Go na content

Go na a tra menu

Go na table of contents

Yehovah Kotoigi

Sranantongo

Studie-Waktitoren  |  yuni 2015

Krestes e sori a krakti fu Gado

Krestes e sori a krakti fu Gado

’Krestes na a sma di e sori a krakti fu Gado.’1 KOR. 1:24.

1. Fu san ede Paulus taki dati ’Krestes na a sma di e sori a krakti fu Gado’?

YEHOVAH gebroiki Yesus Krestes fu sori sma a makti fu Gado na wan spesrutu fasi. Di Yesus ben de na grontapu, a du furu wondru. Na ini Bijbel wi kan leisi san na wan tu fu den wondru disi di kan tranga a bribi fu wi (Mat. 9:35; Luk. 9:11). Iya, Yehovah gi Yesus furu makti. Dati meki na apostel Paulus ben kan taki fu Yesus: ’Krestes na a sma di e sori a krakti fu Gado’ (1 Kor. 1:24). Ma sortu krakti den wondru fu Yesus kan abi tapu a libi fu wi?

2. San wi kan leri fu den wondru di Yesus du?

2 Na apostel Petrus ben taki dati Yesus du wondru noso „bigi sani” (Tori 2:22). Den wondru di Yesus du na grontapu, e sori taki wi o kisi moro bigi blesi te a o tiri leki kownu. Na ini Gado en nyun grontapu, Yesus o du den wondru disi baka, ma disi leisi a o du en na heri grontapu. Den wondru fu en e yepi wi tu fu frustan sortu fasi Yesus nanga en Papa abi. Wi o go luku now san na wan tu fu den wondru di Yesus du. Wi o si sortu krakti den kan abi tapu a libi fu wi now èn na ini a ten di e kon.

 WAN WONDRU DI E LERI WI FU GI SMA SANI

3. (a) Fruteri fa a du kon taki Yesus du en fosi wondru? (b) Di Yesus ben de na Kana, dan fa a sori taki a lobi fu gi sma sani?

3 Yesus du en fosi wondru di a ben de na wan trowfesa na Kana na ini Galilea. A kan taki moro sma kon na a fesa leki san den ben fruwakti. Bijbel no e taki fa a du kon, ma baka wan pisi ten win no ben de moro. A sani disi ben kan gi a trowpaar syen, fu di na ini a ten dati a ben de prenspari srefisrefi fu sori switifasi gi fisitiman èn fu sorgu gi den. Wan fu den sma di ben de na a fesa na Maria, a mama fu Yesus. Yu denki taki Maria aksi Yesus fu yepi a trowpaar fu di a ben bribi taki Yesus ben man du wondru? A musu fu de taki Maria denki dipi fu ala den profeititori di ben e taki fu en manpikin. A ben sabi taki sma ben o kari Yesus, a „Manpikin fu a Moro Heiwan” (Luk. 1:30-32; 2:52). Wán sani wi sabi seiker. Maria nanga Yesus ben wani yepi a trowpaar. Sobun, Yesus du wan wondru èn a meki hondrohondro liter watra tron „bun win”. (Leisi Yohanes 2:3, 6-11.) A de so taki Yesus ben musu fu du a wondru disi? Nôno. A du en fu di a lobi sma èn a teki na eksempre fu en Papa di lobi fu gi sma sani.

4, 5. (a) San wi kan leri fu a fosi wondru di Yesus du? (b) San a wondru di Yesus du na Kana e sori wi fu a ten di e kon?

4 A wondru di Yesus du, meki taki bun furu win ben de. A bun win disi ben sari gi a bigi grupu sma di ben de drape. Yu e si san wi kan leri fu a wondru disi? Yesus ben de klariklari fu du a moi wondru disi, fu di a fasi fa sma e firi de prenspari gi en nanga en Papa. Yesus nanga en Papa no gridi. Na presi fu dati den lobi fu gi sma sani. Prakseri fa Yehovah o gebroiki a makti fu en fu sorgu taki „ala den pipel” na ini a nyun grontapu o abi bun furu nyanyan.Leisi Yesaya 25:6.

