Go na content

Go na a tra menu

Go na table of contents

Yehovah Kotoigi

Sranantongo

Studie-Waktitoren  |  september 2015

A konsensi fu yu e wroko bun?

A konsensi fu yu e wroko bun?

’A rai disi na fu yepi wi fu sori lobi nanga wan krin ati, èn nanga wan bun konsensi.’1 TIM. 1:5.

SINGI: 57, 48

1, 2. Suma gi libisma wan konsensi èn fu san ede wi kan breiti taki wi abi wan konsensi?

DI YEHOVAH GADO meki libisma, a gi den na okasi fu teki den eigi bosroiti. Sobun, wi kan bosroiti fu du wan sani noso fu no du en. Fu yepi wi teki bun bosroiti, Gado gi wi wan prenspari sani. Dati na a konsensi. A konsensi de leki wan sten na ini wi di e taigi wi san bun èn san ogri. Te wi e gebroiki wi konsensi na a yoisti fasi, dan dati kan yepi wi fu du bun. A o yepi wi tu fu no du ogri. Wi konsensi na wan buweisi taki Gado lobi wi èn taki a wani taki ala libisma musu du bun.

2 Son sma na ini a ten disi no sabi san Bijbel e taki, ma toku den e du bun èn den no lobi te sma e du ogri. (Leisi Romesma 2:14, 15.) Fu san ede? Fu di den abi wan konsensi. A konsensi e tapu furu sma fu no du ogri. Prakseri fa grontapu ben o de efu nowan sma ben abi wan konsensi! A situwâsi na grontapu ben o ogri srefisrefi. Kande wi ben o yere fu moro ogri sani leki san wi e yere now. Wi musu breiti taki Gado gi libisma wan konsensi!

3. Fa a konsensi kan yepi wi fu du bun na ini a gemeente?

 3 Furu sma no e leri a konsensi fu den fu wroko bun. Ma nanga den futuboi fu Yehovah dati no de so. Wi wani leri a konsensi fu wi fu wroko bun fu di dati kan meki tu taki wánfasi de na ini gemeente. Wi wani taki a konsensi e memre wi na den rai fu Bijbel di e sori wi san bun èn san ogri. Ma fu leri wi konsensi fu wroko bun, a no soso wan sani di wi musu du nanga wi frustan. Bijbel e sori taki wan bun konsensi abi fu du tu nanga bribi èn nanga lobi. Paulus ben skrifi: „A rai disi na fu yepi wi fu sori lobi nanga wan krin ati, nanga wan bun konsensi èn fu di wi abi bribi sondro fu hoigri” (1 Tim. 1:5). Te wi e leri a konsensi fu wi fu wroko bun èn wi e du san a e taigi wi, dan wi o kon lobi Yehovah moro èn a bribi fu wi o kon moro tranga tu. A fasi fa wi e gebroiki wi konsensi e sori o bun a matifasi de di wi abi nanga Yehovah èn o fara wi wani go fu prisiri en ati. Iya, a konsensi de leki wan sten na ini wi èn a e sori sortu sma wi de trutru.

4. Fa wi kan leri fu meki wi konsensi wroko moro bun?

4 Ma fa wi kan leri wi konsensi fu wroko moro bun? We, a prenspari taki wi abi a gwenti fu studeri Bijbel èn fu begi te wi e studeri. Boiti dati, wi musu denki dipi fu san wi e leisi èn baka dati wi musu du san wi leri. Sobun, disi wani taki dati wi musu du moro leki fu leri sani nomo noso fu sabi san na den wet fu Gado. Te wi e studeri Bijbel, dan safrisafri wi o leri moro fini suma na Yehovah, fa a de, san na den fasi fu en èn san a lobi noso san a no lobi. Wi konsensi kan yepi wi fu kon si sani leki fa Yehovah Gado e si den. Den sani di wi e leri musu naki wi ati èn den musu gi wi deki-ati fu kon de leki en moro nanga moro.

5. San wi o luku na ini na artikel disi?

5 Ma kande wi e aksi wisrefi: Fa wan konsensi di e wroko bun kan yepi wi te wi musu teki bosroiti? Fa wi kan sori lespeki gi a konsensi fu wan tra brada noso sisa? Fa wi konsensi kan yepi wi fu du bun wroko? Meki wi go luku now fa a konsensi kan yepi wi fu teki bosroiti di abi fu du nanga (1) wi gosontu, (2) a fasi fa wi e meki prisiri èn (3) a preikiwroko.

