Go na content

Go na a tra menu

Go na table of contents

Yehovah Kotoigi

Sranantongo

Studie-Waktitoren  |  april 2015

Yu e si Yehovah leki wan trutru mati?

Yu e si Yehovah leki wan trutru mati?

„Kon krosibei na Gado èn a o kon krosibei na unu.”YAK. 4:8.

1. Fu san ede wi musu tan du muiti fu meki a matifasi di wi abi nanga Yehovah kon moro tranga?

EFU yu na wan dopu Kotoigi fu Yehovah, dan yu abi wan sani di warti trutru. Dati na a matifasi di yu abi nanga Yehovah. Ma a grontapu fu Satan e suku fu pori a matifasi disi. Boiti dati, den sondu firi fu wi kan meki tu taki a matifasi di wi abi nanga Yehovah kon swaki. Dati meki wi alamala musu tan du muiti fu meki a matifasi di wi abi nanga en kon moro tranga.

2. (a) O ten yu kan taki dati tu sma de mati fu makandra? (Luku san skrifi na a marki na tapu a bladzijde disi.) (b) Fa wi kan meki a matifasi di wi abi nanga Yehovah kon moro tranga?

2 Yu e si Yehovah leki wan trutru mati? Yu wani taki a matifasi di yu abi nanga en kon moro tranga? Yakobus 4:8 e sori yu fa yu kan du dati. A e taki: „Kon krosibei na Gado èn a o kon krosibei na unu.” Dyaso wi e si taki tu sma de na ini a tori: yu nanga Yehovah. * Te yu e du sani fu kon krosibei na en,  dan en o du sani tu fu kon krosibei na yu. O moro yu e du disi, o moro yu o si en leki wan trutru mati. A matifasi di yu abi nanga en o de so tranga taki yu o firi leki Yesus di ben taki: „A sma di seni mi kon, de trutru, èn . . . mi sabi en” (Yoh. 7:28, 29). Ma san na wan tu sani di yu kan du fu kon moro krosibei na Yehovah?

Fa yu nanga Yehovah kan taki nanga makandra? (Luku paragraaf 3)

3. Fa yu nanga Yehovah kan taki nanga makandra?

3 Efu yu wani kon krosibei na Yehovah, dan a prenspari srefisrefi taki yu nanga Yehovah e taki nanga makandra ala ten. Ma fa yu kan taki nanga Gado? We, fa yu e taki nanga wan mati di e libi fara? Kande unu e skrifi brifi gi makandra èn unu e bel makandra furu. Na so a de tu taki te yu e begi ala ten, dan dati na wan fasi fu taki nanga Yehovah. (Leisi Psalm 142:2.) Èn te yu e leisi en Wortu ala dei èn yu e denki dipi fu san yu leisi, dan yu e gi Yehovah na okasi fu taki nanga yu. (Leisi Yesaya 30:20, 21.) Sobun, meki wi go luku fa disi o yepi yu fu meki a matifasi di yu abi nanga Yehovah kon moro tranga èn fa dati kan yepi yu tu fu si en leki wan trutru Mati.

YEHOVAH E TAKI NANGA YU TE YU E STUDERI BIJBEL

4, 5. Fa Yehovah e gebroiki a Wortu fu en fu taki nanga yu? Gi wan eksempre.

4 Wi de seiker taki yu e agri taki Bijbel na a boskopu fu Gado gi ala libisma. Ma a de so taki Bijbel e sori san yu kan du fu kon krosibei na Yehovah? Iya, a e sori wi dati. Fa so? Te yu abi a gwenti fu leisi èn studeri Bijbel, dan luku fa yu e firi fu den sani di yu e leisi. Denki fa yu kan du den sani di yu e leri. Te yu e du disi, dan yu e meki Yehovah taki nanga yu. A e tron wan bun Mati fu yu di e yepi yu, èn yu e kon moro krosibei na en.Hebr. 4:12; Yak. 1:23-25.

5 Fu eksempre, Yesus taki: „No kibri yu gudu moro na grontapu.” San yu e denki te yu e leisi a sani disi? Kande yu e denki taki yu e poti a Kownukondre na a fosi presi na ini yu libi kaba èn taki Yehovah breiti nanga san yu e du. Ma te yu e leisi san Yesus taki, dan yu e kon frustan taki yu musu tyari moro kenki kon na ini yu libi èn yu musu du moro gi Gado. Na so Yehovah e yepi yu fu kon frustan san yu musu du fu kon moro krosibei na en.Mat. 6:19, 20.

6, 7. (a) Te wi e studeri Bijbel, dan sortu krakti disi abi tapu a lobi di wi abi gi Yehovah èn a lobi di en abi gi wi? (b) San wi musu hori na prakseri te wi e studeri Bijbel?

