Go na content

Go na table of contents

Yehovah Kotoigi

Tongo Sranantongo

Luku bun nanga takru mati na ini den lasti dei disi

Luku bun nanga takru mati na ini den lasti dei disi

„Takru kompe e pori bun gwenti.”1 KOR. 15:33.

SINGI: 73, 119

1. Na ini sortu ten wi e libi now?

WI E libi na ini ’muilek ten di tranga fu pasa’. Sensi 1914 di „den lasti dei” bigin, a situwâsi na grontapu kon moro ogri leki iniwan ten na fesi (2 Tim. 3:1-5). Ma wi sabi taki dei fu dei grontapu o kon moro ogri, fu di Bijbel profeititori e taki dati „ogri sma nanga bedrigiman o kon ogri moro nanga moro”.2 Tim. 3:13.

2. Sortu fasi fu meki prisiri sma na ini a ten disi lobi, aladi Bijbel e krutu dati? (Luku a prenki na a bigin fu na artikel.)

2 Difrenti fasi de fa sma na ini a ten disi e meki prisiri. Furu fu den lobi luku noso du sani di e meki den firi bun, aladi Bijbel e krutu dati. Gado no feni den sani disi bun fu di den abi feti, kiri, hurudu, afkodrei noso tra ogri sani na ini. Fu eksempre, furu tron Internet, telefisi programa, felem, buku, nanga tijdschrift e sori taki feti, kiri noso hurudu na bun sani. Fosi, te sma ben e du sani di no bun, dan dati ben e seki sma. Ma na son presi a de so now taki lanti meki wet srefi di e horibaka gi den sani dati. Toku disi no wani taki dati Gado e feni en bun taki sma e du den sani disi.Leisi Romesma 1:28-32.

3. Fa grontapu e si den sma di e libi leki fa Bijbel taki?

 3 Na ini a ten fu den apostel, sma ben lobi luku sani tu pe feti ben lai èn pe sma ben e du hurudu. Ma den bakaman fu Yesus no ben e luku den sani dati, fu di den ben wani du san Gado taki. Dati meki sma ben e lafu den èn ben e frufolgu den. Na apostel Petrus ben skrifi: „Fu di unu no e waka moro nanga den fu go libi a srefi fisti yayolibi, meki den e fruwondru èn den e taki ogri fu unu” (1 Petr. 4:4). Na ini a ten disi, yu abi sma tu di e libi leki fa Gado wani, ma grontapu no man frustan fu san ede den e libi so. Fu taki en leti, Bijbel e taki dati „sma o frufolgu ala den wan di wani dini Gado fayafaya leki bakaman fu Krestes Yesus”.2 Tim. 3:12.

„TAKRU KOMPE E PORI BUN GWENTI”

4. Fu san ede wi no musu lobi a grontapu disi?

4 Bijbel e taki dati den sma di wani du san Gado taki, no musu lobi grontapu nanga den sani di grontapu e du. (Leisi 1 Yohanes 2:15, 16.) Satan na „a gado fu a grontapu disi”. Na en e tiri grontapu. A e gebroiki kerki, politiek, bisnis, nanga sani soleki Internet, telefisi, buku nanga radio fu kori sma (2 Kor. 4:4; 1 Yoh. 5:19). Dati meki wi leki Kresten musu luku bun san wi e luku noso e leisi, noso nanga suma wi e bumui. Gado Wortu e taki krin: „No meki sma kori unu. Takru kompe e pori bun gwenti.”1 Kor. 15:33.

5, 6. Nanga suma wi no musu bumui èn fu san ede?

5 Efu wi no wani pori den bun gwenti fu wi, dan wi musu luku bun taki wi no e bumui nanga sma di e du ogri. Den sma disi a no soso den wan di no e dini Yehovah, ma sosrefi den wan di e taki dati den e dini en, ma den e trangayesi en fu espresi. Efu den sma disi di e taki dati den na futuboi fu Yehovah e tan du seryusu sondu èn den no abi berow, dan wi no e tan bumui nanga den.Rom. 16:17, 18.

