Go na content

Go na a tra menu

Go na table of contents

Yehovah Kotoigi

Sranantongo

Studie-Waktitoren  |  yuni 2015

Wi kan tan libi wan krin libi

Wi kan tan libi wan krin libi

„Krin un anu èn . . . krin un ati.”YAK. 4:8.

1. Fa furu sma na ini a grontapu disi e libi?

WI E libi na ini wan grontapu pe furu sma no e libi wan krin libi. Fu eksempre, someni sma no abi trobi te tu man noso tu frow e libi nanga makandra, noso te sma di no trow abi seks nanga makandra. Na ini furu felem, buku, poku nanga reklame yu e si sani di abi fu du nanga seks (Ps. 12:8). Iya, na ala sei yu e si taki sma e du hurudu. Sobun, kande yu e aksi yusrefi: ’Mi man libi wan krin libi trutru?’ We, a kan. Yehovah e yepi tru Kresten fu libi wan krin libi.Leisi 1 Tesalonikasma 4:3-5.

2, 3. (a) Fu san ede a prenspari fu feti nanga takru lostu? (b) San wi o luku na ini na artikel disi?

2 Efu wi wani plisi Yehovah, dan wi no musu du sani di a no lobi kwetikweti. Ma fu di wi na sondusma, meki a kan taki a prakseri fu du hurudu e hari wi, neleki fa beti e hari fisi. Efu wi e bigin kisi prakseri di abi fu du nanga hurudu, dan yu musu puru den prakseri dati na yu ede wantewante. Efu wi no e du dati, dan den o kon so tranga taki te wi kisi na okasi fu du hurudu, wi kan du en. Dati meki Bijbel e taki: „Te a  [sma] kweki a lostu, a e tyari sondu kon te fu kaba.”Leisi Yakobus 1:14, 15.

3 Takru lostu kan gro na ini wi ati safrisafri. Ma a bun fu sabi taki te wi e du ala san wi man fu no meki takru lostu teki rutu na ini wi ati, dan wi no o du hurudu èn wi no o firi den takru bakapisi di e kon fu dati (Gal. 5:16). Wi o luku dri sani di kan yepi wi fu feti nanga takru lostu. Den dri sani disi na a matifasi di wi abi nanga Yehovah, a rai di de feni na ini en Wortu nanga a yepi fu lepi Kresten.

„KON KROSIBEI NA GADO”

4. Fu san ede a prenspari fu kon krosibei na Yehovah?

4 Den sma di wani „kon krosibei na Gado” e kisi a rai disi fu Bijbel: „Krin un anu èn . . . krin un ati” (Yak. 4:8). Te wi no wani pori a matifasi di wi abi nanga Yehovah, dan wi o pruberi fu prisiri en ati nanga ala san wi e du noso e denki. Efu den prakseri fu wi krin, dan wi o abi „wan krin ati” tu (Ps. 24:3, 4; 51:6; Fil. 4:8). A tru taki Yehovah e frustan taki wi na sondusma. A sabi taki wi kan kisi takru lostu. Ma fu di wi no wani taki Yehovah e sari, meki wi e du ala san wi man fu feti nanga prakseri di no krin (Gen. 6:5, 6). Te wi e hori den sani disi na prakseri, dan dati o yepi wi fu meki moro muiti fu tan abi wan krin denki.

5, 6. Fa begi kan yepi wi fu feti nanga prakseri di abi fu nanga hurudu?

5 Wan prenspari fasi fa wi kan sori taki wi e frutrow na tapu Yehovah dorodoro na te wi e begi en fu yepi wi feti nanga prakseri di no krin. Te wi e kon krosibei na Yehovah na ini begi, dan a o kon krosibei na wi. A de klariklari fu gi wi en santa yeye, so taki wi kisi a krakti fu tan feti nanga prakseri di abi fu du nanga hurudu. Na so wi kan tan libi wan krin libi. Sobun, meki wi fruteri Gado taki wi e angri fu plisi en, srefi nanga den sani di wi e prakseri dipi na ini wi ati (Ps. 19:14). Wi e aksi en nanga sakafasi efu a wani ondrosuku wi? Wi e aksi en fu sori wi efu wi abi takru lostu noso prakseri di kan meki wi go du sondu ’di kan hati wi bakaten’? (Ps. 139:23, 24) Wi abi a gwenti fu aksi en efu a wani yepi wi du san reti te wi e kisi tesi?Mat. 6:13.

