Go na content

Go na a tra menu

Go na table of contents

Yehovah Kotoigi

Sranantongo

Studie-Waktitoren  |  yanuari 2015

Gi Yehovah na okasi fu kibri yu trowlibi èn fu meki en kon moro tranga

Gi Yehovah na okasi fu kibri yu trowlibi èn fu meki en kon moro tranga

„Efu Yehovah srefi no hori wakti gi a foto, dan na fu soso a waktiman tan na ai.”PS. 127:1b.

1, 2. (a) Fu san ede 24.000 Israelsma lasi a moi grani di den ben kan kisi? (b) Fu san ede a tori disi prenspari gi wi?

SYATU fosi den Israelsma go na ini a Pramisi Kondre, dusundusun man fu Israel du „hurudu nanga den uma fu Moab”. Dati meki Yehovah kiri 24.000 man. Den Israelsma wakti so langa fu go na ini a Pramisi Kondre èn den ben de leti na fesi a kondre. Ma a sari taki den no kisi a blesi disi fu di den no kakafutu gi hurudu.Num. 25:1-5, 9.

2 A sari sani disi skrifi na ini Bijbel „leki wan warskow gi wi di e libi na a kaba fu a ten disi” (1 Kor. 10:6-11). Na ini a lasti pisi fu „den lasti dei” disi, den futuboi fu Gado de leti na fesi a nyun grontapu (2 Tim. 3:1; 2 Petr. 3:13). Ma a de wan sari sani taki son anbegiman fu Yehovah du hurudu fu di den no tan na ai. Now den abi fu du nanga den takru bakapisi fu a sani disi èn efu den no sori berow, den kan lasi a grani fu libi fu têgo na ini a Paradijs na grontapu.

3. Fu san ede trowpaar musu meki Yehovah tiri èn kibri a trowlibi fu den? (Luku a prenki na a bigin fu na artikel.)

3 Masra nanga wefi musu meki Yehovah tiri den èn den  musu meki a kibri a trowlibi fu den fu di a grontapu disi e denki soso seks. (Leisi Psalm 127:1.) Na ini na artikel disi wi o luku fa trowpaar kan kibri a trowlibi fu den. Den kan du disi te den e kibri den ati, te den e tron moro bun mati fu Gado, te den tron nyun sma soleki fa Bijbel e taki, te den e taki bun nanga makandra èn te den e gi makandra san den abi reti na tapu.

KIBRI YU ATI

4. San meki taki son Kresten du hurudu?

4 San kan meki taki wan Kresten kisi a firi fu du hurudu? Furu tron a sani disi e bigin nanga san en ai e si. Yesus ben taki: „Iniwan sma di e tan luku wan uma nanga tranga lostu gi en, du sutadu nanga en kaba na ini en ati” (Mat. 5:27, 28; 2 Petr. 2:14). Furu Kresten di du hurudu ben e du sani di meki taki te fu kaba den no ben e si hurudu leki wan tegu sani moro. Kande den ben gwenti go tapu Internet fu luku seksfelem, seksprenki, seksbuku noso tra sani di abi fu du nanga seks. Noso den ben e luku felem, toneel noso telefisi programa di abi furu seks na ini. Sonwan fu den go na bardancing, presi pe sma e puru den krosi aladi den e dansi, noso presi pe sma e masi skin fu wiki den seksfiri fu den.

5. Fu san ede wi musu kibri wi ati?

5 Son Kresten du hurudu fu di den bigin bumui furu nanga wan sma di no de a trowpatna fu den. Wi e libi na ini wan grontapu pe sma no man dwengi densrefi èn pe den e du hurudu na ala sortu fasi. Boiti dati, a sondu ati fu wi ogri èn a kan kori wi. Fu dati ede, a makriki fu kisi lobifiri gi wan sma di no de wi trowpatna. (Leisi Yeremia 17:9, 10.) Yesus taki: „Disi na den sani di e kon fu na ati: ogri prakseri, kiri, sutadu, hurudu.”Mat. 15:19.

6, 7. (a) San kan pasa efu wan sma kweki takru lostu na ini en ati? (b) San kan yepi wi fu no sondu teige Yehovah?

