Go na content

Go na a tra menu

Go na table of contents

Yehovah Kotoigi

Sranantongo

Studie-Waktitoren  |  november 2014

Wi musu de santa na ini ala san wi e du

Wi musu de santa na ini ala san wi e du

„Un musu kon santa tu na ini ala san unu e du.”1 PETR. 1:15.

1, 2. (a) San Yehovah wani taki en pipel musu du? (b) Na sortu aksi wi o poti prakseri na ini na artikel disi?

DI YEHOVAH meki na apostel Petrus skrifi fu a buku Lefitikus, a sori taki Kresten musu de santa neleki fa den Israelsma ben musu de santa. (Leisi 1 Petrus 1:14-16.) Fu di Yehovah santa, meki a wani taki den salfuwan nanga den „tra skapu” musu du ala muiti fu de santa na ini ala san den e du.Yoh. 10:16.

2 Na ini na artikel disi wi o poti prakseri na wan tu moi tori fu a buku Lefitikus di o yepi wi fu de santa na ini ala san wi e du. Wi o poti prakseri tu na den aksi disi: Fu san ede wi musu luku bun taki wi no du wan sani di Gado no feni bun? Fa Lefitikus e leri wi o prenspari a de fu horibaka gi Yehovah di abi a reti fu tiri hemel nanga grontapu? San wi kan leri fu den ofrandi di den Israelsma ben e tyari?

NO DENKI LEKTI FU DEN WET FU YEHOVAH

3, 4. (a) Fu san ede Kresten musu luku bun taki den no pasa den wet nanga rai fu Bijbel? (b) Fu san ede wi no musu pai ogri fu ogri noso hori sma na ati?

3 Ala ten wi musu gi yesi na den wet nanga rai fu Yehovah. Efu wi wani plisi Yehovah, dan noiti a musu de so taki wi e si den wet fu en leki sani di no santa noso di no de so seryusu.  Na ini a ten disi wi no abi fu gi yesi na den wet di Gado ben gi den Israelsma. Ma den wet disi e yepi wi fu frustan san Yehovah feni bun èn san a no feni bun. Fu eksempre, Yehovah ben taigi den Israelsma: „Un no musu pai ogri fu ogri èn un no musu hori den kondreman fu unu na ati. Un musu lobi tra sma leki fa unu lobi unsrefi. Mi na Yehovah.”Lef. 19:18.

4 Yehovah no wani taki wi pai ogri fu ogri èn a no wani taki wi hori sma na ati (Rom. 12:19). Efu wi no ben o si den wet fu Yehovah leki seryusu sani, dan Didibri ben o breiti èn a ben o meki wi du sani di kan gi Yehovah porinen. Awinsi wan sma du wi wan hati sani fu espresi, toku wi ati no musu bron so te, taki wi e kisi bita-ati gi en. Bijbel e taki dati wi de leki „prapi fu klèidoti” di abi wan gudu na ini. A gudu dati na a diniwroko fu wi (2 Kor. 4:1, 7). Efu wi ben o abi bita-ati, dan disi ben o pori a gudu di wi abi!

5. San wi kan leri fu a sani di miti Aron nanga en famiri? (Luku a prenki na a bigin fu na artikel.)

5 Na ini Lefitikus 10:1-11 wi kan leisi fu wan sari sani di miti Aron nanga en famiri. Yehovah ben meki faya komoto na hemel fu kiri Aron en manpikin, Nadab nanga Abihu. Baka dati Gado taigi Aron nanga en famiri fu no row gi den. Dati ben de wan bigi tesi! Te wan famiriman fu yu no de wan Kotoigi fu Yehovah moro, dan yu no musu bumui nanga en. Yu e sori taki yu de santa fu di yu e gi yesi na a wet disi?Leisi 1 Korentesma 5:11.

