Go na content

Go na a tra menu

Go na table of contents

Yehovah Kotoigi

Sranantongo

Studie-Waktitoren  |  mei 2015

Yu man feti nanga Satan èn wini a strei!

Yu man feti nanga Satan èn wini a strei!

„Kakafutu gi [Satan] èn abi wan tranga bribi.”1 PETR. 5:9.

1. (a) Fu san ede a feti nanga Satan prenspari spesrutu na ini a ten disi? (b) Fa wi sabi taki wi man wini a strei nanga Satan?

SATAN e feti nanga den salfuwan di de na grontapu ete èn nanga den „tra skapu” (Yoh. 10:16). Na ini a syatu ten di Didibri abi, a wani swari someni futuboi fu Yehovah leki a man. (Leisi Openbaring 12:9, 12.) Wi kan wini a strei disi nanga Satan? Iya, wi kan wini a strei! Bijbel e taki: „Kakafutu gi Didibri èn a o lon gowe fu unu.”Yak. 4:7.

2, 3. (a) Fu san ede Satan wani meki sma bribi taki a no de? (b) Fa yu sabi taki Satan de trutru?

2 Furu sma no e bribi te yu e taigi den taki Satan de. Den e si en leki wan anansitori nomo di yu e leisi na ini buku noso den e si en leki wan sani di yu e si na ini spuku felem noso video game. Den sortu sma disi e taki dati nowan enkri sma di de bun na en frustan o bribi taki ogri yeye de. We, yu denki taki Satan e span te sma no e bribi taki en nanga den ogri yeye de trutru? Kwetikweti! Te yu luku en bun, dan a moro makriki gi Satan fu breni a frustan fu sma di no e bribi taki a de (2 Kor. 4:4). Wan fu den sani di Satan e gebroiki fu kori sma na fu meki den bribi taki ogri yeye no de trutru.

 3 Wi leki futuboi fu Yehovah no e meki Satan kori wi. Wi sabi taki Satan Didibri de trutru fu di na en gebroiki wan sneki fu taki nanga Eva (Gen. 3:1-5). Na Satan spotu Yehovah di a ben taki fu Yob (Yob 1:9-12). Na Satan pruberi fu kori Yesus (Mat. 4:1-10). Baka di a Kownukondre fu Gado seti na ini 1914, dan na Satan bigin „feti” nanga den salfuwan di de na grontapu ete (Openb. 12:17). Te now ete a feti dati e feti fu di Satan wani pori a bribi fu den salfuwan èn fu den tra skapu. Efu wi wani wini a strei, dan wi musu kakafutu gi Satan èn wi musu tan abi wan tranga bribi. Na artikel disi e taki fu dri fasi fa wi kan du dati.

NO ABI HEIMEMRE

4. Fa Satan sori krin taki a abi heimemre?

4 Satan no abi sakafasi kwetikweti. Na ogri engel disi ben prefuru fu taki dati Yehovah no abi a reti fu tiri èn a pruberi fu meki sma anbegi en na presi fu Yehovah. Disi e sori wi krin taki a abi heimemre nanga bigifasi. Sobun, wan fasi fa wi kan kakafutu gi Satan na te wi no abi heimemre. Na presi fu dati wi musu abi sakafasi.Leisi 1 Petrus 5:5.

5, 6. (a) A de wan fowtu sani te sma breiti nanga wan sani di den du? Fruklari disi. (b) Sortu Bijbel eksempre e sori taki a no bun fu abi heimemre?

5 A no ala ten a de wan fowtu sani fu de seiker fu wisrefi. A no fowtu fu abi lespeki gi wisrefi noso fu prisiri te wi noso wan sma fu wi du wan bun sani noso te wi abi wan bun sani. Na apostel Paulus taigi den Tesalonikasma: „Wi e prèise unu na den tra gemeente fu Gado, fu di unu e horidoro èn fu di unu no lasi a bribi fu unu awinsi sma e frufolgu unu, noso e pina unu” (2 Tes. 1:4). Sobun, te wi e prisiri taki wan sma du wan wroko bun noso te wi breiti nanga wan sani di wisrefi du, dan dati kan de wan bun sani. Wi no abi fu syen gi wi famiri, wi kulturu noso a presi pe wi kweki.Tori 21:39.

