Go na content

Go na a tra menu

Go na table of contents

Yehovah Kotoigi

Sranantongo

Studie-Waktitoren  |  november 2014

Na opobaka fu Yesus—San a wani taki gi wi?

Na opobaka fu Yesus—San a wani taki gi wi?

„A opo baka.”MAT. 28:6.

1, 2. (a) San son kerki fesiman ben wani sabi èn san Petrus piki den? (Luku a prenki na a bigin fu na artikel.) (b) Fu san ede Petrus no ben frede den kerki fesiman?

WAN TU dei baka di Yesus dede, na apostel Petrus ben tanapu na fesi wan grupu man di ben wani du ogri nanga en. Den man disi ben de den srefi Dyu kerki fesiman di ben meki taki sma kiri Yesus. Petrus ben dresi wan man di ben lan sensi a gebore, èn den Dyu kerki fesiman ben wani sabi nanga sortu krakti èn na ini a nen fu suma Petrus du a wondru disi. Nanga deki-ati, na apostel Petrus piki: „A man di e tanapu na un fesi kon gosontu na ini a nen fu Yesus Krestes fu Nasaret. Na en unu ben spikri na wan postu, ma Gado gi en wan opobaka.”Tori 4:5-10.

2 A no langa fosi a sani disi pasa, Petrus ben frede so te, taki a ben taki dri leisi taki a no sabi Yesus (Mark. 14:66-72). Ma fa a du kon taki a no ben e frede den kerki fesiman now? A no de fu taki dati a santa yeye ben e gi en deki-ati. Ma a ben de seiker tu taki Yesus kisi wan opobaka. Fu san ede na apostel Petrus ben sabi seiker taki Yesus kisi wan opobaka? Fu san ede wi kan de seiker taki Yesus de na libi now?

3, 4. (a) Suma ben kisi opobaka fosi den apostel fu Yesus ben gebore? (b) Suma Yesus gi wan opobaka?

 3 Den apostel fu Yesus ben sabi taki sma ben kan kisi wan opobaka. Fosi den ben gebore srefi, sma ben kisi opobaka kaba. Den ben sabi taki Gado ben gi den profeiti Elia nanga Elisa a krakti fu du den sortu wondru disi (1 Kow. 17:17-24; 2 Kow. 4:32-37). Di sma trowe a dedeskin fu wan man na ini wan grebi èn a tuka nanga den bonyo fu Elisa, dan a man dati kon na libi baka (2 Kow. 13:20, 21). Neleki fa wi e bribi taki den tori na ini Gado Wortu tru, na so den fosi Kresten ben e bribi den tori disi tu.

4 A no de fu taki dati te wi e leisi den tori fu den sma di Yesus ben gi wan opobaka, dan disi e naki wi ati trutru. Di Yesus gi libi baka na a wan-enkri manpikin fu wan uma di en masra ben dede kaba, a musu fu de so taki na uma breiti srefisrefi (Luk. 7:11-15). Na wan tra okasi, Yesus ben gi wan meisje fu 12 yari wan opobaka. Di a meisje dede, a papa nanga mama fu en ben e sari srefisrefi. Ma prakseri nomo fa den ben prisiri èn fruwondru di Yesus gi en wan opobaka! (Luk. 8:49-56) Prakseri tu fa den sma ben breiti fu si fa Lasarus waka komoto libilibi na ini a grebi-olo!Yoh. 11:38-44.

FU SAN EDE NA OPOBAKA FU YESUS NA WAN SPESRUTUWAN?

5. Fu san ede na opobaka fu Yesus no de a srefi leki na opobaka fu tra sma?

5 Den apostel ben sabi taki na opobaka fu Yesus ben de heri tra fasi leki na opobaka fu den tra sma. Di den sma disi kisi wan opobaka, den ben abi wan libisma skin èn te fu kaba den dede baka. Ma di Yesus kisi wan opobaka, a kisi wan yeye skin di no man pori noiti. (Leisi Tori 13:34.) Petrus skrifi taki sma „kiri [Yesus] di a ben de wan libisma, ma a kon na libi leki wan yeye”. A taki tu dati Yesus „go na hemel èn now a de na Gado en reti-anusei. Gado meki den engel, den wan di abi makti nanga den wan di abi krakti, saka densrefi na en ondro” (1 Petr. 3:18-22). A tru taki na opobaka fu den tra sma ben de wondru, ma a di fu Yesus ben de wan moro bigi wondru.

