Go na content

Go na a tra menu

Go na table of contents

Yehovah Kotoigi

Sranantongo

Studie-Waktitoren  |  februari 2015

Abi deki-ati èn si sani krin neleki Yesus

Abi deki-ati èn si sani krin neleki Yesus

„Noiti unu no si Krestes, ma toku unu lobi en. Unu no e si en nownow, ma toku unu e bribi na ini en.”1 PETR. 1:8.

1, 2. (a) San wi musu du fu man kisi frulusu? (b) San kan yepi wi fu tan na tapu a pasi di e tyari wi go na têgo libi?

A DEI di wi tron wan dopu Kresten, wi bigin waka wan pasi. Efu wi tan waka a pasi disi wi kan kisi têgo libi na ini hemel noso na grontapu. Yesus ben taki: „A sma di horidoro te na a kaba [a kaba fu en libi noso a kaba fu a grontapu disi] na en o kisi frulusu” (Mat. 24:13). Iya, efu wi tan gi yesi na Gado wi o kisi frulusu. Ma wi musu luku bun taki noti no puru wi prakseri èn wi no musu komoto fu a pasi (1 Yoh. 2:15-17). Fa wi kan tan na tapu a pasi disi?

2 Yesus sori wi krin fa wi musu waka a pasi disi. Bijbel e fruteri wi fa a ben libi di a ben de na grontapu. Te wi e studeri san Bijbel e taki fu Yesus, dan wi o leri sabi en, wi o lobi en èn wi o bribi na ini en. (Leisi 1 Petrus 1:8, 9.) Na apostel Petrus ben taki dati Yesus libi wan eksempre gi wi so taki wi kan waka soifri na en baka (1 Petr. 2:21). Efu wi waka soifri na en  baka, dan wi o kisi frulusu. * Na ini na artikel na fesi wi ben leri fa wi kan abi sakafasi nanga sari-ati neleki Yesus. Meki wi luku now fa wi kan abi deki-ati neleki en èn fa wi kan abi a koni fu si sani krin neleki en.

YESUS ABI DEKI-ATI

3. San na deki-ati èn san kan yepi wi fu abi a fasi disi?

3 Deki-ati na wan firi di e tranga wi èn di e yepi wi fu horidoro te wi abi problema. Deki-ati e yepi wi tu fu tan du san reti. A kan yepi wi fu no bruya èn fu tan du san Gado taki awinsi problema e miti wi. Frede gi Gado, howpu, nanga lobi o yepi wi fu abi deki-ati. Fu san ede wi kan taki dati? Te wi e frede fu du wan sani di Yehovah no feni bun, dan wi no o frede gi libisma (1 Sam. 11:7; Odo 29:25). Trutru howpu e yepi wi fu no si soso den tesi di wi e kisi nownow, ma a o yepi wi tu fu hori na prakseri taki sani o go moro bun na ini a ten di e kon (Ps. 27:14). Trutru lobi e gi wi a krakti fu sori deki-ati, srefi efu wi ben kan lasi wi libi (Yoh. 15:13). Wi o kisi deki-ati te wi e frutrow na tapu Gado èn te wi e teki na eksempre fu en Manpikin.Ps. 28:7.

4. Fa Yesus ben sori deki-ati di a ben sidon „na mindri den leriman” na ini a tempel? (Luku a prenki na a bigin fu na artikel.)

4 Di Yesus ben abi twarfu yari, dan a ben abi deki-ati kaba fu taki san reti. Luku san pasa di a yongu boi Yesus ben sidon ’na ini a tempel na mindri den leriman’. (Leisi Lukas 2:41-47.) Den leriman dati ben sabi a wet fu Moses finifini, ma den ben sabi den tra sani tu di den Dyu leriman fu owruten ben leri. Den sani disi ben meki en muilek gi sma fu du san a wet fu Moses e taki. Yesus no ben frede fu taki nanga den leriman, ma „a ben e poti aksi gi den”. A no de fu taki dati a no ben aksi den leriman sani di wan yongu boi gwenti aksi. Wi kan de seiker taki Yesus ben aksi den sani di ben hari den prakseri. Èn efu den leriman ben suku fu fasi Yesus nanga muilek aksi, dan den no ben man. Iya, ala den sma di ben e arki en, sosrefi den leriman, „ben e fruwondru taki a ben abi someni koni èn taki a ben man piki den na so wan bun fasi”. Iya, Yesus ben abi a deki-ati fu opo taki gi Gado Wortu!

