Go na content

Go na a tra menu

Go na table of contents

Yehovah Kotoigi

Sranantongo

Studie-Waktitoren  |  december 2014

’Arki mi èn frustan san mi e taki’

’Arki mi èn frustan san mi e taki’

„Un alamala musu arki mi èn un musu frustan san mi e taki.”MARK. 7:14.

1, 2. Fu san ede furu sma di yere san Yesus taki, no ben man frustan san den wortu fu en wani taki?

KANDE wan sma e yere taki wan trawan e taki nanga en. Kande a e yere na a sma sten srefi taki a e mandi noso taki a e prisiri. Ma efu a no e frustan san a sma taigi en, dan sortu wini dati abi? (1 Kor. 14:9) Na ini a ten fu Yesus, dusundusun sma yere den sani di a ben taki. Yesus ben taki srefi na ini wan tongo di den ben man frustan. Ma a no alamala ben frustan san den wortu fu en ben wani taki. Dati meki Yesus taigi den: „Un alamala musu arki mi èn un musu frustan san mi e taki.”Mark. 7:14.

2 Fu san ede furu sma no ben man frustan san den wortu fu Yesus wani taki? Sonwan fu den ben abi den eigi denki èn den no ben e si sani na a yoisti fasi srefi. Yesus ben taki fu den sma disi: „Unu sabi heri bun fa fu trangayesi den komando fu Gado, soso fu kan tan hori den gwenti fu unu” (Mark. 7:9). Den sma disi no ben e pruberi trutru fu kon sabi san den wortu fu en wani taki. Den no ben wani kenki a fasi fa den ben e du sani èn fa den ben e si sani. Kande den yesi ben opo, ma den ati no ben opo kwetikweti. (Leisi Mateyus 13:13-15.)  Ma fa wi kan sorgu taki wi no e tapu wi ati gi den leri fu Yesus di kan gi wi wini?

FA WI KAN KISI WINI FU DEN LERI FU YESUS

3. Fu san ede den bakaman fu Yesus ben man frustan san den wortu fu en wani taki?

3 Wi musu teki na eksempre fu den bakaman fu Yesus di ben abi sakafasi. A taigi den: „Koloku fu unu fu di un ai e si èn fu di un yesi e yere” (Mat. 13:16). Fu san ede den ben man frustan san Yesus taki, aladi trawan no ben man du dati? Na a fosi presi, den ben de klariklari fu poti aksi èn fu ondrosuku san den wortu fu Yesus wani taki trutru (Mat. 13:36; Mark. 7:17). A di fu tu sani na taki den ben de klariklari fu luku san den nyun sani di den ben leri, abi fu du nanga den sani di den ben sabi kaba. (Leisi Mateyus 13:11, 12.) A di fu dri sani na taki den ben de klariklari fu gebroiki den sani di den yere èn di den kon frustan, na ini den eigi libi èn fu yepi trawan.Mat. 13:51, 52.

4. Sortu dri sani wi musu du efu wi wani frustan den agersitori fu Yesus?

4 Efu wi wani frustan den agersitori fu Yesus, dan wi musu teki na eksempre fu den bakaman fu en. Wi musu du dri sani tu. Na a fosi presi wi musu de klariklari fu teki ten fu studeri den sani di Yesus taki èn fu denki dipi fu den. Wi musu ondrosuku den sani disi tu èn wi musu poti den yoisti aksi. Na so wi o kon sabi sani (Odo 2:4, 5). Baka dati wi musu luku san den sani disi abi fu du nanga san wi sabi kaba èn fa wi kan kisi wini fu dati. Na so wi o kon abi moro frustan (Odo 2:2, 3). Te fu kaba, wi musu sori na ini wi aladei libi taki wi e du san wi leri. Na so wi e sori taki wi abi koni.Odo 2:6, 7.

5. Gi wan eksempre fu sori san na a difrenti na mindri sabi, frustan nanga koni.

5 San na a difrenti na mindri sabi, frustan nanga koni? Luku wan eksempre: Kon meki wi taki dati yu e tanapu na mindri wan pasi èn wan bus e rèi kon na yu tapu. Yu sabi taki na wan bus. Yu e frustan taki a bus o naki yu efu yu tan tanapu drape. Fu di yu koni, meki yu e dyompo go na seisei so taki a bus no naki yu. Dati meki Bijbel e sori taki wi musu „tan poti prakseri na koni nanga frustan” fu di disi kan kibri wi libi.Odo 3:21, 22; 1 Tim. 4:16.

