Go na content

Go na a tra menu

Go na table of contents

Yehovah Kotoigi

Sranantongo

Studie-Waktitoren  |  yanuari 2015

Den ben de klariklari fu go—New York

Den ben de klariklari fu go—New York

WAN TU yari pasa Cesar nanga en wefi Rocio ben e libi na ini California pe den ben abi ala sani. Cesar ben e wroko heri wiki na wan bedrijf di e installeer airco nanga sani fu waran sma oso. Rocio ben e wroko wan tu dei na ini a wiki na wan kantoro fu wan datra. Den ben abi den eigi oso èn den no ben abi pikin. Ma wan sani pasa di kenki den libi. San ben pasa?

Na ini oktober 2009 a bijkantoro fu Amerkankondre seni brifi gi ala gemeente na ini a kondre fu aksi efu sma di sabi du spesrutu wroko, wani kon wroko na Betel fu wan pisi ten. Den brada ben o meki nyun gebow na a presi di a bijkantoro abi na Wallkill, New York. Den kari srefi den wan di pasa a yari di wan sma musu abi fu bigin wroko na Betel. „Fu di wi owru kaba, meki wi ben sabi taki noiti moro wi ben o kisi na okasi disi fu dini na Betel”, na so Cesar nanga Rocio taki. „Wi ben o teki na okasi disi awinsi san pasa!” Wantewante den gi den nen fu go yepi bow.

Wan tu fu den sma di e wroko na Warwick

Moro leki wán yari pasa, ma den no kari Cesar nanga Rocio kon na Betel. Toku den tyari moro kenki kon na ini a fasi fa den ben e libi. Cesar taki: „Wan tu yari pasa wi ben kaba bow na oso fu wi èn wi ben lobi en srefisrefi. Ma wi meki a presi pe wi ben e poti wi oto kon tron wan pikin apartement, so taki wi ben kan yuru na oso fu wi gi wan tra sma.” Den froisi komoto na ini a bigi oso fu den di ben abi seibi kamra, fu go tan na ini na apartement di ben de wán kamra nomo. Cesar taki: „Den kenki disi yepi wi fu man de srekasreka fu go na Betel efu den ben o kari wi.” San pasa baka dati? Rocio taki: „Wán mun baka di wi froisi go na ini wi pikin apartement, wi kisi a kari fu go wroko fu wan pisi ten na Wallkill. A de krin taki Yehovah blesi wi fu di wi kenki wi libi.”

Jason, Cesar, nanga William

YEHOVAH BLESI DEN FU A MUITI DI DEN DU

Neleki Cesar nanga Rocio, hondrohondro brada nanga sisa tyari kenki kon na ini den libi fu kan go  yepi du bow-wroko na ini New York. Wan tu fu den e yepi nanga a bow-wroko na Wallkill. Furu trawan abi a grani fu yepi bow na edekantoro na Warwick. * Furu trowpaar di ben wani du moro gi Yehovah gowe libi den moi oso nanga a bun wroko fu den. Yehovah blesi a muiti di den du? Iya, a blesi den trutru!

Way

Way di sabi seti stroom gi sma oso, nanga en wefi Debra pasa 55 yari kaba èn den ben e libi na ini Kansas. Den seri den oso nanga furu sani di den ben abi, dan den froisi go na Wallkill fu wroko na Betel fu wan pisi ten. * Aladi den ben musu kenki den libi, toku den breiti taki den du dati. Debra taki fu en wroko na Betel: „Son leisi a e gersi leki mi e du bow-wroko na ini a Paradijs, neleki den prenki di wi e si son leisi na ini den buku fu wi!”

Melvin nanga Sharon na wan trowpaar fu South Carolina. Den seri den oso nanga den sani fu den, so taki den kan go yepi nanga a bow-wroko na Warwick. Aladi a no ben makriki fu du disi, toku den feni en wan bigi grani fu yepi nanga so wan prenspari bow-wroko. Den taki: „Wi e prisiri srefisrefi fu di wi sabi taki wi e du wan sani di o tyari wini kon gi na organisâsi fu wi na heri grontapu.”

