Go na content

Go na a tra menu

Go na table of contents

Yehovah Kotoigi

Sranantongo

Studie-Waktitoren  |  december 2014

A ’ben sabi a pasi’

A ’ben sabi a pasi’

TAPU tudewroko 18 maart 2014, Guy Hollis Pierce, wan memre fu a Tiri Skin fu Yehovah Kotoigi, kaba a diniwroko fu en na grontapu. A ben abi 79 yari di a howpu fu en fu kisi wan opobaka na hemel leki wan brada fu Krestes, kon tru.Hebr. 2:10-12; 1 Petr. 3:18.

Guy Pierce gebore na ini Auburn, Kalifornia, na Amerkankondre, tapu 6 november 1934 èn a dopu na ini 1955. Na ini 1977, a trow nanga Penny di a ben lobi srefisrefi èn makandra den kweki wan tu pikin. Na ondrofeni di a ben abi leki wan man di kweki pikin, meki taki a ben de leki wan papa gi tra sma. Na a ten fu 1982, en nanga Penny ben e pionier fayafaya èn na ini 1986 Brada Pierce bigin dini leki kring-opziener. Erfu yari langa a du a wroko disi na ini Amerkankondre.

Na ini 1997, Guy nanga Penny Pierce tron memre fu a Betelfamiri na Amerkankondre. Brada Pierce wroko na a Dienstafdeling èn na ini 1998, den poti en leki wan yepiman fu a Wrokoman Komte fu a Tiri Skin. Tapu 2 oktober 1999, na a alayari konmakandra fu a Waktitoren Bijbel nanga Traktaat Genootschap fu Pennsylvania, den meki bekènti taki Brada Pierce tron wan memre fu a Tiri Skin. Na ini den yari di pasa, a ben de na ini a Wrokoman Komte, a Skrifi Komte, a Buku Komte nanga a Fesiman Komte.

Difrenti sortu sma fu difrenti kulturu ben lobi Brada Pierce fu di a ben lobi lafu èn a ben lobi gi switi tori. Ma san sma ben lobi fu en moro furu na taki a ben lobi trawan, a ben abi sakafasi, a ben abi lespeki gi Gado wet èn a ben abi wan tranga bribi na ini Yehovah. Guy Pierce ben de so seiker taki den pramisi fu Yehovah o kon tru, dati a taki dati disi ben o pasa awinsi a son no ben o opo. Na a tru tori disi a ben wani fruteri ala sma.

Brada Pierce ben e dini Yehovah fayafaya. A ben gwenti opo fruku mamanten èn nofo tron a ben e wroko te latilati neti. A ben e go na difrenti kondre na heri grontapu fu gi en Kresten brada nanga sisa deki-ati. Noiti a ben abi so furu fu du taki a no ben abi ten gi sma fu a Betelfamiri. A ben e meki ten tu gi sma di ben wani taki nanga en, di ben e suku rai na en èn di ben wani taki a yepi den. Srefi baka omeni yari, brada nanga sisa sabi ete fa a ben e sori den switifasi, fa a ben de wan trutru mati gi den èn fa a ben e gebroiki Bijbel fu gi den deki-ati.

Wi lobi brada nanga mati, e libi wan wefi nanga siksi pikin na baka, sosrefi granpikin nanga den pikin fu den. Furu sma di a yepi fu kon na ini a tru anbegi ben de leki pikin gi en tu. Tapu satra 22 maart 2014, Mark Sanderson, di de wan brada fu a Tiri Skin tu, hori wan lezing fu memre Brada Pierce. Wan fu den sani di a fruteri na taki Brada Pierce ben abi a howpu fu go na hemel. Dan a leisi san Yesus taki: „Furu tanpresi de na ini na oso fu mi Tata. . . . Te mi gowe èn mi sreka wan presi gi unu kaba, dan mi o kon baka èn mi o teki unu na ini oso, so taki unu kan de pe mi de. Unu sabi a pasi fu doro a presi pe mi e go.”Yoh. 14:2-4.

A tru taki wi o misi Brada Pierce. Ma wi breiti taki a ’ben sabi a pasi’ fu go na a „tanpresi” pe a o de fu ala ten.