6 Ma te wan sma abi heimemre, dan dati kan pori a matifasi di a abi nanga tra sma èn nanga Yehovah. Heimemre kan meki taki wi ati e bron noso wi e mandi te sma e gi wi rai di wi abi fanowdu. A kan pasa srefi taki wi e weigri fu teki a rai disi, fu di wi no abi sakafasi (Ps. 141:5). Wan wortubuku e taki dati heimemre na te „wan sma e denki tumusi furu fu ensrefi”. Son leisi heimemre na te „sma e bribi taki den betre moro trawan, aladi den no abi a reti fu denki so”. Yehovah no lobi sma di abi bigifasi (Esek. 33:28; Amos 6:8). Ma Satan breiti te sma e dyaf èn te den e sori heimemre neleki en. Prakseri fa a ben prisiri di Nimrod, Farao nanga Absalom ben dyaf. Den man disi ben abi heimemre! (Gen. 10:8, 9; Eks. 5:1, 2; 2 Sam. 15:4-6) Kain ben abi heimemre èn dati meki a pori a matifasi di a ben abi nanga Gado. Na Yehovah srefi ben gi en rai, ma heimemre meki taki a no ben wani teki a rai fu Gado. Tranga-ede meki taki a no arki Yehovah èn a go du wan bigi sondu.Gen. 4:6-8.

7, 8. (a) San a wani taki fu desko sma fu wan tra ras èn fu san ede disi kan de wan fasi fa wan sma e sori heimemre? (b) Fruklari fa heimemre kan pori a freide na ini a gemeente.

7 Na ini a ten disi, sma abi furu fasi fa den e sori taki den abi heimemre. Son leisi heimemre e meki taki sma e desko trawan fu wan tra ras. Wan wortubuku e sori taki te sma e desko trawan fu wan tra ras, dan „den e denki taki den betre moro den, noso taki den man du sani moro betre moro den. Den feni taki son ras moro hei noso moro lagi leki tra ras.” Ma te sma e desko trawan fu wan tra ras, dan dati e  tyari dyugudyugu nanga bigi feti kon èn a kan meki srefi taki den e kiri bun furu sma.

8 A no de fu taki dati den sani disi no musu pasa na ini a Kresten gemeente. Toku a e pasa son leisi taki heimemre kan meki taki wan pikin takitaki na mindri Kresten brada nanga sisa e tron wán bigi trobi. Na dati pasa tu nanga den brada nanga sisa fu a fosi Kresten gemeente. Dati meki Yakobus poti a krin aksi disi gi den: „San e meki taki unu e feti èn taki unu e strei nanga makandra?” (Yak. 4:1) Efu wi no lobi tra sma kwetikweti èn wi abi a firi taki wi betre moro den, dan wi kan taki noso du sani di e hati den trutru (Odo 12:18). A de krin taki heimemre kan pori a freide na ini a gemeente.

9. Fa Bijbel e yepi wi fu feti nanga a denki di sma abi taki a wan ras, kondre noso kulturu betre moro a trawan? (Luku a prenki na a bigin fu na artikel.)

9 Efu wi e denki taki wi betre moro tra sma, dan wi musu hori na prakseri taki „Yehovah e tegu gi ala sma di abi bigimemre” (Odo 16:5). Wi musu ondrosuku wi ati tu èn aksi wisrefi: ’Mi denki taki mi betre moro sma fu wan tra ras, kondre noso kulturu?’ Efu wi e denki dati, dan wi e frigiti taki Gado meki ala sma „fu wán sma nomo” (Tori 17:26). Sobun, wi kan taki dati wán ras nomo de, fu di ala libisma komoto fu a wán afo fu wi èn dati na Adam. Dati meki a de wan don sani fu bribi taki son ras moro hei noso moro lagi leki trawan. Satan breiti te wi e denki so, fu di dati kan tapu wi fu sori Kresten lobi èn a kan pori a wánfasi na ini a gemeente (Yoh. 13:35). Efu wi wani feti nanga Satan èn wini a strei, dan wi musu luku bun nanga ala fasi fu heimemre.Odo 16:18.

NO FETI NA BAKA GUDU ÈN NO LOBI GRONTAPU

10, 11. (a) Fu san ede a makriki fu lobi grontapu? (b) Fa Deimas sori taki a ben lobi grontapu?