6 Efu wi e bumui nanga sma di no e du san Gado taki, dan a kan taki te fu kaba wi srefi o go du den sani di den e du, soso fu di wi wani taki den lobi wi. Fu eksempre, efu wi ben o bumui nanga sma di e du hurudu, dan wi kan go du hurudu tu. Na dati pasa nanga son Kresten brada nanga sisa fu wi. Te fu kaba den ben musu puru wan tu fu den na ini a gemeente, fu di den no ben abi berow (1 Kor. 5:11-13). Den sma disi kan drai kon baka na Yehovah, soso te den abi berow. Ma efu den no e du dati, dan a situwâsi fu den kan kon de leki san Petrus taki na ini 2 Petrus 2:20-22.Leisi en.

7. Suma wi musu teki leki wi krosibei mati?

7 Aladi wi wani sori switifasi srefi gi sma di no e libi leki fa Gado taki, toku wi no musu tron krosibei mati fu den. Dati meki a no bun te wan Kotoigi di no trow e hori nanga wan sma di no gi ensrefi abra na Gado, di no e gi yesi na Gado èn di no e lespeki den wet fu en. San moro prenspari na taki wi leki Kresten musu du san reti. Wi no musu du sani fu kon pôpi na den sma di no e libi leki fa Yehovah wet taki. Den krosibei mati fu wi musu de sma di e du san Gado wani. Yesus taki: „Den sma di e du a wani fu Gado, [den] na mi brada, mi sisa, nanga mi mama.”Mark. 3:35.

8. Di den Israelsma go moksi nanga sma di no ben e dini Yehovah, dan san ben de den takru bakapisi?

8 Di den Israelsma go moksi nanga sma di no e dini Gado, den ondrofeni den takru bakapisi fu dati. Baka di Yehovah puru den leki srafu na Egepte, a tyari den go na a Pramisi Kondre, dan a warskow den gi den sma di ben e libi drape. A taki: „Un no musu  boigi gi den gado fu den èn un no musu meki sma kori unu fu dini den. Un no musu meki sani di gersi den gado fu den. Un musu naki den trowe èn broko den santa pilari fu den. Un musu dini Yehovah un Gado” (Eks. 23:24, 25). Ma baka wan pisi ten furu Israelsma no du san Gado taki (Ps. 106:35-39). Fu di den trangayesi Gado, meki Yesus taigi den bakaten: „Luku, Gado o gowe libi a tempel disi” (Mat. 23:38). Yehovah no ben wani den Israelsma moro leki en pipel. Na presi fu dati, a seti wan nyun Kresten gemeente èn a blesi den.Tori 2:1-4.

LUKU BUN SAN YU E LUKU ÈN SAN YU E LEISI

9. Fu san ede den sani di grontapu e sori na telefisi, na Internet èn na ini buku kan abi takru bakapisi gi wi?

9 Furu fu den sani fu grontapu di den e sori na telefisi, na Internet èn na ini buku kan pori a matifasi di wi abi nanga Yehovah. Den sani dati no meki fu yepi Kresten poti bribi na ini Yehovah nanga den pramisi fu en. Na presi fu dati, den sani disi e gi sma deki-ati fu frutrow na ini Satan en ogri grontapu. Dati meki wi musu luku bun taki wi no e luku, leisi, noso arki wan sani di kan meki wi kon kisi „den lostu fu grontapu”.Tit. 2:12.

10. San o pasa nanga den sani di no bun fu leisi èn fu luku?

10 Dyonsro nowan sani o de moro di no bun fu leisi èn fu luku. Te Gado o pori a grontapu disi di de fu Satan, dan a o puru ala den sani disi tu. Gado Wortu e taki: „Grontapu e pasa gowe nanga den lostu fu en, ma a sma di e du a wani fu Gado o tan fu têgo” (1 Yoh. 2:17). Wan srefi sortu sani a psalm skrifiman ben taki tu: „Gado o kiri den ogri sma, ma den sma di e howpu na tapu Yehovah, na den o kisi grontapu. Ma den safri-ati sma o kisi grontapu èn den o prisiri srefisrefi, fu di freide o de pasa marki.” O langa disi o de so? Bijbel e taki: „Den reti-ati sma o kisi grontapu èn fu têgo den o tan libi drape.”Ps. 37:9, 11, 29.