DE NANGA KRIN FRUSTAN

6. Sortu bosroiti di abi fu du nanga wi gosontu wi musu teki son leisi?

6 Bijbel e gi wi deki-ati fu teki bosroiti di o yepi wi fu no du ogri èn fu no du sani pasa marki soleki nyan noso dringi (Odo 23:20; 2 Kor. 7:1). Te wi e du san Bijbel taki, dan dati kan yepi wi fu abi wan bun gosontu. Toku wi o kon owru èn wi kan kon siki. Sortu bosroiti wi o teki te a abi fu du nanga wi gosontu? Na ini son kondre, sma kan go na datra noso na ati-oso fu kisi yepi. Ma den kan bosroiti tu fu go na wan tra sma di e gi den osodresi noso tra sortu dresi fu kon betre. Ala ten baka den bijkantoro e kisi brifi fu brada nanga sisa di wani sabi sortu datrayepi den musu teki. Furu fu den e aksi: „Wan futuboi fu Yehovah kan teki a datrayepi dati?”

7. Fa wi kan teki bosroiti di abi fu du nanga datrayepi?

7 Nowan bijkantoro noso owruman abi a reti fu teki bosroiti gi wan Kotoigi te a abi fu du nanga en gosontu, awinsi a brada noso sisa disi e aksi san a musu du (Gal. 6:5). Ma den kan sori wan Kresten san Yehovah taki, so taki a kan hori dati na prakseri te a o teki wan bosroiti. Fu eksempre, wan futuboi fu Gado no musu frigiti taki Bijbel taki dati wi musu „tan fara . . . fu brudu” (Tori 15:29). A wet disi abi fu du nanga brudu noso nanga iniwan fu den fo  prenspari pisi fu brudu di datra e gi sma leki dresi. Wan Kresten musu hori a wet disi na prakseri tu te a musu bosroiti efu a o teki den pikinpikin sani di datra teki puru fu den fo prenspari pisi fu brudu. A konsensi fu en o abi krakti tapu a bosroiti di a o teki. * Ma sortu tra Bijbel rai kan yepi wi te wi musu teki bosroiti di abi fu du nanga datrayepi?

8. Te a abi fu du nanga wi gosontu, dan fa Filipisma 4:5 kan yepi wi?

8 Odo 14:15 e taki: „Wan sma sondro ondrofeni e bribi ala san sma e taki, ma a koniwan e luku bun pe a e poti en futu.” Son siki no abi dresi. Dati meki wi musu luku bun nanga dresi di e pramisi taki wan sma o kon betre te a e gebroiki en, aladi buweisi no de taki a de so trutru. Paulus ben skrifi: „Meki ala sma kon sabi taki unu de klariklari fu fiti unsrefi na ala fasi [noso, fu de nanga krin frustan]” (Fil. 4:5). Te wi de nanga krin frustan, dan dati o yepi wi fu tan poti na anbegi fu Yehovah na a fosi presi, na presi fu si wi gosontu leki a moro prenspari sani. Efu wi e meki wi gosontu tron a moro prenspari sani na ini wi libi, dan wi kan tron wan sma di e denki ensrefi nomo (Fil. 2:4). Wi sabi taki wi no man de gosontu dorodoro na ini a grontapu disi. Sobun, noiti wi musu frigiti taki a moro prenspari sani na ini wi libi na taki wi musu dini Yehovah.Leisi Filipisma 1:10.

Yu e dwengi trawan fu si sani leki fa yu e si den? (Luku paragraaf 9)

9. Fa Romesma 14:13, 19 kan yepi wi fu teki bosroiti di abi fu du nanga wi gosontu èn san kan pori a wánfasi na ini a gemeente?

9 Wan Kresten di de nanga krin frustan, no o dwengi trawan fu si sani leki fa en e si den. Na ini wan kondre na Europa, yu ben abi wan trowpaar di ben e gi sma deki-ati fu dringi son tablet èn fu nyan spesrutu nyanyan. Son brada nanga sisa gebroiki den dresi disi, ma trawan bosroiti fu no du dati. Te fu kaba, a kon na krin taki den dresi nanga a spesrutu nyanyan no ben abi den bun bakapisi di den ben fruwakti èn furu brada nanga sisa mandi. A trowpaar ben abi a reti fu bosroiti gi densrefi efu den ben o gebroiki den dresi nanga a spesrutu nyanyan. Ma yu denki taki den ben abi a reti fu pori a wánfasi na ini a gemeente fu gosontu tori ede? Son Kresten na ini Rome fu owruten no ben e prakseri a srefi fu son sani di ben abi fu nanga nyanyan èn nanga a hori di sma ben e hori spesrutu dei. Sortu rai Paulus gi den? A taki: „A wan sma feni taki a wan dei prenspari moro a trawan. Wan tra sma feni taki ala dei na a srefi. Ibri sma musu de seiker taki a sani di a e bribi, de tru.” A ben de prenspari fu no meki tra brada nanga sisa naki futu.Leisi Romesma 14:5, 13, 15, 19, 20.