 6 A tru taki te wi e studeri Bijbel, wi e leri san wi kan du fu dini Yehovah moro bun. Ma wi e leri tu sortu sani Yehovah e du gi wi fu di a lobi wi èn sortu tra moi fasi a abi. Disi e meki taki wi lobi en moro. Te a lobi di wi abi gi Yehovah e kon moro dipi, dan a lobi di a abi gi wi, o kon moro dipi tu. Na so a matifasi di wi abi nanga en e kon moro tranga.Leisi 1 Korentesma 8:3.

7 Ma efu wi wani kon krosibei na Yehovah, dan a prenspari fu hori na prakseri fu san ede wi e studeri Bijbel. Yohanes 17:3 e taki: „Efu sma wani kisi têgo libi, den musu leri sabi yu, a wan-enkri tru Gado, èn a sma di yu seni kon, Yesus Krestes.” Sobun, wi no musu studeri nomo fu di wi wani kon sabi sani, ma fu di wi wani leri „sabi” sortu sma Yehovah de trutru.Leisi Eksodes 33:13; Ps. 25:4.

8. (a) San son sma kan denki fu a fasi fa Yehovah strafu Kownu Asaria? (b) Efu yu sabi Yehovah, dan san yu e denki fu a fasi fa a e du sani?

8 Te wi e si Yehovah leki wan krosibei Mati, dan wi no o bruya te Bijbel no e fruklari fu san ede a du son sani na a fasi fa a du en. Fu eksempre, fa yu e firi te yu e leisi san Yehovah du nanga Kownu Asaria fu Yuda? (2 Kow. 15:1-5) Wi e leisi taki „a pipel ben e tan go na den hei presi . . . fu tyari srakti-ofrandi nanga smoko-ofrandi”. Ma Asaria srefi „tan du san Yehovah feni bun”. Toku „Yehovah meki [a kownu] kisi wan takru siki. Na so a libi leki wan gwasiman teleki a dede”. Fu san ede Yehovah du disi? Bijbel no e taki dati. Ma disi musu bruya wi? Noso wi musu aksi wisrefi efu Yehovah strafu Asaria sondro taki a ben de fanowdu? Wi no o denki so efu wi sabi bun fa Yehovah e du sani. Wi sabi taki te Yehovah e strafu wan sma, dan ala ten a e gi en ’a strafu di a musu kisi’ (Yer. 30:11). Sobun, aladi yu no sabi kande fu san ede Yehovah strafu Asaria, toku yu kan de seiker taki Yehovah du san reti.

9. Sortu Bijbeltekst e meki wi kon frustan moro krin fu san ede Yehovah strafu Asaria nanga gwasi?

9 Tra tekst de na ini Bijbel di e fruteri wi moro fu a tori disi. Na ini Bijbel wi sabi Kownu Asaria leki Kownu Usia tu (2 Kow. 15:7, 32). Te wi e leisi 2 Kroniki 26:3-5, 16-21, dan wi e si taki wan pisi ten Usia du san Yehovah feni bun. Toku „a kon abi bigifasi” di a kon moro owru. „Dati meki sani no waka bun gi en.” Fu di a ben abi heimemre, meki a pruberi fu du a wroko fu den priester, aladi a no ben abi primisi fu du dati. Aititenti na wán priester kon taki nanga en fu a tori èn den pruberi fu sori en taki a no ben mag du a sani dati. San Usia du? A kisi so furu bigifasi, taki en „ati kon bron srefisrefi” nanga den priester. Now wi kan frustan fu san ede Yehovah meki a kisi gwasi!

10. (a) San meki Bijbel no abi fu fruklari ala ten fu san ede Yehovah e du son sani? (b) San wi musu du fu de seiker taki Yehovah e du san reti ala ten?

10 Sortu prenspari sani wi e leri dya? Na ini a tori fu Kownu Asaria wi e si nofo sani di e yepi wi fu frustan fu san ede Yehovah strafu en. Ma te Bijbel no e fruteri wi finifini fu san ede son sani pasa, dan san yu o du? Yu o aksi yusrefi efu Yehovah du san reti trutru? Noso yu o denki taki san Bijbel e fruteri, nofo kaba fu sabi taki Gado e du san reti ala ten? (Deut. 32:4) Te wi e kon sabi moro bun sortu sma Yehovah de trutru, dan a lobi nanga a  warderi di wi abi gi a fasi fa a e du sani, o kon moro bigi. Te dati de so, dan a no o de fanowdu ala ten fu kon sabi finifini fu san ede Yehovah e du son sani na a fasi fa a e du en. Yu kan de seiker taki te yu e meki muiti fu studeri Gado Wortu èn yu e denki dipi fu en, dan safrisafri yu o kisi moro warderi gi san a e du (Ps. 77:12, 13). Na so a matifasi di yu abi nanga Yehovah o kon moro tranga èn yu o si en leki wan trutru mati.

YU E TAKI NANGA YEHOVAH TE YU E BEGI

11-13. Fa yu sabi taki Yehovah e arki begi trutru? (Luku a prenki na a bigin fu na artikel.)

