Go na content

Go na a tra menu

Go na table of contents

Yehovah Kotoigi

Sranantongo

Studie-Waktitoren  |  yuli 2015

Den ben de klariklari fu go—Rosiakondre

Den ben de klariklari fu go—Rosiakondre

FURU yari langa, lanti ben tapu a preikiwroko fu Yehovah Kotoigi na Rosiakondre. Ma na ini 1991, den Kotoigi na Rosiakondre prisiri srefisrefi di lanti gi den primisi fu preiki baka. Na a ten dati, sma no ben sabi taki den Kotoigi ben o kon de tin tron so furu leki san den ben de. Now yu abi sowan 170.000 Kotoigi drape. Na mindri den Kownukondre preikiman disi di e wroko tranga, yu abi Kotoigi fu tra kondre di froisi go na Rosiakondre fu yepi nanga a preikiwroko (Mat. 9:37, 38). Meki wi taki fu wan tu fu den.

BRADA DI DE KLARIKLARI FU GO YEPI TRA GEMEENTE

A yari di Kotoigi kisi primisi baka fu du a preikiwroko na Rosiakondre, Matthew fu Ingrisikondre ben abi 28 yari. Na wan kongres a yari dati, wan lezing ben hori di ben taki dati yepi ben de fanowdu na den gemeente na Owstu-Europa. A takiman gi wan eksempre fu wan gemeente na Sint-Petersburg na Rosiakondre di ben abi soso wán dinari ini a diniwroko èn nowan owruman. Toku den preikiman fu a gemeente dati ben abi wan tu hondro Bijbelstudie! Matthew e taki: „Baka a lezing dati, mi ben prakseri soso Rosiakondre. Dati meki mi begi Yehovah èn mi taigi en taki mi ben wani froisi go drape.” Matthew poti moni na wan sei, a seri furu fu den sani fu en, dan a froisi go na Rosiakondre na ini 1992. Fa sani waka gi en?

Matthew

Matthew e taki: „A no ben makriki gi mi fu leri a tongo. Mi no ben man taki bun nanga sma fu Bijbel.” Wan tra problema na taki a no ben man feni wan presi fu tan. A e taki: „Mi no man taigi yu omeni leisi mi ben abi fu froisi èn nofo tron mi no ben sabi langa na fesi o ten mi ben musu du dati.” Aladi Matthew kisi ala den problema disi, toku a e taki: „A moro bun sani di mi du na fu froisi go na Rosiakondre. Sensi mi e dini drape, mi leri fu frutrow moro na tapu Yehovah èn furu leisi mi si fa a yepi mi.” Bakaten, Matthew kisi a grani fu dini leki owruman èn leki spesrutu pionier. Now a e wroko na a bijkantoro krosibei fu Sint-Petersburg.

Na ini 1999, Hiroo go na a Dinariskoro na Yapan. Na a ten dati a ben abi 25 yari. Wan fu den leriman fu a skoro gi en deki-ati fu go dini na ini wan tra kondre.  Hiroo ben yere taki furu yepi ben de fanowdu na Rosiakondre èn a bigin leri Rosiatongo. A du ete wan sani di ben o yepi en. A e taki: „Mi go na Rosiakondre gi siksi mun. Mi go drape na ini a mun november fu di na ini a pisi ten dati, Rosiakondre kowru srefisrefi. Mi ben wani sabi efu mi ben o man nanga a kowru.” Baka di a si taki a kowru no ben hebi so gi en, a drai go baka na Yapan. Drape a kenki a libi fu en èn a ben abi soso den moro prenspari sani di ben de fanowdu. Disi meki taki a ben man kibri nofo moni fu go libi na Rosiakondre.

Hiroo nanga Svetlana

Now Hiroo e libi na Rosiakondre 12 yari kaba èn a dini na difrenti gemeente. Son leisi a ben de a wan-enkri owruman na ini wan gemeente nanga moro leki 100 preikiman. Na ini wán gemeente, a ben de so taki ibri wiki a ben e hori furu pisi fu a Diniwroko Konmakandra. A ben e hori a Theokrasia Diniwroko-skoro, a Waktitoren-studie nanga feifi difrenti Gemeente Bukustudie tu. A ben e go luku furu brada nanga sisa tu fu tranga a bribi fu den. Te Hiroo e prakseri den yari disi, a e taki: „Mi ben e prisiri trutru fu yepi den brada nanga sisa fu tranga a bribi fu den.” Sortu bun bakapisi a ben abi gi Hiroo di a go na wan presi pe moro yepi de fanowdu? A e taki: „Fosi mi go na Rosiakondre, mi ben e dini leki owruman èn mi ben de wan pionier. Ma baka di mi kon dyaso, mi ben kon leri sabi Yehovah moro bun. Na ini ala sani na ini mi libi, mi leri fu frutrow na tapu Yehovah moro.” Na ini 2005, Hiroo trow nanga Svetlana èn now den e dini leki pionier.