6. Sortu fo aksi wi o luku te wi o ondrosuku den seibi agersitori fu Yesus? (Luku a  faki na tapu bladzijde 8.)

6 Na ini na artikel disi èn na ini a wan di e kon, wi o luku seibi agersitori di Yesus gebroiki. Te wi o luku den, wi o poti prakseri na den aksi disi: San na agersitori wani taki? (Disi e yepi wi fu kisi sabi.) Fu san ede Yesus gebroiki na agersitori disi? (Disi e yepi wi fu kon abi frustan.) Fa wi kan gebroiki den sani di wi kon sabi, fu yepi wisrefi èn fu yepi trawan? (Disi na koni.) San na agersitori e leri wi fu Yehovah nanga Yesus?

A MOSTERD-SIRI

7. San na agersitori fu a mosterd-siri wani taki?

7 Leisi Mateyus 13:31, 32. San Yesus agersitori fu a mosterd-siri wani taki? A siri srefi na a Kresten gemeente nanga a Kownukondre boskopu di wi e preiki. Di a Kresten gemeente bigin na ini a yari 33, a ben pikin srefisrefi, neleki a mosterd-siri di de „a moro pikin siri”. Ma baka wan tu yari, a gemeente bigin gro esi-esi. Furu sma no ben fruwakti taki a ben o kon so bigi (Kol. 1:23). Di a siri gro kon tron wan bigi bon, dan dati tyari furu  wini kon fu di Yesus e taki dati „den fowru fu hemel” ben man „feni wan tanpresi na den taki fu en”. Den fowru disi e prenki reti-ati sma. A nyanyan fu den na a Bijbel leri di den e kisi na ini a Kresten gemeente di de leki wan kowrupe nanga wan kibripe gi den.—Luku Esekièl 17:23.

8. Fu san ede Yesus gebroiki na agersitori fu a mosterd-siri?

8 Fu san ede Yesus gebroiki na agersitori disi? A gebroiki en fu sori taki a srefi fasi fa a mosterd-siri e gro kon tron wan bigi bon, na so a wroko fu Gado Kownukondre e gro, a e kibri sma èn noti no man tapu en. Sensi 1914, a Kresten gemeente kon bigi srefisrefi! (Yes. 60:22) Den sma di de na ini a gemeente disi, e kisi kibri so taki a matifasi di den abi nanga Yehovah no pori (Odo 2:7; Yes. 32:1, 2). Nowan gensman kan tapu a Kresten gemeente fu gro.Yes. 54:17.

9. (a) San wi kan leri fu na agersitori fu a mosterd-siri? (b) San disi e leri wi fu Yehovah nanga Yesus?

9 San wi kan leri fu na agersitori fu a mosterd-siri? Kande wi e libi na ini wan kontren pe soso wan tu Kotoigi de noso pe furu sma no wani arki te wi e preiki. Ma noiti wi musu frigiti taki noti no man tapu a Kownukondre fu du a wroko fu en. Disi o gi wi krakti fu horidoro. Fu eksempre, di Brada Edwin Skinner doro na India na ini 1926, wan tu Kotoigi nomo ben de na ini a kondre dati. Na a bigin, a wroko no ben e go na fesi so esi èn a ben hebi. Ma a tan preiki èn a si fa noti no ben man tapu a Kownukondre boskopu. Now moro leki 37.000 Kotoigi de na India èn moro leki 108.000 sma kon na a Memrefesa a yari di pasa. A srefi yari di Brada Skinner doro na India, a wroko bigin tu na Sambia. Now moro leki 170.000 preikiman de na Sambia èn 763.915 sma go na a Memrefesa fu 2013. Disi wani taki dati 1 fu ibri 18 sma na Sambia go na a Memrefesa. Iya, a wroko go na fesi trutru!