11 Te wi e begi, dan wi e kon moro krosibei na Yehovah. Wi e prèise en, wi e taki en tangi èn wi e suku a yepi fu en (Ps. 32:8). Ma efu yu wani si Yehovah leki wan trutru mati, dan yu musu bribi taki a e arki begi.

12 Son sma e taki dati Gado no e arki begi èn den feni taki begi na soso fu meki yu firi bun. Den e bribi taki begi e yepi yu nomo fu denki bun fu den problema fu yu èn taki disi e yepi yu fu feni yu eigi lusu. A tru taki begi kan yepi yu na a fasi disi. Ma te yu e taki nanga Yehovah na ini begi, dan a e arki yu trutru. Fa yu kan de seiker fu dati?

13 Prakseri fu a tori disi: Fosi Yesus kon na grontapu, a ben e si fa Yehovah e piki den begi fu En futuboi. Di Yesus ben de na grontapu, a fruteri en Papa na hemel na ini begi fa a ben e firi. Yu denki taki Yesus ben o du disi efu a ben sabi taki Yehovah no e arki trutru? Yu denki taki a ben o begi wan heri neti srefi? (Luk. 6:12; 22:40-46) A ben o leri den bakaman fu en fu begi efu a ben sabi taki Yehovah no e arki begi? A de krin taki Yesus ben sabi taki Yehovah e arki begi trutru. Wan leisi Yesus taki: „Mi Tata, mi e taki yu tangi taki yu arki a begi fu mi. Mi sabi heri bun taki yu e arki mi ala ten.” Wi srefi kan de seiker tu taki Yehovah „na a sma di e arki begi”.Yoh. 11:41, 42; Ps. 65:2.

14, 15. (a) Sortu wini wi e kisi te wi aksi spesrutu sani na ini den begi fu wi? (b) Fa den begi fu Kathy yepi en fu meki a matifasi di a abi nanga Yehovah kon moro tranga?

14 A no ala ten wi e si wantewante fa  Yehovah e piki den begi fu wi. Ma te yu e aksi Yehovah spesrutu sani, dan yu o man si moro krin fa a e piki den begi fu yu èn a o de moro makriki gi yu fu si en leki wan trutru mati. Efu yu e fruteri Yehovah finifini nanga sortu sani yu e broko yu ede, dan a o kon moro krosibei na yu.

15 Fu eksempre, luku na ondrofenitori fu Kathy. * Aladi Kathy ben abi a gwenti fu go na ini a preikiwroko, a no ben lobi en. A e taki: „Mi no ben lobi a preikiwroko. Mi no ben lobi en kwetikweti. Di mi go nanga pensyun, wan owruman taigi mi taki a ben howpu taki mi ben o tron gewoon pionier. A gi mi wan formulier srefi fu skrifi mi nen fu kan du a pionierwroko. Mi bosroiti fu go pionier, ma ibri dei mi ben e begi Yehovah tu fu meki mi lobi a preikiwroko.” Yu denki taki Yehovah piki den begi fu en? A sisa disi e taki: „Now mi e pionier dri yari kaba. Fu di mi de furu na ini a preikiwroko, dan mi e si fa tra sisa e du en, èn safrisafri dati yepi mi fu man preiki moro bun. Now mi lobi a preikiwroko trutru. San moro prenspari na taki a matifasi di mi abi nanga Yehovah kon moro tranga.” Iya, den begi fu Kathy yepi en fu kon si Yehovah leki wan trutru mati.

SAN YU MUSU DU

16, 17. (a) San wi musu du fu tan meki muiti fu kon moro krosibei na Yehovah? (b) San wi o luku na ini a tra artikel?

16 Wi heri libi langa wi musu meki muiti fu kon moro krosibei na Yehovah. Meki wi tan arki en fu di wi abi a gwenti fu studeri Bijbel èn meki wi tan taki nanga en na ini begi. Te wi e du disi, dan dei fu dei a matifasi di wi abi nanga Yehovah o kon moro tranga. A o yepi wi tu fu man horidoro te tesi miti wi.

Wi heri libi langa wi musu meki muiti fu kon moro krosibei na Yehovah (Luku paragraaf 16 nanga 17)

17 Ma son leisi problema e tan miti wi, aladi wi abi a gwenti fu begi Yehovah. Te dati e pasa, dan a kan taki wi no e frutrow so furu moro na tapu Yehovah. Kande wi e bigin aksi wisrefi efu Yehovah e arki den begi fu wi noso efu wi de en mati trutru. Te yu e bigin firi so, dan san yu kan du? A tra artikel o taki fu a tori disi.

^ paragraaf 2 A fasi fa tu sma e firi gi makandra èn den sani di den e du gi makandra, e sori taki den de mati. Sobun, den ala tu musu du sani fu tan abi wan bun matifasi.

^ paragraaf 15 Wi kenki a nen.