Go na content

Go na a tra menu

Go na table of contents

Yehovah Kotoigi

Sranantongo

Studie-Waktitoren  |  mei 2015

De na ai—Satan wani swari yu!

De na ai—Satan wani swari yu!

„De na ai. Didibri, a feanti fu unu, e waka lontu leki wan lew di e bari, fu di a e suku fu swari wan sma.”1 PETR. 5:8.

1. Fruteri fa wan yeye tron Satan.

WAN leisi wan yeye ben de di ben abi wan bun matifasi nanga Yehovah. Ma baka wan pisi ten a ben wani taki libisma anbegi en. Na presi taki a puru a takru lostu disi na ini en prakseri, a meki a kon moro tranga èn te fu kaba a du sondu (Yak. 1:14, 15). Wi sabi a yeye disi now leki Satan. A ben „drai baka gi san tru” èn a opo ensrefi teige Yehovah. Na so a tron „a tata fu ala lei”.Yoh. 8:44.

2, 3. San den wortu „Satan”, „Didibri”, „sneki” nanga „bigi kaiman” e sori wi fu a moro bigi feanti fu Yehovah?

2 Sensi di Satan opo ensrefi teige Gado, a tron a moro bigi feanti fu Yehovah. A no de wan mati fu libisma kwetikweti. Den sani di Bijbel e taki fu Satan e leri wi taki en ati takru srefisrefi. A nen Satan wani taki „Gensman”, san e sori taki na ogri yeye disi feni taki Gado no abi a reti fu de Tiriman fu hemel nanga grontapu. A no lobi a tori disi kwetikweti èn fu dati ede a e du ala san a man fu gens Gado. A sani di a wani trutru na taki Yehovah no musu de Tiriman moro.

3 Openbaring 12:9 e kari a yeye disi Didibri tu. A nen Didibri wani taki „Ogri-ati leiman”, fu di Satan gi Yehovah porinen  di a kari Gado wan leiman. A tekst e taki tu fu „a fosi sneki”. Disi e meki wi prakseri fa Satan gebroiki wan sneki fu kori Eva. Den wortu „a bigi kaiman” e sori wi heri bun suma Satan de trutru. A abi bigi atibron, a lobi du ogri nanga sma èn en ati takru. A wani tapu Yehovah fu du san A abi na prakseri èn a wani kiri a pipel fu Gado.

4. San wi o luku na ini na artikel disi?

4 A de krin taki Satan o du ala san a man fu pori a matifasi di wi abi nanga Yehovah. Fu dati ede Bijbel e warskow wi: „Tan nanga krin frustan. De na ai. Didibri, a feanti fu unu, e waka lontu leki wan lew di e bari, fu di a e suku fu swari wan sma” (1 Petr. 5:8). Sobun, na ini na artikel disi wi o luku dri fasi di Satan abi. Wi o luku tu fu san ede a prenspari fu kakafutu gi na ogri-ati feanti disi fu Yehovah èn fu a pipel fu En.

SATAN ABI FURU MAKTI

5, 6. (a) Gi wan tu eksempre di e sori taki engel „tranga srefisrefi”. (b) Fu san ede wi kan taki dati Satan „man kiri sma”?

5 Bijbel e sori taki yeye na engel di „tranga srefisrefi” (Ps. 103:20). Den hei moro libisma. Dati meki den koni moro den èn den tranga moro den. A no de fu taki dati engel di e gi yesi na Gado e gebroiki a makti fu den fu du bun sani. Fu eksempre, wan leisi wán engel fu Yehovah kiri 185.000 srudati fu Asiria di ben de feanti fu Gado pipel. Wán libisma no ben o man kiri someni srudati èn a ben o muilek srefi gi wan heri legre fu du dati (2 Kow. 19:35). Wan tra leisi, wan engel gebroiki a makti nanga a koni fu en fu lusu den apostel fu Yesus na strafu-oso. Na engel dati feni wan fasi fu pasa den srudati di ben e hori wakti leti drape, a opo den doro di ben sroto èn a meki den apostel kon na doro. Baka dati a tapu den doro baka. Ala den sani disi a du sondro fu den srudati si!Tori 5:18-23.

