Go na content

Go na a tra menu

Go na table of contents

Yehovah Kotoigi

Sranantongo

Studie-Waktitoren  |  februari 2015

 A HISTORIA FU WI

„Wan ten di prenspari”

„Wan ten di prenspari”

NA INI 1870, wan pikin grupu na ini a foto Pittsburgh (Allegheny), na Pennsylvania, Amerkankondre, bigin ondrosuku Bijbel. Makandra nanga Charles Taze Russell, di ben e teki fesi, den ondrosuku a tori fu a lusu-paiman fu Krestes. Syatu baka dati den kon frustan taki a lusu-paiman ben de fanowdu fu meki den sani di Yehovah abi na prakseri kon tru. Den ben breiti taki a lusu-paiman e gi ala libisma, sosrefi den sma di no ben yere ete fu Yesus, na okasi fu kisi frulusu. Fu sori warderi, meki den bigin memre a dede fu Yesus ibri yari.1 Kor. 11:23-26.

Brada Russell bigin tyari Zion’s Watch Tower kon na doro, di ben sori krin taki a leri fu a lusu-paiman na wan tumusi prenspari sani fu di a lusu-paiman na a moro moi fasi fa Gado sori a lobi fu en. A Watch Tower taki dati a ten fu a Memrefesa fu Krestes dede ben de „wan ten di prenspari”. A ben gi leisiman deki-ati fu memre a dede fu Yesus na ini Pittsburgh noso na wan tra presi, awinsi dati ben o de na ini wan oso fu wan sma. A tijdschrift ben taki dati srefi efu tu noso dri bribiman kon makandra, iya, srefi efu na wán bribiman nomo, toku yu ben kan taki dati Masra ben o de drape nanga den.

Ibri yari moro nanga moro sma ben e kon na Pittsburgh gi a Memrefesa. A kari di den ben e gi sma fu kon na a Memrefesa ben taki: „Wi di de dyaso e gi unu wan switikon nanga wi heri ati.” Bijbel Ondrosukuman na ini Pittsburgh ben e teki brada nanga sisa na ini oso èn den ben e gi den nyanyan srefi. Na ini 1886, na a ten fu a Memrefesa, wan kongres ben e hori wan tu dei langa. Na a spesrutu konmakandra disi den ben e studeri Bijbel èn den ben e leri furu sani. A Watch Tower ben taki: „Kon nanga wan ati di furu nanga lobi gi Masra, gi den brada fu en èn gi a tru bribi.”

Papira fu sori fa fu prati den sani di den ben nyan èn dringi na a Memrefesa na ini London Tabernacle

Furu yari langa, Bijbel Ondrosukuman na ini Pittsburgh hori kongres gi sma di ben e bribi na ini a lusu-paiman èn di ben e kon drape gi a Memrefesa. Di a grupu Bijbel Ondrosukuman kon moro bigi, dan na moro presi na grontapu Memrefesa ben e hori èn moro sma ben e kon. Ray Bopp di ben de fu a gemeente na Chicago kan memre taki na ini den yari baka 1910, a ben e teki wan tu yuru fu meki den sani di den ben o nyan èn dringi na a Memrefesa pasa na fesi ala sma. Disi ben de so fu di pikinmoro ala den hondrohondro sma drape ben e nyan èn dringi fu den sani disi.

San na den sani di den ben e nyan èn dringi? A Watch Tower ben taki dati Yesus gebroiki win na a Avondmaal fu Masra. Ma wan pisi ten ben de taki den ben e gi sma a rai fu gebroiki droifisap noso sap di meki fu korenti di bori na ini watra. Den ben kan gebroiki den sani disi, so taki a win no ben o de wan tesi gi den sma di ben abi wan swakifasi. Ma efu sma ben feni taki den ben musu gebroiki win, dan den ben kan du dati. Bakaten Bijbel Ondrosukuman kon  frustan taki a yoisti sani fu prenki Yesus brudu, na redi win di no abi spesrei na ini.

