Go na content

Go na a tra menu

Go na table of contents

Yehovah Kotoigi

Sranantongo

Studie-Waktitoren  |  yuli 2015

„A frulusu fu unu de krosibei”!

„A frulusu fu unu de krosibei”!

„Opo tanapu leti-opo èn opo un ede luku go na loktu, bika a frulusu fu unu de krosibei.”LUK. 21:28.

SINGI: 133, 43

1. San pasa na ini a yari 66? (Luku a prenki na a bigin fu na artikel.)

KON meki wi taki dati yu na wan Kresten di e libi na Yerusalem na ini a yari 66. Wan lo sani e pasa na ini a foto. Florus, wan edeman fu Rome, teki furu moni fu a tempel tyari gowe. Baka dati den Dyu e bigin feti nanga den Romesma. Den e kiri furu srudati fu Rome èn den e taki dati den no wani den Romesma leki tiriman moro. Ma den Romesma no e draidrai fu du wan sani. Baka dri mun, a legre-edeman Cestius Gallus e kon na Yerusalem nanga 30.000 srudati èn den e lontu a foto. Den Dyu di ben opo densrefi teige den tiriman e lon go suku kibri krosibei fu a tempel. Ma te fu kaba, den srudati fu Rome e doro te na a dorosei skotu fu a tempel èn den e pruberi fu broko kon na inisei. Ala sma na ini a foto e bruya. Fa yu ben o firi te yu ben o si ala den sani disi?

2. San Kresten ben musu du na ini a yari 66 èn fa den ben kan du disi?

2 Wan tu yari na fesi, Yesus ben warskow den bakaman fu en taki den sani disi ben o pasa. A taigi den: „Te unu e si taki legre  seti kampu lontu Yerusalem, dan un musu sabi taki a ten doro te a foto o kisi pori. Dan meki den sma di de na Yudea, bigin lowe go na den bergi, meki den sma di de na ini Yerusalem hari gowe fu drape, èn meki den sma di de na den boitipresi no go na ini a foto” (Luk. 21:20, 21). Ma fa den bakaman o man gowe libi Yerusalem te srudati lontu a foto? Wan sani e pasa di den no e fruwakti. Wantronso a legre fu Rome e gowe libi Yerusalem. Soleki fa Yesus ben taki kaba, dan a legre fu Rome „syatu” a feti fu den (Mat. 24:22). Now den bakaman fu Yesus abi na okasi fu du san a taigi den. Wantewante den e lon go na den bergi abrasei fu Yordan-liba, makandra nanga ala tra Kresten di tan gi yesi na Gado èn di e libi na ini a foto nanga den kontren lontu a foto. * Baka dati, na ini a yari 70 wan tra legre fu Rome e kon na Yerusalem èn den e pori a foto. Ma den futuboi fu Gado no lasi den libi fu di den du san Yesus taigi den.

3. Nanga sortu situwâsi Kresten o kisi fu du dyonsro èn san wi o luku na ini na artikel disi?

3 Heri esi ibriwan fu wi o kisi fu du nanga wan srefi sortu situwâsi. Yesus no ben warskow den Kresten fu ten a dati nomo taki Yerusalem ben o kisi pori, ma a gebroiki den sani di pasa na a ten dati fu sori tu san o pasa te a „bigi banawtu” o bigin wantronso (Mat. 24:3, 21, 29). Ma a moi fu sabi taki „wan bigi ipi” sma o tan na libi te a bigi rampu disi o pasa na heri grontapu. (Leisi Openbaring 7:9, 13, 14.) San Bijbel e taki fu den sani disi di o pasa? A piki tapu na aksi disi prenspari, fu di a abi fu du nanga wi libi. Meki wi go luku now fa den sani di o pasa na ini a ten di e kon, o abi krakti na tapu ibriwan fu wi.