10 Satan na „a tiriman fu a grontapu disi” èn a heri grontapu de na ini a makti fu en (Yoh. 12:31; 1 Yoh. 5:19). Furu fu den sani di a grontapu disi wani taki sma e du, de teige san Bijbel e leri. Toku a no ala sani fu grontapu na ogri sani. Ma wi kan de seiker taki Satan o gebroiki a grontapu fu en fu tesi wi èn a o pruberi fu meki wi du sondu. Noso a o pruberi fu meki wi lobi grontapu so taki wi no anbegi Yehovah moro leki fa wi ben gwenti du.Leisi 1 Yohanes 2:15, 16.

11 Soleki fa a sori, dan wan tu sma fu a fosi Kresten gemeente ben kon lobi grontapu. Fu eksempre, Paulus ben skrifi: „Deimas gowe libi mi, fu di a lobi a grontapu disi” (2 Timoteyus 4:10). Bijbel no e taki krin san fu grontapu Deimas ben kon lobi so, taki a gowe libi Paulus. A kan taki Deimas bigin lobi den gudu fu grontapu moro leki a wroko fu Yehovah. Efu dati de so, dan Deimas lasi na okasi fu kisi moi grani na ini a diniwroko fu Gado. A sani disi tyari bun bakapisi kon gi en? Kwetikweti. Grontapu no ben kan gi Deimas wan moro betre sani leki san Yehovah ben o gi en efu a ben o tan a yepiman fu Paulus.Odo 10:22.

12. Fa Satan kan meki „a bedrigifasi fu gudu” tron wan tesi gi wi?

12 A sani disi kan pasa nanga wi tu. Wi leki Kresten sabi taki na wi frantwortu fu sorgu gi wisrefi èn gi wi osofamiri (1 Tim. 5:8). Yehovah ben meki Adam nanga Eva libi na ini wan moi paradijs. Disi e sori wi taki Yehovah wani taki wi leki libisma abi wan switi libi (Gen. 2:9). Ma fu di Satan sabi taki wi leki libisma wani abi wan bun  libi, meki a e gebroiki „a bedrigifasi fu gudu” fu tesi wi (Mat. 13:22). Furu sma e denki taki moni nanga gudu o meki den firi koloku noso taki a libi fu den o waka moro bun. Te wi e denki so, dan wi e kori wisrefi èn a kan meki taki wi lasi a moro prenspari sani na ini wi libi. Dati na a matifasi di wi abi nanga Yehovah. Yesus ben warskow den bakaman fu en: „Nowan sma kan dini tu masra leki srafu. Bika a o teige a wan masra èn lobi a trawan, noso a o horibaka gi a wan èn wisiwasi a trawan. Unu no kan dini Gado èn dini Gudu na a srefi ten” (Mat. 6:24). Efu wi e dini Gudu, dan wi no o dini Yehovah moro èn dati na soifri san Satan wani. Noiti wi musu meki moni noso den sani di wi kan bai nanga moni pori a matifasi di wi abi nanga Yehovah. Efu wi wani feti nanga Satan, dan wi no musu si gudu leki a moro prenspari sani na ini wi libi.Leisi 1 Timoteyus 6:6-10.

KAKAFUTU GI HURUDU

13. Fa a grontapu disi e si a trowlibi nanga seks?

13 Wan tra sani di a grontapu fu Satan e gebroiki fu tesi wi, na hurudu. Na ini a ten disi, furu sma no e feni en wan problema te trowpatna e waka gi makandra. Den feni srefi taki a trowlibi e tapu den fu du san den wani èn taki a no de gi a ten disi. Fu eksempre, wan pôpi uma ben taki: „Nowan sma man tan nanga wán trowpatna. Mi no sabi wan sma di no e waka gi en trowpatna noso di wani tan nanga wán trowpatna.” Wan pôpi man ben taki: „Mi no sabi seiker efu wi ben meki fu de nanga a wán sma wi heri libi langa.” Satan musu fu breiti te den sortu pôpi sma disi e wisiwasi a trowlibi di Gado seti. Didibri no e horibaka gi a seti fu a trowlibi èn a no wani taki a trowlibi fu sma waka bun. Sobun, efu wi wani feti nanga Satan èn wini a strei, dan wi musu si a trowlibi leki fa Gado e si en.

14, 15. Fa yu kan kakafutu gi hurudu?

