Go na content

Go na a tra menu

Go na table of contents

Yehovah Kotoigi

Sranantongo

Studie-Waktitoren  |  april 2015

 ONDROFENITORI

Wi kisi blesi „na ini bun ten èn na ini muilek ten”

Wi kisi blesi „na ini bun ten èn na ini muilek ten”

MI GEBORE na ini maart 1930 na ini a dorpu Namkumba na Malawi. Na osofamiri fu wi ben de fayafaya futuboi fu Yehovah. Na ini 1942, mi gi mi libi abra na Gado èn mi dopu na ini wan fu den moi liba fu Malawi. Den 70 yari di pasa mi pruberi fu du san na apostel Paulus ben taigi Timoteyus. A ben taki: „Preiki a wortu, du disi fayafaya na ini bun ten èn na ini muilek ten.”2 Tim. 4:2.

Na a bigin fu 1948, Nathan H. Knorr nanga Milton G. Henschel kon na Malawi fu a fosi leisi. Di den brada disi fu na edekantoro fu Yehovah Kotoigi kon, dan mi kisi deki-ati fu dini Yehovah furuten. Nanga prisiri mi e memre ete san den taki èn fa dati tranga a bribi fu mi. Di Brada Knorr hori wan lezing, wi ben de nanga sowan 6000 sma e arki. Wi ben e tanapu na wan pisi gron di ben lai nanga tokotoko. A lezing ben nen „Wán tiriman di o tiri ala pipel fu têgo”, èn a gi wi furu deki-ati.

Bakaten mi miti Lidasi, wan moi sisa di kweki na ini wan famiri fu Yehovah Kotoigi tu. Mi ben kon sabi taki en srefi ben wani du a furuten diniwroko. Wi trow na ini 1950 èn na ini 1953 wi ben abi tu pikin. Aladi wi ben abi a frantwortu now fu kweki pikin, toku wi bosroiti taki mi ben o bigin nanga a gewoon pionierwroko. Tu yari baka dati, mi kisi a kari fu tron spesrutu pionier.

Syatu baka dati, mi kisi a grani fu tron kring-owruman. Lidasi horibaka gi mi. Na so mi ben man sorgu gi mi osofamiri èn mi ben man yepi den fu dini Yehovah, aladi mi ben e du a kring-wroko. * Ma wi ala tu ben wani go na ini a furuten diniwroko. Fu di wi ben seti sani bun èn den pikin fu wi ben e horibaka gi wi, meki Lidasi ben man bigin nanga a furuten diniwroko na ini 1960.

Den kongres ben e sreka wi gi a frufolgu di ben o kon

Wi ben lobi den bun ten dati pe wi ben kan wroko makandra nanga den brada nanga sisa fu wi na ini den difrenti gemeente. Te wi ben e du a kring-wroko, dan wi ben e go na den moi kontren fu Mulanje-bergi na zuidsei. Wi ben e doro srefi te na a syoro fu Malawimeer di de na a owstusei pisi fu a kondre. Na ini den kring pe wi ben e wroko, wi si fa a nomru fu preikiman nanga gemeente gro.

Na ini 1962, wi go na a „Futuboi di abi deki-ati” Distrikt Kongres. Te yu e prakseri fu a tori disi baka, dan den konmakandra dati ben de trutru san wi alamala ben abi fanowdu fu sreka wisrefi gi den muilek ten di ben o kon. A tra yari fu en di Brada Henschel kon na Malawi baka, wan spesrutu kongres ben hori krosibei fu a foto Blantyre èn  sowan 10.000 sma ben de. A kongres dati gi wi furu deki-ati èn a gi wi krakti fu man kakafutu gi den tesi di ben o miti wi.

MUILEK TEN E BIGIN

Lanti tapu a wroko fu wi èn den teki a bijkantoro fu wi

Na ini 1964, den Kotoigi kisi hebi tesi fu di den no ben wani horibaka gi politiek. Na ini a pisi ten dati, den Kotoigi lasi moro leki 100 Kownukondre zaal èn moro leki 1000 oso fu di sma bron den noso du tra sani nanga den. Ma wi ben man tan du a kring-wroko teleki den tiriman fu Malawi tapu a wroko fu den Kotoigi na ini 1967. Den teki a bijkantoro na Blantyre èn den taigi den zendeling taki den musu komoto na ini a kondre. Den tiriman poti furu Kotoigi fu Malawi, sosrefi mi nanga Lidasi, na strafu-oso. Baka di wi komoto na strafu-oso, wi go doro nanga a kring-wroko na wan kibri fasi.