6, 7. (a) Te wi musu bosroiti efu wi sa teki prati na wan trow di o hori na ini wan kerki, dan san wi musu hori na prakseri? (Luku san skrifi na *.) (b) Fa wi kan yepi famiri di no de Kotoigi fu frustan taki wi no kan teki prati na wan trow di e hori na ini wan kerki?

6 Kande wi no o kisi so wan hebi tesi leki di fu Aron nanga en famiri. Ma kon meki wi taki dati wan famiri fu wi di no de wan Kotoigi, o trow èn a trow o hori na ini wan kerki. San yu o du efu yu kisi wan kari fu go na a trow noso efu den aksi yu fu teki prati na a trow na ini a kerki? Nowan wet na ini Bijbel e taki dati wi no musu go, ma son tori na ini Bijbel kan yepi wi fu teki wan bun bosroiti. *

7 Kande den famiri fu wi no o frustan a bosroiti di wi teki fu plisi Yehovah èn fu de santa (1 Petr. 4:3, 4). A no de fu taki dati wi no wani meki den mandi. Ma toku a bun fu taigi den krin èn na wan switi fasi fa wi e denki. A bun fu du disi langa ten na fesi. Wi kan taki den tangi taki den gi wi wan kari noso taki den aksi wi fu du wan sani na a trow. Ma efu den o du den kerki sani fu den, dan wi no o teki prati na dati. Sobun, fu di wi no wani gi den nanga den tra sma syen èn fu di wi wani taki den de koloku na a spesrutu dei dati, meki a o moro bun taki wi no teki prati na a trow. Te wi taki nanga den na a fasi disi, dan wi no o kon na ini wan situwâsi pe wi kan du sani di no e kruderi nanga a bribi fu wi.

HORIBAKA GI YEHOVAH DI DE A MORO HEI TIRIMAN

8. Fa a buku Lefitikus e sori taki Yehovah na a Moro Hei Tiriman fu hemel nanga grontapu?

8 A buku Lefitikus e sori krin taki Yehovah na a Moro Hei Tiriman fu hemel nanga grontapu. Moro leki 30 leisi a buku e sori taki den wet di skrifi na ini Lefitikus e kon fu Yehovah. Moses ben sabi disi èn a ben e du san Yehovah taigi en fu du (Lef. 8:4, 5). Na so wi srefi musu du ala ten san Yehovah, a Moro Hei Masra fu wi, wani wi fu du. Aladi Gado organisâsi de klariklari fu yepi wi, toku wi kan kisi tesi te wi wawan de neleki fa a ben pasa nanga Yesus di a ben de na ini a sabana (Luk. 4:1-13).  Te wi e hori na prakseri taki Yehovah na a Moro Hei Tiriman èn te wi e frutrow na en tapu, dan wi no o du wan sani di no e kruderi nanga den wet fu en fu di wi frede sma.Odo 29:25.

9. Fu san ede sma no wani si wi na ai?

9 Na heri grontapu sma e frufolgu wi fu di wi na bakaman fu Krestes èn Kotoigi fu Yehovah. Wi no e fruwondru fu a sani disi fu di Yesus ben taigi den disipel fu en: „Sma o frufolgu unu èn den o kiri unu. Na ini ala kondre sma o teige unu fu mi nen ede” (Mat. 24:9). Ma awinsi sma no wani si wi na ai, toku wi e tan preiki go doro èn wi e sorgu taki wi de santa na ini ala san wi e du. Wi abi wan krin ati, wi e sorgu taki wi skin de krin, wi e libi na wan krin fasi èn wi e gi yesi na lanti. Toku sma no wani si wi na ai. Fu san ede? (Rom. 13:1-7) Na fu di wi e si Yehovah leki a Moro Hei Tiriman fu hemel nanga grontapu! Gi „en wawan” wi e du santa diniwroko èn ala ten wi wani gi yesi na den reti wet fu en.Mat. 4:10.

