Go na content

Go na a tra menu

Go na table of contents

Yehovah Kotoigi

Sranantongo

Studie-Waktitoren  |  mei 2015

Den ben „si” den pramisi fu Gado

Den ben „si” den pramisi fu Gado

„Den no si fa den pramisi disi kon tru, ma den ben si den fu farawe kaba.”HEBR. 11:13.

1. Sortu moi kado Yehovah gi wi èn fa dati kan yepi wi? (Luku a prenki na a bigin fu na artikel.)

YEHOVAH gi wi wan moi kado: A meki wi na so wan fasi taki wi man prakseri fa sani o de, aladi wi no si den noiti ete. Fu dati ede wi man denki den bun sani di o pasa na ini a ten di e kon, wi man seti sani na fesi èn wi man wai pasi gi problema. Yehovah sabi san o pasa na ini a ten di e kon èn a e fruteri wi san na wan tu fu den sani di wi kan fruwakti. Aladi wi no man si den sani disi ete, toku wi kan prakseri fa a o de te den o pasa. Wi kan bribi tu taki den o pasa trutru.2 Kor. 4:18.

2, 3. (a) Sortu wini wi e kisi te wi e prakseri fa sani o de? (b) Sortu aksi wi o luku na ini na artikel disi?

2 Son leisi wi e prakseri fu sani di noiti o pasa. Fu eksempre, kande wan pikin meisje e prakseri fa a o de fu rèi na tapu wan vlinder èn a e si ensrefi kaba, aladi a sani disi no man. Ma luku a tori fu Hana, a mama fu Samuel. A ben e prakseri tu fa sani ben o de gi en. A tan denki a dei di a ben o tyari en boi go na a tabernakel fu wroko makandra nanga den priester. Disi no ben de wan dren nomo, ma wan sani di ben o pasa trutru. Na wan sani di a ben bosroiti fu du. Fu di Hana ben e si kaba fa a dei dati ben o de, meki a kisi a krakti fu du san a ben pramisi Yehovah  (1 Sam. 1:22). Te wi e prakseri den sani di Yehovah o du gi wi, dan dati a no wan dren, ma na sani di o pasa trutru.2 Petr. 1:19-21.

3 Furu futuboi fu Yehovah na ini Bijbel ten ben man si den sani di Gado pramisi, aladi den sani disi no ben pasa ete. Fu san ede a bun taki den ben e prakseri den pramisi fu Gado? Fu san ede a bun fu prakseri den sani di Gado o du gi libisma?

DEN BRIBI KON TRANGA FU DI DEN BEN MAN SI KABA SAN GADO BEN O DU GI DEN

4. Fu san ede Abel ben man si kaba fa sani ben o de, aladi disi no ben de so ete?

4 Abel ben de a fosi man di ben sori bribi na ini den pramisi fu Yehovah. A ben sabi san Yehovah taigi a sneki, baka di Adam nanga Eva sondu. Gado ben taki: „Mi o meki yu nanga na uma tron feanti èn yu pikin nanga en pikin o de feanti. A pikin fu na uma o masi yu ede èn yu o gi a pikin fu na uma mankeri na en bakafutu” (Gen. 3:14, 15). Abel no ben sabi o ten disi ben o pasa. Ma a musu fu de taki a ben e prakseri furu fu a sani di Gado taki. Kande a ben denki: ’Suma na a sma di a sneki o gi mankeri? Suma na a sma di o yepi libisma fu kon de sondro sondu baka?’ Abel ben bribi taki Yehovah ben o du ala san a pramisi. Sobun, di a tyari wan meti leki ofrandi, Yehovah ben breiti nanga dati.Leisi Genesis 4:3-5; Hebrewsma 11:4.

5. Fu san ede a bun taki Heinok ben e prakseri fa a grontapu ben o de?

5 Wan tra man di ben abi wan tranga bribi na Heinok. A ben libi na mindri ogrisma di ben e taki „takru sani” fu Gado. Ma Heinok ben abi deki-ati èn dati meki a ben e preiki a boskopu fu Gado. A taigi den sma taki Yehovah ben o kon ’nanga den dusundusun santawan fu en fu strafu ala sma. A ben o kon tu fu sori den san na den ogri di den du di meki taki den o kisi a strafu èn san na den takru sani di den ogri sondari ben taki fu en’ (Yud. 14, 15). San meki Heinok ben abi a deki-ati fu preiki so wan boskopu? Kande a ben e si kaba fa a grontapu ben o de te ala sma o dini Yehovah.Leisi Hebrewsma 11:5, 6.

