamala na a srefi. Toku ala froktu abi sani di e sori taki den lepi. Na so a de tu nanga lepi Kresten. A no alamala na a srefi. Kande den komoto na difrenti kondre èn den kweki na difrenti fasi. Sonwan fu den yongu èn trawan owru. A no alamala lobi den srefi sani. Toku ala lepi Kresten abi fasi di e sori sma taki den lepi. San na wan tu fu den fasi disi?

5 Wan lepi Kresten e pruberi fu de leki Yesus di ben libi wan eksempre gi wi ’so taki wi kan waka soifri na en baka’ (1 Petr. 2:21). San ben de prenspari gi Yesus? A ben taki dati te wi wani lobi Yehovah, dan wi musu du dati nanga wi heri ati, wi heri libi èn nanga wi heri frustan. Boiti dati, wi musu lobi tra sma leki fa wi lobi wisrefi (Mat. 22:37-39). Wan lepi Kresten e pruberi fu teki a rai disi. A fasi fa a e libi e sori taki a matifasi di a abi nanga Yehovah èn a lobi di a abi gi trawan na a moro prenspari sani gi en.

Brada di owru kaba kan sori sakafasi fu di den e horibaka gi yonguwan di e teki fesi na ini a gemeente now (Luku paragraaf 6)

6, 7. (a) San na wan tu fasi di wan sma musu abi fu sori taki a de wan lepi Kresten? (b) San wi o luku now?

6 Lobi na soso wan fu den fasi di wan lepi Kresten musu abi (Gal. 5:22, 23). Ma tra fasi prenspari tu, soleki safri-ati, pasensi èn a dwengi di a musu dwengi ensrefi. Te a de na ini wan muilek situwâsi, dan den fasi disi kan yepi en fu no mandi esi. Den kan yepi en tu fu no lasi-ati tumusi te wan sari sani miti en. Te a abi a gwenti fu studeri nanga ensrefi, dan ala ten baka a e pruberi fu frustan sortu Bijbel rai kan yepi en fu si san bun èn san ogri. Sobun, te a musu teki bosroiti, a e arki en konsensi di e wroko bun fu di a sabi san Bijbel e taki. Wan lepi Kresten abi sakafasi. A sabi taki a fasi fa Yehovah e du sani èn den rai fu en, betre moro di fu en. * A e preiki a bun nyunsu fayafaya èn a e du ala san a man fu meki wánfasi de na ini a gemeente.

7 Awinsi o langa wi e dini Yehovah kaba, ibriwan fu wi kan aksi ensrefi: ’Mi musu meki moro muiti fu teki na eksempre fu Yesus fu sori taki mi wani tron wan lepi Kresten?’

„TRANGA NYANYAN NA GI LEPI SMA”

8. O bun Yesus ben sabi Bijbel èn o bun a ben frustan en?

8 Yesus Krestes ben frustan Gado Wortu heri bun. Srefi di a ben abi 12 yari nomo, a ben man taki fu Bijbel tori  nanga den leriman fu a tempel. „Ala den sma di ben e arki en, ben e fruwondru taki a ben abi someni koni èn taki a ben man piki den na so wan bun fasi” (Luk. 2:46, 47). Bakaten, di a ben e preiki, a gebroiki Gado Wortu na wan koni fasi so taki a ben kan tapu a mofo fu den feanti fu en.Mat. 22:41-46.

9. (a) Efu wan sma wani tron wan lepi Kresten, dan sortu gwenti a musu abi fu studeri? (b) Fu san ede wi musu studeri?

9 Neleki Yesus, na so wan brada noso sisa di wani tron wan lepi Kresten o meki muiti fu frustan Bijbel so bun leki a man. A o abi a gwenti fu ondrosuku finifini san skrifi na ini Bijbel, fu di a sabi taki „tranga nyanyan na gi lepi sma” (Hebr. 5:14). A de krin taki wan lepi Kresten wani kon „sabi a Manpikin fu Gado bun” (Ef. 4:13). Yu e poti ten na wan sei fu leisi Bijbel ibri dei? Yu abi a gwenti fu studeri nanga yusrefi? Yu e meki muiti fu hori na Osofamiri Anbegi ibri wiki? Te yu e ondrosuku Gado Wortu, dan pruberi fu si sortu Bijbel rai kan yepi yu fu frustan moro krin fa Yehovah e denki èn fa a e firi. Pruberi fu fiti den Bijbel rai disi na ini yu libi, spesrutu te yu musu teki bosroiti. Na so yu o kon moro krosibei fu Yehovah.