10. Fu san ede wi musu lespeki a bosroiti di tra Kresten e teki? (Luku a prenki na a bigin fu na artikel.)

10 Nofo tron te brada nanga sisa e teki  bosroiti, den e gebroiki den konsensi. Ma a no ala ten wi man frustan fu san ede den teki a bosroiti dati. San wi musu du dan? Wi no musu de esi fu krutu den noso fu dwengi den fu kenki den prakseri. Kande a konsensi fu den „swaki” ete èn den musu leri fu gebroiki en moro bun. Noso kande den konsensi e trobi den te a abi fu du nanga son tori (1 Kor. 8:11, 12). Na a tra sei, a kan taki wi musu ondrosuku wi eigi konsensi. Kande wi musu studeri Bijbel moro fini fu leri wi konsensi fu wroko moro bun. Te a abi fu du nanga wi gosontu, dan ibriwan fu wi musu teki en eigi bosroiti èn wisrefi musu tyari den bakapisi fu a bosroiti dati.

MEKI PRISIRI NA WAN FASI DI FITI GI WAN KRESTEN

11, 12. Fa Bijbel e yepi wi fu bosroiti na sortu fasi wi o meki prisiri?

11 Yehovah meki libisma na so wan fasi taki den man meki prisiri di e tyari wini kon gi den. Salomo ben skrifi taki „wan ten de fu lafu” èn „wan ten de fu dansi èn fu dyompodyompo fu prisiri” (Preik. 3:4). Ma a no ala sani di sma e du fu meki prisiri, fu relaks noso fu teki bro, bun. A no bun tu fu gi tumusi furu ten na prisiri noso fu du en pasa marki. Fa wi konsensi kan yepi wi fu meki prisiri di bun gi wi?

12 Bijbel e warskow wi gi „sani di a sondu skin e du”. Den sani disi na „hurudu, fasi fu libi di no krin, ogri di sma e du sondro fu syen, na anbegi fu falsi gado, afkodrei, feantifasi, kesekese, dyarusu, faya-ati, trobi, pratifasi, falsi leri, bigi-ai, a drungu di sma e drungu, bradyari fesa, èn tra sani leki den sortu sani disi”. Paulus ben skrifi taki „sma di gwenti du den sani disi, no o kisi a Kownukondre fu Gado” (Gal. 5:19-21). Sobun, wi musu aksi wisrefi: ’Mi konsensi e taigi mi fu no du noso luku sport pe sma wani wini nomonomo, pe sma e kisi deki-ati fu lobi a kondre fu den, pe sma e feti noso pe den e du tra sortu ogri? Mi konsensi e warskow mi te mi wani luku wan felem pe den e sori porno noso wan felem pe sma e du hurudu, afkodrei noso pe den e kon drungu?’

13. Fa a rai na ini 1 Timoteyus 4:8 nanga Odo 13:20 kan yepi wi te a abi fu du nanga a fasi fa wi musu meki prisiri?

13 Te a abi fu du nanga a fasi fa wi musu meki prisiri, dan Bijbel e gi wi rai tu di kan yepi wi fu meki wi konsensi wroko moro bun. Wan fu den Bijbel rai disi na taki „te wi e oefen a skin, dan dati bun gi wan tu sani nomo” (1 Tim. 4:8). Furu sma kon si taki te yu abi a gwenti fu sport, dan yu o firi moro bun èn a bun tu gi yu gosontu. Ma kon meki wi taki dati wi wani du sport nanga wan grupu sma. Wi musu du en nanga iniwan sma? Odo 13:20 e taki: „Te wan sma e waka nanga koniwan, dan ensrefi o kon koni, ma te wan sma e waka nanga don sma, dan sani no o waka bun gi en.” A tekst disi e sori krin taki wi musu gebroiki den rai na ini Bijbel fu meki wi konsensi wroko moro bun. Na so fasi wi o sabi sortu fasi fu meki prisiri bun gi wi.