5 Prakseri a tori! Wan ten o kon taki Yehovah o gi wi ala san wi abi fanowdu trutru. Ala sma o abi wan moi oso nanga bun nyanyan. Wi e prisiri te wi e prakseri ala den moi sani di Yehovah o gi wi na ini a paradijs.

Te wi e meki ten gi sma, dan wi e sori taki wi lobi fu gi sani neleki Yesus (Luku paragraaf 6)

6. Fa Yesus gebroiki a makti fu en èn fa wi kan de neleki en?

6 Wan leisi Didibri ben wani kori Yesus fu a du wan wondru èn fu meki ston tron brede. Ma Yesus ben weigri fu du disi. A no ben wani gebroiki a makti fu en fu kisi wini gi ensrefi (Mat. 4:2-4). Ma a gebroiki a makti disi fu yepi tra sma. Fa wi kan de leki Yesus? Yesus ben gi futuboi fu Gado deki-ati fu „abi a gwenti fu gi sma sani” (Luk. 6:38). Wi kan du disi te wi e kari sma kon na wi oso fu nyan nanga wi. Yu denki taki yu kan meki ten gi trawan baka a konmakandra? Kande yu kan arki te wan brada e oefen a lezing fu en. San wi kan du fu yepi trawan na ini a preikiwroko? Efu wi de klariklari fu yepi trawan te wi man, dan  wi e sori taki wi de neleki Yesus di lobi fu gi sma sani.

„ALA DEN SMA NYAN DEN BERE FURU”

7. Sortu problema o de na ini Satan grontapu ala ten?

7 Pôtisma ben de kaba sensi ten. Yehovah ben taigi en pipel Israel taki pôtisma ben o de na ini a kondre (Deut. 15:11). Hondrohondro yari baka dati Yesus ben taki: „Den pôti sma de nanga unu ala ten” (Mat. 26:11). Yesus ben wani sori nanga disi taki pôtisma ben o de na grontapu ala ten? Nôno. A ben wani sori taki pôtisma ben o de solanga a kruka grontapu fu Satan disi de. Ma te a Kownukondre o tiri, dan a libi na ini a nyun grontapu o de heri tra fasi! Na a ten dati, sma no o pôti moro. Ala sma o abi nofo nyanyan èn den o kisi san den abi fanowdu.

8, 9. (a) San meki Yesus du wan wondru pe a gi dusundusun sma nyanyan? (b) Fa yu e firi te yu e prakseri a wondru di Yesus du?

8 A psalm skrifiman ben taki fu Yehovah: „Yu e opo yu anu èn yu e gi ala libisani san den e angri fu kisi” (Ps. 145:16). ’Krestes di e sori a krakti fu Gado’ èn di de neleki en Papa, ben lobi yepi sma. A no ben du en nomo fu sori taki a abi makti. Ma a ben e broko en ede nanga sma trutru. Meki wi go luku Mateyus 14:14-21. (Leisi en.) Den sma ben komoto na den foto èn nanga futu den ben waka kon na Yesus baka (Mat. 14:13). Di neti fadon, den bakaman fu Yesus ben e broko den ede nanga den sma fu di den ben swaki èn angri ben e kiri den. Dati meki den aksi Yesus fu seni den sma gowe meki den go bai nyanyan gi densrefi. San Yesus ben o du?

9 Yesus teki feifi brede nanga tu fisi fu gi nyanyan na 5000 mansma èn na den umasma nanga pikin-nengre di ben de drape tu. Te wi e prakseri a fasi fa Yesus gebroiki a makti fu en, dan disi e naki wi ati. Fu di a ben sari den sma, meki a sorgu gi ala den osofamiri drape. A sorgu gi den pikin-nengre srefi tu. Ala sma „nyan den bere furu”. Disi e sori wi taki nofo nyanyan ben de. Yesus no gi den sma wan pikin pisi brede nomo. Ma a gi den nyanyan di ben o gi den krakti baka, te den ben musu waka a langa pasi go na oso (Luk. 9:10-17). Boiti dati, den bakaman fu en ben kan furu 12 baskita nanga a nyanyan di tan abra.