5. Fa Yesus sori deki-ati di a ben e du a diniwroko fu en?

5 Di Yesus ben e du a diniwroko fu en a sori deki-ati na difrenti fasi. Fu eksempre, a ben sori a pipel taki den kerki fesiman ben kori den nanga falsi leri (Mat. 23:13-36). A no ben meki a denki fu a grontapu abi krakti na en tapu (Yoh. 16:33). A tan preiki awinsi sma ben e gens en (Yoh. 5:15-18; 7:14). Tu leisi a sori deki-ati di a yagi den sma di ben pori a tru anbegi na ini a tempel.Mat. 21:12, 13; Yoh. 2:14-17.

6. Fa Yesus sori deki-ati na a lasti dei fu en libi na grontapu?

6 Meki wi luku fa Yesus sori deki-ati na a lasti dei fu en libi na grontapu. A ben sabi taki Yudas ben o tori en èn a ben sabi san ben o miti en baka dati. Toku di den ben e nyan na a Paskafesa, Yesus taigi Yudas: „A sani di yu wani du, go du en moro esi” (Yoh. 13:21-27). Di den srudati kon fu grabu en na ini a dyari fu Getseimanei, dan a no ben frede fu taigi den taki en na Yesus. Aladi a ben kan lasi en libi, toku a opo taki gi den disipel fu en. A taigi den  srudati: „Meki den wan disi gowe” (Yoh. 18:1-8). Di a ben de na fesi a Grankrutu fu den Dyu a no ben frede fu taki dati en na a Krestes èn a Manpikin fu Gado. A no ben frede aladi a ben sabi taki a granpriester ben suku wan fasi fu kiri en (Mark. 14:60-65). Yesus tai hori na Gado teleki den kiri en na wan pinapostu. Nanga en lasti blo a bari: „A kaba!”Yoh. 19:28-30.

ABI DEKI-ATI NELEKI YESUS

7. Un yonguwan, fa unu feni en fu de Kotoigi fu Yehovah, èn fa unu kan sori deki-ati?

7 Fa wi kan abi deki-ati neleki Yesus? Na skoro. Un yonguwan, unu e sori deki-ati te unu e taigi sma krin taki unu na Kotoigi fu Yehovah, awinsi unu sabi taki den skoropikin noso tra sma o dreigi unu. Te unu e du dati, dan unu e sori taki unu feni en wan grani fu tyari Yehovah nen. (Leisi Psalm 86:12.) Son sma kan pruberi fu dwengi unu fu bribi na ini na evolutie-leri. Ma unu abi bun reide fu bribi taki na Gado meki libisma soleki fa Bijbel e taki. Unu kan gebroiki a brochure Vijf belangrijke vragen over het ontstaan van het leven fu gi wan krin piki na den sma di e „aksi unu sani di abi fu du nanga a howpu fu unu” (1 Petr. 3:15). Te unu du dati, dan unu o firi koloku fu di unu sabi taki unu sori sma taki Gado Wortu e taki san tru.

8. Sortu reide wi abi fu preiki nanga deki-ati?

8 Na ini wi diniwroko. Leki tru Kresten wi musu ’taki sondro frede nanga sma fu di Yehovah gi wi a makti fu du dati’ (Tori 14:3). Sortu reide wi abi fu preiki nanga deki-ati? A fosi reide na taki wi sabi taki a boskopu di wi e preiki komopo fu Bijbel èn taki a tru (Yoh. 17:17). A di fu tu na taki wi e „wroko makandra nanga Gado” èn taki a e yepi wi nanga en santa yeye (1 Kor. 3:9; Tori 4:31). A di fu dri sani na taki wi lobi Yehovah nanga tra sma. Dati meki wi e du ala san wi man fu preiki a bun nyunsu fayafaya (Mat. 22:37-39). Fu di wi abi deki-ati, meki wi no o tapu fu preiki. Na presi fu dati, wi de fayafaya fu sori sma taki den kerki fesiman ’breni den frustan’ nanga falsi leri (2 Kor. 4:4). Iya, wi o tan preiki a bun nyunsu awinsi sma no wani arki, awinsi den e spotu wi, noso awinsi den e gens wi.1 Tes. 2:1, 2.

9. Fa wi kan sori deki-ati te wi abi problema?

9 Te wi abi problema. Efu wi e frutrow na tapu Yehovah, dan a o tranga wi bribi èn a o gi wi a deki-ati fu horidoro te wi abi problema. Efu wan lobiwan fu wi dede, dan wi e sari, ma wi no e lasi howpu. Wi e suku krakti na „a Gado fu ala trowstu” (2 Kor. 1:3, 4; 1 Tes. 4:13). Efu wi e siki hebi noso efu wi kisi bigi mankeri, dan wi kan abi furu skin-ati. Toku wi no o du sani di Yehovah no feni bun. Wi no o teki nowan datrayepi di o meki taki wi trangayesi Gado (Tori 15:28, 29). Efu wi e firi brokosaka, dan a kan pasa taki „wi ati e krutu wi”. Ma fu di wi e frutrow na tapu Gado di „de krosibei fu den sma di lasi-ati” meki wi no e gi abra. *1 Yoh. 3:19, 20; Ps. 34:18.