Wan dei na ini oktober 1972, sowan 100 yongusma fu wan politiek grupu ben de na pasi fu e kon na a oso fu wi. Sma ben sabi den leki a Jeugdbond fu Malawi. Ma wan fu den lon kon taigi mi fu go kibri fu di den yongusma dati ben wani kiri mi. Mi taigi mi wefi nanga den pikin fu mi fu go kibri na mindri den bânabon di ben de krosibei. Ne mi kren go esi-esi na ini wan bigi manyabon. Drape mi ben kan si fa den broko na oso fu mi nanga ala den sani di ben de na ini.

Fu di den brada fu wi no ben wani horibaka gi politiek, meki sma bron den oso fu den

Di a frufolgu kon moro hebi, dusundusun fu wi lowe komoto na ini a kondre. Mi nanga mi osofamiri tan na wan loweman-kampu na west-sei fu Mosambik teleki yuni 1974. Na a ten dati, den aksi mi nanga Lidasi fu dini leki spesrutu pionier na Dómue na ini Mosambik. A presi disi no ben de fara fu Malawi. Wi tan dini leki spesrutu pionier teleki 1975 di Potogisikondre no ben e tiri Mosambik moro. Baka dati den tiriman fu a kondre dwengi wi fu drai go baka na Malawi pe sma ben e frufolgu den Kotoigi ete.

Di wi drai go baka na Malawi, den aksi mi nanga mi wefi fu go na den gemeente na ini a mamafoto Lilongwe. Aladi sma ben e frufolgu den Kotoigi èn den ben kisi furu problema, toku a nomru fu den gemeente gro na ini den kring pe wi ben e dini.

WI SI FA YEHOVAH HORIBAKA GI WI

Wan dei wi doro na wan dorpu pe wan politiek konmakandra ben e hori. Ne wan tu sma kon sabi taki wi na Yehovah Kotoigi èn den meki wi sidon na mindri wan politiek grupu fu yongusma (Malawi Young Pioneers). Wi begi Yehovah fayafaya fu a yepi wi na ini a muilek situwâsi disi. Di a konmakandra kaba, den sma bigin fon wi. Ne wan owru frow lon kon, dan a bari: „Libi den, mi e begi un! A man disi na mi brada pikin. Meki a gowe!” Dan a fesiman fu a konmakandra taki: „Lusu den!” A frow no ben de wan famiri fu wi.  Sobun, wi no sabi fu san ede a taki a sani disi. Ma san wi sabi na taki Yehovah arki a begi fu wi.

Politiek partij karta

Na ini 1981, wi miti wan tu fu den yongusma fu a politiek grupu disi baka. Den teki den baisigri fu wi, den tas fu wi, den dosu nanga buku èn den prenspari papira fu a kring-wroko. Ma wi ben man lowe go na a oso fu wan owruman. Dan wi begi baka fu a situwâsi. Fu di furu sani fu den Kotoigi ben skrifi na ini den papira di den ben teki fu wi, meki wi ben e broko wi ede nanga dati. Di den sma fu a politiek grupu luku den papira, den si brifi di sma na ala sei fu Malawi ben seni kon na mi. Di den si den brifi, den kon frede fu di den ben denki taki mi ben de wan prenspari wrokoman fu lanti. Dati meki den tyari ala sani go na den owruman fu a kontren drape sondro fu puru wan sani na ini.

Wan tra leisi baka, wi ben e abra wan liba na ini wan boto. A sma di ben abi a boto, ben de na edeman fu wan politiek partij na ini a birti drape. Sobun, a bigin luku efu ala den sma na ini a boto ben abi den politiek partij karta. * Di a man ben e waka kon na wi, a si wan fufuruman di skowtu ben e suku wan heri pisi ten kaba. A sani dati tyari wan heri dyugudyugu kon èn a man no ben luku moro suma ben abi partij karta. Na so wi si baka fa Yehovah yepi wi na wan lobi-ati fasi.