10. San Gado o du dyonsro nanga pôtifasi?

10 Milyunmilyun sma pôti fu di den tiriman fu grontapu abi bigi-ai èn den kruka. Yu abi son brada nanga sisa srefi di no abi nofo fu nyan. Ma a ten o kon taki den libisma di e gi yesi na Gado, o libi na ini wan grontapu pe nowan krukafasi o de èn pe nowan sma o pôti. A ten disi de krosibei. Efu yu ben abi a makti, dan yu no ben o gi sma san den abi fanowdu? Na Almakti Gado abi a makti fu du dati èn a de klariklari fu du en tu. Dyonsro a o du san a pramisi. Iya, a ten doro taki wi o kisi frulusu!Leisi Psalm 72:16.

11. (a) Fu san ede yu sabi seiker taki dyonsro Krestes o gebroiki en makti na heri grontapu? (b) San yu musu du, now di yu sabi disi?

11 Di Yesus ben de na grontapu, dan a ben wroko na ini wan pikin kontren èn a ben du dati dri nanga afu yari nomo (Mat. 15:24). Te a o tiri leki kownu wán dusun yari, dan a o tiri heri grontapu (Ps. 72:8). Den wondru di Yesus du, e gi wi a dyaranti taki a wani gebroiki a makti fu en fu du bun gi wi. Wi no man du wondru, ma wi kan sori sma san skrifi na ini Gado Wortu èn wi kan du disi nanga faya. Bijbel profeititori e gi wi a dyaranti taki wan moro betre ten o kon. Wi leki Kotoigi fu Yehovah sabi san o pasa. Sobun, wi kan taki dati wi  abi wan paiman na tra sma (Rom. 1:14, 15). Meki wi denki dipi fu a tori disi èn meki wi fruteri tra sma a bun nyunsu fu Gado Kownukondre.Ps. 45:1; 49:3.

YEHOVAH NANGA YESUS MAN BASI SANI SOLEKI A WINTI NANGA A SE

12. Fu san ede wi sabi taki Yesus e frustan heri bun fa Gado seti a grontapu so taki libi kan de?

12 Di Gado meki grontapu nanga ala den tra sani na grontapu, en wan-enkri Manpikin ben de na en sei leki „wan tumusi bun wrokoman” (Odo 8:22, 30, 31; Kol. 1:15-17). Sobun, Yesus sabi fa Yehovah seti sani so taki libi kan de na grontapu èn a sabi heri bun fa den sani disi e wroko. A sabi fa sani soleki winti, alen nanga a son e wroko. A sabi tu fa a kan basi den èn fa a musu gebroiki den.

Fa yu e firi te yu e denki a fasi fa Yesus ben e du wondru? (Luku paragraaf 13 nanga 14)

13, 14. Gi wan eksempre di e sori fa Krestes man basi sani soleki a winti nanga a se.

13 Di Yesus ben de na grontapu, a sori „a krakti fu Gado” fu di a ben man basi sani soleki a winti nanga a se. Luku san Yesus du di wan bigi winti wai. A winti ben wai so tranga taki den disipel fu en ben kan lasi den libi. (Leisi Markus 4:37-39.) Wan Bijbel sabiman e taki: „A Griki wortu [gi „bigi winti” na Markus 4:37] abi fu du nanga wan bigi draiwinti di kan meki sma lasi den libi. Noiti a abi fu du nanga wan pikin winti, . . . ma a de wan bun tranga winti di e kon nanga bigi blaka wolku èn nanga hebi alen. Baka so wan hebi winti, furu sani broko èn a heri presi bruya.”

14 Prakseri san e miti den disipel: Den skwala e naki a boto èn ibri leisi den e meki taki watra e kon na ini a boto. A bigi winti di e wai e meki furu babari èn a boto e seki hebi. Aladi den sani disi e pasa, toku Yesus e sribi fu di a weri. Ma den disipel fu en frede. Dati meki den e wiki Yesus èn den e bari: „Wi o sungu!” (Mat. 8:25) Sobun, Yesus e opo, dan a e bari a winti nanga a se. A e taki: „Tapu! Tan tiri!” Dan a tranga winti e saka (Mark. 4:39). Fu taki en leti, Yesus taigi a winti nanga a se fu tan tiri èn fu no opo kon moro. San ben de a bakapisi? „Ala sani kon tiri.” Dyaso wi e si o bigi a makti fu Yesus de!