6 A fasi fa wi kweki noso den sani di wi ben du fosi, kan meki taki wi kon lobi sani di Yehovah no feni bun. Ma toku Gado kan yepi wi fu kenki wi libi na so wan fasi taki wi kan tan dini en soleki fa a wani. Kownu David ben sabi disi. Baka di a du hurudu nanga Batseiba, a begi Yehovah: „Meki mi kon abi wan krin ati èn meki mi kisi wan nyun denki, so taki mi no degedege” (Ps. 51:10, 12). Sobun, efu wi ben abi takru lostu fosi èn wi e feti ete nanga den, dan Yehovah kan yepi wi. A kan meki a firi di wi abi fu gi yesi na en èn fu du san reti, kon moro tranga. A man yepi wi tu fu basi den sondu prakseri fu wi.Ps. 119:133.

Efu takru lostu e bigin teki rutu na ini wi ati, dan wi musu puru en wantewante (Luku paragraaf 6)

’SORGU TAKI UNU TRON SMA DI E DU SAN A WORTU FU GADO E TAKI’

7. Fa Gado Wortu kan yepi wi fu no kisi prakseri di no krin?

7 Yehovah kan piki den begi fu wi nanga yepi fu Bijbel. A koni di de fu feni na ini Gado Wortu „de soifri” (Yak. 3:17). Te wi e leisi Bijbel ibri dei èn wi e denki dipi fu san wi e leisi, dan dati kan yepi wi fu feti nanga prakseri di abi fu du nanga hurudu (Ps. 19:7, 11; 119:9, 11). Boiti dati, Bijbel abi eksempre nanga spesrutu rai di kan yepi wi fu no kisi takru lostu noso prakseri di no krin.

8, 9. (a) Fu san ede a yonguman na ini Odo kapitel 7 go du hurudu nanga wan huru-uma? (b) Te wi e luku na eksempre dati, dan fa a kan yepi wi?

 8 Na Odo 5:8 wi e leisi: „Tan farawe fu na uma [di e du hurudu]. No go krosibei fu a doromofo fu en oso.” Odo kapitel 7 e sori wi san kan pasa efu wi no e poti prakseri na a rai disi. Drape wi e leisi fa wan yonguman go koiri krosibei fu na oso fu wan huru-uma. Neti fadon kaba. Tapu na uku fu a strati wan uma e waka kon miti en. Na uma e weri krosi di e poti en skin na doro. A e grabu a yonguman, dan a e bosi en. A fasi fa na uma e taki, e meki lostu opo kon na ini a yonguman teleki a no man hori ensrefi moro. Baka dati den e du hurudu. A kan taki biginbigin a yonguman no ben abi na prakseri fu du dati. Ma fu di a no abi ondrofeni èn a no gebroiki en frustan, meki a abi fu libi nanga den takru bakapisi fu san a du. Moro betre a ben tan farawe fu na uma dati!Odo 7:6-27.

9 Son leisi a kan pasa tu nanga wi taki wi no e gebroiki wi frustan. Kande wi e kon na ini situwâsi di kan meki taki wi e kisi takru lostu. Fu eksempre, te neti son telefisi-station e sori programa noso felem di abi furu seks. Sobun, yu kan kon na ini problema efu yu e sidon omeni  yuru e go fu a wan station na a trawan fu luku san de tapu telefisi. Kande wi abi a gwenti fu go na presi tapu Internet pe sma e go fu taki nanga makandra, noso wi e go na tra website. Kande wi e go sukusuku ala sortu sani tapu Internet sondro fu sabi san wi o opo. Na ala den website disi boskopu kan opo kon wantronso di kan hari wi fu go luku porno noso fu du tra sani di abi fu du nanga seks. Disi kan meki wi si sani di kan meki wi kisi takru lostu èn a kan abi takru bakapisi. A kan meki taki wi trangayesi Yehovah.

