Go na content

Go na a tra menu

Go na table of contents

Yehovah Kotoigi

Sranantongo

Studie-Waktitoren  |  augustus 2015

Tan fruwakti en!

Tan fruwakti en!

’Un musu tan fruwakti en awinsi a no kon ete.’HAB. 2:3.

SINGI: 128, 45

1, 2. San na wan sani di furu futuboi fu Yehovah du?

SENSI owruten, futuboi fu Yehovah e wakti a ten te den profeititori di Gado fruteri den o kon tru. Fu eksempre, Yeremia ben taki dati den Babilonsma ben o pori Yuda èn na dati pasa tu na ini 607 Fosi Krestes (Yer. 25:8-11). Yehovah ben taigi a profeiti Yesaya taki a ben o bow Yerusalem baka. A profeiti taki: „Koloku fu ala den sma di e tan wakti en” (Yes. 30:18). Mika srefi ben fruwakti taki den pramisi fu Yehovah ben o kon tru. Dati meki a taki: „Mi dati o wakti Yehovah” (Mika 7:7). Hondrohondro yari langa, den futuboi fu Gado ben e fruwakti taki den profeititori di ben e taki fu a Mesias noso Krestes ben o kon tru.Luk. 3:15; 1 Petr. 1:10-12. *

2 Na ini a ten disi tu den futuboi fu Gado e wakti fu den profeititori di e taki fu Yehovah en Kownukondre kon tru. Nanga yepi fu a Mesias Kownukondre disi, Yehovah o tyari wan kaba kon na ala pina di e miti libisma. Fa a o du dati? A o pori den ogrisma èn a o puru en pipel na ini a bruya grontapu disi di de na ini a makti fu Satan (1 Yoh. 5:19). Sobun, meki wi tan na ai  fu di wi sabi taki a kaba fu a grontapu disi o kon dyonsro.

3. San wi kan aksi wisrefi, efu na someni yari langa kaba wi e wakti fu a kaba kon?

3 Wi leki futuboi fu Yehovah e angri fu a ten taki Gado wani „pasa na grontapu soleki fa a e pasa na hemel” (Mat. 6:10). Sonwan fu wi e wakti a kaba someni yari langa. Sobun, kande wi e aksi wisrefi: ’Fu san ede wi musu tan fruwakti taki a kaba o kon dyonsro?’ Meki wi go luku a piki tapu na aksi disi.

FU SAN EDE WI MUSU TAN FRUWAKTI TAKI A KABA O KON DYONSRO?

4. San na a moro prenspari sani di meki taki wi e tan na ai?

4 Bijbel e sori wi krin taki wi leki Kresten no musu tweifri taki a kaba fu a grontapu disi o kon. Yesus ben taigi den bakaman fu en fu „tan na ai” (Mat. 24:42; Luk. 21:34-36). Dati meki wi musu tan fruwakti a kaba, bika na dati Yesus ben taigi wi fu du. Na ini a tori disi, Yehovah en organisâsi gi wi wan bun eksempre. Na ini den buku fu wi den tan gi wi deki-ati fu ’tan fruwakti a dei fu Yehovah èn fu tan hori bun na prakseri taki a dei dati e kon’. Den gi wi deki-ati tu fu tan howpu tapu a nyun grontapu di Gado pramisi wi.Leisi 2 Petrus 3:11-13.

5. Fu san ede a prenspari fu tan na ai na ini a ten fu wi?

5 Efu a ben fiti gi Kresten fu owruten fu tan fruwakti a kaba, dan a de moro prenspari gi wi na ini a ten disi fu du dati. Fu san ede? Fu di sensi 1914, wan lo sani de di e sori krin taki Yesus tron Kownu fu Gado Kownukondre èn taki wi e libi na ini den lasti dei. Dati na a ten fu „a kaba fu a grontapu”. Fu eksempre, a profeititori di Yesus ben taki fu a ten disi e kon tru, bika a situwâsi na grontapu e kon moro ogri èn a bun nyunsu fu a Kownukondre e preiki na heri grontapu (Mat. 24:3, 7-14). Ma Yesus no ben taki o langa a ben o teki fosi a kaba kon. Dati meki a prenspari fu tan na ai.