6 Te tu sma di de furu nanga makandra bigin kisi takru lostu na ini den ati, dan den kan go taki fu sani di den musu taki soso nanga a trowpatna fu den. Fosi yu denki, den e suku moro okasi fu de nanga makandra. Den e miti makandra furu, aladi den e du neleki den no ben sabi taki a trawan ben o de drape. Te den firi di den abi gi makandra e kon moro tranga, a e kon moro muilek gi den fu hori densrefi. O moro den e kon lobi makandra, o moro muilek a de fu tapu nanga san den e du, aladi den sabi taki den no e du bun.Odo 7:21, 22.

7 Den e frigiti ala den wet fu Yehovah, dan den e bigin hori anu, den e bosi, den e fasifasi makandra, den e freiri nanga makandra, èn den e du tra sani di e wiki den seksfiri fu den. Den sani disi na sani di den mag du soso nanga a trowpatna fu den. Te fu kaba, den seksfiri fu den e kon tranga so te, taki den e du hurudu (Yak. 1:14, 15). A de wan sari sani taki den tu sma disi ben kan wai pasi gi a sondu disi efu den ben meki Yehovah yepi den fu abi moro lespeki gi a trowlibi. Fa wan sma kan kisi moro lespeki gi a trowlibi?

TRON WAN MORO BUN MATI FU GADO

8. Fa wi matifasi nanga Yehovah o yepi wi fu wai pasi gi hurudu?

8 Leisi Psalm 97:10. Wan prenspari sani di kan yepi wi fu wai pasi gi hurudu, na te wi de mati fu Yehovah. O moro wi  e leri fu den moi fasi fu Gado, o moro wi o pruberi fu „teki na eksempre fu Gado leki lobi pikin” èn fu tan sori lobi. Disi o gi wi a krakti fu kakafutu gi ’hurudu èn gi iniwan sani di no krin’ (Ef. 5:1-4). Masra nanga wefi sabi taki „Gado o krutu huruman nanga sutaman”. Dati meki den musu du ala muiti fu hori a trowlibi fu den krin.Hebr. 13:4.

9. (a) Fa a du kon taki Yosef ben man kakafutu gi hurudu? (b) San wi kan leri fu na eksempre fu Yosef?

9 Baka wroko, son Kresten bigin bumui furu nanga sma fu den wrokope, aladi den sma disi no de Kotoigi. A sani disi meki taki den no tan na ai. Trawan kisi tesi na wrokope srefi. Na dati ben pasa nanga a yongu man Yosef. Di a ben de na wroko, a wefi fu en basi ben kon lobi en. Ibri dei na uma disi ben e pruberi fu korikori en fu abi seks nanga en. Te fu kaba „na uma grabu Yosef hori na en krosi. A taki: ’Kon didon nanga mi!’” Ma Yosef weigri, dan a lon gowe. Fa a du kon taki Yosef ben abi a krakti fu man kakafutu gi a tesi disi? Na fu di a ben wani tan wan mati fu Gado. Yosef lasi a wroko fu en èn den poti en na strafu-oso, ma bakaten Yehovah blesi en (Gen. 39:1-12; 41:38-43). Awinsi wan Kresten de na wroko noso na wan tra presi, a no musu poti ensrefi na ini situwâsi di kan meki a du hurudu.

TRON NYUN SMA DI ABI NYUN FASI

10. Te wi e du muiti fu tron nyun sma soleki fa Bijbel e taki, dan fa dati o yepi wi fu wai pasi gi hurudu?

10 Bijbel e taki dati wi musu kisi „nyun fasi fu tron sma di de leki fa Gado wani, sobun, [wi musu tron] reti-ati sma di e gi yesi na Gado ala ten” (Ef. 4:24). Te wan trowpaar kisi den nyun fasi disi, dan dati o yepi den fu wai pasi gi hurudu. Te wi tron nyun sma soleki fa Bijbel e taki, dan wi o ’kiri den difrenti pisi fu wi skin di kan meki taki wi kisi fu du nanga hurudu, wan libi di no krin, sekslostu, takru lostu èn nanga bigi-ai’. (Leisi Kolosesma 3:5, 6.) A wortu „kiri” e sori taki wi musu du iniwan sani di de fanowdu fu kakafutu gi takru lostu. Wi o wai pasi gi iniwan sani di kan meki wi kisi seksfiri gi wan sma di no de wi trowpatna (Yob 31:1). Te wi e meki muiti fu libi soleki fa Gado wani, dan wi o leri fa fu „tegu gi ogri” èn wi o „tan du bun”.Rom. 12:2, 9.