10. Fa wan lepi Kresten e si den rai fu Gado?

10 Wan lepi Kresten e frustan taki moro de fanowdu leki fu sabi nomo san Bijbel e taki. Boiti taki a sabi den wet nanga rai fu Gado, a musu lobi den tu. A e sori a lobi disi fu di a e angri fu du a wani fu Yehovah na presi fu du en eigi wani. A e kenki srefi a fasi fa a e libi, a fasi fa a e denki nanga a fasi fa a e tyari ensrefi. Fu eksempre, a e pruberi fu  de leki Yesus èn a e leri fu abi nyun fasi. Na so a e kon ’de leki fa Gado wani, wan reti-ati sma di e gi yesi na Gado ala ten’. (Leisi Efeisesma 4:22-24.) Bijbel skrifi nanga yepi fu Gado santa yeye. Te wan Kresten e leri sabi Bijbel rai moro bun èn a e kon lobi den, dan a e opo en ati nanga en frustan gi Gado santa yeye. Na so a matifasi di a abi nanga Yehovah e kon moro tranga.

WROKO MAKANDRA NA INI WÁNFASI

11. San Yesus ondrofeni di a ben de na grontapu?

11 Yesus no ben abi sondu. Ma di a ben de na grontapu, a ben kisi fu du nanga sondu libisma. En papa nanga mama ben de sondu libisma èn omeni yari a tan nanga den sondu brada nanga sisa fu en. Srefi den bakaman fu en di ben de krosibei mati fu en ben abi heimemre èn den ben prakseri densrefi nomo. Fu eksempre, a neti fosi sma kiri Yesus, den bakaman fu en „bigin meki wan bigi trobi suma fu den ben de a moro bigiwan” (Luk. 22:24). Ma Yesus ben sabi taki den sondu bakaman fu en ben man gro kon tron lepi Kresten èn taki den ben o tron wan gemeente di abi wánfasi. A srefi neti dati, Yesus begi taki den apostel fu en abi wánfasi. A aksi en Papa na hemel: ’Meki den alamala de wán, neleki fa yu, mi Tata, de wán nanga mi èn mi de wán nanga yu. Na so den kan de wán nanga wi tu . . . so taki den kan de wán neleki fa wi na wán.’Yoh. 17:21, 22.

12, 13. (a) Fa Efeisesma 4:15, 16 e sori taki wi musu du muiti fu meki wánfasi de na ini a gemeente? (b) Fa wan brada leri fu meki wánfasi de na ini a gemeente?

12 Wan lepi futuboi fu Yehovah e du san a man fu meki wánfasi de na ini a gemeente. (Leisi Efeisesma 4:1-6, 15, 16.) Wi wani taki Gado pipel „wroko makandra na ini wánfasi”. Soleki fa Gado Wortu e taki, dan wi musu abi sakafasi fu kan wroko makandra na a fasi disi. Wan lepi brada noso sisa di wani taki wánfasi de na ini a gemeente e tan sori sakafasi, awinsi a e si den swakifasi fu trawan. Sobun, aksi yusrefi: ’San mi e du te wan brada noso sisa e meki wan fowtu? Fa mi e firi te wan sma e du wan hati sani nanga mi? Mi no e taki moro nanga a sma dati? Noso mi e pruberi fu kon bun baka nanga en?’ Wan lepi Kresten wani meki muiti fu lusu wan problema, na presi fu de wan problema gi trawan.

13 Luku na eksempre fu wan brada di nen Uwe. Fosi, a ben mandi te wan brada noso sisa ben meki wan fowtu. Ne a bosroiti fu studeri Bijbel èn a buku Inzicht in de Schrift fu kon sabi moro fu a libi fu David. Fu san ede a brada disi teki David? A e taki: „David si fa futuboi fu Yehovah du sani di Gado no feni bun. Fu eksempre, Kownu Saul pruberi fu kiri en, son sma ben wani ston en kiri èn srefi David en eigi wefi ben spotu en (1 Sam. 19:9-11; 30:1-6; 2 Sam. 6:14-22). Ma noiti David meki den sani di trawan du, meki taki a lobi di a ben abi gi Yehovah kon kowru. David ben abi sari-ati tu, wan sani di mi ben musu leri. Den sani di mi leri, kenki a fasi fa mi ben e si den swakifasi fu brada nanga sisa. Mi no e hori sma na ati moro. Na presi fu dati, mi e du muiti fu meki wánfasi de na ini a gemeente.” Yu srefi wani du muiti tu fu meki wánfasi de na ini a gemeente?