6. Sortu krakti na opobaka fu Yesus ben abi tapu den disipel fu en?

6 Na opobaka fu Yesus ben abi furu krakti tapu den disipel fu en. Den feanti fu en ben denki taki a ben dede ete, ma disi no ben de so. Yesus ben de na libi. A ben de wan makti yeye èn nowan sma ben man du en ogri. Na opobaka fu en ben sori krin taki a ben de a Manpikin fu Gado. Fu di den disipel ben sabi taki Yesus ben de na libi, meki den no ben sari moro èn den no ben e frede. Na presi fu dati den ben breiti èn den ben abi deki-ati. Efu Yesus no ben kisi wan opobaka, sani no ben o pasa soleki fa Gado wani èn a bun nyunsu di den ben e preiki gi sma ben o de fu soso.

7. San Yesus e du now èn sortu aksi wi o luku?

7 Wi sabi taki Yesus no de wan prenspari man nomo di ben libi na grontapu. A de na libi now èn a e tiri a preikiwroko di e du na heri grontapu. Heri esi Yesus Krestes di de Kownu fu Gado Kownukondre na hemel, o puru ala ogri na grontapu èn a o meki grontapu tron wan paradijs pe sma o man libi fu têgo (Luk. 23:43). Nowan fu den sani disi ben o man pasa efu Yesus no ben kisi wan opobaka. Sobun, fu san ede wi kan de seiker taki Yesus kisi wan opobaka? San na opobaka fu en wani taki gi wi?

 YEHOVAH ABI A MAKTI FU GI SMA LIBI BAKA

8, 9. (a) Fu san ede den Dyu kerki fesiman ben wani taki Pilatus poti waktiman na a grebi fu Yesus? (b) San ben pasa di den uma go na a grebi?

8 Baka di den kiri Yesus, den moro prenspari priester nanga den Fariseiman go na Pilatus, dan den taki: „Masra, wi kan memre taki di a bedrigiman dati ben de na libi ete, a ben taki: ’Baka dri dei mi o opo baka.’ Fu dati ede, taigi sma fu tapu a grebi bun teleki a di fu dri dei, so taki den disipel fu en no kon fufuru en èn taigi sma: ’A opo baka!’ Bika dan a lasti lei disi o bigi moro a fosiwan.” Pilatus taigi den: „Unu abi waktiman. Un go tapu a grebi èn hori wakti drape.” Ne den du soleki fa Pilatus ben taki.Mat. 27:62-66.

9 Den ben poti Yesus dedeskin na ini wan grebi-olo di den ben meki na ini wan bergi, dan den tapu en nanga wan bigi ston. Den Dyu kerki fesiman ben wani taki Yesus tan na ini a grebi-olo ala ten. Ma Yehovah ben abi wan tra sani na prakseri. Di Maria Makdalena nanga a tra Maria go na a grebi baka dri dei, den si taki a ston ben lolo komoto na fesi a grebi èn wan engel ben e sidon na tapu a ston. Na engel taigi den uma meki den srefi go luku taki a grebi ben leigi. Na engel taki: „A no de dya, bika a opo baka” (Mat. 28:1-6). Iya, Yesus ben de na libi!

10. Sortu buweisi Paulus gi taki Yesus kisi wan opobaka?

10 Den sani di pasa na ini den 40 dei baka dati e sori krin taki Yesus kisi wan opobaka. Na apostel Paulus ben skrifi gi den Korentesma: „Wan fu den fosi sani di mi fruteri unu, na san misrefi kon sabi tu, taki Krestes dede gi den sondu fu wi soleki fa Gado Buku taki. Den beri en èn a kisi wan opobaka na a di fu dri dei soleki fa Gado Buku taki. A sori ensrefi na Seifas, èn baka dati na den twarfu apostel. Baka dati a sori ensrefi na moro leki feifi hondro brada na a srefi ten. Furu fu den brada disi e libi te now ete, ma sonwan fu den dede. Dan a sori ensrefi na Yakobus èn baka dati na ala den apostel. Ma leki lastiwan fu un alamala a sori ensrefi na mi neleki mi de wan pikin di gebore tumusi fruku.”1 Kor. 15:3-8.

FU SAN EDE WI SABI TAKI YESUS KISI WAN OPOBAKA?

