Go na content

Go na a tra menu

Go na table of contents

Yehovah Kotoigi

Sranantongo

Studie-Waktitoren  |  mei 2015

Aksi fu leisiman

Aksi fu leisiman

Suma na Gok fu Magok na ini a Bijbel buku Esekièl?

Furu yari langa, den buku fu wi ben taki dati Gok fu Magok na a nen di Satan Didibri kisi, baka di Yesus trowe en komoto na hemel. Fu san ede den buku ben taki disi? We, fu di a Bijbel buku Openbaring e taki dati Satan Didibri o teki fesi te sma na heri grontapu o kon feti nanga Gado pipel (Openb. 12:1-17). Sobun, wi ben denki taki Gok ben de wan tra nen gi Satan.

Ma a fasi disi fu fruklari a tori meki wan tu prenspari aksi opo kon. Prakseri fu a sani disi: Te Yehovah e taki fu a ten dati Gok o kisi pori, dan a e taki tu fu Gok: „Mi o meki ala sortu aka, tra sortu fowru nanga busimeti kon, dan mi o meki den nyan yu” (Esek. 39:4). Baka dati Yehovah e taki: „Na a dei dati a musu pasa taki mi o gi Gok wan presi drape, iya, mi o gi en wan grebi na ini Israel . . . Na drape sma o abi fu beri Gok nanga ala den sma di de nanga en” (Esek. 39:11). Ma fa „aka, tra sortu fowru nanga busimeti” kan nyan Satan, di de wan yeye di sma no man si? Fa sma kan beri en na „wan grebi” na grontapu? Bijbel e sori krin taki Yesus o trowe Satan go na ini wan dipi peti 1000 yari langa. Sma no o beri en èn meti no o nyan en.Openb. 20:1, 2.

Bijbel e taki dati na a kaba fu den 1000 yari, Satan o lusu komoto na ini a dipi peti èn „a o kori den pipel di de na den fo uku fu grontapu. Na den pipel disi den e kari Gok nanga Magok. A o tyari den kon makandra fu feti a feti” (Openb. 20:8). Ma efu Satan na Gok srefi, dan fa a kan kori Gok? Disi e sori taki a wortu „Gok” na ini a profeititori fu Esekièl noso na ini Openbaring, no abi fu du nanga Satan.

Dan suma na Gok fu Magok na ini Esekièl? Fu feni a piki tapu na aksi disi, wi musu ondrosuku Bijbel fu kon sabi suma o kon feti nanga Gado pipel. Na ini Bijbel wi e leisi taki „Gok fu Magok”, „a kownu fu noordsei” nanga „den kownu fu grontapu” o kon feti nanga a pipel fu Gado (Esek. 38:2, 10-13; Dan. 11:40, 44, 45; Openb. 17:14; 19:19). Disi wani taki dati difrenti grupu o kon feti nanga Gado pipel? Wi no denki. Soleki fa a sori, dan den difrenti nen disi di Bijbel e kari, abi fu du nanga a wán grupu èn nanga a wán feti. Fu san ede wi kan taki disi? Fu di Bijbel e taki dati ala pipel fu grontapu o de na ini a lasti feti disi di o de a bigin fu Armagedon.Openb. 16:14, 16.

Te wi e luku ala den Bijbeltekst di e taki fu a lasti  leisi di sma o kon feti nanga Gado pipel, dan wi e si krin taki a nen Gok fu Magok no abi fu du nanga Satan. Ma a abi fu du nanga den sma di o span anu makandra fu kon feti nanga Gado pipel. A de so taki na a agersi „kownu fu noordsei” o teki fesi na ini feti disi? Wi no kan taki disi. Ma a sani di Yehovah e taki fu Gok, e horibaka gi a prakseri disi. Gado taki: „Yu o komoto na a presi pe yu e tan, iya, yu o komoto te na den moro farawe presi na noordsei. Yu o kon makandra nanga furu pipel èn den alamala e rèi asi. Den de nanga furu, iya, den de wan bigi legre.”Esek. 38:6, 15.

A profeiti Danièl, di ben e libi na ini a ten fu Esekièl, ben taki tu fu a kownu fu noordsei: „A o yere nyunsu komoto fu a sei pe son e opo èn fu noordsei. A nyunsu dati o bruya en. Dati meki a o hari go drape nanga bigi atibron fu kan kiri sma, iya, fu puru furu sma na pasi. Den tenti fu en di gersi wan palèisi, a o poti na mindri a bigi se nanga a santa bergi fu a Moi Kondre. A o abi fu kon na wan kaba krinkrin èn nowan sma o de fu yepi en” (Dan. 11:44, 45). A de krin taki a sani di Danièl skrifi dyaso, na a srefi sani di a Bijbel buku Esekièl e taki fu Gok.Esek. 38:8-12, 16.

San o pasa baka te Gok pruberi wan lasti leisi fu kon feti nanga Gado pipel? Bijbel e taki dati Mikaèl o opo du wan sani na Armagedon. Danièl 12:1 e kari en „a bigi granman di e opo du sani [sensi 1914] fu yepi den sma fu yu eigi pipel”. A vers dati e taki: „Dan wan ten fu banawtu [a bigi banawtu] o kon. Sensi a ten di a fosi pipel ben kon de, teleki a ten dati, noiti ete so wan banawtu kon. Na a ten fu a banawtu yu pipel o kisi frulusu. Iya, ibriwan sma di nen skrifi na ini a buku, o kisi frulusu” (Dan. 12:1). A srefi sani disi di Yesus o du, wi e leisi tu na Openbaring 19:11-21.

Ma suma na „Gok nanga Magok” na Openbaring 20:8? A nen disi abi fu du nanga ala sma di o opo densrefi teige Yehovah na a ten te Didibri o pruberi fu kori sma wan lasti leisi. Disi o pasa na a kaba fu den 1000 yari. Fu di den sma disi no o lobi Gado pipel kwetikweti, meki den o kon feti nanga den. Na a srefi sani dati a grupu di Bijbel e kari „Gok fu Magok”, o du tu nanga Gado pipel na a lasti pisi fu a bigi banawtu. Ma den tu grupu disi, „Gok fu Magok” èn „Gok nanga Magok”, o kisi a srefi strafu: Den o dede fu têgo! (Openb. 19:20, 21; 20:9) Dati meki a fiti fu taki dati „Gok nanga Magok”, na ala sma di o opo densrefi teige Gado na a kaba fu a Dusun Yari Tiri.

Fu di wi e studeri Bijbel fayafaya, meki wi e angri fu kon sabi suma o tron „a kownu fu noordsei”. Ma awinsi suma o teki fesi te den sma o span anu makandra fu kon feti nanga Gado pipel, wán sani wi sabi seiker: (1) Gok fu Magok nanga den legre fu en o lasi a strei èn den o kisi pori. (2) Wi Kownu Yesus Krestes o frulusu Gado pipel. A o meki den go na ini wan nyun grontapu pe soso freide o de èn pe ala sani o waka bun.Openb. 7:14-17.