A SRUDEKI

10. San na agersitori fu a srudeki wani taki?

10 Leisi Mateyus 13:33. San na agersitori  fu a srudeki wani taki? Na agersitori disi abi fu du tu nanga a Kownukondre boskopu èn fa a e kenki sma libi. Na ini na agersitori, „a heri blon” na ala den pipel, èn a fasi fa a blon e sweri na a fasi fa a Kownukondre boskopu e panya go na ala sei fu di a preikiwroko e du. Sma man si krin taki a mosterd-siri e gro, ma den no man si wantewante fa a srudeki e meki a blon sweri. Baka wan pisi ten fosi den e si taki a srudeki du en wroko.

11. Fu san ede Yesus gebroiki na agersitori fu a srudeki?

11 Fu san ede Yesus gebroiki na agersitori disi? Yesus ben sori taki a Kownukondre boskopu man doro „te na den moro farawe presi fu grontapu” èn a man tyari bigi kenki kon na ini na ati fu sma (Tori 1:8). Ma a no ala ten wi man si den kenki disi wantewante. Son leisi a kan pasa srefi taki na a bigin wi no e si nowan kenki. Ma kenki de. Na ala presi furu sma e arki a Kownukondre boskopu èn den e meki a moi boskopu disi kenki a fasi fa den de.Rom. 12:2; Ef. 4:22, 23.

12, 13. Gi wan tu eksempre di e sori fa a Kownukondre preikiwroko bigin gro soleki fa na agersitori fu a srudeki e sori.

12 Nofo tron den bakapisi fu a preikiwroko de fu si someni yari baka di a wroko bigin. Fu eksempre, na ini 1982, Franz nanga Margit, wan trowpaar di ben e dini na a bijkantoro fu Brasyonkondre, ben preiki na ini wan pikin dorpu. Wan fu den Bijbelstudie fu den ben de wan mama nanga en fo pikin. Na a ten dati, a moro bigi boi ben abi 12 yari nomo. A ben e syensyen èn nofo tron a ben suku fu go kibri fosi a studie bigin. Fu di a trowpaar disi kisi wan tra wroko fu du, meki den no ben man go doro nanga a studie. Ma 25 yari baka dati den kisi na okasi fu go na a dorpu disi. San den kon si? Den go miti wan gemeente fu 69 preikiman, èn 13 fu den ben de gewoon pionier. Den alamala ben kon makandra na ini wan nyun Kownukondre zaal. Fa sani go nanga a boi di ben e syensyen? Now a e dini leki fesiman fu den owruman. Neleki a srudeki na ini Yesus agersitori, na so a Kownukondre boskopu gro èn a kenki a libi fu furu sma. A sani disi gi a trowpaar disi furu prisiri.

13 A Kownukondre boskopu man kenki sma ete, srefi na ini kondre pe den brada nanga sisa fu wi no man preiki so fri. A muilek fu sabi te o fara a boskopu doro na ini den sortu kondre dati èn nofo tron wi e fruwondru te wi e si den bun bakapisi. Fu eksempre, luku san pasa na ini Cuba. A Kownukondre boskopu doro na Cuba na ini 1910 èn na ini 1913 Brada Russell go drape. Ma na a bigin, a wroko no ben e go na fesi so esi. San wi e si now na ini Cuba? Moro leki 96.000 sma e preiki a bun nyunsu èn 229.726 sma go na a Memrefesa fu 2013. Dati na 1 fu ibri 48 sma fu na èilanti dati. Srefi na ini kondre pe lanti no tapu a wroko, a kan taki a Kownukondre boskopu doro te na kontren pe den Kotoigi ben e denki taki furu wroko no ben de fu du moro.Preik. 8:7; 11:5. *

14, 15. (a) Fa wi kan kisi wini fu na agersitori fu a srudeki? (b) San dati e leri wi fu Yehovah nanga Yesus?

14 Sortu wini wi e kisi te wi e prakseri Yesus agersitori fu a srudeki? Te wi e denki dipi fu na agersitori fu Yesus, dan wi e  kon frustan taki a no de fanowdu fu broko wi ede tumusi nanga fa a Kownukondre boskopu o doro den milyunmilyun sma di musu yere en ete. Na Yehovah e luku a wroko. Ma san wi musu du? Gado Wortu e taki: „Sai yu siri na mamanten èn no meki yu anu rostu fosi neti tapu, bika yu no sabi pe a siri o gro. A kan de dyaso noso a kan de drape, noso a kan taki a o gro bun na ala tu presi” (Preik. 11:6). Ma toku wi no musu frigiti fu begi taki a preikiwroko kan abi bun bakapisi, spesrutu na ini kondre pe den brada nanga sisa fu wi no man preiki so fri.Ef. 6:18-20.