11. Fa „Gado Buku” sori taki Yesus ben o kisi wan opobaka?

11 Yesus kisi wan opobaka „soleki fa Gado Buku taki”. Gado Wortu ben taki na fesi dati a ben o kisi wan opobaka. Fu eksempre, David ben taki dati Gado no ben o libi a moro prenspari sma ’di tai hori na en’ na ini Grebi. (Leisi Psalm 16:10.) Na a Pinksterfesa fu a yari 33 na apostel Petrus ben sori taki a profeititori disi ben abi fu du nanga Yesus. A taki: „[David] ben sabi kaba taki a Krestes ben o kisi wan opobaka èn a ben taki fu a sani dati tu. A ben taki dati Gado no ben o libi a Krestes na ini Grebi èn en skin no ben o pori.”Tori 2:23-27, 31.

12. Suma si Yesus baka di a kisi wan opobaka?

12 Furu sma si nanga den eigi ai taki Yesus kisi wan opobaka. Na ini den 40 dei baka di Yesus kisi wan opobaka, a sori ensrefi na den disipel ini a dyari pe a grebi fu en ben de. A sori ensrefi na den disipel tu na a pasi di e go na Ema-us èn na tra presi (Luk. 24:13-15). Na den okasi dati a ben taki nanga difrenti sma soleki Petrus èn nanga wan tu grupu sma. Wan leisi Yesus di ben kisi wan opobaka, sori ensrefi na wan grupu fu moro leki 500 sma srefi! Sobun, wi kan de seiker taki Yesus kisi wan opobaka fu di someni sma si en.

13. Fu san ede a preiki di den disipel ben e preiki fayafaya na wan buweisi taki Yesus kisi wan opobaka?

 13 Den disipel ben e preiki fayafaya taki Yesus kisi wan opobaka. Fu di den disipel ben e preiki fayafaya taki Krestes kisi wan opobaka, meki sma ben e frufolgu den, den ben e pina den èn den ben kiri den. Yu denki taki Petrus ben o fruteri den kerki fesiman taki Krestes kisi wan opobaka aladi a ben sabi taki na den kiri en? Efu Yesus no ben kisi wan opobaka trutru, yu denki taki Petrus ben o fruteri den a sani disi aladi a ben sabi taki den ben kan kiri en tu? Petrus nanga den tra disipel ben sabi seiker taki Yesus ben kon na libi baka èn taki a ben e tiri a preikiwroko. Boiti dati na opobaka fu Yesus ben de wan dyaranti gi den disipel taki den srefi ben o kisi wan opobaka tu. Fu eksempre, di Stefanus ben o dede a ben abi na overtoigi taki a ben o kisi wan opobaka.Tori 7:55-60.

14. Fu san ede yu e bribi taki Yesus de na libi?

14 Buweisi de taki Yesus e tiri now leki Kownu èn taki a de na Edeman fu a Kresten gemeente. Dati meki a tru Kresten bribi e panya moro nanga moro. Yu denki taki disi ben o pasa efu Yesus no ben kisi wan opobaka? Fu taki en leti, efu Yesus no ben kisi wan opobaka, dan kande wi no ben o yere fu en noiti. Ma wi abi krin buweisi taki Yesus de na libi now èn taki a e tiri a preikiwroko.

SAN NA OPOBAKA FU YESUS WANI TAKI GI WI?

15. Fu san ede na opobaka fu Yesus e gi wi deki-ati fu preiki?

15 Na opobaka fu Krestes e gi wi deki-ati fu preiki. Sowan 2000 yari kaba den feanti fu Gado du ala sortu ogri fu tapu a preikiwroko. Sma di fadon komoto na bribi kon nanga falsi leri, lanti tapu a preikiwroko na ini son kondre, sma spotu den anbegiman fu Gado, sma du ogri nanga den, sma pina den èn sma kiri den. Ma Bijbel ben taki na fesi: „Awinsi sortu fetisani sma meki fu feti nanga yu, a no o abi bun bakapisi” (Yes. 54:17). Wi no e frede den sma di Satan e gebroiki fu du ogri nanga wi. Yesus de nanga wi èn a e horibaka gi wi, soleki fa a pramisi (Mat. 28:20). Wi no abi fu frede noti, fu di den feanti no o man tapu wi noiti, awinsi san den e du!

Na opobaka fu Yesus e gi wi deki-ati fu preiki (Luku paragraaf 15)

16, 17. (a) Fa na opobaka fu Yesus e sori taki ala den sani di a ben e leri sma tru? (b) Sortu makti Gado gi Yesus, soleki fa Yohanes 11:25 e sori?