6 Wi si taki engel di e gi yesi na Gado e gebroiki a makti fu den fu du bun sani, ma Satan e gebroiki en makti fu du ogri. Èn wi sabi taki a abi bun furu makti! Bijbel e taki dati en na „a tiriman fu a grontapu disi” èn „a gado fu a grontapu disi” (Yoh. 12:31; 2 Kor. 4:4). Satan Didibri „man kiri sma” srefi (Hebr. 2:14). Disi no wani taki dati a man kiri iniwan sma di a wani. Ma san disi wani taki dan? We, wi e si taki na heri grontapu Satan e gi sma deki-ati fu kiri trawan. Wi sabi tu taki ala libisma e sondu. Den e dede fu di Eva bribi a lei di Satan fruteri en èn fu di Adam trangayesi Gado (Rom. 5:12). Na fu dati ede Bijbel e taki dati Didibri „man kiri sma”. Yesus ben kari en „wan kiriman” (Yoh. 8:44). Iya, Satan na wan makti feanti trutru!

7. Fa den ogri yeye sori taki den abi furu makti?

7 Te wi e kakafutu gi Satan, dan wi e kakafutu gi ala sma tu di e horibaka gi en èn di e gens a tiri fu Gado. Wan bigi grupu fu den sma disi na engel di opo densrefi teige Yehovah èn di Bijbel e kari ogri yeye (Openb. 12:3, 4). Furu leisi den ogri yeye sori taki den tranga moro libisma èn den e meki libisma pina srefisrefi (Mat. 8:28-32; Mark. 5:1-5). Noiti wi musu frigiti taki den ogri yeye nanga „a tiriman fu den ogri yeye” abi furu makti (Mat. 9:34). Efu Yehovah no e yepi wi, dan noiti wi o man wini a feti di wi e feti nanga Satan.

SATAN E DU FURU OGRI-ATI SANI

8. (a) San Satan wani du nanga a pipel fu Gado? (Luku a prenki na a bigin fu na artikel.) (b) Soleki fa yusrefi si, dan fa grontapu e sori taki den e du den srefi ogri-ati sani leki Satan?

8 Na apostel Petrus ben agersi Satan  nanga „wan lew di e bari”. Soleki fa wan buku e taki, dan a Griki wortu di vertaal nanga „bari” abi fu du nanga a fasi fa wan meti e bari te a abi bigi angri. Na so Satan e „bari” tu. Aladi heri grontapu de na ini a makti fu en, toku a e suku moro sma fu du ogri nanga den fu di a abi ogri-ati fasi (1 Yoh. 5:19). Spesrutu nanga den salfuwan di de na grontapu ete èn nanga den „tra skapu”, a wani du ogri (Yoh. 10:16; Openb. 12:17). Satan wani swari a pipel fu Yehovah. A hebi frufolgu di den bakaman fu Yesus kisi sensi a bigin fu a Kresten gemeente teleki now e sori taki a yeye disi na wan ogri-ati sma trutru.

9, 10. (a) Fa Satan meki a pipel Israel sondu? (Gi wan tu eksempre.) (b) Fu san ede Satan ben poti spesrutu prakseri na a pipel Israel? (c) Fa yu denki Didibri e firi te wan futuboi fu Yehovah e du wan seryusu sondu na ini a ten disi?

9 Satan wani tapu Gado fu du san a abi na prakseri. Dati meki a e sori na ete wan fasi taki a de wan ogri-ati sma. Wan lew di abi bigi angri, no e sari a meti di a o swari. A no e sari en fosi a o kiri en èn baka te a kiri en, a no abi nowan konsensi fonfon. Na so Satan no e sari den sma di a wani swari. Fu eksempre, fa yu denki taki Satan Didibri firi ala den leisi di den Israelsma du hurudu noso di den sori taki den abi bigi-ai? Yu e si kaba fa Satan prisiri di a si sortu takru bakapisi a hurudu fu Simri nanga a bigi-ai fu Gehasi tyari kon?Num. 25:6-8, 14, 15; 2 Kow. 5:20-27.

Satan e prisiri te wan futuboi fu Gado e du wan sondu (Luku paragraaf 10)

10 Satan ben poti spesrutu prakseri na a pipel Israel fu di a Mesias ben o komoto fu a pipel disi. Na a Mesias disi ben o masi Satan ede èn na en ben o sori taki na Yehovah wawan abi a reti fu tiri hemel nanga grontapu (Gen. 3:15). Satan no ben wani taki sani go bun nanga den Israelsma èn na wan ogri-ati fasi a pruberi fu meki den du sondu. Yu denki taki Satan ben sari David di a sribi nanga wan tra frow di no ben de en trowpatna? Yu denki taki a ben sari a profeiti Moses di a no ben mag go moro na ini a Pramisi Kondre? Kwetikweti! Yu kan de seiker taki Satan e prisiri te wan futuboi fu Gado e du wan  seryusu sondu. Fu taki en leti, te den sortu sani disi e miti den futuboi fu Gado, dan Didibri e lafu Yehovah.Odo 27:11.

