Go na content

Go na a tra menu

Go na table of contents

Yehovah Kotoigi

Sranantongo

Studie-Waktitoren  |  yuli 2015

Tan horibaka gi Gado Kownukondre

Tan horibaka gi Gado Kownukondre

„Den no de wan pisi fu grontapu.”YOH. 17:16.

SINGI: 63, 129

1, 2. (a) Fu san ede Kresten musu tai hori na Gado èn fa disi kan yepi wi fu no teki sei na ini den strei noso feti fu grontapu? (Luku a prenki na a bigin fu na artikel.) (b) Gi san furu sma abi tranga lobi, ma san na a bakapisi?

WI LEKI futuboi fu Yehovah no e teki sei na ini politiek afersi. Wi no e bumui nanga sani di kan tyari pratifasi kon, soleki te wan sma abi tranga lobi gi a kondre fu en, a ras fu en noso a kulturu fu en. Fu san ede wi no e du dati? Fu di wi lobi Yehovah, wi e tai hori na en èn wi e gi yesi na en (1 Yoh. 5:3). Awinsi pe wi e libi noso pe wi komoto, wi e du san Gado leri wi. A moro prenspari sani na taki wi musu tai hori na Yehovah èn wi musu horibaka gi en Kownukondre (Mat. 6:33). Dati meki wi kan taki dati wi „no de wan pisi fu grontapu”.Yes. 2:4; leisi Yohanes 17:11, 15, 16.

2 Furu sma na ini a ten disi abi tranga lobi gi a kondre, a lo noso a kulturu fu den noso srefi gi a sport grupu fu den. Ma a bakapisi fu dati na taki sma e strei nanga makandra, den no lobi makandra kwetikweti èn son leisi den kiri makandra srefi. Awinsi wi no e teki prati na den strei noso feti disi, toku den  kan abi krakti na wi tapu èn na tapu wi famiri, èn son leisi sma e du bigi ogri nanga wi srefi. Gado meki wi na so wan fasi taki wi sabi san reti èn san no reti. Fu dati ede a kan pasa makriki taki wi e mandi te lanti e teki kruka bosroiti (Gen. 1:27; Deut. 32:4). Fa yu e firi te wan sani e pasa di no reti? Yu man hori yusrefi, noso yu e sori taki yu no e agri nanga a sani dati?

3, 4. (a) Fu san ede wi no e teki sei te strei nanga feti de? (b) San wi o luku na ini na artikel disi?

3 Furu sma e teki sei na ini strei noso feti, fu di tiriman e taigi den taki na dati wan sma musu du fu sori taki a lobi a kondre fu en. Ma wi e teki na eksempre fu Yesus. Sobun, wi e no e bumui nanga politiek èn wi no e go feti (Mat. 26:52). Tru Kresten no feni taki a wan pisi fu Satan grontapu bun moro a trawan (2 Kor. 2:11). Wi no wani abi noti fu du nanga den strei èn nanga den feti fu a grontapu disi.Leisi Yohanes 15:18, 19.

4 Fu di wi na sondusma, meki a kan pasa taki sonwan fu wi e denki takru fu trawan di de tra fasi leki wi (Yer. 17:9; Ef. 4:22-24). Na ini na artikel disi, wi o luku wan tu rai di o yepi wi fu feti nanga den firi disi di e tyari pratifasi kon. Wi o luku tu san wi kan du fu no abi den firi disi moro. Wi o si fa wi kan leri wisrefi fu denki leki fa Yehovah nanga Yesus e denki, so taki wi kan tan horibaka gi a Kownukondre.

FU SAN EDE WI NO E HORIBAKA GI NOWAN PISI FU GRONTAPU?

5, 6. Di Yesus ben de na grontapu, dan fa a ben e si den difrenti grupu èn fu san ede?