15. Fa na Almakti Gado srefi sori taki a man basi sani soleki a winti nanga a se?

15 A sma di gi Krestes a makti fu en na Yehovah. Fu dati ede wi kan bribi taki na Almakti Gado srefi man basi sani soleki a winti nanga a se. Luku wan tu eksempre. Fosi a Frudu na ini a ten fu Noa, Yehovah taki: „Ete seibi dei, dan mi o meki alen fadon kon na grontapu fotenti dei nanga fotenti neti” (Gen. 7:4). Na Eksodes 14:21 wi e leisi tu: „Yehovah meki wan tranga winti fu owstusei dribi a watra.” Na Yona 1:4 wi e leisi: „Yehovah meki wan bigi winti wai na a se èn a se kon krasi srefisrefi. Pikinmoro a sipi sungu.” A e gi wi deki-ati fu sabi taki Yehovah man basi den sani soleki a winti nanga a se. Iya, wi abi a dyaranti taki na ini a ten di e kon sani o go bun na grontapu.

16. Fu san ede a e gi wi deki-ati fu sabi taki wi Mekiman nanga en wan-enkri Manpikin man basi sani soleki a winti nanga a se?

16 Te wi e denki fu a bigi makti di wi Mekiman nanga a „tumusi bun wrokoman” fu en abi, dan dati e gi wi furu deki-ati. Te Krestes o tiri wán dusun yari, dan nowan sma na grontapu abi fu frede moro. Noiti moro rampu o pasa. Noiti moro sma o abi fu frede taki bigi draiwinti, tsunami, bergi di e spiti faya nanga gronseki o de na ini a nyun grontapu. A bun fu denki a ten te nowan fu den sani disi o kiri sma noso o gi den mankeri fu di „a tenti fu Gado [o] de na libisma” (Openb. 21:3, 4). Wi kan de  seiker taki na ini a Dusun Yari Tiri, a krakti fu Gado di de fu si na ini Krestes, o man basi ala sani soleki a winti nanga a se.

TEKI NA EKSEMPRE FU GADO NANGA KRESTES

17. San na wán fasi fa wi kan de leki Gado nanga Krestes?

17 Wi no abi makti leki Yehovah nanga Yesus. Fu dati ede wi no man meki taki rampu no pasa. Ma wan sani de di wi man du. Wi man du san skrifi na ini Odo 3:27. (Leisi en.) Te den brada nanga sisa fu wi e pina, dan wi kan yepi den, wi kan horibaka gi den èn wi kan trowstu den (Odo 17:17). Fu eksempre, wi kan yepi den te wan rampu pasa. Na so yu ben abi wan sisa di ben lasi en masra na ini dede èn di wan bigi draiwinti wai na ini a kondre fu en, furu sani na en oso kon broko. Baka dati a skrifi wan brifi pe a ben taki: „Mi breiti trutru nanga na organisâsi fu Yehovah. Den no sorgu gi mi nomo, ma den trowstu mi tu nanga yepi fu Bijbel.” Wan sisa di no trow ben e firi brokosaka di wan bigi winti wai di meki taki furu sani na en oso kon broko. Baka di den brada yepi en fu meki en oso baka, a taki: „Mi no man taki fa mi e firi! A muilek gi mi fu taigi unu san mi e denki nownowde. . . . Yehovah, mi e taki yu tangi!” Wi breiti taki den brada nanga sisa fu wi e broko den ede trutru nanga tra sma di de na nowtu. Ma san e meki wi de nanga moro prisiri na taki Yehovah nanga Yesus Krestes e broko den ede nanga wi trutru.

18. Fa yu e firi te yu e denki fu san ede Yesus du wondru?

18 Di Yesus du a wroko fu Gado dyaso na grontapu, a buweisi taki en na a sma di e sori ’a krakti fu Gado’. Ma fu san ede a du disi? Noiti wi si taki a gebroiki a makti fu en fu meki bigi, noso fu kisi wini gi ensrefi. Iya, den wondru di Yesus du e sori taki a lobi libisma. Na dati wi o luku na ini a tra artikel.