Go na content

Go na a tra menu

Go na table of contents

Yehovah Kotoigi

Sranantongo

Studie-Waktitoren  |  yuni 2015

„Efu Kingsley man du en, dan mi man du en tu!”

„Efu Kingsley man du en, dan mi man du en tu!”

KINGSLEY o hori en fosi lezing na a Theokrasia Diniwroko-skoro. Wan brada e fasi en na en skowru èn Kingsley e bigin leisi. A e leisi ibri wortu krin èn a no e misi nowan pisi fu den wortu. Ma wakti! Fu san ede a no e luku na ini en Bijbel?

Kingsley e libi na Sri Lanka. A breni èn a no man yere bun. A e sidon na ini wan rolsturu. Fa a man disi leri sabi Yehovah èn san a du fu man de na a Theokrasia Diniwroko-skoro? Kon meki mi fruteri yu.

Di mi miti Kingsley a fosi leisi, a naki mi ati fu si fa a ben e angri fu kon sabi den tru tori fu Bijbel. Fosi dati, a ben studeri Bijbel kaba nanga tra Kotoigi. A ben abi a buku di nen Sabi di e tjari joe go na têgo libi. * A ben abi wan di ben meki spesrutu gi brenisma. Yu ben kan si taki a ben gebroiki a buku furu. Di mi aksi en efu a wani studeri Bijbel baka, a ben wani. Ma tu problema ben de.

A fosi problema na taki Kingsley ben e libi na ini wan oso nanga tra owrusma nanga malengrisma. Fu di furu babari ben de na ini na oso dati èn Kingsley no ben man yere so bun, meki mi ben abi fu taki bun tranga. Fu taki en leti, ala sma na  ini na oso ben man yere san wi ben e taki te wi ben e studeri ala wiki.

A tra problema na taki Kingsley ben man leisi èn frustan wan pikin pisi nomo fu san wi ben e studeri ibri leisi. Fu kisi moro wini fu a studie, a ben e sreka ensrefi bun. Fosi mi ben e kon na en fu studeri, a ben e leisi a pisi di wi ben o luku wan tu tron. A ben e suku den tekst na ini a Bijbel fu en di meki spesrutu gi brenisma so taki den kan leisi en nanga den finga. Dan a ben e sidon denki fa a ben o piki den aksi. A fasi fa a ben e sreka ensrefi ben de heri bun. Te wi ben e studeri, a ben e sidon na tapu wan matamata èn a ben fow en futu. Kingsley ben lobi den sani di a ben e leri so te, taki a ben e taki bun tranga te a ben e gi piki. Fosi yu denki wi bigin studeri tu tron wan wiki. Ibri studie ben e teki tu yuru!

FA A BEN E GO NA DEN KONMAKANDRA ÈN SAN A BEN E DU DRAPE?

Kingsley nanga Paul

Kingsley ben lobi go na den konmakandra na a Kownukondre zaal, ma a no ben makriki gi en. Sma ben musu opo en poti na ini en rolsturu èn baka dati den ben musu opo en poti na ini a wagi. Te a ben doro na a Kownukondre zaal, dan den ben musu yepi en fu go na inisei. Toku furu sma na ini a gemeente ben de klariklari fu yepi en. Ibri leisi wan tra sma ben e yepi en èn den ben e si disi leki wan grani. Na a konmakandra, Kingsley ben e go sidon leti sei wan speaker èn a ben e arki bun. A ben e gi piki srefi!

Baka di Kingsley studeri wan pisi ten, a ben wani poti en nen na a Theokrasia Diniwroko-skoro. Tu wiki fosi a hori en fosi lezing, mi aksi en efu a oefen. Nanga en heri ati a taki: „Iya, Brada! Mi oefen 30 tron.” Mi taigi en taki mi ben breiti nanga a muiti di a du. Dan mi aksi en efu mi kan arki fa a e leisi. Ne a opo en Bijbel, a poti en finga na a presi pe a ben o leisi, dan a bigin. Ma mi si taki a no ben e leisi nanga en finga leki fa a ben gwenti. A heri pisi fu Bijbel di a ben musu leisi, a ben sabi na ede!

Mi no ben man bribi! Nanga watra-ai mi luku en, dan mi aksi en fa a du kon taki a ben sabi a pisi so bun, baka di a oefen en soso 30 tron. A piki: „Nôno. Mi oefen sowan 30 tron ibri dei.” Moro leki wán mun Kingsley ben sidon ibri dei na tapu a matamata fu en fu oefen a pisi fu Bijbel di a ben musu leisi. A leisi en ibri tron baka, teleki a ben sabi en na ede.

Ne a dei doro taki Kingsley ben musu hori a lezing fu en na a Kownukondre zaal. Di a kaba leisi, a heri gemeente naki anu gi en fu di den ben breiti trutru! Furu sma krei di den si omeni muiti a nyun studenti disi du. Wan preikiman di no ben wani hori lezing moro na a skoro fu di a ben senwesenwe, aksi fu poti en nen na a skoro baka. Na uma disi taki: „Efu Kingsley man du en, dan mi man du en tu!”

Tapu 6 september 2008, baka di Kingsley studeri Bijbel dri yari, a gi ensrefi abra na Yehovah èn a teki dopu. A tan dini Yehovah fayafaya, teleki a dede tapu 13 mei 2014. Kingsley ben de seiker taki na ini a paradijs, a o go doro nanga a diniwroko fu en nanga ala en krakti èn nanga wan bun gosontu (Yes. 35:5, 6).—Soleki fa Paul McManus fruteri.

^ paragraaf 4 A buku disi tyari kon na doro na ini 1995. Now a no e meki moro.