16 Na opobaka fu Yesus na wan buweisi taki ala den sani di a ben e leri sma tru. Paulus ben skrifi taki efu Krestes no ben kisi wan opobaka, a Kresten bribi nanga a preikiwroko ben o de fu soso. Efu Yesus no ben kisi wan opobaka, dan den Bijbel buku Mateyus, Markus, Lukas nanga Yohanes ben o de soso wan sari tori fu wan bun èn koni man di sma ben kiri. Ma fu di Krestes kisi wan opobaka trutru, meki wi kan bribi taki ala den sani di a ben taki fu a ten di e kon, o kon tru.Leisi 1 Korentesma 15:14, 15, 20.

17 Yesus taki: „Mi na a opobaka nanga a libi. A sma di e bribi na ini mi, sa kon na libi baka, awansi a dede” (Yoh. 11:25). Wi kan de seiker taki a pramisi disi o kon tru. Yehovah gi Yesus a makti fu gi libi baka na den wan di o libi leki yeye na ini hemel èn na den milyardmilyard sma di o libi fu têgo na grontapu. A frulusu-ofrandi fu Yesus nanga na opobaka fu en e gi wi a dyaranti taki dede no sa de moro. A sani disi e gi wi deki-ati fu horidoro, awinsi wi e kisi tesi di kan meki taki wi lasi wi libi srefi.

18. Sortu dyaranti na opobaka fu Yesus e gi wi?

18 Na opobaka fu Yesus e gi wi a dyaranti  taki den sma na grontapu o kisi krutu na wan reti fasi soleki fa Yehovah wani. Paulus ben taigi wan grupu man nanga uma na ini na owruten foto Ateine: „[Gado] o gi wan man a wroko fu krutu ala sma na grontapu na wan reti fasi. Ala sma kan de seiker fu disi, fu di a gi en wan opobaka” (Tori 17:31). Iya, Gado poti Yesus leki Krutuman èn wi kan de seiker taki a o koti krutu na wan reti fasi èn na wan lobi-ati fasi.Leisi Yesaya 11:2-4.

19. San wi wani du fu di wi e bribi na ini na opobaka fu Yesus?

19 Fu di wi e bribi na ini na opobaka fu Yesus, meki wi wani du san Gado wani. Efu Yesus no ben gi en libi èn efu a no ben kisi wan opobaka, dan wi alamala ben o tan sondusma èn wi ben o dede (Rom. 5:12; 6:23). Efu Yesus no ben kisi wan opobaka, wi no ben o abi nowan howpu èn kande wi ben o taki: „Meki wi nyan èn dringi, bika tamara wi o dede” (1 Kor. 15:32). Ma wi a no sma di e prakseri soso den prisiri fu a libi. Na presi fu dati wi breiti taki wi abi na opobaka howpu èn ala ten wi de klariklari fu gi yesi na Yehovah.

20. Fa na opobaka fu Yesus e sori taki Yehovah abi furu makti?

20 Na opobaka fu Yesus e sori krin taki Yehovah na wan makti Gado èn taki „a e pai den wan di e suku en fayafaya”. (Hebr. 11:6) Now Yesus de na libi na ini hemel èn a no man dede noiti moro. Disi e sori krin taki Yehovah abi furu krakti èn taki a koni srefisrefi. Yehovah sori tu taki a man meki ala den pramisi fu en kon tru. A ben pramisi taki wan spesrutu „pikin” ben o kon di ben o sori suma abi a reti fu tiri hemel nanga grontapu. Fu meki a pramisi disi kon tru, Yesus ben musu dede èn kisi wan opobaka.Gen. 3:15.

21. San na opobaka howpu wani taki gi yu?

21 Yu no de nanga tangi taki Yehovah gi wi a dyaranti taki sma kan kisi wan opobaka? Bijbel e pramisi: „Luku, a tenti fu Gado de na libisma. Gado o tan nanga den èn den o de en pipel. Gado srefi o de nanga den. A o figi ala watra puru na den ai èn dede no o de moro. Nowan sari, noso krei, noso pen no o de moro. Den fositen sani pasa kaba.” Na apostel Yohanes ben kisi a moi howpu disi. A sma di ben taigi en den sani disi, taigi en tu: „Skrifi, bika den wortu disi tru èn sma kan bribi den.” Suma ben de a sma di tyari den sani disi kon na krin gi Yohanes? A ben de Yesus Krestes di kisi wan opobaka.Openb. 1:1; 21:3-5.