Michael nanga Olga makandra nanga Marina nanga Matthew

Matthew, di abi 34 yari, nanga en brada Michael, di abi 28 yari na fu Kanada. Di den go na Rosiakondre, den fruwondru fu si omeni sma di ben wani sabi moro fu Bijbel ben e go na den konmakandra. Ma yu ben abi wan tu brada nomo fu yepi den sma disi. Matthew e taki: „Na a gemeente pe mi go, 200 sma kon na a konmakandra. Ma yu ben abi wán owruman nomo di no ben yongu moro nanga wán yongu dinari ini a diniwroko fu hori ala den konmakandra. Di mi si disi, mi ben wani froisi go drape fu yepi den brada.” Matthew froisi go na Rosiakondre na ini 2002.

Fo yari baka dati, Michael froisi go na Rosiakondre èn heri esi a kon si taki furu brada ben de fanowdu ete. Leki dinari ini a diniwroko a ben kisi a grani fu luku den moni-afersi fu a gemeente. A ben musu sorgu tu gi den buku nanga tijdschrift èn gi a kontren pe a gemeente ben musu du a preikiwroko. Den aksi en tu fu du a wroko di wan sekretarsi fu wan gemeente e du. A ben musu hori lezing tu, yepi orga bigi konmakandra èn bow Kownukondre zaal. Iya, te na a dei fu tide furu yepi de fanowdu ete na ini den gemeente na Rosiakondre. Now Michael e dini leki owruman. Aladi a musu wroko tranga fu du ala den grani di a e kisi, toku a e taki: „Mi e firi koloku te mi e yepi den brada. Disi na a moro bun fasi fu libi.”

Baka wan pisi ten, Matthew trow nanga Marina, èn Michael trow nanga Olga. Makandra nanga furu tra brada nanga sisa di de klariklari fu yepi nanga a wroko, den tu trowpaar disi e tan horibaka gi den gemeente di e kon bigi dei fu dei.

SISA DI DE FAYAFAYA E YEPI NANGA A PREIKIWROKO

Tatyana

Na ini 1994, di Tatyana ben abi 16 yari, siksi spesrutu pionier fu Tyekia Republiek, Polen nanga Slowâkia go dini na ini a gemeente fu en na Ukraini. Nanga prisiri a e taki fu den: „Den pionier disi ben de fayafaya. Den brada nanga sisa no ben frede fu go taki nanga den èn den ben abi switifasi. Den ben sabi Bijbel bun.” Di Tatyana si fa Yehovah blesi den sisa disi gi a tranga wroko fu den, a prakseri na ensrefi: ’Mi wani de leki den.’

Na eksempre fu den pionier gi Tatyana furu deki-ati. A gebroiki den skoro fakansi fu en fu go nanga tra brada nanga sisa na den fara kontren fu Ukraini nanga Belarus pe Kotoigi no ben preiki ete. A ben lobi disi so  te, taki a seti sani fu froisi go na Rosiakondre fu kan du moro na ini a diniwroko. Na a bigin, a go drape wan syatu pisi ten èn a go tan nanga wan sisa di ben froisi kon fu wan tra kondre. Baka dati a suku wroko so taki a ben kan pionier. Bakaten, na ini 2000, a froisi go na Rosiakondre. Disi ben hebi gi en?

Tatyana e taki: „Fu di mi no ben man pai gi wan oso, meki mi ben abi fu yuru wan kamra na ini sma oso. A no ben makriki fu libi na a fasi dati. Son leisi mi ben wani go na oso baka. Ma ala ten Yehovah yepi mi fu si taki mi ben o kisi furu wini efu mi ben o tan pionier drape.” Now Tatyana e dini leki zendeling na Rosiakondre. A taki: „Na ini ala den yari taki mi no ben de na ini mi eigi kondre, mi ondrofeni furu moi sani na ini a diniwroko èn mi kisi furu mati. Ma a moro prenspari sani na taki mi bribi kon moro tranga.”

Masako

Masako fu Yapan pasa 50 yari. En heri libi langa a ben wani dini leki zendeling, ma fu di en gosontu no ben bun, meki a ben gersi leki noiti a ben o man du disi. Ma di a kon moro gosontu, a bosroiti fu froisi go na Rosiakondre fu yepi nanga a preikiwroko. A no ben makriki fu feni wan bun wroko èn wan bun presi fu tan. Ma toku a ben man tan pionier fu di a ben e leri sma Yapantongo èn a ben e krin sma oso. San yepi en fu tan du a diniwroko fu en?

Te Masako e prakseri den 14 yari di a e pionier now na Rosiakondre, dan a e taki: „Aladi mi kisi furu problema, mi e prisiri srefisrefi nanga a preikiwroko. Fu di mi e wroko na ini kontren pe moro Kownukondre preikiman de fanowdu, meki mi kon de nanga moro faya èn mi de moro koloku. Misrefi ondrofeni fa Yehovah yepi mi na ini ala den yari èn fa a sorgu gi nyanyan, krosi nanga wan presi fu tan. A sani disi na wan bigi wondru gi mi.” Boiti taki Masako wroko na kontren na ini Rosiakondre pe moro yepi de fanowdu, a preiki tu na ini Kirgistan. A ben man horibaka tu gi den grupu di e taki Ingrisitongo, Sneisitongo nanga Udgurtongo. Now a e dini leki pionier na Sint-Petersburg.