A BIGIN FU A BIGI BANAWTU

4. Fa a bigi banawtu o bigin?

4 Fa a bigi banawtu o bigin? A Bijbel buku Openbaring e gi piki tapu na aksi disi. Drape skrifi taki „Babilon a Bigiwan, a mama fu den huru-uma” o kisi pori (Openb. 17:5-7). Fu san ede Bijbel e agersi den falsi kerki nanga wan huru-uma? Fu di den kerki fesiman no tan horibaka gi Gado. Den horibaka gi den tiriman fu grontapu, na presi fu horibaka gi Yesus nanga en Kownukondre. Den no du san Bijbel e leri, soso fu di den wani abi krakti tapu politiek. Den no e dini Gado na wan soifri fasi leki fa den salfu Kresten e du (2 Kor. 11:2; Yak. 1:27; Openb. 14:4). Ma suma o pori na organisâsi disi di Bijbel e agersi nanga wan huru-uma? Na Yehovah Gado o meki „den tin tutu” fu a „redi ogri meti” ’du san a abi na prakseri’. Den tin tutu disi na ala den politiek makti di e horibaka gi den Verenigde Naties, wan organisâsi di Bijbel e agersi nanga wan „redi ogri meti”.Leisi Openbaring 17:3, 16-18.

5, 6. Fu san ede wi kan taki dati a no ala kerkisma o dede te Babilon a Bigiwan o kisi pori?

5 Ma wi musu denki taki ala den sma fu den kerki disi o dede te Babilon a Bigiwan o kisi pori? Nôno. Gado ben taigi a profeiti Sakaria fu skrifi san ben o pasa na a ten dati. Sakaria e taki fu wan sma di ben de fu wan falsi bribi. A tori e taki: „[A] o taki: ’Mi a no profeiti. Mi na wan man di e wroko na den gron, bika wan sma bai mi leki srafu sensi mi yongu.’ Efu wan sma aksi [en]: ’San na den soro di yu abi na ini yu anu?’, dan [a] o piki: ’Na naki sma naki mi di mi ben de na ini na oso fu den wan di lobi mi’” (Sak. 13:4-6). Soleki fa a sori, dan srefi wan tu kerki fesiman o drai baka gi a kerki fu den èn den o taki dati noiti den ben de fu den falsi kerki dati.

 6 Fa a o go nanga Gado pipel na a ten dati? Yesus e taki: „Fu taki en leti, efu Gado no ben o syatu a ten dati, dan nowan sma ben o feni frulusu. Ma Gado o syatu a ten gi den sma di a kari” (Mat. 24:22). Soleki fa wi si, dan na ini a yari 66, Gado ben „syatu” a ten fu a bigi banawtu. Disi meki taki „den sma di [Gado] kari”, den salfu Kresten, kisi na okasi fu lowe komoto na ini Yerusalem nanga den kontren lontu a foto disi. Na a srefi sani Gado o du tu na ini a ten di e kon. Fu den salfuwan ede, a o „syatu” a fosi pisi fu a bigi banawtu. Den politiek makti, sobun den „tin tutu”, no o kisi na okasi fu kiri Gado pipel. San o pasa dan? Baka te ala den falsi kerki kisi pori, wan syatu ten o kon pe nowan dyugudyugu no o de.

WAN TEN FU TESI ÈN FU KOTI KRUTU

7, 8. Sortu okasi o de baka te den falsi kerki kisi pori èn fa sma na a ten dati o si taki Gado pipel de tra fasi?

7 San o pasa baka te den falsi kerki kisi pori? Na a ten dati, wi o abi fu sori san de na ini wi ati trutru. Furu sma o suku yepi na den organisâsi fu libisma di Bijbel e agersi nanga „den bigi bergiston” (Openb. 6:15-17). Ma Yehovah en pipel o suku kibri na en. Di Gado „syatu” a bigi banawtu na ini a yari 66, dan dati no ben wani taki dati ala Dyu ben o tron Kresten wantronso. Na presi fu dati, a ben de a ten gi den sma di ben de Kresten kaba fu lowe komoto na ini Yerusalem soleki fa Yesus ben taigi den. Na ini a ten di e kon, te Gado o „syatu” a bigi banawtu, wi no kan fruwakti tu taki furu sma o tron tru Kresten wantronso. Na presi fu dati, ala tru anbegiman fu Gado o kisi na okasi fu sori taki den lobi Yehovah èn taki den e horibaka gi den brada fu Krestes.Mat. 25:34-40.