6. Sortu sani Noa prakseri kande baka a Frudu?

6 Fu di Noa ben bribi na ini Yehovah, meki a no dede na ini a Frudu (Hebr. 11:7). Na a srefi bribi dati, meki taki Noa ben e gi Yehovah meti leki ofrandi (Gen. 8:20). Baka a Frudu, grontapu ben kon ogri baka. Nimrod bigin tiri èn a ben wani taki sma gens Yehovah (Gen. 10:8-12). Ma Noa ben tan abi wan tranga bribi. Neleki Abel, a ben de seiker taki te fu kaba Gado o puru sondu nanga dede. Kande Noa ben e prakseri tu fa a ben o de te nowan ogri-ati tiriman o de moro. Wi srefi kan prakseri fu a moi ten dati tu. A ten dati no de fara moro.Rom. 6:23.

DEN PRAKSERI A TEN TE GADO O DU SAN A PRAMISI

7. San Abraham, Isak nanga Yakob ben e fruwakti?

7 Abraham, Isak nanga Yakob ben man si kaba sortu moi sani den ben o kisi na ini a ten di ben o kon. Yehovah ben pramisi taki na den bakapikin fu en ben o meki taki ala pipel fu grontapu o kisi blesi (Gen. 22:18; 26:4; 28:14). Gado ben pramisi den tu taki a famiri fu den ben o tron wan bigi pipel èn taki den ben o libi na ini a moi Pramisi Kondre (Gen. 15:5-7). Fu di Abraham, Isak nanga Yakob ben sabi taki Yehovah ben o du san a pramisi, meki den ben man si kaba fa a famiri fu den ben o libi na ini a kondre dati. Fu taki en leti, sensi di Adam nanga Eva sondu, Yehovah yepi den reti-ati futuboi fu en fu frustan taki wan dei o kon te nowan libisma o abi sondu moro.

8. San yepi Abraham fu abi wan tranga bribi èn fu gi yesi na Gado?

 8 Fu di Abraham ben abi wan tranga bribi, meki a gi yesi na Yehovah srefi te a ben hebi gi en. Abraham nanga tra reti-ati sma ben man si kaba fa Yehovah ben o du san a pramisi, aladi den sani dati no pasa di den ben de na libi. Bijbel e taki: „Den ben si den [sani disi] fu farawe kaba èn den ben prisiri nanga dati.” (Leisi Hebrewsma 11:8-13.) Abraham ben sabi taki na ini a ten di pasa Yehovah du ala ten san a pramisi. Dati meki a ben de seiker taki ala sani di Yehovah pramisi fu du na ini a ten di ben o kon, ben o pasa trutru.

9. Fa a bribi di Abraham ben abi na ini den pramisi fu Gado yepi en?

9 Fu di Abraham ben e bribi den pramisi fu Yehovah, meki a tan du san Yehovah aksi en. Fu eksempre, a gowe libi a foto Ur pe a ben e tan, dan a go na Kanan. Ma en heri libi a ben e weigri fu tan langa na ini den foto fu a kondre disi. A ben sabi taki den foto disi ben o kisi pori fu di den tiriman fu den no ben e dini Yehovah (Yos. 24:2). En heri libi langa Abraham „ben fruwakti a foto di abi trutru fondamenti”. Na ini Bijbel wi e leisi taki „a sma di prakseri fa fu meki a foto dati èn di bow en, na Gado” (Hebr. 11:10). Abraham ben si kaba fa a libi o de te Yehovah nanga a Kownukondre fu en o tiri grontapu fu têgo. Abel, Heinok, Noa, Abraham nanga tra sma leki den ben bribi taki den dedewan o kisi wan opobaka. Den ben e fruwakti fu libi na grontapu te Gado Kownukondre, „a foto di abi trutru fondamenti”, o tiri. Ala leisi te den ben e prakseri den blesi disi, dan a bribi fu den na ini Yehovah ben e kon moro tranga.Leisi Hebrewsma 11:15, 16.

10. Fu san ede a bun taki Sara ben e prakseri den pramisi fu Gado?

10 Abraham en wefi Sara ben bribi tranga tu na ini den pramisi fu Yehovah. Srefi di a ben abi 90 yari èn a no ben abi pikin ete, a ben prakseri a ten te a ben o kisi wan beibi. A ben e si srefi kaba fa den pikin fu en ben o tron wan bigi pipel (Hebr. 11:11, 12). Fa Sara ben kan de seiker fu dati? We, fu di Yehovah taigi en masra: „Mi o blesi [Sara] èn mi o meki yu kisi wan manpikin nanga en. Mi o blesi en èn mi o meki a tron na afo fu bun furu pipel. Den bakapikin fu en o tiri leki kownu” (Gen. 17:16). Soleki fa Yehovah pramisi, dan Sara kisi wan manpikin Isak. A wondru disi ben sori en krin taki den tra sani di Yehovah pramisi ben o kon tru. Wi srefi kan meki a bribi fu wi kon moro tranga te wi e prakseri fa sani o de te den pramisi fu Yehovah o kon tru.