6. Fu san ede wi kan fruwakti taki a situwâsi na grontapu o kon moro ogri te a kaba o kon?

6 Bijbel e taki dati „na ini den lasti dei” sma ben o du ogri moro nanga moro (2 Tim. 3:1, 13; Mat. 24:21; Openb. 12:12). Sobun, aladi a situwâsi na grontapu ogri kaba, toku wi kan fruwakti taki a o kon moro ogri. Ma a kan taki „a kaba fu a grontapu” abi fu du nanga wan ten di musu kon ete? A kan taki a abi fu du nanga wan ten te a situwâsi na grontapu o kon moro ogri leki fa a de now?

7. San Mateyus 24:37-39 e taki fu a situwâsi na grontapu na ini den lasti dei?

7 Kande son sma e denki taki fosi „a bigi banawtu” kon, feti o de na ini ibri kondre èn taki furu sma o kon siki noso taki den o dede fu angri (Openb. 7:14). Ma efu dati ben o de so, dan ala sma ben o si krin taki den Bijbel profeititori kon tru. Srefi sma di no e agri nanga Bijbel ben o si dati. Ma Yesus ben taki dati furu sma ’no ben o poti prakseri na san e pasa’ te a e tiri leki Kownu. A taki tu dati den ben o tan du den aladei sani fu den, teleki a lati tumusi. (Leisi Mateyus 24:37-39.) Sobun, Bijbel no e taki dati na ini den lasti dei a situwâsi na grontapu o kon so takru taki sma musu fu bribi taki a kaba de krosibei.Luk. 17:20; 2 Petr. 3:3, 4.

8. San de krin gi den sma di e „tan na ai” soleki fa Yesus ben taki?

8 Sobun, den sani di ben o pasa fu sori taki Yesus tron Kownu, ben musu de wan warskow gi den bakaman fu en so taki den ben o man si krin na ini sortu ten den e  libi. Dati meki den ben musu „tan na ai” soleki fa Yesus ben taki (Mat. 24:27, 42). Sensi 1914, den difrenti sani di Yesus taki fu a ten fu wi e kon tru. Wi de seiker taki wi e libi na ini a ten fu „a kaba fu a grontapu” disi. Yehovah bosroiti kaba o ten a o pori na ogri grontapu fu Satan.

9. Fu san ede wi musu tan fruwakti a kaba fu na ogri grontapu disi?

9 Dan fu san ede Kresten na ini a ten disi musu tan fruwakti taki a kaba o kon dyonsro? Na fu di wi wani gi yesi na Yesus Krestes. Boiti dati, wi e si krin tu fa ala den sani di Yesus ben e taki fu den lasti dei e kon tru. A no fu di wi e bribi iniwan sani di wi e yere, meki wi sabi taki a kaba de krosibei, ma na fu di wi de seiker taki Bijbel profeititori e kon tru. Wi musu tan na ai èn wi musu tan fruwakti a kaba fu na ogri grontapu disi.

O LANGA WI MUSU WAKTI?

10, 11. (a) Fu san ede Yesus taigi den bakaman fu en fu „tan na ai”? (b) San Yesus taigi den bakaman fu en fu du te a kaba ben o kon moro lati leki san den fruwakti? (Luku a prenki na a bigin fu na artikel.)

10 Furu fu wi e dini Yehovah someni yari kaba èn wi e angri fu a dei fu Gado kon. Ma a no abi trobi o langa wi e wakti, ala ten wi musu tan fruwakti a dei dati. Wi musu de klariklari te Yesus o kon fu pori a grontapu fu Satan. Hori na prakseri san Yesus ben taigi den bakaman fu en: „Tan luku, tan na ai, bika unu no sabi o ten den sani disi o pasa. A de leki wan man di ben go na wan tra kondre. A gowe èn a meki den srafu fu en luku na oso fu en. Ibriwan fu den ben musu du en eigi wroko èn a ben gi a waktiman a komando fu tan na ai. Fu dati ede, tan na ai, bika unu no sabi o ten a masra fu na oso o kon. Unu no sabi efu a o kon na mofoneti, mindrineti, musudei, noso fruku mamanten. No meki a de so taki te a kon wantronso, a e si unu e sribi. Iya, san mi e taigi unu, mi e taigi ala sma: Tan na ai.”Mark. 13:33-37.

