Go na content

Go na a tra menu

Go na table of contents

Yehovah Kotoigi

Sranantongo

Studie-Waktitoren  |  yuni 2015

Yu e memre disi ete?

Yu e memre disi ete?

Yu man memre san yu leisi na ini den Waktitoren di kon na doro no so langa pasa? We, luku efu yu kan gi piki na tapu den aksi di e kon now:

Kresten musu begi Yesus Krestes?

Nôno. Yesus srefi leri wi fa fu begi Yehovah èn a sori wi tu fa fu du dati (Mat. 6:6-9; Yoh. 11:41; 16:23). Dati meki den fosi disipel fu en ben e begi Gado, den no ben begi Yesus (Tori 4:24, 30; Kol. 1:3).1/1, bladzijde 14.

San wi kan du ibri yari fu sreka wisrefi fu memre a dede fu Yesus?

Wan fasi fa wi kan sreka wisrefi na fu leisi den Bijbeltekst di wi musu leisi na a ten fu a Memrefesa. Wan tra sani di wi kan du na fu du moro na ini a preikiwroko na a ten dati. Wi kan begi tu èn teki ten fu prakseri fu a howpu di Gado gi wi fu libi na grontapu noso na hemel.15/1, bladzijde 14-16.

Fa sani ben waka gi den tu strafuman fu Egepte di ben fruteri Yosef san den ben dren?

Yosef taigi na edeman fu den sma di ben e kanti win gi Farao taki a ben o wroko gi a kownu baka. A dren fu a bakriman ben wani taki dati Farao ben o kiri en èn taki a ben o anga en dedeskin na wan postu. Sani pasa soifri soleki fa a ben taki (Gen. 40:1-22).1/2, bladzijde 12-14.

Sortu moi kado den brada na Yapan kisi?

Den kisi wan nyun buku. A buku disi na a Evangelietori fu Mateyus di teki puru fu a Nyun-Grontapuvertaling. Den e gebroiki en na ini a preikiwroko èn furu sma di no sabi Bijbel, wani leisi en.15/2, bladzijde 3.

Sortu sani na ini a fosi yarihondro ben meki taki a bun nyunsu ben man prati moro makriki?

Wan pisi ten ben de di sma ben e kari „a freide fu Rome” èn dati meki furu dyugudyugu no ben de drape. Den Romesma ben meki bun pasi èn na den pasi disi Kresten ben gebroiki fu go preiki na furu presi. Na ala den kondre di ben de na ondro a tiri fu den Romesma, sma ben e taki Grikitongo. Disi ben meki en moro makriki fu preiki, srefi gi den Dyu di ben libi na ala sei fu a kownukondre. Kresten ben man gebroiki den wet fu den Romesma fu opo taki gi a bun nyunsu.15/2, bladzijde 20-23.

Fu san ede tru Kresten no e hori Pasen?

Yesus no aksi den bakaman fu en fu memre na opobaka fu en, ma a aksi den fu memre a dede fu en (Luk. 22:19, 20).1/3, bladzijde 8.

Na ini den yari di pasa den buku fu wi no ben taki so furu moro dati son sani noso son sma na ini Bijbel e prenki wan moro bigi sani. Fu san ede?

Bijbel e sori taki son sma e prenki wan tra sma noso wan moro bigi sani. Wan eksempre fu disi skrifi na Galasiasma 4:21-31. Ma te Bijbel no e taki dati wan Bijbel tori e prenki wan sani, dan wi no musu taki dati tu. Toku wi kan leri wan sani fu den sma di kari na ini den Bijbel tori èn fu den sani di pasa na a ten dati (Rom. 15:4).15/3, bladzijde 17, 18.

Na wan owru doti-ipi na ini Egepte, sma feni wan papirus dokumenti. Fu san ede disi prenspari?

Na a bigin fu a di fu 20 yarihondro, sma feni wan papirus dokumenti pe wan pisi fu na Evangelie fu Yohanes skrifi. Soleki fa a sori, dan a papirus dokumenti disi skrifi wan tu tenti yari baka di a buku Yohanes ben skrifi. Den sani na tapu a pisi papirus disi e sori krin taki san skrifi na ini Bijbel soifri èn taki wi no abi fu tweifri na dati.1/4, bladzijde 10, 11.

Fu san ede a seti fu puru wan sma na ini a gemeente na wan lobi-ati sani?

Bijbel e sori taki a seti fu puru wan sma na ini a gemeente na wan seryusu sani. A e sori tu sortu wini dati e tyari kon (1 Kor. 5:11-13). A e gi Gado nen glori, a e sorgu taki a gemeente tan krin èn a kan yepi a sma fu drai kon baka.15/4, bladzijde 29, 30.