14 Awinsi wi trow noso wi no trow, wi musu meki muiti fu kakafutu gi ala sortu fasi fu hurudu. A makriki fu feti a feti disi? Kwetikweti! Efu yu na wan yongusma, dan kande yu yere fa skoropikin e dyaf taki den abi seks nanga suma den wani. A kan taki den e dyaf fa den e gebroiki den cel fu taki fu seks tori nanga trawan noso fu seni seks fowtow gi makandra. Sma e kari a sani disi „sexting”. Fu taki en leti, na ini son kondre sma feni taki „sexting” na a srefi leki te sma ben o seni felem noso fowtow gi makandra pe sma abi seks nanga pikin-nengre. Bijbel e taki: „A sma di e du hurudu, e sondu teige en eigi skin” (1 Kor. 6:18). Furu sma di du hurudu e pina noso e dede fu di den kisi siki di sma kan kisi fu seks. Furu yongusma di ben abi seks fosi den trow e sari taki den du disi. Den sani di sma e si na ini felem noso e leisi na ini buku e meki den bribi taki den no o abi takru bakapisi te den e trangayesi den wet fu Gado. Efu wi e bribi den sortu lei disi, dan wi o meki taki ’sondu e bedrigi’ wi.Hebr. 3:13.

15 Te yu e kisi a firi fu abi seks di no fiti, dan san yu kan du? No tapu yu ai gi a swakifasi fu yu (Rom. 7:22, 23). Begi Gado meki a gi yu krakti (Fil. 4:6, 7, 13). Luku bun taki yu no e kon na ini situwâsi pe yu kan du hurudu (Odo 22:3). Te tesi e miti yu, dan yu musu kakafutu gi dati wantewante.Gen. 39:12.

16. Fa Yesus piki Satan di a ben wani tesi Yesus èn san wi kan leri fu na eksempre fu Yesus?

16 Yesus sori wi na wan heri moi fasi san wi kan du te wi e kisi tesi. A no ben meki Satan kori en nanga den pramisi fu en èn  a no go sidon denki fu den pramisi disi srefi. Na presi fu dati, sondro draidrai a piki Satan: „Gado Buku taki.” (Leisi Mateyus 4:4-10.) Yesus ben sabi Gado Wortu. Dati meki di Satan pruberi fu tesi en, a ben man piki Satan wantewante nanga tekst di komoto na ini Gado Buku. Efu wi wani feti nanga Satan èn wini a strei, dan wi musu luku bun taki wi no e du hurudu.1 Kor. 6:9, 10.

TE YU E HORIDORO YU KAN WINI A STREI

17, 18. (a) Sortu tra tesi Satan e gebroiki fu kori wi èn fu san ede disi no musu fruwondru wi? (b) San o pasa nanga Satan èn fa disi e gi yu deki-ati fu horidoro?

17 Heimemre, a feti di sma e feti baka gudu nanga hurudu na dri fu den tesi di Satan e gebroiki fu kori wi. Ma a e gebroiki tra tesi tu. Fu eksempre, son Kresten abi famiriman di e gens den noso skoromati di e spotu den. Trawan e libi na ini kondre pe lanti tapu a preikiwroko. Den sortu tesi disi no musu fruwondru wi, fu di Yesus ben warskow den bakaman fu en: „Fu mi nen ede, sma o teige unu. Ma a sma di horidoro te na a kaba, o kisi frulusu.”Mat. 10:22.

Satan o kisi pori fu têgo (Luku paragraaf 18)

18 Fa wi kan feti nanga Satan èn wini a strei? Yesus ben taigi den bakaman fu en: „Te unu horidoro, dan unu o kisi libi” (Luk. 21:19). Nowan sani di libisma kan du wi, o tan fu ala ten. Nowan sma kan pori a matifasi di wi abi nanga Gado, solanga wi no e gi den na okasi (Rom. 8:38, 39). Srefi te futuboi fu Yehovah dede, dan Satan no wini a strei fu di Yehovah o sorgu taki den o libi baka (Yoh. 5:28, 29). Ma sani no o waka bun gi Satan. Baka te na ogri grontapu disi fu Satan kisi pori, dan Yesus o trowe en na ini wan dipi peti 1000 yari langa (Openb. 20:1-3). Na a kaba fu Yesus Dusun Yari Tiri, dan fu wan syatu pisi ten Satan o lusu „komopo na ini a strafu-oso pe a ben de na ini” èn fu wan lasti leisi, a o pruberi fu kori den libisma di no abi sondu moro. Baka dati Didibri o kisi pori (Openb. 20:7-10). Satan o dede fu ala ten, ma dati no o pasa nanga yu. Kakafutu gi Satan èn abi wan tranga bribi. Yu man feti nanga Satan èn wini a strei!