8 A ten disi o de wan ten fu tesi. Kande wi no e frustan ala san o pasa na a ten dati. Ma wi kan fruwakti taki a ten dati no o makriki èn taki wi o lasi son sani. Den Kresten fu Yerusalem ben abi fu libi ala den sani fu den na baka èn a no ben makriki gi den fu tan na libi (Mark. 13:15-18). Fa a de nanga wi? Wi o de klariklari fu lasi den sani fu wi soso fu kan tan dini Gado? Wi o de klariklari fu du iniwan sani di wi musu du fu sori taki wi e tai hori na Yehovah? Prakseri fu a tori. Neleki a profeiti Danièl fu owruten di ben tan dini Gado, na so wi o de a wan-enkri grupu di tan dini Yehovah awinsi san o pasa.Dan. 6:10, 11.

9, 10. (a) Sortu boskopu Gado pipel o meki bekènti na a ten fu a bigi banawtu? (b) San den feanti fu Gado pipel o du?

9 A bigi banawtu no o de a ten taki wi o preiki ’a bun nyunsu fu a Kownukondre’. A ten fu preiki a boskopu dati o pasa kaba. A ten fu „a kaba” o kon heri esi (Mat. 24:14). Nanga deki-ati, a pipel fu Gado o fruteri sma a krutuboskopu fu Yehovah di o abi krakti tapu ala sma. Kande wi o abi fu meki bekènti taki na ogri grontapu fu Satan o kisi pori krinkrin. Bijbel e agersi a boskopu dati nanga pisipisi ijs di e fadon komoto na hemel. A e taki: „Bigi pisi ijs fadon komoto fu hemel leki wan bigi alen èn den fadon kon na tapu den sma. Ibri pisi ijs ben hebi sowan tutenti kilo. Dan den sma ben e taki sani fu wisiwasi Gado, fu di a rampu fu den pisipisi ijs ben kon na den tapu èn fu di a rampu disi ben hebi srefisrefi.”Openb. 16:21.

10 Den feanti fu wi o yere a krutuboskopu dati tu. Gado ben meki a profeiti Esekièl fruteri san Gok fu Magok o du. Gok fu Magok na den sma di o span anu makandra fu kon feti nanga Gado pipel. Esekièl e  taki: „A Moro Hei Masra Yehovah taki: ’Na a dei dati yu o sidon prakseri èn yu o luku fa yu kan du ogri nanga den. Yu o taki: „Mi o hari go feti nanga a kondre di abi dorpu sondro skotu. Mi o kon feti nanga den wan di no abi nowan broko-ede èn di no frede taki ogri kan pasa nanga den. Den alamala e libi na ini dorpu sondro skotu, bowtu, nanga doro.” Yu abi na prakseri fu teki bun furu gudu fu den èn yu wani fufuru wan lo tra sani fu den tyari gowe. Yu wani go pori den presi pe sma ben go libi baka èn yu wani du ogri nanga wan pipel di mi ben puru na mindri den trakondre sma. Na a pipel disi e tyari furu gudu kon na wán èn den e libi na mindrisei fu grontapu’” (Esek. 38:10-12). A o de krin fu si taki Gado pipel no de leki ala tra sma. A o gersi leki den e libi „na mindrisei fu grontapu”. Den pipel fu grontapu no o lobi a tori dati kwetikweti. Den o wani kon feti nanga den salfuwan fu Yehovah èn nanga den wan di e horibaka gi den.

11. (a) San wi musu hori na prakseri, te a abi fu du nanga den sani di o pasa na a ten fu a bigi banawtu? (b) San sma o du te den e si den sani di o pasa na loktu?

11 San o pasa baka dati? Bijbel no e fruteri wi soifri sortu sani o pasa fosi, ma soleki fa a sori, dan son sani o pasa na a srefi ten. Na ini a profeititori di Yesus e fruteri fu a kaba fu a grontapu disi, a e taki: „Marki o de fu si na a son, a mun, nanga den stari. Sma na grontapu o frede kefalek èn den no o sabi fa fu lon komoto fu feni kibri, fu di a se o meki babari èn a o rigeri. Sma o lasi-ati krinkrin, fu di den o frede te fu dede èn fu di den no sabi san o pasa nanga grontapu, bika den krakti fu hemel o seki. Dan den o si a Manpikin fu libisma e kon na ini wan wolku nanga krakti èn nanga bigi glori” (Luk. 21:25-27; leisi Markus 13:24-26.) A profeititori disi wani taki dati sma o si sani na loktu di o frede den? Den o si sani na a son, a mun, nanga den stari? Wi sa abi fu wakti fu si fa sani o waka. Ma awinsi fa a no fa, den sani di o pasa o frede den feanti fu Gado èn den o bruya.