5 Te wan situwâsi de pe sma e strei nanga makandra noso pe wan feti de, èn a muilek gi yu fu no teki sei, dan san yu kan du? Aksi yusrefi: ’San Yesus ben o du?’ Di a ben de na grontapu, trobi ben de na mindri den sma fu Yudea, Galilea nanga Samaria. Luku wan tu eksempre. Den Dyu nanga den Samariasma no ben e taki nanga makandra (Yoh. 4:9). Furu sani ben de di den Fariseiman nanga den Saduseiman no ben e agri nanga makandra (Tori 23:6-9). Den Dyu di ben sabi a Wet bun ben denki taki den ben betre moro den sma di no ben sabi a Wet (Yoh. 7:49). Boiti dati, a pipel no ben lobi den belasting-man nanga den Romesma kwetikweti (Mat. 9:11). Ma Yesus no bumui nanga den trobi disi. Ala ten a ben e fruteri sma den tru tori fu Yehovah èn a ben sabi taki Israel ben de a spesrutu pipel fu Gado. Ma noiti a leri den bakaman fu en taki den betre moro tra sma (Yoh. 4:22). Na presi fu dati, a leri den fu lobi ala sma.Luk. 10:27.

6 Fu san ede Yesus no ben feni taki a wan grupu prenspari moro a trawan? Fu di en nanga en Papa no e teki sei na ini den furu strei nanga feti fu a grontapu disi. Yehovah meki libisma na so wan fasi taki den ben o furu grontapu nanga ala sortu ras (Gen. 1:27, 28). Sobun, Yehovah nanga Yesus no e denki taki a wan ras, kondre noso tongo betre moro a trawan (Tori 10:34, 35; Openb. 7:9, 13, 14). Wi musu teki a moi eksempre fu den.Mat. 5:43-48.

7, 8. (a) Suma sei wi e teki èn fu san ede? (b) Suma nomo o lusu den problema fu libisma?

7 Fu san ede wi no e horibaka gi nowan libisma tiriman noso tirimakti? Fu di wi e teki a sei fu Yehovah. En na wi Tiriman. Na ini Eden, Satan ben taki dati Yehovah no de a moro bun tiriman fu libisma. A ben wani meki libisma bribi taki a fasi fa en e du sani, betre moro a fasi fa Gado e du sani. Yehovah e gi wi na okasi fu bosroiti na suma sei wi wani de. Ma fa a de nanga  yu? Yu e du san Yehovah e taki fu di yu e bribi taki a fasi fa en e du sani, betre moro a fasi fa yu e du sani? Yu e bribi taki en Kownukondre wawan man lusu den problema fu wi? Noso yu e denki taki wan sma musu bosroiti gi ensrefi san bun èn san ogri?Gen. 3:4, 5.

8 Fu eksempre, efu wan sma e aksi yu san yu e denki fu wan politiek partèi, fu wan organisâsi di wani kenki sani na ini a libimakandra, noso fu wan fu den sortu organisâsi dati, dan san yu o piki? Sonwan fu den grupu disi abi bun sani na prakseri èn den wani yepi sma. Ma wi sabi taki soso a Kownukondre fu Yehovah kan lusu den problema fu libisma èn puru ala ogridu. Na ini a gemeente, wi e du tu san Yehovah e taigi wi, na presi taki ibri sma e du san ensrefi feni bun. Dati meki pratifasi no de na ini a gemeente.

9. Sortu problema Paulus si na mindri wan tu Kresten na ini Korente èn san den ben musu du?

9 Na ini a ten fu den apostel, yu ben abi wan tu Kresten na Korente di ben e meki trobi nanga makandra. Den ben e taki: „’Mi na fu Paulus’, noso ’mi na fu Apolos’. Trawan [ben] e taki: ’Mi na fu Seifas’, noso ’mi na fu Krestes.’” Paulus no ben man bribi di a yere a tori. A ben de wan seryusu sani fu di disi ben e tyari pratifasi kon na ini a gemeente. Soleki fa a sori, dan „a gemeente fu Krestes [ben] prati”. Dati meki Paulus taigi den Kresten brada nanga sisa fu en: „Brada, na ini a nen fu wi Masra Yesus Krestes mi e gi unu deki-ati fu de wán na ini a fasi fa unu e taki. No meki pratifasi de na un mindri. Un musu de wán na ini a fasi fa unu e denki èn e prakseri.” Na so a de tu na ini a ten disi. Pratifasi no musu de na ini a gemeente.1 Kor. 1:10-13; leisi Romesma 16:17, 18.