YESUS MAN SI SANI KRIN

10. San na a koni fu si sani krin? Fa wan Kresten di man si sani krin e taki èn e du?

10 Wan sma di man si sani krin sabi san bun èn san no bun èn dati meki a e teki bun bosroiti (Hebr. 5:14). Wan Kresten di man si sani krin e teki bosroiti di e tranga a matifasi di a abi nanga Gado. So wan  sma e taki èn e du sani di e plisi Gado. A no e taki sani fu hati trawan, ma fu gi den deki-ati (Odo 11:12, 13). En „ati no e bron esi” (Odo 14:29). A e „tan waka a reti pasi” (Odo 15:21). Fa wi kan kisi a koni fu si sani krin? Wi musu studeri Gado Wortu èn du san wi e leri (Odo 2:1-5, 10, 11). Boiti dati, wi kan studeri na eksempre fu Yesus di ben de a moro bun eksempre fu wan sma di abi a koni fu si sani krin.

11. Fa Yesus ben sori taki a abi a koni fu si sani krin te a ben taki?

11 Ala sani di Yesus ben taki èn du ben sori taki a ben abi a koni fu si sani krin. A fasi fa a ben taki. Te Yesus ben preiki a bun nyunsu a ben ’taki moi sani’ di ben fruwondru den sma di ben arki en (Luk. 4:22; Mat. 7:28). A ben gwenti gebroiki Gado Wortu te a ben taki nanga sma. A ben sabi heri bun sortu tekst a ben musu gebroiki fu horibaka gi san a ben taki (Mat. 4:4, 7, 10; 12:1-5; Luk. 4:16-21). Yesus ben fruklari Gado Wortu na wan fasi di ben naki na ati fu den arkiman fu en. Baka di a kisi wan opobaka, a ben taki nanga tu disipel fu en di ben de na pasi fu go na Ema-us, èn a „tyari kon na krin gi den san Gado Buku e taki fu en”. Bakaten den disipel ben taki: „Di a ben e taki nanga wi na pasi èn di a meki wi frustan finifini san skrifi na ini Gado Buku, dan dati ben naki wi ati trutru!”Luk. 24:27, 32.

12, 13. Sortu eksempre e sori taki Yesus no ben ati bron esi èn taki a no ben fruwakti tumusi furu fu sma?

12 A fasi fa a ben firi èn a fasi fa a ben denki. Fu di Yesus ben abi a koni fu man si sani krin meki a ’no ben ati bron esi’ (Odo 16:32). A ben abi „safri-ati” (Mat. 11:29). A ben abi pasensi nanga den disipel fu en awinsi den ben meki fowtu (Mark. 14:34-38; Luk. 22:24-27). Yesus ben hori ensrefi awinsi sma ben du hati sani nanga en.1 Petr. 2:23.

13 Fu di Yesus ben man si sani krin, meki a no ben fruwakti tumusi furu fu sma. A ben frustan fu san ede a Wet ben meki èn dati ben abi krakti tapu a fasi fa a ben libi nanga sma. Fu eksempre, luku a tori na ini Markus 5:25-34. (Leisi en.) Wan uma di ben e lasi brudu, boro kon na mindri wan grupu sma, a fasi Yesus en krosi èn a kon betre. A Wet ben taki dati so wan uma no ben krin èn taki a no ben mag fasi nowan sma (Lef. 15:25-27). Ma Yesus ben frustan taki „den moro prenspari sani fu a Wet” ben de taki wan sma ’musu abi sari-ati èn musu tai hori na Gado’. Dati meki a no piri-ai gi na uma di fasi en krosi (Mat. 23:23). Na presi fu dati a taigi en na wan switi fasi: „Mi umapikin, a bribi fu yu meki yu kon betre. No broko yu ede moro. Yu o de gosontu now, bika yu no abi a takru siki moro.” A moi fu si taki a koni di Yesus abi fu si sani krin yepi en fu sori switifasi!