14. Fa wan osofamiri gebroiki a rai di skrifi na Romesma 14:2-4?

14 Christian nanga Daniela abi tu umapikin di de tini ete. Christian e taki: „Wan leisi di wi ben abi na Osofamiri Anbegi, wi taki fu a fasi fa wi kan meki prisiri. Wi alamala agri taki son fasi fu meki prisiri bun, ma tra fasi no bun. Ma suma na den sma di wi e teki fu meki prisiri? Wan fu den umapikin fu wi fruteri wi taki te den abi pauze na skoro, dan son Kotoigi no e tyari densrefi na wan fasi di fiti. A ben kisi a firi tu fu du a srefi. Wi sori en taki ibriwan fu wi abi wan konsensi èn taki disi musu yepi wi fu bosroiti san wi wani du èn nanga suma wi wani du en.”Leisi Romesma 14:2-4.

Te yu konsensi e wroko bun, dan dati o yepi yu fu no du sani di no bun (Luku paragraaf 14)

15. Te wi luku Mateyus 6:33, dan fa dati kan yepi wi fu luku na sortu fasi wi o meki prisiri?

 15 Omeni ten yu e gebroiki fu meki prisiri? Den sani leki konmakandra, a preikiwroko nanga a studeri di yu e studeri Bijbel e kon na a fosi presi na ini yu libi? San moro prenspari gi yu? Yesus taki: „Fu dati ede, tan suku fosi a Kownukondre nanga Gado en retidu, dan unu o kisi ala den tra sani tu” (Mat. 6:33). Yu konsensi e memre yu san Yesus ben taki te yu musu bosroiti fa yu o gebroiki a ten fu yu?

WI E KISI DEKI-ATI FU PREIKI FAYAFAYA

16. San wi konsensi kan gi wi deki-ati fu du?

16 Wan bun konsensi no e warskow wi nomo taki wan sani no bun. Ma a e gi wi deki-ati tu fu du bun wroko. Wan fu den bun wroko disi na fu preiki oso fu oso èn fu gi kotoigi na sma awinsi pe wi e miti den. Paulus en konsensi ben e gi en deki-ati fu du disi tu. A skrifi: „Mi de fruplekti fu preiki. Iya, helu fu mi efu mi no preiki a bun nyunsu!” (1 Kor. 9:16) Te wi e pruberi fu du san Paulus ben e du, dan wi o abi wan bun konsensi fu di wi sabi taki wi e du a yoisti sani. Te wi e preiki a bun nyunsu, dan wi e gi den sma di wi e miti deki-ati fu gebroiki a konsensi fu den fu du san bun. Paulus taki: „Wi e sori sma san [Gado Wortu] e taki trutru. Na so wi tron bun eksempre gi ala sma na fesi Gado èn disi abi krakti na tapu a konsensi fu den.”2 Kor. 4:2.

17. Fa wan yongu sisa arki a konsensi fu en?

17 Di Jacqueline ben abi 16 yari, a ben e studeri biologie na skoro. Ma den ben kisi na evolutie-leri tu. Jacqueline e taki: „Fu di mi no ben e horibaka gi na evolutie-leri, meki mi konsensi no ben e gi mi pasi fu teki prati na den les disi soleki fa mi ben gwenti du na den tra les. Sobun, mi go na a skoromeester, dan mi taigi en taki mi e bribi taki na Gado meki ala sani. Mi fruwondru taki en ati no bron. A gi mi na okasi srefi fu taki nanga a heri klas fu a tori disi.” Jacqueline ben e prisiri trutru taki a arki en konsensi èn taki a du san Bijbel leri en. Yu konsensi e gi yu deki-ati tu fu du a yoisti sani?

18. Fu san ede wi musu meki muiti fu abi wan bun konsensi?

18 A moi te wi e sori taki wi wani libi soleki fa Yehovah taki. Wi konsensi kan yepi wi fu du dati. Te wi e studeri Gado Wortu finifini, wi e denki dipi fu den sani di wi e leri èn wi e pruberi fu du san wi e leri, dan dati o yepi wi fu gebroiki wi konsensi moro bun. Na so wi o man teki bun bosroiti na ini wi libi.

^ paragraaf 7 Luku „Aksi fu leisiman” na ini A Waktitoren fu 15 yuni 2004, bladzijde 29-31.