A BEN POTI ALA EN PRAKSERI NA DEN BLESI DI A BEN O KISI

11, 12. Fa Moses ben kon lobi Yehovah moro nanga moro?

11 Ete wan sma di ben bribi na ini den pramisi fu Yehovah, na Moses. A gro kon bigi na ini Egepte leki wan pikin fu a kownu. Ma fu di a ben lobi Yehovah moro iniwan tra sani, meki a no ben wani makti noso gudu. En papa nanga mama ben de Israelsma èn den ben leri en suma na Yehovah. Den ben leri en tu taki Yehovah pramisi taki wan dei den Israelsma no ben o de srafu moro èn taki a ben o gi den Israelsma a Pramisi Kondre (Gen. 13:14, 15; Eks. 2:5-10). O moro Moses ben e prakseri fu den pramisi disi, o moro a ben kon lobi Yehovah.

12 Bijbel e taki: „Na fu di Moses ben abi bribi, meki di a gro kon bigi, a no ben wani meki sma kari en a manpikin fu na umapikin fu a kownu fu Egepte. Ma a ben bosroiti fu nyan pina makandra nanga a pipel fu  Gado, na presi fu nyan bun fu sondu fu wan pisi ten nomo, fu di a ben si a syen di en leki a Salfuwan ben kisi, leki wan gudu di bigi moro den gudu fu Egepte. A ben poti ala en prakseri na a pai di a ben o kisi.”Hebr. 11:24-26.

13. Fu san ede a bun taki Moses tan prakseri den pramisi fu Yehovah?

13 A musu fu de taki Moses prakseri bun fu a pramisi fu Yehovah fu fri den Israelsma so taki den no ben o de srafu moro. Neleki fa a ben de nanga tra futuboi fu Yehovah, na so Moses ben sabi tu taki wan dei Yehovah ben o meki taki nowan libisma dede moro (Yob 14:14, 15; Hebr. 11:17-19). Sobun, fu di Moses ben frustan omeni Yehovah lobi en pipel, meki a kon lobi Yehovah moro èn a bribi fu en kon moro tranga. Den sani disi yepi en tu fu tan dini Yehovah en heri libi langa (Deut. 6:4, 5). Srefi di Farao taigi Moses taki a ben o kiri en, Moses no frede. A ben sabi taki wan dei Yehovah ben o blesi en.Eks. 10:28, 29.

PRAKSERI DEN SANI DI GADO KOWNUKONDRE O DU

14. Fa son sma e si a ten di e kon?

14 Furu sma na ini a ten disi e prakseri fa a libi fu den o de. Ma den sani di den e prakseri na sani di noiti o pasa. Fu eksempre, son sma di pôti, e dren taki wan dei den o kon gudu èn taki den no o abi nowan sorgu moro. Ma Bijbel e taki dati a libi na ini Satan grontapu, o „lai soso broko-ede nanga pina” ala ten (Ps. 90:10). Tra sma e prakseri taki wan dei o kon taki wan tirimakti fu libisma o lusu den problema fu grontapu. Ma Bijbel e taki dati soso a tirimakti fu Gado o man du disi (Dan. 2:44). Yu abi furu sma tu di e denki taki noiti grontapu o kenki. Ma Bijbel e taki dati Gado o pori na ogri grontapu disi (Sef. 1:18; 1 Yoh. 2:15-17). Den sma di e denki taki sani no o pasa leki fa Yehovah taki, o si taki den no abi leti.

Yu e si yusrefi kaba na ini a nyun grontapu? (Luku paragraaf 15)

15. (a) Fu san ede a bun fu prakseri den sani di Gado pramisi wi gi a ten di e kon? (b) San na wan fu den sani di yu ben sa wani du na ini a paradijs?