10. San pasa nanga wan brada di tron srudati fu di sma dwengi en?

10 Wi „no de wan pisi fu grontapu” tu. Dati meki wi no e teki prati na den feti fu grontapu èn na politiek afersi. (Leisi Yohanes 15:18-21; Yesaya 2:4.) Son dopu Kresten no hori densrefi na a sani disi. Furu fu den ben abi berow èn den drai kon baka na Yehovah (Ps. 51:17). Ma wan tu fu den no ben abi berow. Fu eksempre, na a pisi ten fu a Di Fu Tu Grontapufeti furu brada na ini Hongaria ben abi fu koti strafu aladi den no ben du noti. Den srudati ben tyari 160 brada di no ben abi 45 yari ete kon na wán na ini wan dorpu, dan den taigi den taki den musu go na ini a legre. Furu fu den brada weigri fu du disi, ma neigi fu den sweri fu feti gi a kondre èn den tron srudati. Baka tu yari wan fu den brada di ben tron srudati ben kisi a wroko fu sutu den Kotoigi kiri di tan gi yesi na den wet fu Gado. Wan fu den Kotoigi disi ben de en eigi brada srefi! Ma bakaten den taki dati den no o sutu den Kotoigi moro.

GI YEHOVAH DEN MORO BUN SANI DI YU ABI

11, 12. San wi kan leri fu den ofrandi di den Israelsma ben musu tyari?

11 A Wet di Gado ben gi den Israelsma ben taki dati den ben musu tyari ofrandi (Lef. 9:1-4, 15-21). Den meti di den ben o tyari leki ofrandi no ben musu abi nowan mankeri fu di den ben e agersi a ofrandi fu Yesus di no ben abi sondu. Ibri ofrandi ben musu tyari na wan tra fasi. Fu eksempre, luku san ben musu pasa te wan mama ben kisi wan pikin. Lefitikus 12:6 taki: „Baka a pisi ten dati, te na uma musu kon krin fu di a kisi wan manpikin noso wan umapikin, dan a musu go na a priester na a mofodoro fu a konmakandra-tenti. A musu tyari wan yongu manskapu fu wán yari leki bron-ofrandi, èn wan yongu osodoifi noso wan stondoifi leki sondu-ofrandi.” Den wet fu Yehovah ben sori finifini fa den musu tyari den difrenti ofrandi. Ma a Wet ben e tyari kon na krin tu taki Yehovah ben lobi den sma èn taki a ben e hori a situwâsi fu den na prakseri. Efu a mama no ben man tyari wan skapu, a ben kan tyari tu stondoifi noso tu yongu osodoifi leki ofrandi (Lef. 12:8). Awinsi so wan uma ben pôti, toku Yehovah ben lobi en èn a ben warderi na ofrandi di a ben tyari, neleki fa a ben warderi den ofrandi fu den sma di ben e tyari wan moro diri ofrandi. San wi kan leri fu disi?

12 Na apostel Paulus ben gi den tra Kresten a deki-ati fu ’tyari wan ofrandi gi Gado nanga den mofo’ (Hebr. 13:15). Wi e tyari den ofrandi disi te wi e fruteri sma fu a nen fu Yehovah. Den dofu brada nanga  sisa no man taki, ma toku den e prèise Gado na ini Dofusma-tongo. Kresten di no man komoto na oso e preiki gi den sma di e kon luku den na oso, den e skrifi brifi gi sma, noso den e bel sma fu preiki gi den. Son sma man du furu na ini a preikiwroko, ma trawan no man du so furu fu di den siki noso owru. Ma ala ten wi wani du so furu leki wi man gi Yehovah.Rom. 12:1; 2 Tim. 2:15.