11 Di den bakaman fu Yesus kon frustan taki Krestes bigin tiri na ini 1914, den sori taki den ben de srekasreka. Dati meki den bigin du a Kownukondre preikiwroko nanga moro faya, fu di den ben sabi taki a kaba ben kan kon iniwan ten. Ma soleki fa Yesus ben taki, dan a ben kan kon na wan moro lati ten tu, kande „musudei, noso fruku mamanten”. Te dati ben o pasa, dan san den bakaman fu en ben musu du? A taki: „Tan na ai.” Sobun, srefi te wi denki taki wi wakti langa ten kaba, toku disi no wani taki dati a kaba fara ete noso taki a no o kon na ini a ten fu wi.

12. San Habakuk aksi Gado èn fa Gado piki en?

12 Luku na eksempre fu a profeiti Habakuk di ben musu fruteri taki Yerusalem ben o kisi pori. Tra profeiti fosi en ben preiki a boskopu dati omeni yari kaba. A situwâsi na ini a kondre ben kon takru srefisrefi èn ’sani no ben e pasa na wan reti fasi, fu di den ogri sma ben lontu den reti-ati sma’. Dati meki a no musu fruwondru wi taki Habakuk aksi Yehovah: „O Yehovah, o langa mi musu bari, fosi yu . . . yepi mi?” Yehovah no piki Habakuk langalanga, ma a gi en a dyaranti taki Yerusalem ben o kisi pori trutru. ’A no ben o kon lati.’ Gado taigi Habakuk fu „tan fruwakti en”.Leisi Habakuk 1:1-4; 2:3.

13. San Habakuk ben kan denki èn fu san ede dati no ben o de wan koni sani fu du?

13 Kon meki wi taki dati Habakuk ben lasi-ati èn taki a ben prakseri na ensrefi:  ’Omeni yari mi e yere taki Yerusalem o kisi pori. Ma a kaba no e kon ete. Dan fu san ede mi musu preiki fu en. Meki tra sma du a wroko.’ Efu Habakuk ben prakseri so, dan kande Yehovah no ben o feni en bun moro èn kande a ben o lasi en libi srefi te den Babilonsma ben o pori Yerusalem.

14. Fu san ede wi o de nanga tangi taki Yehovah warskow wi fu tan fruwakti a kaba?

14 Pruberi fu si yusrefi na ini a nyun grontapu. Ala den sani di Yehovah ben taki fu den lasti dei kon tru. Now a bribi di yu abi na ini Yehovah èn na ini den pramisi fu en kon moro tranga srefi èn yu sabi taki a o du ala san a pramisi. (Leisi Yosua 23:14.) Yu de nanga tangi taki Yehovah ben seti sani fu a kaba kon na a yoisti ten èn taki a ben warskow en pipel fu tan fruwakti a kaba.Tori 1:7; 1 Petr. 4:7.

WI E TAN PREIKI ALADI WI E WAKTI

Yu e preiki a bun nyunsu fayafaya? (Luku paragraaf 15)

15, 16. Fu san ede wi musu du ala san wi man fu preiki gi sma na ini a ten disi?

15 Wi kan fruwakti taki na organisâsi fu Yehovah o tan memre wi taki wi musu si a wroko fu Gado leki wan prenspari sani. A no fu meki wi tan du a wroko fu Gado fayafaya nomo meki den e du dati, ma na fu yepi wi fu no frigiti taki a boskopu fu wi prenspari trutru. Wi de seiker taki den sani di Yesus fruteri wi fu a ten fu wi e kon tru nownow èn taki a kaba o kon heri esi. Sobun, te wi e preiki a bun nyunsu fayafaya, dan wi e sori taki wi e tan suku a Kownukondre nanga Gado en retidu fosi.Mat. 6:33; Mark. 13:10.