15 Boiti dati, wi no musu lasi-ati te wi no e si bun bakapisi wantewante. Noiti wi musu si en leki wan lawlaw sani te a wroko e bigin pikinpikin (Sak. 4:10). Te fu kaba, wi o si taki sani e go moro bun èn moro moi leki san wi ben e denki.Ps. 40:5; Sak. 4:7.

A BISNISMAN DI E WAKA E SERI SANI ÈN A GUDU DI KIBRI

16. San na agersitori fu a bisnisman di e waka e seri sani nanga na agersitori fu a gudu di kibri wani taki?

16 Leisi Mateyus 13:44-46. San na agersitori fu a bisnisman di e waka e seri sani nanga na agersitori fu a gudu di kibri wani taki? Na ini a ten fu Yesus, son bisnisman ben e go te na a Indisch Se fu bai den moro bun peri (wan sortu diri krara). A bisnisman na ini na agersitori disi na den reti-ati sma di e du ala san den man fu kon feni a tru bribi. A „wán peri di ben warti furu” na den moi tru tori fu a Kownukondre. Di a bisnisman si taki a peri ben warti srefisrefi, a ben wani seri ala sani fu en „wantewante” so taki a ben kan bai en. Yesus taki tu fu wan man di ben e wroko na wan gron èn di feni wan gudu di ben „kibri” na ini a gron. A man disi no ben e suku gudu. Ma neleki a bisnisman a ben de klariklari fu seri ’ala sani’ fu en fu kan bai a gudu.

17. Fu san ede Yesus fruteri na agersitori fu a bisnisman di e waka e seri sani nanga na agersitori fu a gudu di kibri?

17 Fu san ede Yesus fruteri den tu agersitori disi? A ben wani sori taki sma kan feni den tru tori fu Bijbel na difrenti fasi. Son sma e suku en èn den du ala muiti teleki den feni en. Ma yu abi sma tu di no suku en, ma toku den feni en, kande fu di wan sma tyari en kon gi den. Awansi fa a situwâsi ben de, ala tu man na ini den agersitori kon si taki a sani di den feni ben warti furu èn den ben de klariklari fu du ala san den man fu abi en.

18. (a) Fa wi kan kisi wini fu den tu agersitori di Yesus fruteri? (b) San disi e leri yu fu Yehovah nanga Yesus?

18 Fa wi kan kisi wini fu den tu agersitori disi? (Mat. 6:19-21) Aksi yusrefi: ’Mi e denki leki den tu man disi? Den tru tori fu Bijbel abi furu waarde gi mi tu? Mi de klariklari fu du ala san mi man fu no lasi den? Noso mi e meki tra sani soleki den sorgu fu a libi puru mi prakseri fu den sani disi?’ (Mat. 6:22-24, 33; Luk. 5:27, 28; Fil. 3:8) Efu wi lobi a tru anbegi, dan wi o de klariklari fu du ala san wi man fu meki a de a moro prenspari sani na ini wi libi.

19. San wi o luku na ini a tra artikel?

19 Meki wi sori taki wi arki èn taki wi frustan trutru san den agersitori disi fu a Kownukondre wani taki. Hori na prakseri taki a no prenspari nomo fu sabi san den wani taki, ma wi musu du san den e leri wi. Na ini a tra artikel wi o luku ete dri agersitori èn wi o si san wi kan leri fu den.

^ paragraaf 13 Yu kan leisi den srefi sortu ondrofenitori disi fu kondre soleki Argentinia (Jaarboek 2001, bladzijde 186); Owstu Doisrikondre (Jaarboek 1999, bladzijde 83); Papuwa Nyun Ginea (Jaarboek 2005, bladzijde 63); nanga Robinson Crusoe-èilanti (A Waktitoren fu 15 yuni 2000, bladzijde 9).