OSOFAMIRI E HORIBAKA GI A PREIKIWROKO ÈN DEN E KISI BLESI

Inga nanga Mikhail

Nofo tron a de so taki osofamiri e froisi go na wan tra kondre, fu di sani no e go bun na ekonomia sei na ini  a kondre fu den èn fu di den wani abi wan moro bun libi. Ma neleki Abraham nanga Sara, na so son osofamiri froisi go na wan tra kondre fu du moro gi Yehovah (Gen. 12:1-9). Luku a tori fu Mikhail nanga Inga, wan trowpaar fu Ukraini. Na ini 2003, den froisi go na Rosiakondre. Heri esi den feni sma di ben wani kon sabi moro fu Bijbel.

Mikhail e fruteri: „Wan leisi wi ben e wroko na ini wan kontren pe Kotoigi no ben preiki ete. Wan owru man opo a doro, dan a aksi: ’Unu na preikiman?’ Di wi taigi en taki wi ben de preikiman, a taki: ’Mi sabi taki unu ben o kon wan dei. A no kan taki den wortu fu Yesus no kon tru.’ Ne a man taki san skrifi na Mateyus 24:14.” Mikhail e taki tu: „Na ini a kontren dati, wi feni wan grupu tu fu tin reti-ati Baptist uma di ben e angri fu kon sabi moro fu Bijbel. Den ben abi a Libi fu têgo-buku èn ibri wiki den ben e gebroiki en fu studeri Bijbel. Wi tan drape omeni yuru fu piki den aksi fu den èn wi singi Kownukondre singi nanga den. Baka dati wi nyan nanga makandra. A dei dati na wan fu den moro moi sani di mi kan memre.” Mikhail nanga Inga kon si taki di den go dini na ini kontren pe moro Kownukondre preikiman de fanowdu, a matifasi di den abi nanga Yehovah kon moro bun. A lobi fu den gi sma kon moro tranga èn Gado blesi den nanga wan moro koloku libi. Now den e du kring-wroko.

Oksana, Aleksey nanga Yury

Yury nanga Oksana, na wan trowpaar fu Ukraini. Den pasa 35 yari èn Aleksey, a manpikin fu den abi 13 yari now. Na ini 2007, den go na a bijkantoro fu Rosiakondre. Na tapu wan karta fu Rosiakondre den si taki bigi kontren ben de pe Kotoigi no preiki ete. Oksana e taki: „Baka di wi si a karta, wi frustan taki furu Kownukondre preikiman de fanowdu ete moro leki iniwan ten. Disi yepi wi fu teki a bosroiti fu froisi go na Rosiakondre.” San yepi den tu? Yury e taki: „San yepi wi furu na fu leisi artikel na ini den buku fu wi soleki ’Yu Kan Go Dini na ini wan Tra Kondre?’ * Wi go na a kontren di a bijkantoro fu Rosiakondre ben sori unu. Drape wi suku wan tanpresi nanga wan wroko.” Na ini 2008, wi froisi go na Rosiakondre.

Na a bigin, a ben muilek fu feni wan wroko èn nofo tron wi ben musu froisi go na wan tra oso. Yury e taki: „Furu leisi wi begi Gado fu no lasi-ati èn baka dati wi ben e go doro nanga a preikiwroko. Wi ben e frutrow na tapu Yehovah fu a yepi wi. Wi si fa Yehovah sorgu gi wi te wi e poti a Kownukondre na a fosi presi. A diniwroko meki a bribi fu na osofamiri fu wi kon moro tranga” (Mat. 6:22, 33). Sortu bakapisi a ben abi gi Aleksey di den go dini pe moro yepi de fanowdu? Oksana e taki: „A ben abi furu wini gi Aleksey. A gi ensrefi abra na Yehovah èn a teki dopu di a ben abi neigi yari. Fu di a si taki moro Kownukondre preikiman de fanowdu, meki a e dini leki yepipionier ibri skoro fakansi. Wi e prisiri te wi e si taki a lobi a preikiwroko èn taki a de fayafaya.” Now Yury nanga Oksana e dini leki spesrutu pionier.

„A WAN-ENKRI SANI DI HATI MI”

Ala den sma disi di go dini na wan tra kondre, e taki dati te wan sma e froisi go na wan tra presi fu du moro, a musu frutrow na tapu Yehovah dorodoro. Iya, a no makriki gi den preikiman di froisi go na wan nyun kontren. Ma den e prisiri srefisrefi fu preiki a bun nyunsu gi sma di wani arki a Kownukondre boskopu. Yu man go yepi na ini wan kontren pe moro Kownukondre preikiman de fanowdu? Te yu o du disi, dan kande yu o firi leki Yury di go dini pe moro yepi de fanowdu. A e taki fu a bosroiti disi: „A wan-enkri sani di hati mi, na taki mi no bigin moro fruku.”

^ paragraaf 20 Luku A Waktitoren fu 15  oktober 1999, bladzijde 23-27.