15 Wi na a tra sei e prisiri fu di Yehovah pramisi wi wan switi libi na ini a ten di e kon. Te wi e denki fu a ten dati, dan dati e gi wi a deki-ati di wi abi fanowdu fu tan dini en. Kande yu e si kaba fa yu e du den sani di Yehovah pramisi yu, awinsi dati o de na ini hemel noso na grontapu. Efu yu abi a howpu fu libi fu têgo na grontapu, dan prakseri fa a libi o de: Yu e si fa yu e wroko makandra nanga den mati fu yu fu meki heri grontapu tron wan moi dyari. Den sma di e teki fesi na ini a wroko disi lobi yu èn dati meki yu e prisiri fu a libi. Ala sma na yu lontu lobi Yehovah neleki yu. Yu de gosontu èn yu abi furu krakti. Yu no abi fu broko yu ede nanga nowan sani. Yu e firi koloku fu di yu man du den sani di yu sabi du bun. Yu man yepi tra sma tu èn yu man gi Yehovah glori. Kande yu e yepi sma srefi di kon na libi baka èn yu e leri den fu kon sabi Yehovah (Yoh. 17:3; Tori 24:15). Te yu e prakseri fa a libi disi o de, dan a no dren yu e dren. Ala den sani disi o kon tru fu di na dati Bijbel taki.Yes. 11:9; 25:8; 33:24; 35:5-7; 65:22.

FU SAN EDE WI MUSU TAKI FU DEN SANI DI WI E FRUWAKTI?

16, 17. Fu san ede a bun fu taki fu den sani di Yehovah pramisi wi gi a ten di e kon?

16 Te wi e fruteri den brada nanga sisa fu wi san wi ben sa wani du na ini a nyun grontapu, dan wi e yepi makandra fu tan prakseri a moi ten di e wakti wi. Wi no sabi krin san ibriwan fu wi o du. Ma te wi e taki fu den sani di wi howpu fu du, dan wi e sori bribi na ini den pramisi fu Yehovah. Di  na apostel Paulus go na Rome, dan a ben breiti taki en nanga den brada drape ben „kan gi makandra deki-ati”. Na dati wi kan du tu na ini den muilek ten disi.Rom. 1:11, 12.

17 Te yu e denki den pramisi fu Yehovah, dan yu no o prakseri den problema fu yu so furu moro. Wan leisi na apostel Petrus ben e broko en ede nanga wan tu sani. Dati meki a taigi Yesus: „Wi gowe libi ala sani èn wi kon waka na yu baka. San wi o kisi dan?” Yesus ben wani yepi Petrus nanga den tra bakaman fu en fu denki den moi sani di den ben o du wan dei. Dati meki a taigi den: „Fu tru mi e taigi unu: Te sani meki kon nyun baka èn a Manpikin fu libisma sidon na tapu en gran kownusturu, dan unu di waka na mi baka o sidon tu na tapu twarfu kownusturu fu krutu den twarfu lo fu Israel. Ibri sma di gowe libi en oso, noso en brada, noso en sisa, noso en papa, noso en mama, noso en pikin, noso en gron fu mi nen ede, o kisi moro leki dati. A sma dati o kisi têgo libi leki gudu” (Mat. 19:27-29). A sani di Yesus taki ben o yepi Petrus nanga den tra disipel fu prakseri a ten te den ben o tiri makandra nanga Yesus na ini hemel. Den ben o man prakseri tu fa den ben o yepi libisma di o gi yesi na Gado, fu kon de sondro sondu.

18. Fu san ede a bun taki wi e prakseri a ten te Gado o du san a pramisi?

18 Na ini na artikel disi wi leri san yepi den futuboi fu Yehovah fu abi wan tranga bribi. Fu eksempre, Abel ben sabi taki Yehovah pramisi taki wan dei a o meki a grontapu tron wan moro bun presi èn Abel ben man si kaba fa disi o de. Fu di a ben bribi a pramisi dati, meki Yehovah ben e prisiri nanga en. Abraham srefi ben e prakseri a pramisi fu Yehovah di ben abi fu du nanga a bakapikin fu en. A ben man si kaba fa a ben o te a pramisi dati ben o kon tru. Dati meki a gi yesi na Yehovah, aladi a ben hebi gi en (Gen. 3:15). Moses fu en sei, „poti ala en prakseri na [den blesi] di a ben o kisi”. Disi yepi en fu tan abi wan tranga bribi èn fu meki a lobi di a ben abi gi Yehovah kon moro tranga (Hebr. 11:26). Te wi man si fa a o de te Yehovah du san a pramisi, dan a bribi fu wi èn a lobi di wi abi gi en o kon moro tranga. Ma moro fasi de fa wi kan gebroiki a moi kado di Gado gi wi. A tra artikel o taki fu a tori disi.