11. Fa a trowlibi fu masra nanga wefi kan kon moro bun te den e tron nyun sma?

11 Wan sma di abi den nyun fasi disi o gersi Yehovah, ’a sma di ben meki a kisi den fasi disi’ (Kol. 3:10). Te masra nanga wefi e sori „trutru sari-ati, bun-ati, sakafasi, safri-ati, nanga pasensi”, dan den o abi wan bun trowlibi èn Yehovah o blesi den (Kol. 3:12). Trutru wánfasi o de na den mindri te den e ’meki a freide fu Krestes tiri na ati fu den’ (Kol. 3:15). Te den „lobi makandra trutru”, dan ibriwan fu den o pruberi fu „de a fosiwan” fu sori a trawan lespeki.Rom. 12:10.

12. Sortu fasi yu denki taki trowpatna musu abi fu abi wan koloku trowlibi?

12 Di den aksi Sid san meki taki a abi wan koloku trowlibi, a taki: „A moro prenspari sani di wi e pruberi fu du ala ten, na fu lobi makandra moro nanga moro. Wi kon si taki safri-ati prenspari tu.” En wefi Sonja e agri nanga en èn a taki: „A no de fu taki dati switifasi prenspari tu. Wi pruberi tu fu sori sakafasi aladi a no makriki ala ten fu du dati.”

 TAKI BUN NANGA MAKANDRA

13. San de fanowdu fu man abi wan bun trowlibi èn fu san ede?

13 Wan fu den moro bun sani di yu kan du fu man abi wan bun trowlibi, na fu taki nanga yu trowpatna na wan switi fasi. A de wan sari sani taki son masra nanga wefi e taki na wan lespeki fasi nanga sma di den no sabi srefi, aladi den no e du dati nanga den eigi trowpatna! Te „takru bita-ati nanga faya-ati nanga atibron nanga babari nanga kosikosi” de na ini wan trowlibi, dan safrisafri a trowlibi dati o pori (Ef. 4:31). Te trowpatna e krutukrutu nanga makandra èn te den e taigi makandra hati sani, dan disi kan pori a trowlibi fu den. Fu dati ede, den musu taki nanga makandra na wan switi fasi èn na wan lobi-ati fasi.Ef. 4:32.

14. San wi no musu du?

14 Bijbel taki dati „wan ten de fu tan tiri” (Preik. 3:7). Ma disi no wani taki dati wi no musu taki moro nanga wi trowpatna te wi ati bron. Fu man abi wan bun trowlibi, trowpatna musu taki nanga makandra. Wan wefi na ini Doisrikondre taki: „Na ini so wan situwâsi a kan hati yu trowpatna te yu e tan pî.” Ma a e taki tu: „A tru taki a no ala ten a makriki fu hori yusrefi te yu e stress. Ma a no bun noiti fu puru atibron na sma tapu, soso fu di yu wani firi bun. Sondro fu denki yu kan taki noso du sani di kan hati yu trowpatna èn disi kan meki sani kon moro ogri.” Wan masra nanga wefi no e lusu den problema fu den te den e bari makandra noso te den no wani taki nanga makandra. Efu den wani abi wan bun trowlibi, den musu du muiti fu lusu den problema esi-esi èn den no musu abi a gwenti fu haritaki nanga makandra.