11. San Satan ben wani du nanga Sara?

11 Satan ben abi bita-ati gi a famiri pe a Mesias ben o komoto. Fu eksempre, luku san pasa syatu baka di Gado taigi Abraham taki a ben o tron „wan bigi pipel” (Gen. 12:1-3). Di Abraham nanga Sara ben de na Egepte, Farao meki sma tyari Sara kon na en oso, fu di a ben wani meki Sara tron en wefi. Ma Yehovah kibri Sara èn a puru en na ini a muilek situwâsi dati. (Leisi Genesis 12:14-20.) Syatu fosi Isak gebore, wan srefi sortu sani pasa na ini a foto Gerar (Gen. 20:1-7). Yu denki taki na Satan ben meki den sani disi pasa? No frigiti taki Sara ben gowe libi a gudu foto Ur èn a go libi na ini tenti. Sobun, kande Satan ben wani kori Sara fu go libi na ini a moi palèisi fu Farao noso a di fu Abimeilek. Kande Satan ben denki taki a ben o man kori Sara fu gowe libi en masra èn fu trow nanga wan fu den kownu disi. Kande a ben denki taki a ben o man meki Sara drai baka gi Yehovah. Bijbel no e taki dati. Ma wi kan de seiker taki Didibri ben o breiti efu Sara ben o du wan sani di ben o meki a lasi na okasi fu tron na afo fu a Mesias. Satan no ben o abi nowan konsensi fonfon efu a trowlibi fu a bun uma dati ben o pori, efu a ben o kisi porinen noso efu a ben o lasi a matifasi di a ben abi nanga Yehovah. Iya, Satan na wan ogri-ati sma trutru!

12, 13. (a) Baka di Yesus gebore, dan fa Satan sori taki a de wan ogri-ati yeye? (b) Fa Satan e si pikin-nengre di lobi Yehovah èn di e pruberi fu dini En na ini a ten disi?

12 Yesus gebore hondrohondro yari baka Abraham. Yu denki taki Satan ben e si en leki wan moi pikin beibi di a ben o wani prei nanga en? Nôno. Satan ben sabi taki a beibi disi ben o tron a Mesias di Gado ben pramisi. Iya, Yesus ben de a moro prenspari bakapikin fu Abraham. Na en ben o „tyari wan kaba kon na den wroko fu Didibri” (1 Yoh. 3:8). Yu denki taki Satan ben o feni en wan ogri-ati sani fu kiri wan beibi? Kwetikweti! Satan no e span srefisrefi nanga san bun èn san ogri. Dati meki a no draidrai di a ben wani kiri Yesus. San a du?

13 Di Kownu Herodes yere fu den lukuman taki a „kownu fu den Dyu” gebore, en ati ben bron srefisrefi èn a ben wani kiri en (Mat. 2:1-3, 13). Fu de seiker taki disi pasa, a taigi sma fu kiri ala boi di ben abi tu yari noso di ben de moro yongu èn di ben e libi na ini a foto Betlehem nanga den distrikt lontu a foto disi. (Leisi Mateyus 2:13-18.) Ma aladi den kiri den boi na a ogri-ati fasi disi, toku den no feni Yesus fu kiri en. San disi e sori wi fu wi feanti Satan? A de krin taki Didibri no e si a libi fu libisma leki wan warti sani. Srefi pikin-nengre a no lobi. Iya, Satan na „wan lew di e bari”. Noiti wi musu frigiti taki a de wan ogri-ati yeye!

SATAN E KORI SMA

14, 15. Fa Satan „breni a frustan fu den sma di no e bribi”?

14 A wan-enkri fasi fa Satan kan meki taki sma no wani lobi Yehovah Gado, na te a e kori den (1 Yoh. 4:8). Fu di Satan e kori sma, meki den no „sabi taki den abi Gado fanowdu” (Mat. 5:3). Na so a „breni a frustan fu den sma di no e bribi, so taki den no man si a leti fu a tumusi moi bun nyunsu fu Krestes di de leki Gado”.2 Kor. 4:4.

