Go na content

Go na a tra menu

Go na table of contents

Yehovah Kotoigi

Sranantongo

Studie-Waktitoren  |  februari 2015

Aksi fu leisiman

Aksi fu leisiman

San wi kan du fu yepi brada nanga sisa di e firi siki te den e smeri sani soleki parfum?

A no makriki gi wan sma di no man nanga son switismeri. Fu di a e miti nanga sma ala dei, meki a no man wai pasi gi den switismeri di sma e poti gi den skin. Son sma ben aksi efu wi kan aksi den brada nanga sisa fu no poti parfum nanga tra switismeri te den e kon na den Kresten konmakandra, den kring konmakandra nanga den kongres.

A no de fu taki dati nowan Kresten ben o wani du wan sani fu meki en muilek gi wan tra sma fu kon na den konmakandra. Wi alamala abi a deki-ati fanowdu di wi e kisi na den konmakandra (Hebr. 10:24, 25). Sobun, den sma di no man kon na den gemeente konmakandra fu di den no man nanga a smeri fu sani soleki parfum, kan taki nanga den owruman fu a tori disi. A no ben o fiti èn a no ben o kruderi nanga Bijbel efu den owruman ben o taigi sma sortu parfum den mag poti. Ma den owruman kan yepi a gemeente fu frustan a problema fu den brada nanga sisa disi. Kande den owruman kan taki fu wan artikel di ben taki fu a tori disi, te den o taki fu sani di a gemeente abi fanowdu na a Diniwroko Konmakandra. Noso den kan meki bekènti na wan switi fasi gi a gemeente taki son sma no man nanga switismeri. * Ma a no musu tron wan gwenti fu meki den sani disi bekènti. Ala ten yu o abi sma di e kon fu a fosi leisi na wi konmakandra èn di no sabi taki son sma drape no man nanga a smeri fu parfum. Wi no wani meki den sma disi firi fruferi. Boiti dati, wi no musu gi nowan sma a firi taki a du wan fowtu sani fu di a poti pikinso parfum.

Na son gemeente pe yu abi sma di abi a problema disi, den owruman kan seti sani so taki den sma di no man nanga a smeri fu parfum kan go sidon na wan presi fu a Kownukondre zaal pe furu sma no e kon. Kande den kan sidon na ini a kamra pe a di fu tu skoro e hori so taki den kan kisi wini fu a konmakandra. Ma efu disi no e yepi èn a switismeri e meki taki son sma e tan firi siki, dan a gemeente kan teki den konmakandra tapu CD so taki a sma kan arki en. Noso den kan seti sani taki a sma kan arki a konmakandra nanga yepi fu telefon soleki fa den e du gi brada nanga sisa di no man kon na den konmakandra.

Te wi e go na den bigi konmakandra a ben o bun fu hori den sma na prakseri di no man nanga a smeri fu parfum. Nofo tron a de so na den bigi konmakandra taki wi no abi presi pe wan sma kan sidon en wawan, èn dati meki a ben o bun fu no poti tumusi furu parfum. Ma disi no wani taki dati a rai disi musu tron wan wet gi den gemeente konmakandra.

Na ini a grontapu disi wi alamala e firi den takru bakapisi fu sondu. A no de fu taki dati wi e warderi en te trawan e hori a problema fu wi na prakseri. Disi kan meki taki son sma di lobi poti parfum e bosroiti fu no du dati te den e go na konmakandra, fu di den e prakseri wan brada noso sisa di no man nanga a smeri. Na so den e sori trutru lobi.

 Grontapu buku de di e sori taki Pontius Pilatus ben de trutru?

A pisi ston disi abi Pilatus nen na tapu na ini Latijntongo

Sma di e leisi Bijbel sabi Pontius Pilatus leki a granman di ben gi sma primisi fu kiri Yesus (Mat. 27:1, 2, 24-26). Ma en nen de tu na ini tra historia buku fu a fosi yarihondro. A buku di nen The Anchor Bible Dictionary e taki dati furu sani skrifi fu Pontius Pilatus. Den sani di skrifi fu en de moro leki iniwan sani di skrifi fu tra granman fu Yudea.

Pilatus en nen de fu si moro furu na ini den buku fu Josephus, wan Dyu historia skrifiman. Josephus fruteri finifini fu dri sani di ben pasa èn di ben abi fu du nanga problema di Pilatus ondrofeni di a ben e tiri Yudea. A di fu fo sani di ben pasa èn di ben abi fu du nanga en na wan sani di a Dyu historia skrifiman Filo skrifi. A Rome skrifiman Tacitus, di skrifi fu a historia fu den grankownu fu Rome, taki dati na Pontius Pilatus meki Yesus kisi dedestrafu na a ten fu Grankownu Tiberius.

Na ini 1961, sabiman di e ondrosuku owruten sani ben diki sani puru na wan owruten stadion fu den Romesma na ini Sesareya, na Israel. Drape den feni wan plata pisi ston pe Pilatus en nen skrifi na tapu na ini Latijntongo. Na tapu a ston (di yu e si dya na ondrosei) yu no e si ala sani di ben skrifi na tapu. Ma sma e denki taki a sani disi ben skrifi na tapu a ston: „Pontius Pilatus, granman fu Yudea gi a Tiberium-oso disi abra na den lespeki gado.” A Tiberium-oso ben de wan tempel kande fu gi grani na Grankownu Tiberius fu Rome.

Wan sisa musu weri wan sani fu tapu en ede te a e hori wan Bijbelstudie aladi wan brada di no dopu ete de drape?

Na ini „Aksi fu leisiman” fu A Waktitoren fu 15 yuli 2002 ben skrifi taki wan sisa musu weri wan sani fu tapu en ede te a e hori wan Bijbelstudie aladi wan preikiman de drape, awinsi a preikiman no dopu ete. Di wi luku a tori disi moro fini, dan wi kon si taki a fiti fu tyari wan kenki kon na a fasi fa wi e si sani now.

Efu wan dopu brada de nanga wan sisa na wan studie di a sisa e hori, dan a no de fu taki dati a sisa musu weri wan sani fu tapu en ede. Na so a e sori taki a e saka ensrefi na ondro a seti fu Yehovah taki mansma musu teki fesi na ini na osofamiri nanga a gemeente. A o weri wan sani fu tapu en ede fu di na a momenti dati a e du wan sani di wan brada ben musu du (1 Kor. 11:5, 6, 10). A sisa kan aksi a brada tu fu hori a studie efu a brada lepi nofo èn efu a man du en.

Ma efu a sisa de na wan Bijbelstudie èn wan brada di no dopu ete èn di no de en masra de drape, dan a no abi fu weri wan sani fu tapu en ede. Ma efu wan sisa wani, a kan weri wan sani fu tapu en ede na ini a situwâsi dati, efu en konsensi e piki en fu du dati.

^ paragraaf 4 Efu yu wani sabi moro fu a tori disi, dan luku na artikel „Hoe personen met MCS te helpen” na ini na Ontwaakt! fu 8 augustus 2000, bladzijde 8-10.