10. San na apostel Paulus taigi den Kresten èn san wi e leri fu dati?

10 Paulus ben taigi den salfu Kresten fu no frigiti taki den ben o tan na hemel. Dati meki den no ben musu poti prakseri na „grontapu sani” (Fil. 3:17-20). * Na ini a ten disi, yu abi furu kondre di e gi wan fu den heihei man fu den a frantwortu fu teki presi gi den na ini wan tra kondre. A sma disi no e bumui nanga a politiek fu a kondre pe den seni en go noso nanga den problema drape. Na so a de tu nanga den salfu Kresten. Den e teki presi gi Gado nanga Krestes dyaso na grontapu. Ma a no fiti taki den e bumui nanga a politiek noso den problema fu grontapu (2 Kor. 5:20). Den sma di abi a howpu fu libi fu têgo na grontapu e horibaka tu gi a Kownukondre èn den no e teki sei na ini den strei nanga feti fu a grontapu disi.

LERI YUSREFI FU HORIBAKA GI YEHOVAH KOWNUKONDRE

11, 12. (a) Sortu denki wi no musu abi efu wi wani tan horibaka gi Gado Kownukondre? (b) Fa wan sisa ben e si son sma èn san yepi en fu kenki a denki fu en?

11 Na furu presi na grontapu, sma di abi a srefi historia nanga kulturu èn di e taki a srefi tongo, e firi leki den de wán. Nofo tron den e firi tranga lobi gi a presi pe den kweki. Ma wi no musu de so. Na presi fu dati, wi musu kenki a fasi fa wi e denki èn wi musu oefen a konsensi fu wi, so taki wi no e teki nowan sma sei, awinsi na ini sortu situwâsi wi de. Fa wi kan du disi?

12 Luku na eksempre fu Mirjeta. * A gebore na ini a kondre di ben nen Yugoslafia  fosi. Na ini a kontren pe a gro kon bigi, sma no ben lobi Serfiasma kwetikweti. Di a leri sabi Yehovah, a kon si taki Gado no lobi a wan ras moro a trawan èn taki Satan wani taki sma abi bitafasi gi makandra. Dati meki Mirjeta du ala san a man fu kenki a denki fu en. Ma di wan feti kon na mindri den difrenti ras na ini a kontren pe Mirjeta ben e libi, a bigin denki takru baka fu den Serfiasma. A no ben wani preiki srefi gi den. Ma a ben sabi taki a sani disi no bun. Dati meki a begi Yehovah fu yepi en fu no abi a denki disi moro. Mirjeta aksi Yehovah tu fu yepi en fu bigin nanga a pionierwroko. A e taki: „Mi kon si taki te mi e poti prakseri na a preikiwroko, dan dati e yepi mi na a moro bun fasi. Te mi e preiki, mi e pruberi fu sori lobi neleki Yehovah èn mi si taki mi no e denki takru fu sma moro.”

13. (a) Na ini sortu situwâsi Zoila ben de èn san a du? (b) San wi kan leri fu a sani di miti Zoila?

13 Zoila na wan sisa fu Meksikow di froisi go na Europa. Na ini a gemeente fu en, yu abi brada nanga sisa di de fu wan tra pisi fu Latijn-Amerika. Zoila e taki dati sonwan fu den ben taigi en fruferi sani fu a kondre fu en èn fu den gwenti nanga den poku fu a kondre fu en. A sani disi ben meki taki a mandi. Dati meki a begi Yehovah fu yepi en fu no ati bron nanga den brada nanga sisa. San wi ben o du efu wi ben de na ini a situwâsi dati? Sonwan fu wi e feti ete nanga den firi fu wi te sma e taki wan fruferi sani fu a presi pe wi kweki. Noiti wi musu taki noso du wan sani di kan gi a wán grupu a firi taki den betre moro a trawan. Wi no wani tyari pratifasi kon na mindri den brada nanga sisa fu wi, noso na mindri tra sma.Rom. 14:19; 2 Kor. 6:3.

14. San kan yepi yu fu si sma leki fa Yehovah e si den?

14 Wi alamala sabi taki den futuboi fu Yehovah de wán. Sobun, noiti wi musu denki taki a wan presi noso kondre betre moro a trawan. Ma kande den famiri fu yu noso sma na ini yu birti gi yu deki-ati fu abi tranga lobi gi a presi pe yu kweki. Dati meki a kan pasa son leisi taki yu e denki takru ete fu sma fu tra kondre, kulturu, tongo noso ras. San kan yepi yu fu kenki? Prakseri dipi fu a fasi fa Yehovah e si sma di abi tranga lobi gi a kondre fu den, noso di e denki taki den betre moro trawan. Ondrosuku a tori te yu de yu wawan noso te yu abi yu Osofamiri Anbegi. Baka dati yu kan aksi Yehovah fu yepi yu fu si tra sma leki fa en e si den.Leisi Romesma 12:2.