13. Fu san ede wi musu skrifi san wi du na ini a preikiwroko?

13 Fu di wi lobi Yehovah meki wi wani prèise en nanga wi heri ati (Mat. 22:37, 38). Ma den brada wani wi fu skrifi na tapu wi preikiwroko raportu san wi du na ini a preikiwroko. Fa wi e si a seti disi? Wi musu de klariklari fu du disi ibri mun, fu di na so wi e sori taki wi e gi yesi na Yehovah ala ten (2 Petr. 1:7). Ma nowan sma musu kisi a firi taki a musu du bun furu na ini a preikiwroko, soso fu man skrifi dati na tapu a raportu. Fu dati ede, efu wan preikiman no man du so furu fu di a e siki noso fu di a kon owru, dan a kan skrifi 15 miniti srefi. Efu dati na ala san a man du, dan Yehovah e warderi dati. A sabi taki den brada nanga sisa disi lobi en èn taki den wani de en Kotoigi trutru. Neleki fa den pôtiwan na ini Israel ben kan tyari ofrandi tu gi Gado, na so den wan di no man preiki so furu kan skrifi wan sani tu na tapu den preikiwroko raportu. Den brada e luku a raportu fu wi makandra nanga ala den tra raportu fu den brada nanga sisa na heri grontapu. Na so na organisâsi kan sabi san de fanowdu na ini a preikiwroko. Dati meki a prenspari fu gi yu preikiwroko raportu biten.

WI ABI A GWENTI FU STUDERI BIJBEL ÈN FU PREIKI?

14. Tyari kon na krin fu san ede wi musu luku efu wi abi a gwenti fu studeri Bijbel moro fini.

14 Now di wi luku wan tu moi sani na ini a buku Lefitikus, dan kande yu e denki: ’Mi e frustan moro bun now fu san ede a buku disi na wan pisi fu Gado Wortu Bijbel’ (2 Tim. 3:16). Kande yu wani du moro muiti fu tyari yusrefi na wan santa fasi na ini ala sani. Yehovah wani taki wi musu gi en den moro bun sani fu wi èn a abi a reti fu aksi dati fu wi. Kande den sani di yu kon sabi fu a buku Lefitikus gi yu moro deki-ati fu ondrosuku den Buku fu Bijbel moro fini. (Leisi Odo 2:1-5.) A bun fu luku efu yu abi a gwenti fu studeri Bijbel moro fini èn fu aksi Yehovah fu yepi yu nanga a tori disi. Aksi yusrefi: ’Mi e du ala san mi man gi Yehovah? A de so taki telefisi, video game, sport, noso tra sani e tapu mi fu go na fesi na ini a tru anbegi?’ Efu disi de so, dan a bun fu prakseri seryusu fu wan sani di Paulus taki na ini a buku Hebrewsma.

Yu e si na Osofamiri Anbegi èn a studeri di yu e studeri Bijbel leki sani di prenspari trutru? (Luku paragraaf 14)

15, 16. Fu san ede Paulus ben taki krin nanga den Hebrew Kresten?

15 Di Paulus skrifi en brifi gi den Hebrew Kresten a ben taki krin nanga den. (Leisi Hebrewsma 5:7, 11-14.) A taigi den: „Un yesi kon lesi fu arki.” Fu san ede a taki a sani disi? Paulus ben lobi den neleki fa Yehovah ben lobi den èn a ben e broko en  ede nanga den fu di den no ben e studeri den dipi sani fu Bijbel. Den ben breiti kaba nanga den makriki leri fu Bijbel di de leki merki. A tru taki a prenspari fu sabi den sani disi. Ma efu wi wani go na fesi na ini a tru anbegi, dan wi musu kon sabi den moro dipi leri fu Bijbel tu di de leki „tranga nyanyan”.

16 Na presi taki den Hebrew Kresten ben de leriman, den srefi ben abi leri fanowdu. Fu san ede? Fu di den no ben wani „tranga nyanyan”. Aksi yusrefi: ’A prenspari gi mi fu kon sabi den moro dipi leri fu Bijbel? Mi wani sabi den trutru? A de so taki mi no e studeri Bijbel moro fini èn mi no e begi?’ Efu disi de so, dan kande a problema na taki yu no abi a gwenti fu studeri Bijbel. Wi no musu preiki gi sma nomo, ma wi musu gi den leri èn wi musu meki disipel tu.Mat. 28:19, 20.