Kenneth

Kenneth na wan brada di ben e du bow-wroko fosi, ma a go nanga pensyun kaba. En nanga en wefi Maureen abi sowan 55 yari. Den froisi fu California go na Warwick fu go yepi du bow-wroko drape. Fu man du disi den aksi wan sisa fu a gemeente fu luku den oso èn den aksi tra famiri fu sorgu gi a papa fu Kenneth di owru kaba. A hati den taki den du ala den sani disi fu man wroko na Betel? Nôno! Kenneth taki: „Wi kisi bun furu wini. A makriki? Nôno. Ma wi abi wan koloku libi, èn nanga wi heri ati wi wani gi trawan a deki-ati fu du a wroko disi tu.”

TRA KENKI DI DEN TYARI KON

Furu fu den sma di go yepi nanga a wroko, ben abi fu tyari kenki kon di no ben makriki. William nanga Sandra di pasa 60 yari kaba ben abi wan switi libi na ini Pennsylvania. Den ben abi wan bedrijf di ben e meki onderdeel gi son masyin èn 17 sma ben e wroko gi den. Den ben de na ini na srefi gemeente sensi di den ben de pikin-nengre, èn furu famiriman fu den ben e tan na ini a birti fu den. Sobun, di den kisi na okasi fu go wroko na Wallkill, den ben sabi taki a no ben o makriki. Den ben o abi fu libi ala sani nanga ala sma di den ben sabi. „A no de fu taki dati a moro muilek sani ben de fu  gowe libi ala sani di wi ben gwenti”, na so William taki. Ma baka di a trowpaar disi begi furu fu a tori disi, den teki a bosroiti fu froisi. A no hati den srefisrefi taki den du disi. William taki: „Nowan tra sani e gi wi moro prisiri leki fu wroko skinskin nanga a Betelfamiri. Noiti ete mi nanga Sandra ben de so koloku!”

Wan tu fu den trowpaar di e wroko na Wallkill

Ricky di ben de wan fesiman na wan bedrijf di e du bow-wroko na Hawai, ben kisi wan kari fu go wroko wan pisi ten na Betel. Den ben aksi en fu go yepi bow na Warwick. En wefi Kendra ben wani taki a ben musu go. Ma den ben abi wan broko-ede: Fa den ben o du nanga Jacob, a manpikin fu den di ben abi 11 yari? Den ben e aksi densrefi efu a ben o de wan koni sani fu froisi nanga a heri osofamiri go na New York èn efu a boi fu den ben o gwenti a nyun libi fu den.

Ricky taki: „Wan prenspari sani di wi ben wani, na fu suku wan gemeente di abi yonguwan di de fayafaya na ini na anbegi. Wi ben wani taki Jacob musu abi furu bun mati.” Ma di den froisi, den brada aksi den fu dini na ini wan gemeente di ben abi sma fu Betel, ma furu yonguwan no ben de. Ricky taki: „Baka a fosi konmakandra, mi aksi Jacob fa a ben feni a nyun gemeente fu wi, bika furu fu den yonguwan drape no ben de speri fu en. Jacob taigi mi: ’No broko yu ede Pa. Den yongu brada fu Betel o tron mi mati.’”

Jacob, en papa nanga en mama, e taki nanga wan tu brada fu Betel di de na ini a srefi gemeente

A no de fu taki dati den yongu brada fu Betel tron mati fu Jacob trutru. San ben de a bakapisi? Ricky taki: „Wan neti di mi pasa a kamra fu mi boi, mi si taki a faya ben leti ete. Mi ben denki taki a ben e prei game, ma na leisi a ben e leisi Bijbel! Di mi aksi san a ben e du, a taigi mi: ’Mi na wan pikin brada fu Betel èn mi o leisi Bijbel na ini wán yari.’” A no de fu taki dati Ricky nanga Kendra e prisiri fu di Ricky kan yepi nanga a wroko na Warwick èn Jacob e go na fesi moro nanga moro.Odo 22:6.

