Go na content

Go na a tra menu

Go na table of contents

Yehovah Kotoigi

Sranantongo

Studie-Waktitoren  |  november 2014

 A HISTORIA FU WI

A leti bigin skèin na ini Yapan

A leti bigin skèin na ini Yapan

Na ini Tokio den ben e prati traktaat fu gi sma wan kari gi den publikitaki èn na ini Osaka den ben du dati nanga yepi fu opolani

TAPU 6 september 1926 wan brada go dini leki zendeling na Yapan, a kondre pe a gebore. A brada disi ben de wan pelgrim noso kring-opziener na ini Amerkankondre. A man di ben e wakti en na ini Yapan ben de a wan-enkri sma di ben e teki A Waktitoren doronomo na ini Yapan. A man disi ben bigin studeri Bijbel nanga wan grupu sma na ini Kobe. Tapu 2 yanuari 1927 den Bijbel Ondrosukuman hori a fosi konmakandra fu den na ini a foto dati. Na a konmakandra dati 36 sma ben kon, èn 8 teki dopu. Dati ben de wan moi bigin. Ma fa a pikin grupu disi ben o man meki a leti skèin gi den 60 milyun sma na ini Yapan? Iya, fa den ben o man preiki a bun nyunsu fu Bijbel gi someni sma?

Na ini mei 1927 fayafaya Bijbel Ondrosukuman bigin wan spesrutu preikiwroko fu gi sma wan kari fu kon arki wan tu Bijbel lezing. Fu gi sma wan kari fu kon arki a fosi lezing di ben o hori na ini Osaka, den brada ben poti pikin bord nanga bigi bord na strati na ini a heri foto. Den seni 3000 kari gi prenspari sma fu a foto èn den prati 150.000 traktaat. Boiti dati, den ben e meki reklame gi a lezing na ini den prenspari koranti fu Osaka èn na tapu 400.000 loko-karta. Na a dei di a lezing hori, tu opolani ben frei abra a foto fu panya 100.000 traktaat. Sowan 2300 sma kon na ini a Osaka Asahi zaal fu arki a lezing di ben nen „A Kownukondre fu Gado de krosibei”. Den ben musu seni sowan dusun sma gowe fu di presi no ben de moro. Baka a lezing den brada ben seti sani fu gi piki tapu aksi di sma ben abi èn moro leki 600 sma tan gi a takimakandra dati. Den mun baka dati, den brada ben e hori Bijbel lezing na ini Kyoto èn na ini tra foto na a west-sei fu Yapan.

Na ini oktober 1927 den Bijbel Ondrosukuman ben o hori lezing na ini Tokyo. A leisi disi tu den gi prenspari sma fu a kondre wan kari, soleki a tiriman fu a kondre, memre fu na asamblei, kerki fesiman nanga legre-edeman. Den gi sma wan kari nanga yepi fu bigi prenki di den ben e plak na ala sei, koranti, nanga 710.000 traktaat. Ala nanga ala 4800 sma kon arki den dri lezing di ben hori na ini a mamafoto fu Yapan.

FAYAFAYA KOLPORTEUR

Katsuo nanga Hagino Miura

Den kolporteur noso pionier ben e teki fesi fu preiki a Kownukondre boskopu oso fu oso. Matsue Ishii ben de wan fu den fosi kolporteur na ini Yapan. En nanga en masra Jizo ben e preiki na ini a moro bigi pisi fu a kondre. Den preiki fu Sapporo di ben de na a noordsei, te na Sendai. Den preiki tu na ini Tokyo, Yokohama, Nagoya, Osaka, Kyoto, Okayama, nanga Tokushima. Te  Sisa Ishii nanga wan owru sisa di ben nen Sakiko Tanaka ben e go preiki gi den heiheiman fu a kondre, den ben e weri spesrutu krosi di den ben e kari kimono. Wan fu den heiheiman disi ben wani 300 fu den buku De Harp Gods (A Harpu fu Gado) nanga Deliverance (Frulusu). A ben o meki sma poti den buku disi na ini den bukukasi fu strafu-oso.

Di Katsuo nanga Hagino Miura teki buku fu Sisa Ishii, den si wantewante taki disi na a tru leri. Den dopu na ini 1931 èn den tron kolporteur. Na ini den yari fosi 1930, Haruichi nanga Tane Yamada èn furu fu den famiri fu den poti bribi na ini a Kownukondre boskopu. Brada nanga sisa Yamada tron kolporteur èn Yukiko, na umapikin fu den, go dini na Betel na ini Tokyo.

BIGI NANGA PIKIN YEHU-WAGI

Siksi pionier ben kan tan na ini wan bigi Yehu-wagi

Na a ten dati wagi ben diri srefisrefi èn den pasi no ben bun. Dati meki Kazumi Minoura nanga tra yongu kolporteur ben gebroiki wagi sondro masyin, pe den ben kan tan na ini. Den ben e kari den wagi disi Yehu-wagi, neleki Krutuman Yehu di ben e rèi en asiwagi bun tranga èn di tron kownu fu Israel (2 Kow. 10:15, 16). Den ben meki dri bigi Yehu-wagi di ben langa 2.2 meter, di ben bradi 1.9 meter èn di ben hei 1.9 meter. Siksi pionier ben kan tan na ini. Boiti dati, a bijkantoro fu Yapan ben meki erfu pikin Yehu-wagi di sma ben kan hari nanga baisigri èn tu sma ben kan tan na ini den wagi disi. Kiichi Iwasaki di ben yepi meki den Yehu-wagi taki: „Ibriwan fu den Yehu-wagi ben abi wan tenti nanga wan oto batterij fu man leti den lampu.” Den kolporteur ben e panya a Bijbel boskopu na ini heri Yapan. Den ben e hari èn pusu den Yehu-wagi abra den bergi èn na ini den lagipresi fu Hokkaido na noordsei fu Yapan te na Kyushu di ben de na zuidsei.

Tu sma ben kan tan na ini wan pikin Yehu-wagi

Kolporteur Ikumatsu Ota taki: „Te wi ben doro na ini wan foto, wi ben poti a Yehu-wagi fu wi na libasei, noso na wan opo presi. Wi ben e go fosi na den prenspari sma fu a foto, soleki a komsarsi, èn baka dati wi ben go na den sma oso fu prati den buku fu wi. Te wi ben kaba preiki na ini a heri kontren, dan wi ben go na wan tra foto.”

Na ini a bigin, wan pikin grupu fu 36 Bijbel Ondrosukuman na ini Kobe hori den fosi konmakandra (Sak. 4:10). Ma na ini 1932, soso feifi yari baka dati, 103 kolporteur nanga preikiman ben e preiki fayafaya na ini Yapan. Den ben prati moro leki 14.000 buku gi sma. Na ini a ten disi Yehovah Kotoigi orga sani spesrutu fu preiki na ini den bigi foto fu Yapan èn pikinmoro 220.000 preikiman e meki a leti skèin na ini a kondre dati.A historia fu wi na ini Yapan.