Wi no o frede fu di wi sabi taki wi o kisi frulusu! (Luku paragraaf 12 nanga 13)

12, 13. (a) San o pasa te Yesus kon „nanga krakti èn nanga bigi glori”? (b) San den futuboi fu Gado o du na a ten dati?

12 San o pasa te Yesus kon „nanga krakti èn nanga bigi glori”? Na a ten dati, Gado o blesi den sma di tan dini en èn a o strafu den sma di e trangayesi en (Mat. 24:46, 47, 50, 51; 25:19, 28-30). Yesus ben fruteri wan agersitori fu tyari a sani disi kon na krin. A taki: „Te a Manpikin fu libisma kon nanga en glori, makandra nanga ala den engel, dan a o go sidon na tapu en gran kownusturu. Den o tyari ala pipel kon na en fesi èn a o prati den sma neleki fa wan skapuman e prati den skapu fu den bokoboko. A o poti den skapu na en reti-anusei, ma den bokoboko a o poti na en kruktu-anusei” (Mat. 25:31-33). San o pasa nanga den skapu èn nanga den bokoboko? Den o kisi krutu. Na agersitori e taki: „Den sma disi [den bokoboko] o dede fu têgo, ma den sma di Gado feni bun o kisi têgo libi.”Mat. 25:46.

13 San den bokoboko o du te den e si taki den o „dede fu têgo”? Den o „sari” (Mat. 24:30). Ma san den brada fu Krestes nanga den wan di horibaka gi den o du na a ten dati? Fu di den e bribi na ini Yehovah Gado nanga en Manpikin Yesus Krestes, meki den o du san Yesus taigi den: „Te den sani disi e bigin, dan opo tanapu leti-opo èn opo un ede luku go na loktu, bika a frulusu fu unu de krosibei” (Luk. 21:28). Iya, wi no o frede fu di wi sabi taki wi o kisi frulusu.

 DEN O BRENKI NA INI A KOWNUKONDRE

14, 15. San na a wroko di o du fu tyari sma kon na wán baka te Gok fu Magok o kon feti nanga Gado pipel èn fa a wroko disi o pasa?

14 San o pasa baka te Gok fu Magok o kon feti nanga Gado pipel? Bijbel e taki dati a Manpikin fu libisma „o seni den engel go èn den o tyari den sma kon na wán di Gado kari komopo fu noordsei, zuidsei, owstusei, nanga west-sei, iya, fu a wan uku fu grontapu te na a tra uku èn fu a wan uku fu hemel te na a tra uku” (Mark. 13:27; Mat. 24:31). A wroko disi fu tyari sma kon na wán no abi fu du nanga a momenti di Gado e kari son Kresten fu tron salfuwan. A no abi fu du tu nanga a ten te den salfu Kresten di de na grontapu ete o kisi wan marki fu a lasti leisi (Mat. 13:37, 38). Den o kisi a marki disi leti fosi a bigi banawtu o bigin (Openb. 7:1-4). Sobun, san na a wroko di o du fu tyari sma kon na wán soleki fa Mateyus e taki? A de a ten te den salfuwan di de na grontapu ete o kisi den pai èn den o go na hemel (1 Tes. 4:15-17; Openb. 14:1). Disi o pasa baka te Gok fu Magok o kon feti nanga Gado pipel (Esek. 38:11). Dan sani o pasa soifri leki fa Yesus ben taki: „Na a ten dati den sma di Gado feni bun o brenki leki a son na ini a Kownukondre fu den Tata.”Mat. 13:43. *

15 Furu sma na ini den difrenti Kresten kerki e bribi taki Krestes o tyari den sma fu den kerki disi go na hemel nanga wan libisma skin. Den e denki tu taki sma o si fa Yesus o drai kon baka fu tiri na grontapu. Ma wi sabi taki sma no o si te Yesus kon fu di Bijbel e taki krin dati „a marki fu a Manpikin” fu libisma o kon de fu si na hemel èn Yesus o kon „na tapu den wolku fu hemel” (Mat. 24:30). Bijbel e taki tu dati „skin nanga  brudu no man go na ini a Kownukondre fu Gado”. Sobun, te Yesus o tyari sma go na hemel, den musu „kenki [fosi] na ini wan momenti, fosi yu pingi yu ai, te a lasti trompeti o bari”. * (Leisi 1 Korentesma 15:50-53.) Ala den salfuwan di de na grontapu ete èn di tan gi yesi na Gado, o tyari kon na wán wantronso.