17, 18. (a) Fu san ede wi musu abi a gwenti fu nyan „tranga nyanyan”? (b) Fa wi musu si a dringi di son sma e dringi sopi fosi den go na wan konmakandra?

17 Furu fu wi e feni en wan muilek sani kande fu studeri Bijbel. Ma Yehovah no wani dwengi wi fu du disi. Awinsi a no makriki gi wi fu studeri Bijbel, toku wi musu du muiti fu nyan „tranga nyanyan” awinsi o langa wi de na ini a tru bribi. A sani disi prenspari fu man tan santa.

18 Efu wi wani de santa, dan wi musu studeri Bijbel moro fini èn wi musu du san Gado e aksi fu wi. Yehovah ben kiri Nadab nanga Abihu fu di den ben ’bron switismeri gi en aladi a no ben gi den primisi fu du dati’ (Lef. 10:1, 2). Kande den ben du disi fu di den ben dringi sopi. Luku san Gado ben taigi Aron. (Leisi Lefitikus 10:8-11.) A de so taki a tekst disi e sori taki wi no musu dringi nowan sani di abi sopi fosi wi go na wan Kresten konmakandra? Prakseri den sani disi: Wi no abi fu hori a Wet moro (Rom. 10:4). Na ini son kondre den brada nanga sisa gwenti fu dringi win noso tra sani di abi sopi na ini te den e nyan fosi den go na konmakandra, ma den no e dringi pasa marki. Na a Paskafesa den ben gebroiki fo kan nanga win. Di Yesus seti a Memrefesa, a meki den apostel dringi win di ben agersi a brudu fu en (Mat. 26:27). Ma Bijbel e krutu sma di e dringi tumusi furu sopi noso di e kon drungu (1 Kor. 6:10; 1 Tim. 3:8). Furu Kresten no e dringi nowan sopi fosi den du wan wroko gi Yehovah, fu di den konsensi no e gi den pasi fu du dati. A tru taki na ini son kondre sani de tra fasi. Ma a prenspari taki ibri Kresten musu „sabi krin san na wan santa sani èn san na wan sani di no santa”. Na so den kan sorgu taki den e plisi Yehovah èn taki den e tan tyari densrefi na wan santa fasi.

19. (a) San wi musu du te wi e hori Osofamiri Anbegi noso te wi e studeri Bijbel? (b) Fa yu kan sori taki yu wani de santa ala ten?

19 Te wi o ondrosuku Gado Wortu moro fini, dan wi o leri wan tu moi sani. Te yu e hori na Osofamiri Anbegi noso te yu e studeri Bijbel, yu kan gebroiki den yepisani di wi kisi fu ondrosuku Bijbel moro fini. Leri sabi Yehovah moro bun èn kon sabi moro fu den sani di a o du. Kon moro krosibei na en (Yak. 4:8). Begi Gado neleki fa a psalm skrifiman ben begi: „Opo mi ai, so taki mi kan luku den tumusi moi sani di skrifi na ini a wèt fu yu” (Ps. 119:18). Noiti no si den wet nanga den tra sani di skrifi na ini Bijbel leki sani di no de so prenspari. De klariklari fu gi yesi na den wet fu a Santawan Yehovah èn teki prati fayafaya na „a santa wroko fu preiki a bun nyunsu fu Gado” (1 Petr. 1:15; Rom. 15:16). Sorgu taki yu tan santa na ini den muilek lasti dei disi. Meki a de so, taki wi alamala tan tyari wisrefi na wan santa fasi èn meki wi horibaka ala ten gi wi santa Gado Yehovah.

^ paragraaf 6 Luku „Aksi fu leisiman” na ini A Waktitoren fu 15 mei 2002.