11. Fa Gado e sorgu taki en pipel kan kisi den sani di den abi fanowdu fu kon sabi en?

11 Ma den sani di Yehovah en organisâsi e meki na den lasti dei disi, no de leki den sani fu grontapu. Den difrenti sani di den e meki e yepi sma fu libi na so wan fasi taki te fu kaba den kan kisi têgo libi. Di Yesus begi Yehovah, a taki: „Efu sma wani kisi têgo libi, den musu leri sabi yu, a wan-enkri tru Gado, èn a sma di yu seni kon, Yesus Krestes” (Yoh. 17:3). Wi Papa na hemel e gebroiki en organisâsi fu sorgu taki wi e kisi ala sani di de fanowdu fu kon sabi en. Na wan bigi blesi fu abi tijdschrift, brochure, buku, felem nanga wan website di e gi wi deki-ati fu anbegi a tru Gado. Gado organisâsi seti sani tu taki konmakandra kan hori ibri wiki na ini moro leki 110.000 gemeente na heri grontapu. Na den konmakandra disi èn na den bigi konmakandra fu wi, wi e studeri sani di e sori wi moro fini san Bijbel e taki. Disi e yepi wi fu bribi na ini Gado èn na ini den pramisi fu en.Hebr. 10:24, 25.

TROW „SOSO NANGA WAN SMA DI DE WAN BAKAMAN FU MASRA”

12. Fruklari fu san ede Bijbel e taki dati wan Kresten musu trow „soso nanga wan sma di de wan bakaman fu Masra”.

12 Te Kresten wani trow, dan a prenspari taki den luku bun suma den abi leki mati. Gado Wortu e taki krin: „No kon de wán nanga sma di no de na bribi. Bika san retidu abi fu du nanga kruktudu? Noso san leti abi fu du nanga dungru?” (2 Kor. 6:14) Te futuboi fu Gado e suku wan trowpatna, dan Bijbel e taki dati den musu trow „soso nanga wan sma di de wan bakaman fu Masra”.  Sobun, a musu de wan sma di gi ensrefi abra na Gado, di teki dopu èn di e du san Bijbel e leri (1 Kor. 7:39). Te wan Kresten e trow nanga wan Kotoigi di lobi Yehovah, dan a o abi wan patna di o yepi en fu tan dini Gado.

13. Nanga suma den Israelsma no ben musu trow?

13 A wan-enkri sma di sabi san na a moro bun sani gi wi na Yehovah. Sensi owruten a ben taki kaba dati den futuboi fu en musu trow „soso nanga wan sma di de wan bakaman fu Masra”. Fu eksempre, Yehovah ben warskow den Israelsma gi den trakondre sma di no ben e dini en. A ben taki: „Un no musu trow nanga den. No meki den umapikin fu unu trow nanga den manpikin fu den, èn no meki den manpikin fu unu trow nanga den umapikin fu den. Bika den o meki den pikin fu unu drai baka gi Gado èn den o go dini tra gado. Dan Yehovah en ati o bron nanga unu èn a no o draidrai fu kiri unu.”Deut. 7:3, 4.

14, 15. San pasa di Salomo trangayesi a wet fu Yehovah?

14 Di Kownu Salomo, a manpikin fu David, bigin tiri a begi Gado fu gi en koni. Gado arki a begi fu en èn a gi en furu koni. Na so a du kon taki ala sma ben kon sabi Kownu Salomo leki wan koni tiriman di ben e tiri wan kondre pe sani ben e go bun. Fu taki en leti, di na umakownu fu Skeiba kon luku Salomo, a taki: „Mi no ben wani bribi den sani di sma ben e taki, teleki mi kon fu si nanga mi eigi ai efu den sani disi tru. Ma soleki fa mi si, sma no ben fruteri mi afu srefi! Yu koni èn yu gudu moro leki san sma ben taigi mi” (1 Kow. 10:7). Ma na eksempre fu Salomo e leri wi san kan pasa te wan sma e trangayesi a wet fu Gado èn e trow nanga wan sma di no e dini Yehovah.Preik. 4:13.

15 Aladi Gado ben du someni sani gi Salomo, toku a no du san Gado taki èn a „ben teki wan lo uma fu tra kondre” di no ben e dini Yehovah. Te fu kaba a ben abi 700 wefi nanga 300 tra uma. San ben de a bakapisi? Di Salomo kon owru, a „ben e anbegi tra gado”, fu di den wefi fu en ben „e gi en deki-ati fu du disi. . . . Salomo du sani di Yehovah no feni bun” (1 Kow. 11:1-6). Fu di Salomo ben e bumui nanga sma di no ben e dini Gado, meki a tapu fu dini Yehovah. Efu disi ben kan pasa nanga Salomo, dan a kan pasa nanga iniwan fu wi tu. Dati meki wi no musu denki srefi fu trow nanga wan sma di no lobi Yehovah!