Na ini wan strafu-oso na ini Nikaragwa den ben seni a papira nanga a potlood disi fu a wán cel go na a trawan fu skrifi omeni sma ben de na a Memrefesa di den ben hori

A Memrefesa ben e gi sma na okasi fu denki dipi fu sani. Ma na ini son gemeente sma ben e du leki den ben de na row èn baka a Memrefesa ala sma ben e gowe sondro fu taki wan sani. Ma na ini 1934, a buku Jehovah ben taki dati a Memrefesa no ben de fu sari taki Yesus dede wan hati dede, ma fu prisiri taki a bigin tiri leki Kownu na ini 1914.

Na ini 1957, brada na ini wan strafuman-kampu na Mordvinia, Rosiakondre, kon makandra fu hori a Memrefesa

Na ini 1935, wan bigi kenki kon di ben o abi krakti na tapu ala Memrefesa di ben o hori baka dati. Den ben kon frustan moro krin san den wortu „bigi grupu” (King James Version), noso „bigi ipi” na ini Openbaring 7:9 wani taki. Fosi a ten dati, futuboi fu Yehovah ben denki taki a grupu disi ben de Kresten di gi densrefi abra, ma di no ben de nanga so furu faya. Ma now den ben kon si taki a bigi grupu disi ben de futuboi fu Gado di abi a howpu fu libi na ini wan paradijs na grontapu. Baka di Russell Poggensee kon frustan a tori disi moro krin èn a go ondrosuku fa a de nanga ensrefi, a taki: „Mi no ben abi a firi taki a santa yeye fu Yehovah poti a howpu na ini mi fu go na hemel.” Sensi a ten dati, Brada Poggensee nanga furu tra futuboi fu Gado, no nyan fu a brede èn no dringi fu a win moro, ma toku den tan go na a Memrefesa.

Na a prenspari ten dati, a ben de wan moi okasi gi ala sma fu sori warderi gi a lusu-paiman fu di den ben e horibaka gi den spesrutu sani di seti fu du moro na ini a preikiwroko. Na ini 1932, a Bulletin (Nyunsu) gi Kresten deki-ati taki den no musu du leki santa sma di e go na a Memrefesa nomo, ma dan den no e preiki. Na ini 1934, a Bulletin aksi sma fu wroko leki yepipionier. A ben taki: „Wi o feni 1000 sma di wani tron yepipionier na a ten fu a Memrefesa?” Na Informateur taki fu den salfuwan: „Soso te den e preiki fu a Kownukondre, den kan abi trutru prisiri.” Bakaten den sma di abi a howpu fu libi na grontapu ben o ondrofeni disi tu. *

Di den sroto Harold King en wawan na ini wan strafu-oso cel, a skrifi puwema nanga singi fu a Memrefesa

Gi a heri pipel fu Yehovah, a Memrefesa na a moro santa neti fu a yari. Den e hori en, awinsi o muilek a situwâsi fu den de. Na ini 1930, Pearl English nanga en sisa Ora waka sowan 80 kilometer fu go na a Memrefesa. Di den sroto a zendeling Harold King en wawan na ini wan strafu-oso cel na ini China, a skrifi puwema nanga singi fu a Memrefesa èn a gebroiki blaka korenti nanga bori aleisi gi a Memrefesa. Kresten fu Owstu-Europa te go miti Mindri-Amerika, sori deki-ati fu di den hori a Memrefesa, awinsi feti ben de noso lanti ben tapu a wroko fu wi. Awinsi pe wi de noso san na a situwâsi fu wi, wi e kon makandra fu gi Yehovah Gado nanga Yesus Krestes grani na a prenspari ten fu a Memrefesa.

^ paragraaf 10 Bakaten den kari a Bulletin na Informateur, èn now a nen Wi Kownukondre diniwroko.