16, 17. San musu pasa fosi a trow fu a Pikin Skapu?

16 Te ala den 144.000 salfu Kresten de na hemel kaba, dan den lasti sani kan bigin seti gi a trow fu a Pikin Skapu (Openb. 19:9). Ma wan tra sani o pasa fosi a prisiri sani disi. Hori na prakseri taki leti fosi Krestes tyari den salfuwan di de na grontapu ete go na hemel, Gok o kon feti nanga Gado pipel (Esek. 38:16). San Gado pipel o du dan? A o gersi leki den no man yepi densrefi. Den o du den srefi sortu sani di Yehovah ben taigi Kownu Yosafat fu owruten. Yehovah ben taki: „Disi leisi unu no abi fu feti. Na go un musu go drape nomo. Tanapu kánkan èn luku fa Yehovah o frulusu unu. Un sma fu Yuda nanga Yerusalem, no frede èn no beifi” (2 Kron. 20:17). Ma na ini hemel wan tra sani o pasa. Openbaring 17:14 e fruteri san o pasa te ala den salfu Kresten de na ini hemel kaba. A tekst e taki fu den feanti fu Gado pipel: „Den o feti nanga a Pikin Skapu, ma fu di a Pikin Skapu na Masra fu den masra èn Kownu fu den kownu, meki a o wini den. Den sma di de nanga en, iya, den sma di Gado kari, den wan di a teki èn di e tai hori na en, o wini a strei tu.” Yesus o kon fu frulusu Gado pipel na grontapu èn a o du dati nanga den 144.000 salfuwan di o tiri makandra nanga en.

17 Baka dati Armagedon o bigin. A feti disi o gi glori na Yehovah en santa nen (Openb. 16:16). Na a ten dati, ala sma di Bijbel e agersi nanga bokoboko, „o dede fu têgo”. A bakapisi o de taki noiti moro ogri o de na grontapu. A bigi ipi o pasa a lasti pisi fu a bigi banawtu libilibi. A kaba fu a Bijbel buku Openbaring e sori taki wan span sani o pasa baka dati. San na a sani disi? Na a trow fu a Pikin Skapu. (Openb. 21:1-4). * Ala den sma di pasa a bigi banawtu libilibi o kisi furu blesi fu di Yehovah feni den bun. Gado o sori den na omeni fasi taki a lobi den trutru. A trowfesa dati o bigi srefisrefi! Yu no e angri fu si a moi ten dati?Leisi 2 Petrus 3:13.

18. San wi musu du, now di someni span sani de so krosibei?

18 San ibriwan fu wi musu du, now di den span sani disi de so krosibei? Yehovah ben meki na apostel Petrus skrifi: „Fu di ala den sani disi o smèlter gowe na a fasi disi, meki un musu luku sortu sma un musu de. Tyari unsrefi na wan santa fasi èn du sani di e sori taki unu e dini Gado fayafaya. Tan fruwakti a dei fu Yehovah. Tan hori bun na prakseri taki a dei dati e kon . . . Fu dati ede un lobiwan, now di unu e fruwakti den sani disi, du ala muiti fu meki Gado si unu te fu kaba leki sma di de sondro flaka, sondro fowtu èn di e libi na ini freide” (2 Petr. 3:11, 12, 14). Sobun, meki wi du ala san wi man fu tan anbegi Gado na wan krin fasi, fu no abi noti fu du nanga falsi bribi èn fu horibaka gi Yesus Krestes di de Kownu fu Freide.

^ paragraaf 2 Luku A Waktitoren fu 15 april 2012, bladzijde 25 nanga 26.

^ paragraaf 15 Krestes no o tyari den salfuwan di de na grontapu ete na a ten dati, go na hemel nanga a libisma skin fu den (1 Kor. 15:48, 49). Soleki fa a sori, dan a skin fu den no o de fu feni moro neleki fa a skin fu Yesus no ben de fu feni moro.

^ paragraaf 17 Psalm 45 e sori wi pikinso kaba sortu sani o pasa fosi. A fosi sani di a Kownu o du na taki a o feti a feti fu en. Baka dati a o trow.