16. Sortu rai Bijbel e gi sma di tron wan Kotoigi aladi den trow kaba èn a patna fu den no e dini Yehovah?

16 Ma kon meki wi taki dati wan sma trow kaba èn a e bigin dini Yehovah, aladi a patna fu en no e du dati. San a musu du? Bijbel e taki: „Un uma, . . . saka unsrefi na ondro un eigi masra, so taki te sonwan fu den no wani du san Gado wortu e taki, dan a fasi fa unu e tyari unsrefi kan meki den teki a bribi sondro fu unu taigi den wan sani” (1 Petr. 3:1). Den sani disi skrifi gi Kresten wefi, ma a fiti tu gi wan man di trow kaba èn di e bigin dini Yehovah aladi a patna fu en no e du dati. Bijbel e sori krin: De wan bun trowpatna èn du ala den sani di Gado e aksi fu yu na ini a trowlibi. Furu trowpatna di no ben de Kotoigi ete, tron futuboi fu Yehovah fu di a patna fu den kenki en libi baka di a leri den wet fu Gado.

ABI MATI DI LOBI YEHOVAH

17, 18. Fu san ede Noa tan na libi di a Frudu kon? Fu san ede den Kresten na ini a ten fu den apostel no dede di Yerusalem kisi pori?

17 Te yu abi takru mati, den kan meki yu trangayesi Yehovah. Ma te yu abi bun mati, den o yepi yu fu tan gi yesi na en. Luku na  eksempre fu Noa. A ben libi na ini wan ogri grontapu, ma a no ben kisi a firi srefi fu tron bun mati fu den sma na en lontu. Na a ten dati, „Yehovah kon si taki libisma ben e du bun furu ogri na grontapu èn taki doronomo den ben abi soso ogri prakseri na ini den ati” (Gen. 6:5). Dati meki Gado bosroiti fu tyari wan frudu kon fu pori na ogri grontapu dati nanga den sma di ben e du ogri. Ma a no kiri Noa fu di a „ben de wan reti-ati man. . . . Noa ben e waka nanga a tru Gado.”Gen. 6:7-9.

18 Noa no ben e meki mati nanga sma di no ben lobi Yehovah. En nanga den seibi sma fu en osofamiri ben e du ala san den man fu bow na ark èn a ben de „wan preikiman fu retidu” tu (2 Petr. 2:5). A preikiwroko di Noa ben e du, a wroko di a ben e du fu bow na ark èn den sma fu en osofamiri di ben de en mati, yepi en fu tan du sani di Gado feni bun. A bakapisi ben de taki Noa nanga en osofamiri no dede di a Frudu kon. Wi alamala na ini a ten disi na bakapikin fu Noa nanga en osofamiri. Sobun, wi musu de nanga tangi taki den gi yesi na Yehovah èn taki den no ben teki ogrisma leki den mati. Na dati den Kresten na ini a ten fu den apostel du tu. Fu di den tan gi yesi na Yehovah, meki den no bumui nanga sma di no ben e dini Gado. Den tan na libi tu di Yerusalem nanga ala den trangayesi Dyu kisi pori na ini a yari 70.Luk. 21:20-22.

Te wi e moksi nanga sma di lobi Yehovah, dan wi e si nownow kaba fa a libi na ini a nyun grontapu o de (Luku paragraaf 19)

19. San wi musu du efu wi wani taki Gado feni wi bun?

19 Leki anbegiman fu Yehovah, wi musu teki na eksempre fu Noa nanga en osofamiri èn fu den fosi Kresten di ben e gi yesi na Gado. Wi no musu moksi nanga den sma fu na ogri grontapu di lontu wi, ma wi musu suku bun mati na mindri den milyunmilyun brada nanga sisa di e tan dini Gado fayafaya. Te wi e tan krosibei fu den wan di e gi yesi na den koni rai di Gado e gi, dan dati o yepi wi fu „tanapu kánkan na ini a bribi” na ini den muilek lasti dei disi (1 Kor. 16:13; Odo 13:20). Prakseri ala den moi sani di e wakti wi! Nownow kaba wi musu luku bun suma na den mati fu wi. Efu wi du dati, dan wi o abi na okasi fu pasa a kaba fu a grontapu disi libilibi èn fu libi na ini a nyun grontapu fu Yehovah di de so krosibei.