10. Fu san ede a kan abi takru bakapisi te wi e prei nanga den firi fu trawan? (Luku a prenki na a bigin fu na artikel.)

10 Bijbel e gi wi rai tu di e sori wi fa brada nanga sisa musu tyari densrefi te den de nanga makandra. (Leisi 1 Timoteyus 5:2.) Kresten musu sori lobifiri soso gi den trowpatna noso gi wan sma di den wani trow nanga en. Den no e prei nanga den firi fu tra sma. Kande son sma feni taki a no ogri fu meki trawan denki taki den abi lobifiri gi den, solanga den no e fasi makandra. Fu dati ede den e luku a sma na wan fasi fu hari en prakseri, den e meki sani nanga den skin noso den e du tra sani. Ma te sma e prei nanga den firi fu makandra, dan den ala tu kan kisi prakseri di no krin èn den kan du hurudu. A sani disi pasa kaba èn a kan pasa baka.

11. Sortu bun eksempre Yosef gi wi?

11 Yosef na wan bun eksempre gi wi. Di Potifar wefi pruberi fu kori Yosef, a weigri fu du san a frow disi aksi en. Ma a frow no libi a tori so. Ibri dei a tan aksi Yosef fu kon na en so taki den ben kan de den wawan (Gen. 39:7, 8, 10). Wan sabiman e taki dati Potifar wefi ben howpu taki efu en nanga Yosef ben de den wawan, dan Yosef ben o wani didon nanga en. Ma Yosef ben abi a fasti bosroiti fu no meki Potifar wefi kori en èn noiti a ben o du sani tu fu meki Potifar wefi prakseri taki a abi firi gi en. Sobun, a no meki takru lostu teki rutu na ini en ati. Di na uma pruberi fu dwengi Yosef fu abi seks nanga en, Yosef gebroiki en frustan. A „libi a krosi fu en na ini na anu fu na uma, dan a lon go na dorosei”.Gen. 39:12.

12. Fa wi sabi taki den sani di wi e luku kan abi krakti tapu wi ati?

12 Yesus ben warskow wi tu taki den sani di wi e luku kan abi krakti tapu wi ati èn den kan meki takru sekslostu opo kon. A taki: „Iniwan sma di e tan luku wan uma nanga tranga lostu gi en, du sutadu nanga en kaba na ini en ati” (Mat. 5:28). No frigiti san pasa nanga Kownu David. A ben de na tapu „a daki fu en oso”, di „a si wan uma e wasi” (2 Sam. 11:2). A no luku go na wan tra sei fu kan poti en prakseri na wan tra sani. Dati meki a kisi firi gi wan uma di ben de a wefi fu wan tra man. Na so a go du hurudu nanga na uma disi.

13. Fu san ede wi musu ’meki wan frubontu nanga wi ai’ èn san disi wani taki?

13 Efu wi wani feti nanga prakseri di abi fu du nanga hurudu, dan wi musu ’meki wan frubontu nanga wi ai’, neleki san Yob du (Yob 31:1, 7, 9). Wi musu du ala san wi man fu dwengi wi ai so taki wi no e kisi sekslostu gi trawan di no de wi trowpatna. Sobun, te wi e si wan fowtow na tapu computer di abi fu du nanga seks, noso wan fowtow na tapu den bigi bord na seipasi, noso na ini tijdschrift, na koranti noso na iniwan tra presi, dan wi musu dwengi wi ai fu no tan luku.