 SUKU MATI DI E DU YEHOVAH WANI

14. Suma Yesus ben teki leki en krosibei mati?

14 Yesus Krestes ben sori switifasi gi sma. Mansma nanga umasma, yonguwan nanga owruwan èn srefi pikin-nengre ben e firi bun te den ben de nanga Yesus. Ma toku Yesus ben e luku bun suma a ben e teki leki en krosibei mati. A taigi den apostel fu en: „Unu na mi mati te unu e du san mi e taigi unu” (Yoh. 15:14). Den mati di Yesus teki ben de futuboi fu en di tan waka na en baka èn di ben e dini Yehovah nanga den heri ati. Den krosibei mati fu yu na sma di e dini Yehovah nanga den heri ati tu? Fu san ede disi prenspari?

15. Sortu wini yonguwan kan kisi te den abi lepi Kresten leki mati?

15 Nanga furu froktu a de so taki te den de na ini a waran fu a son, dan den e kon lepi moro esi. Na so a de tu taki a waran fu a lobi di wi e firi na ini a gemeente kan yepi wi fu gro kon tron lepi Kresten. Kande yu na wan yongusma èn yu e pruberi fu luku san yu o du nanga yu libi. A de wan koni sani fu abi brada nanga sisa leki mati di e dini Yehovah furu yari kaba èn di e du ala san den man fu meki wánfasi de na ini a gemeente. Kande den kisi wan tu problema na ini den libi noso a no ben de makriki gi den srefi fu dini Gado. Den sma disi kan yepi yu fu teki a bosroiti fu du a moro bun sani di wan sma kan du nanga en libi. Te yu de bun mati nanga den sortu brada nanga sisa disi, dan dati kan yepi yu fu teki yu eigi koni bosroiti èn fu tron wan lepi Kresten.Leisi Hebrewsma 5:14.

16. Fa lepi Kresten na ini wan gemeente yepi wan yongu sisa?

16 Helga kan memre taki a lasti yari di a ben de na skoro furu pikin fu en klas ben e taki nanga makandra san den ben wani du nanga den libi. Furu fu den ben wani go na universiteit fu kan feni wan bun wroko. Ma Helga go taki nanga lepi mati na ini en gemeente. A e taki: „Furu fu den ben owru moro mi èn den yepi mi trutru. Den gi mi deki-ati fu go na ini a furuten diniwroko. Baka dati mi kisi na okasi fu du a pionierwroko feifi yari langa. Now, baka someni yari, mi breiti taki mi gebroiki mi yongu yari gi a wroko fu Yehovah. Mi no e sari taki mi teki a bosroiti dati.”

17, 18. Fa wi kan dini Yehovah na a moro bun fasi?

17 Te wi e teki na eksempre fu Yesus, dan wi o gro kon tron lepi Kresten. Wi o kon moro krosibei fu Yehovah èn moro nanga moro wi o angri fu dini en so bun leki wi man. Solanga wan futuboi fu Gado no tron wan lepi Kresten, a no o man dini Yehovah na a moro bun fasi. Yesus ben taigi den bakaman fu en: „Un musu meki un leti skèin gi sma tu. Dan den kan si den bun di unu e du èn den kan gi glori na un Tata di de na hemel.”Mat. 5:16.

18 Soleki fa wi si, dan wan lepi Kresten kan du furu fu meki wánfasi de na ini a gemeente. A fasi fa so wan Kresten e gebroiki a konsensi fu en, e sori taki a lepi tu. Fa wi konsensi kan yepi wi fu teki koni bosroiti? Fa wi kan sori lespeki gi a konsensi fu tra sma? Na ini a tra artikel wi o luku den aksi disi.

^ paragraaf 6 Fu eksempre, den kan aksi wan owru brada di abi ondrofeni fu no du son wroko na ini a gemeente moro èn fu horibaka gi den moro yongu brada di e teki den frantwortu dati abra.