16 Wan sisa taki: „Te wi e preiki a bun nyunsu fu Gado Kownukondre, dan wi . . . kan yepi sma so taki den no dede te grontapu o kisi pori.” A sisa disi srefi ondrofeni san a wani taki te sma e yepi trawan fu den no dede. Na ini 1945, en nanga en masra ben de na tapu Wilhelm Gustloff, wan bigi sipi di ben moi trutru. Ne a sipi disi sungu. A ben de wan fu den moro bigi rampu di oiti pasa nanga wan boto na se. Dusundusun sma dede. Ma en nanga en masra no dede fu di tra sma di ben de na tapu a sipi tu ben man yepi den. Ma yu ben abi sma tu di no ben prakseri den libi. Na presi fu dati, den ben e prakseri tra sani di no ben prenspari na a momenti dati. A sisa e memre taki wan uma ben e tan bari nomo: „Mi kofru! Mi kofru! Den gowtu sani fu mi! Ala mi gowtu sani de na ini mi kamra ete. Mi lasi ala sani!” Ma na a tra sei, yu ben abi sma na tapu a sipi di ben wani yepi trawan. Aladi den ben kan lasi den libi, toku den du ala san den man fu yepi den sma di ben fadon na ini a kowru watra fu a se. Den sma disi no ben e prakseri  densrefi nomo. Na so wi de tu. Wi e du ala san wi man fu yepi tra sma. Wi e tan hori na prakseri taki a preikiwroko prenspari. Fosi a lati tumusi, wi e suku fu yepi sma so taki den no lasi den libi te a kaba o kon di de a moro bigi rampu di o miti grontapu.

Yu e teki koni bosroiti fu sori taki yu e tan fruwakti a dei fu Yehovah? (Luku paragraaf 17)

17. Fu san ede wi kan bribi taki a kaba kan kon iniwan ten?

17 Den sani di e pasa na grontapu e sori krin taki den profeititori fu Bijbel e kon tru èn taki a kaba fu na ogri grontapu disi de krosibei. Wi e wakti a ten te „den tin tutu” nanga „na ogri meti” o pori ala den falsi kerki na heri grontapu di Bijbel e kari Babilon a Bigiwan (Openb. 17:16). Wi no musu denki taki a o teki langa, fosi a sani disi pasa. Hori na prakseri taki na Gado o ’meki den du san en abi na prakseri’. Na en o gi den a denki fu go feti nanga den falsi kerki. A sani disi kan pasa esi-esi èn na iniwan ten! (Openb. 17:17) A kaba fu na ogri grontapu disi no de fara moro. A no fu soso wi e gi yesi na Yesus warskow: „Luku bun taki noiti unu nyan pasa marki, taki unu no dringi tumusi furu, noso taki unu no broko un ede nanga na aladei libi, so taki un ati kon hebi. Noso a dei dati o kon na unu tapu wantronso, sondro taki unu fruwakti dati. A o kon leki wan trapu na [un] tapu” (Luk. 21:34, 35; Openb. 16:15). Meki wi teki a bosroiti fu tan dini Yehovah fayafaya, fu di wi de seiker taki a „e yepi den wan di e tan wakti en”.Yes. 64:4.

18. Sortu aksi wi o luku na ini a tra artikel?

18 Now di wi e wakti a kaba fu na ogri grontapu disi, meki wi teki a rai fu Yudas, wan bakaman fu Yesus: „Lobiwan, meki a santa bribi fu unu yepi unu fu kon moro tranga èn begi nanga santa yeye. Te unu e du dati, dan Gado o tan lobi unu, aladi unu e wakti teleki wi Masra Yesus Krestes sori unu sari-ati, so taki unu kan kisi têgo libi” (Yud. 20, 21). Ma fa wi kan sori taki wi e tan fruwakti a nyun grontapu di Gado pramisi wi èn taki wi e howpu na en tapu trutru? Na fu a tori disi wi o taki na ini a tra artikel.

^ paragraaf 1 Fu kon sabi wan tu fu den profeititori di e taki fu a Mesias èn fa den kon tru, dan luku a lijst na tapu bladzijde 200 fu a buku San Bijbel e leri wi trutru?