Efu wi wani tai hori na Yehovah, dan wi musu tan gi yesi na en, awinsi tra sma wani du wi ogri (Luku paragraaf 15 nanga 16)

15, 16. (a) San son sma o taki te den e si taki wi de tra fasi? (b) Fa papa nanga mama kan yepi den pikin fu den fu tai hori na Yehovah?

15 Wi wani dini Yehovah nanga wan bun konsensi. Sobun, son leisi a o de krin fu si taki wi de tra fasi leki den sma na wi wrokope, den pikin fu wi klas, den sma na ini wi birti noso den famiriman fu wi (1 Petr. 2:19). Yesus warskow wi taki sma no ben o lobi wi fu di wi de tra fasi. Hori na prakseri taki furu sma di e gens wi no sabi Gado Kownukondre. Dati meki den no e frustan fu san ede a de so prenspari gi wi fu horibaka gi a Kownukondre, na presi fu horibaka gi libisma tiriman.

16 Efu wi wani tai hori na Yehovah, dan wi musu gi yesi na en, awinsi san tra sma e du noso e taigi wi (Dan. 3:16-18). Spesrutu gi yongusma a hebi fu de tra fasi leki tra sma. Papa nanga mama, yepi yu pikin fu abi deki-ati te den de na skoro. Kande yu pikin frede fu taigi sma taki den no o singi gi a fraga noso taki den no o hori den fesa fu a kondre. Te yu abi yu Osofamiri  Anbegi, dan un kan taki fa Yehovah e denki fu den sani disi. Leri den pikin fa den kan taki krin fu a bribi fu den èn fa den kan du disi na wan lespeki fasi (Rom. 1:16). Yu kan yepi yu pikin tu fu di yu e go taki nanga a meneer noso a juffrouw fu den te a de fanowdu. Fruteri a meneer noso a juffrouw san wi e bribi.

LOBI ALA DEN SANI DI YEHOVAH MEKI

17. Sortu denki wi no musu abi èn fu san ede?

17 Wi kan frustan te sma lobi den kondre, den kulturu, den tongo nanga den sani di den gwenti nyan. Ma wi no musu denki taki den sani di wi lobi, betre moro di fu tra sma. Yehovah meki difrenti sani so taki wi kan prisiri nanga den (Ps. 104:24; Openb. 4:11). Sobun, fu san ede wi musu hori nomo taki a fasi fa wi gwenti du wan sani betre moro a fasi fa trawan gwenti du sani?

18. Fu san ede a bun fu si tra sma leki fa Yehovah e si den?

18 Yehovah wani taki ala sortu sma musu kon sabi en, anbegi en èn libi fu têgo (Yoh. 3:16; 1 Tim. 2:3, 4). Wi musu de klariklari fu arki san tra sma e denki. Nofo tron wi kan du soleki fa den e taki, aladi wi e denki tra fasi fu a tori kande. Efu wi e du disi, dan a libi fu wi o moro switi èn wi o prisiri moro fu sani. Na so wi kan de wán nanga wi brada nanga sisa. Te wi e tai hori na Yehovah èn wi e horibaka gi en Kownukondre, dan wi no e teki sei na ini den strei nanga feti fu a grontapu disi. Den sma fu Satan grontapu abi heimemre èn den e strei nanga makandra, ma wi no musu de so kwetikweti. Wi breiti trutru taki Yehovah leri wi fu libi bun nanga tra sma èn fu abi sakafasi. Wi e firi neleki a psalm skrifiman di ben taki: „Luku o bun èn o switi a de te brada e libi makandra leki wán famiri!”Ps. 133:1.

^ paragraaf 10 A kan taki son Kresten na ini a gemeente na Filipi ben de borgu fu Rome. Dati meki den ben abi moro reti leki den Kresten di no ben de borgu fu Rome.

^ paragraaf 12 Wi kenki wan tu fu den nen.