DEN NO E BROKO DEN EDE NANGA A TAMARA

Luis nanga Dale

A bow-wroko na Wallkill nanga Warwick o kaba wan dei. Sobun, den sma di e wroko drape sabi taki na fu wan pisi ten nomo den e wroko na Betel. Den brada nanga sisa disi e broko den ede nanga san o pasa nanga den, noso san den o du bakaten? Nôno! Furu fu den abi a srefi denki leki tu trowpaar fu Florida di pasa 50 yari kaba. John, di ben de fesiman na wan bedrijf di e du bow-wroko, nanga en wefi Carmen e yepi na Warwick. Den taki: „Te nanga now wi si taki Yehovah gi wi soifri san wi abi fanowdu. Wi no denki taki Yehovah ben o tyari wi so fara, soso fu gowe libi wi bakaten”  (Psalm 119:116). Luis e meki spesrutu sortu kran di e spoiti watra te wan oso e bron. En nanga en wefi Quenia e wroko na Wallkill. Den taki: „Wi si kaba fa Yehovah de klariklari fu gi wi san wi abi fanowdu. Wi de seiker taki Yehovah o tan sorgu gi wi, awinsi wi no sabi fa, o ten èn pe a o du dati.”Ps. 34:10; 37:25.

„MI O BLESI UNU SO TE, TAKI UNU NO O MANKERI NOWAN SANI”

John nanga Melvin

Furu sani de di ben kan tapu den brada nanga sisa disi fu go yepi nanga a bow-wroko na New  York. Ma den bosroiti fu tesi Yehovah soleki fa ensrefi ben taki. Luku san a pramisi den wan di e meki muiti fu du moro gi en. A taki: „Unu o si fa mi o opo den sroisi fu hemel, so taki blesi fadon leki alen gi unu. Mi o blesi unu so te, taki unu no o mankeri nowan sani.”Mal. 3:10.

Kande yu srefi musu tesi Yehovah fu si den furu blesi di a o gi yu. Begi Yehovah èn luku san yu kan du fu yepi nanga a wroko di musu du ete. Awinsi yu wani du bow-wroko na New York noso na tra presi, yu o si nanga yu eigi ai taki Yehovah o blesi yu.Mark. 10:29, 30.

Gary

Dale ben e wroko leki fesiman fu bigi bow-wroko soleki broki nanga pasi. En nanga en wefi Cathy ben e libi na Alabama fosi den go wroko na Wallkill. Den e gi ala sma deki-ati fu du a wroko disi. Den taki: „Efu yu abi a deki-ati fu gowe libi den sani di yu gwenti, dan yu o kisi na okasi fu si fa a yeye fu Yehovah e wroko.” San yu kan du fu de srekasreka te den aksi yu fu go yepi nanga so wan wroko? Tyari kenki kon na ini yu libi èn pruberi fu libi soso nanga den sani di yu abi fanowdu trutru. Dale taki: „Kenki, kenki, kenki yu libi. Èn efu yu si taki yu kan tyari moro kenki kon, dan du dati tu. A no o hati yu noiti!” Gary fu North Carolina, ben e wroko 30 yari langa leki fesiman na wan bedrijf di e du bow-wroko. En nanga en wefi Maureen taki dati wan fu den blesi fu a wroko di den e du na Warwick „na fu miti èn wroko makandra nanga furu lobi-ati brada nanga sisa di e wroko langa ten na Betel kaba”. Gary taki: „Efu yu wani dini na Betel, yu musu de klariklari fu man libi soso nanga den sani di yu abi fanowdu trutru. Disi na a moro bun fasi fu libi now.” Jason fu Illinois ben wroko gi wan bedrijf di e poti stroom gi sma oso. En nanga en wefi Jennifer taki dati a wroko di den e du na Wallkill „na wan fu den moro bun fasi fa wan sma kan ondrofeni fa a libi o de na ini a nyun grontapu”. Jennifer taki: „A e gi mi furu prisiri fu sabi taki Yehovah e si a wroko di mi e du èn taki a o warderi en ala ten. Yehovah e sorgu taki wi e kisi blesi pasa marki.”

^ paragraaf 6 Luku a 2014 Jaarboek van Jehovah’s Getuigen, bladzijde 12, 13.

^ paragraaf 7 Sonwan fu den sma disi e kon wroko na Betel wán noso moro dei na ini a wiki èn den no e tan drape. Den srefi e suku wan presi fu tan èn wan fasi fu sorgu densrefi.