DEN KISI WI ÈN DEN POTI WI NA STRAFU-OSO

Na ini februari 1984, mi ben de na pasi fu go na Lilongwe fu tyari wan tu raportu go na a bijkantoro na Sambia. Ne wan skowtu stop mi, dan a bigin suku sani na ini a tas fu mi. Di a feni wan tu buku di e taki fu Bijbel, a tyari mi go na skowtu-oso, dan a bigin fon mi. Baka dati a tai mi nanga titei, dan a poti mi na ini wan kamra nanga strafuman di ben de fufuruman.

A dei na en baka, na edeman fu skowtu tyari mi go na wan tra kamra, dan a skrifi na tapu wan papira: „Mi, Trophim R. Nsomba, e teken a papira disi taki mi no de wan Kotoigi fu Yehovah moro so taki mi kan kon fri.” Mi taigi en: „Mi de klariklari fu den tai mi èn fu dede. Mi na wan Kotoigi fu Yehovah ete.” Mi weigri fu teken a papira. Dati meki na edeman fu skowtu ati bron nanga mi èn a naki so tranga nanga en kofu na tapu a tafra taki a skowtu na ini a tra kamra lon luku san e pasa. Na edeman taigi en: „A man disi e weigri fu teken a papira fu sori taki a no o preiki moro. Sobun, meki a teken taki en na wan Yehovah Kotoigi. Dan wi o seni en go na Lilongwe meki den tai en.” Na a pisi ten dati, mi wefi ben e aksi ensrefi san pasa nanga mi. Fo dei baka dati, wan tu brada ben man fruteri en pe mi de.

Na a skowtu-oso fu Lilongwe den ben sori switifasi gi mi. Drape na edeman fu skowtu taki: „Mi e gi yu wan preti aleisi bika den tai yu fu di yu e  preiki Gado Wortu. Den tra sma di de dya na fufuruman.” Baka dati a seni mi go na a strafu-oso na Kachere pe mi tan feifi mun.

A driktoro fu a strafu-oso ben breiti taki mi kon. A ben wani meki mi tron a „domri” fu a strafu-oso. Yu ben abi wan tra strafuman di ben de domri kaba, ma a driktoro no ben wani en moro leki domri. Dati meki a taigi en: „Mi no wani yu leri den sma dyaso Gado Wortu moro. Yu de na strafu-oso fu di yu fufuru a kerki fu yu.” Sobun, ala wiki mi ben hori konmakandra fu leri den strafuman san Bijbel e taki.

Bakaten, sani kon moro ogri. Den skowtu fu a strafu-oso bigin aksi mi omeni Kotoigi ben de na Malawi. Di mi no piki den leki fa den wani, den fon mi teleki mi fadon flaw. Wan tra leisi, den ben wani sabi pe na edekantoro fu wi de. Mi taigi den: „A no muilek fu piki na aksi disi èn mi o taigi unu.” Mi fruteri den taki Bijbel e taki fu na edekantoro fu Yehovah Kotoigi. Den fruwondru di mi taki dati èn den aksi mi: „Pe fu Bijbel?”

Mi piki den: „Na Yesaya 43:12.” Ne den go suku a Bijbeltekst, dan den leisi en bun. A tekst disi e taki: „’Unu na mi kotoigi èn mi na a tru Gado’, na so Yehovah taki.” Den leisi en dri tron. Dan den aksi: „Fa na edekantoro fu Yehovah Kotoigi kan de na ini Bijbel èn no na ini Amerkankondre?” Mi taigi den: „Te Yehovah Kotoigi na Amerkankondre e leisi a Bijbeltekst disi, dan den e feni tu taki a e taki fu na edekantoro fu den.” Fu di mi ben weigri fu taigi den san den ben wani yere, meki den seni mi go na wan tra strafu-oso na Dzaleka, noordsei fu Lilongwe.

WI KISI BLESI SREFI NA INI MUILEK TEN

Na ini yuli 1984, di mi doro na a strafu-oso na Dzaleka, yu ben abi 81 Kotoigi drape kaba. A strafu-oso ben furu so te, taki den 300 strafuman ben abi fu didon sribi na a gron sei na sei. Baka wan pisi ten, den Kotoigi ben man miti na ini pikin grupu fu luku wan Bijbeltekst ibri dei. Ibri leisi wan tra Kotoigi ben kan taki sortu tekst wi ben o luku. Disi gi wi furu deki-ati.