15 Wan fu den moro prenspari fasi fa  Satan e kori sma, na falsi bribi. Solanga den no e anbegi Yehovah, a bun gi en. A breiti te sma e anbegi den afo fu den, den meti, den sani di wi e si na wi lontu, noso iniwan tra sani. Satan sabi taki Yehovah „wani taki sma musu anbegi en wawan” (Eks. 20:5). Furu sma e denki taki den e anbegi Gado na wan fasi di fiti, ma toku den e bribi wan lo sani di no tru èn den e hori densrefi na kerkigwenti di no e tyari nowan wini kon gi den. Na ini a ten fu Yesaya den Israelsma ben de na ini a srefi situwâsi. Yehovah ben wani yepi den èn dati meki a taki: „Fu san ede unu e tan bai sani di no e tapu angri? Fu san ede unu e wroko so tranga sondro fu kisi wini fu dati? Arki bun san mi e taki. Un musu nyan bun nyanyan. Iya, nyan a moro bun nyanyan èn prisiri fu dati.”Yes. 55:2.

16, 17. (a) Fu san ede Yesus taigi Petrus: „Komoto na mi tapu, Satan”? (b) Fa Satan kan kori wi so taki wi no de na ai moro?

16 Srefi futuboi fu Yehovah di e dini en fayafaya, Satan man kori. Fu eksempre, luku san pasa di Yesus taigi den bakaman fu en taki sma ben o kiri en. Na apostel Petrus di ben lobi Yesus, taigi en: „Masra, du yusrefi wan bun. A sani disi no o miti yu kwetikweti.” Ne Yesus piki Petrus krin: „Komoto na mi tapu, Satan!” (Mat. 16:22, 23) Fu san ede Yesus kari Petrus, „Satan”? Fu di Yesus ben frustan san ben o pasa. A yuru ben doro taki a ben o dede leki frulusu-ofrandi èn taki a ben o sori dati Didibri na wan leiman. Na a prenspari momenti dati, a no ben de a ten gi Yesus fu ’du ensrefi wan bun’. Satan ben o breiti efu Yesus no ben o de na ai moro.

17 Wi e doro a kaba fu a grontapu disi. Sobun, wi srefi de na ini muilek ten tu. Satan wani taki wi ’du wisrefi wan bun’ èn taki wi poti prakseri na sani di wi kan du fu meki en na ini a grontapu disi. A wani taki wi frigiti dati wi e libi na ini den lasti dei èn a no wani taki wi de na ai moro. No meki dati pasa nanga yu! Na presi fu dati yu musu „tan na ai” (Mat. 24:42). Noiti yu musu bribi a lei fu Satan taki a kaba de fara ete noso taki a no o kon srefisrefi.

18, 19. (a) Fa Satan kan pruberi fu kori wi so taki wi denki taki Yehovah no lobi wi? (b) Fa Yehovah e yepi wi fu tan na ai?

18 Satan e pruberi fu kori wi na ete wan fasi. A wani taki wi musu bribi taki Gado no lobi wi èn taki wi no man kisi pardon fu den sondu fu wi. Ma den sani disi na bigi lei fu Satan. Te yu luku en bun, dan suma na a sma di Yehovah no lobi? Na Satan! Suma na a sma di Yehovah no o gi pardon noiti? Na Satan! Bijbel e gi wi a dyaranti disi: „Gado no e du sani di no reti. Dati meki a no o frigiti a wroko di unu du nanga a lobi di unu sori gi a nen fu en” (Hebr. 6:10). Yehovah breiti nanga a muiti di wi e du fu prisiri en ati. A wroko di wi e du gi en no de fu soso. (Leisi 1 Korentesma 15:58.) Sobun, no meki den lei fu Satan kori wi.

19 Soleki fa wi si, dan Satan abi furu makti, a e du furu ogri-ati sani èn a e kori sma. Fa wi kan wini so wan bigi feanti? Yehovah e yepi wi. Na ini Bijbel wi e leri fa Satan e wroko èn dati meki „wi sabi san a abi na prakseri” (2 Kor. 2:11). Te wi e frustan den difrenti fasi fa Satan e kori sma, dan a moro makriki gi wi fu tan na ai. Ma fu sabi fa Satan e kori sma, a no ala. Bijbel e taki: „Kakafutu gi Didibri èn a o lon gowe fu unu” (Yak. 4:7). Na ini a tra artikel wi o taki fu dri fasi fa wi kan feti nanga Satan èn wini a strei.