15. Fa wan trowlibi kan kon moro bun te trowpaar e taki bun nanga makandra?

15 Trowpaar kan abi wan moro bun trowlibi te den e meki ten fu fruteri makandra fa den e firi èn fa den e denki. A  prenspari fu luku san wi e taki, ma a prenspari tu fu luku fa wi e taki. Fu dati ede, awinsi wi de na ini wan muilek situwâsi, toku wi musu pruberi fu taki na wan switi fasi èn fu no taki sani di e hati a trawan. Disi o meki en moro makriki gi yu patna fu arki yu. (Leisi Kolosesma 4:6.) Wan trowpaar kan meki den trowlibi kon moro bun te den e taki bun nanga makandra èn te den e taki sani di e gi makandra deki-ati.Ef. 4:29.

Wan masra nanga wan wefi kan tranga a trowlibi fu den te den e taki bun nanga makandra (Luku paragraaf 15)

GI YU TROWPATNA SAN A ABI RETI NA TAPU

16, 17. Fu san ede masra nanga wefi musu poti prakseri na den firi fu a trowpatna fu den, sosrefi na den seksfiri fu den?

16 Masra nanga wefi kan meki den trowlibi kon moro tranga te den e sori taki den afersi fu a patna fu den prenspari moro den eigi afersi (Fil. 2:3, 4). Den musu hori den firi fu a patna fu den na prakseri, sosrefi den seksfiri fu den.Leisi 1 Korentesma 7:3, 4.

17 A de wan sari sani taki son masra nanga wefi no wani sori taki den lobi a patna fu den noso den no wani abi seks nanga den. Son masra feni tu taki den a no trutru man-nengre te den e libi switi nanga a wefi fu den. Bijbel e taki: „Un masra, tan libi nanga un wefi na wan fasi di e sori taki unu e frustan den bun” (1 Petr. 3:7). Fu gi yu trowpatna san a abi reti na tapu, no wani taki dati yu musu abi seks nomo nanga en. Wan masra musu frustan taki ala ten a musu sori en wefi taki a lobi en. Te a e du dati, dan a o moro makriki gi a wefi fu abi seks nanga en. Te ala tu e sori taki den lobi makandra, dan a o moro makriki fu gi makandra san den abi fanowdu.

18. Fa masra nanga wefi kan tranga a trowlibi fu den?

18 Noti no e gi sma a reti fu waka gi den trowpatna. Ma son leisi te wan sma en trowpatna no e sori en taki a lobi en, a e go suku a lobi na wan tra sma (Odo 5:18; Preik. 9:9). Fu dati ede Bijbel e taigi trowpaar: „No weigri fu gi makandra san unu abi reti na tapu, boiti efu unu ala tu agri fu du dati fu wan pisi ten.” Fu san ede? „So taki Satan no tesi unu fu di unu no man dwengi unsrefi” (1 Kor. 7:5). Efu trowpaar ’no man dwengi densrefi’, dan Satan kan kori den fu du hurudu. Dati ben o de wan sari sani trutru! Te masra nanga wefi e gi makandra san den abi reti na tapu, dan ibriwan fu den e sori taki den ’no e suku den eigi bun, ma den e suku a bun fu a trawan’. Den no e du disi fu di den musu fu du en, ma den e du en fu di den lobi makandra. Te masra nanga wefi e sori taki den lobi makandra trutru, dan dati o tranga a trowlibi fu den.1 Kor. 10:24.

KIBRI A TROWLIBI FU YU ALA TEN

19. San musu de a bosroiti fu wi èn fu san ede?

19 Wi de leti na fesi a nyun grontapu pe retidu o de. Fu dati ede wi musu luku bun taki sondu firi no pori wi libi neleki den 24.000 Israelsma di ben de na Moab-lagipresi. Baka di Gado Wortu taki fu a sari sani disi, a e taki: „A sma di denki taki a e tanapu, musu luku bun taki a no fadon” (1 Kor. 10:12). Dati meki a prenspari srefisrefi taki wi tranga a trowlibi fu wi. Wi e du disi te wi e tai hori na wi hemel Tata èn na a trowpatna fu wi (Mat. 19:5, 6). Now na a ten fu ’du ala muiti fu meki Gado si wi te fu kaba leki sma di de sondro flaka, sondro fowtu èn di e libi na ini freide.’2 Petr. 3:13, 14.