A driktoro fu a strafu-oso no ben meki wi moksi nanga den tra strafuman. Wan fu den skowtu fu a strafu-oso taigi wi kibrikibri: „Lanti no de teige unu. Wi e poti unu na strafu-oso fu di den frede taki a politiek grupu fu den yongusma o kiri unu. Fu di unu e preiki taki wan bigi feti o kon, meki lanti denki taki te a feti dati o bigin, ala den srudati o frede èn den o lon gowe.”

Den e tyari den brada gowe, baka di den go na fesi krutu

Na ini oktober 1984, wi alamala ben musu go na fesi krutu. Ibriwan fu wi kisi wan strafu fu tu yari. Leki fa a ben pasa kaba, dan den poti wi na strafu-oso makandra nanga sma di no ben de Kotoigi. Ma a driktoro fu a strafu-oso taigi ala sma drape: „Yehovah Kotoigi no e smoko.” Dan a taigi den skowtu fu a strafu-oso: „Sobun, un no abi fu go aksi den wan sikaret. No seni den tu fu suku wan pisi krofaya gi unu fu leti wan sikaret. Den  na Gado pipel. Ala Yehovah Kotoigi musu kisi nyanyan tu tron wan dei fu di den no de dya fu wan ogri di den du, ma fu di den e bribi na ini Bijbel.”

A bun fasi fa wi ben e tyari wisrefi, ben abi tra bun bakapisi tu. Den strafuman no ben mag go na dorosei te alen ben fadon noso te a ben dungru. Ma wi ben mag go na dorosei o ten wi ben wani. Den ben sabi taki wi no ben o pruberi fu lowe. Wan leisi a pasa srefi taki di wi ben e wroko na ini wan gron, wan fu den skowtu fu a strafu-oso di ben e luku wi kon siki. Wi tyari en go baka na a strafu-oso fu meki datra luku en. Den skowtu fu a strafu-oso ben sabi taki den ben kan frutrow wi. Sobun, fu di wi ben e tyari wisrefi na wan fasi di fiti, meki wi ben man si fa den man di ben e luku wi na ini a strafu-oso, gi Yehovah nen glori.1 Petr. 2:12. *

BUN TEN DORO BAKA

Tapu 11 mei 1985, den lusu mi fu a strafu-oso na Dzaleka. Mi ben breiti fu kan de baka nanga mi osofamiri. Wi e taki Yehovah tangi taki a yepi wi fu tan gi yesi na en na ini wan ten di ben muilek srefisrefi. Wi ben firi leki na apostel Paulus di ben skrifi: „Brada, wi wani taki un musu sabi sortu banawtu miti wi . . . Wi no ben sabi srefi efu wi ben o tan na libi. Fu taki en leti, wi ben firi leki na dedestrafu wi kisi. Disi pasa, so taki wi no ben o frutrow na tapu wisrefi, ma na tapu a Gado di e gi dede sma wan opobaka. A frulusu wi fu dede srefi.”2 Kor. 1:8-10.

Brada Nsomba nanga en wefi Lidasi na fesi wan Kownukondre zaal na ini 2004

Iya, son leisi a ben gersi leki wi no ben o pasa a muilek ten dati libilibi. Ma ala ten wi aksi Yehovah fu a gi wi deki-ati nanga koni. Dati ben o yepi wi fu tan abi sakafasi so taki wi ben kan tan gi en bigi nen glori.

Yehovah blesi wi na ini bun ten èn na ini muilek ten. Now wi e prisiri fu si a bijkantoro na Lilongwe di kaba bow na ini a yari 2000. Wi breiti tu taki den bow moro leki 1000 nyun Kownukondre zaal na ini heri Malawi. Den blesi disi fu Yehovah moi so te taki a gersi wan dren gi mi nanga Lidasi. *

^ paragraaf 7 Na ini a ten disi, a de so taki te brada abi yongu pikin na oso ete, den no e aksi den moro fu du a kring-wroko.

^ paragraaf 18 Sma na ini Malawi ben musu abi a karta disi fu sori taki den ben e horibaka gi a politiek partij di ben e tiri.

^ paragraaf 30 Efu yu wani sabi moro fu a frufolgu di den Kotoigi na ini Malawi kisi, dan leisi a Jaarboek van Jehovah’s Getuigen 1999, bladzijde 171-223.

^ paragraaf 34 Di wi ben e sreka na artikel disi fu tyari en kon na doro, dan Brada Nsomba dede. A ben abi 83 yari.