14. San Yesus ben bosroiti fu du? San yepi en fu tan poti ala en prakseri na a diniwroko fu en?

14 A fasi fa a ben libi. A fasi fa Yesus ben libi ben sori taki a abi a koni fu si sani krin. A bosroiti fu meki a preikiwroko de a moro prenspari sani na ini en libi (Luk. 4:43). Den bosroiti di Yesus ben e teki ben yepi en tu fu tan poti ala en prakseri na a wroko disi èn fu du en te na a kaba. Fu eksempre, a ben bosroiti fu no feti baka gudu, ma a ben libi nanga den sani di a ben abi trutru fanowdu. Dati meki a ben man gi ala en ten nanga en krakti fu du en diniwroko (Luk. 9:58). A ben frustan taki a ben de fanowdu fu gi tra sma leri, so taki den ben kan go doro nanga a preikiwroko baka te a dede (Luk. 10:1-12; Yoh. 14:12).  A pramisi den bakaman fu en taki a ben o yepi den fu klari a wroko „te na a kaba fu grontapu”.Mat. 28:19, 20.

ABI A KONI FU SI SANI KRIN NELEKI YESUS

Wi musu suku fu kon sabi san sma lobi èn san den abi fanowdu, èn dan wi o sabi fa wi musu taki nanga den (Luku paragraaf 15)

15. Fa wi kan teki na eksempre fu Yesus na ini a fasi fa wi e taki?

15 Luku wan tra fasi fa wi kan teki na eksempre fu Yesus. A fasi fa wi e taki. Te wi e taki nanga wi brada nanga sisa, dan wi musu taki sani di o gi den deki-ati na presi fu broko den saka (Ef. 4:29). Te wi e taki nanga trawan fu Gado Kownukondre, dan den wortu fu wi musu „abi sowtu” (Kol. 4:6). Te wi kon sabi san den ososma abi fanowdu èn san den lobi fu du, dan wi o sabi fa wi musu taki nanga den. Efu wi e taki na wan switi fasi, dan sma o wani arki wi èn a boskopu fu wi kan naki den ati. Te wi e taki fu den sani di wi e bribi, dan wi e pruberi fu sori sma san Bijbel e taki fu di Bijbel na a Wortu fu Gado. Wi sabi taki a boskopu fu Bijbel abi moro krakti moro iniwan sani di wi ben o man taki.Hebr. 4:12.

16, 17. (a) Fa wi kan sori taki wi ati no e bron gaw èn taki wi no e fruwakti tumusi furu fu trawan? (b) Fa wi kan tan poti prakseri na wi diniwroko?

16 A fasi fa wi e firi èn fa wi e denki. Te wi abi a koni fu si sani krin, dan dati o yepi wi fu man dwengi wisrefi èn wi ’no o de gaw fu kisi atibron’ (Yak. 1:19). Te wan sma taki noso du wan sani di meki wi mandi, dan wi o pruberi fu frustan fu san ede a du dati. Disi o meki en moro makriki gi wi fu gi a sma pardon èn fu no ati bron nanga en (Odo 19:11). A koni fu si sani krin, o yepi wi tu fu no fruwakti tumusi furu fu wi brada nanga sisa. Wi no musu frigiti taki den brada nanga sisa fu wi na sondu libisma. Wi musu hori na prakseri taki den kan abi problema di wi no man frustan dorodoro. Wi musu de klariklari fu arki te den e taki fa den e denki èn wi no musu dwengi den fu si sani soleki fa wi e si den.Fil. 4:5.

17 A fasi fa wi e libi. Leki bakaman fu Yesus wi e frustan taki a moro bigi grani di wi abi na fu preiki a bun nyunsu. Dati meki wi o teki bosroiti di o yepi wi fu tan poti ala wi prakseri na wi diniwroko. Yehovah e kon na fosi presi na ini wi libi. Wi no e feti baka gudu, so taki wi kan gebroiki wi ten fu preiki a bun nyunsu fosi a kaba kon.Mat. 6:33; 24:14.

18. Fa wi kan tan na tapu a pasi di e tyari wi go na têgo libi, èn san na yu fasti bosroiti?

18 A ben bun fu taki fu den moi fasi fu Yesus, a no so? Prakseri omeni wini wi o kisi te wi o studeri den tra moi fasi fu Yesus èn te wi e leri fa wi kan de neleki en. Meki wi abi a fasti bosroiti fu waka soifri na en baka. Te wi e du dati, dan wi o tan na tapu a pasi di e tyari wi go na têgo libi èn wi o kon moro krosibei na Yehovah.

^ paragraaf 2 Aladi 1 Petrus 1:8, 9 skrifi gi Kresten di abi a howpu fu libi na hemel, toku den wortu fu Petrus abi fu du tu nanga Kresten di abi a howpu fu libi fu têgo na grontapu.

^ paragraaf 9 Luku wan tu eksempre fu sma di ben abi deki-ati aladi problema miti den, na ini A Waktitoren fu 1 december 2000, bladzijde 24-28; na Ontwaakt! fu 22 april 2003, bladzijde 18-21; nanga na Ontwaakt! fu 22 yanuari 1995, bladzijde 11-15.