14. Fa wi kan kisi wini fu a rai di Bijbel e gi wi fu tan libi wan krin libi?

 14 Efu wan fu den sani di wi luku te nanga now e sori taki yu musu meki moro muiti fu feti nanga takru lostu, dan yu musu du wan sani wantewante. Yu musu de klariklari fu teki a rai fu Gado Wortu èn disi o yepi yu fu no du sani di no bun. Na so wi kan libi wan krin libi.Leisi Yakobus 1:21-25.

„KARI DEN OWRUMAN”

15. Fu san ede a prenspari fu suku yepi efu wi e feti nanga takru lostu?

15 Efu yu e feti nanga takru lostu, dan taki nanga wan sma na ini a gemeente di e dini Yehovah langa ten kaba èn di kan gi yu bun rai fu Gado Wortu. Kande a no makriki fu taki nanga trawan fu den sortu problema disi, ma a prenspari fu aksi yepi (Odo 18:1; Hebr. 3:12, 13). Lepi Kresten kan yepi yu fu si sortu kenki yu musu tyari kon. Te yu e tyari den kenki disi kon, dan dati kan yepi yu fu tan abi Yehovah leki yu Mati.

16, 17. (a) Fa owruman kan yepi den sma di e feti nanga takru lostu? Gi wan eksempre. (b) Fu san ede a bun taki sma di e luku porno go suku yepi wantewante?

16 Spesrutu den owruman kan yepi wi bun. (Leisi Yakobus 5:13-15.) Wan yonguman fu Brasyonkondre ben e feti nanga takru lostu furu yari langa. A e fruteri: „Mi ben sabi taki Yehovah no ben lobi den sani di mi ben e denki. Ma mi ben e syen tumusi fu fruteri trawan san mi ben e firi.” Wan owruman di ben e broko en ede nanga en, gi en deki-ati fu go suku yepi. A yonguman e taki: „Mi ben e fruwondru di mi si fa den owruman sori switifasi gi mi. Den ben e frustan den firi fu mi èn den ben sori switifasi moro leki san mi ben frudini. Di mi ben e fruteri den san na mi problema, den arki mi bun. Den gebroiki Bijbel fu sori mi taki Yehovah lobi mi èn den begi nanga mi. Dati ben meki en moro makriki gi mi fu teki a Bijbel rai di den gi mi.” A yonguman disi du muiti fu meki a matifasi di a ben abi nanga Yehovah kon moro tranga. Baka wan tu yari a taki: „Now mi e frustan o prenspari a de fu suku yepi, na presi fu pruberi fu tyari yu lai yu wawan.”

17 Te yu abi a gwenti fu luku porno, dan yu musu suku yepi wantewante. O moro yu e draidrai fu suku yepi, o moro muilek a o de gi yu fu no du hurudu. Efu yu du hurudu, dan yu o hati trawan èn yu kan meki taki sma taki takru fu Yehovah. Furu sma aksi den owruman fu yepi den. Den teki a rai fu den owruman disi fu di den wani plisi Yehovah èn tan na ini a Kresten gemeente.Yak. 1:15; Ps. 141:5; Hebr. 12:5, 6.

MEKI MUITI FU TAN LIBI WAN KRIN LIBI

18. Sortu muiti yu musu meki?

18 Dei fu dei moro nanga moro sma na ini a grontapu fu Satan e du hurudu. Ma den futuboi fu Yehovah e wroko tranga fu tan abi wan krin denki èn fu libi wan krin libi soleki fa Yehovah wani. Yehovah breiti nanga den brada nanga sisa disi. Sobun, meki ibriwan fu wi meki muiti fu tan krosibei na Yehovah. Meki wi teki a rai di a e gi wi na ini en Wortu èn na ini a gemeente. Te wi e tan libi wan krin libi, dan wi o de koloku èn wi o abi wan krin konsensi (Ps. 119:5, 6). Na ini a ten di e kon, baka te Satan no de moro, wi o abi a grani fu libi fu têgo na ini wan nyun grontapu di krin.