Go na content

Go na a tra menu

Go na table of contents

Yehovah Kotoigi

Sranantongo

Studie-Waktitoren  |  oktober 2014

Si en leki wan bigi grani fu wroko makandra nanga Yehovah!

Si en leki wan bigi grani fu wroko makandra nanga Yehovah!

„Wi e wroko makandra nanga Gado.”1 KOR. 3:9.

1. Fa Yehovah e feni en fu wroko èn san a e du fu dati ede?

YEHOVAH lobi a wroko di a e du (Ps. 135:6; Yoh. 5:17). Fu di a wani taki engel nanga libisma prisiri tu nanga a wroko di den e du, meki a gi den wroko di switi èn di e meki den firi bun. Fu eksempre, a gebroiki en fosi Manpikin fu yepi en meki sani. (Leisi Kolosesma 1:15, 16.) Bijbel e taki dati fosi Yesus tron wan libisma, a ben de na hemel na Gado sei leki „wan tumusi bun wrokoman”.Odo 8:30.

2. Fa wi sabi taki ala ten engel abi prenspari wroko fu du di e meki den firi koloku?

2 Fu Genesis te go miti Openbaring, Bijbel abi eksempre di e sori wi taki ala ten Yehovah gi den engel fu en wroko fu du. Baka di Adam nanga Eva sondu èn Gado yagi den puru na ini Paradijs, „a poti kerub-engel na owstusei fu a dyari. A poti wan feti-owru tu di ben e bron nanga faya èn di ben e drai lontu doronomo, fu tapu a pasi di e go na a bon di nen ’Libi’” (Gen. 3:24). Openbaring 22:6 e taki dati Yehovah „seni en engel kon fu sori den srafu fu en den sani di musu pasa dyonsro”.

 SORTU WROKO A GI LIBISMA?

3. Di Yesus ben de na grontapu, dan fa a sori taki a ben de leki en Tata?

3 Di Yesus ben de na grontapu leki wan libisma di no abi sondu, a ben prisiri fu du a wroko di Yehovah gi en fu du. Yesus srefi teki na eksempre fu en Tata èn a gi den bakaman fu en prenspari wroko fu du. Fu meki den du den wroko nanga moro prisiri, a taki: „Fu tru, mi e taigi unu: A sma di e bribi na ini mi, o du den sani tu di mi e du. A o du moro bigi sani leki den sani disi, fu di mi e go na a Tata” (Yoh. 14:12). Fu sori o prenspari a wroko disi de, Yesus taki tu: „Wi musu du den wroko fu a sma di seni mi kon. A neti o kon te nowan sma o man wroko.”Yoh. 9:4.

4-6. (a) Fu san ede wi kan breiti taki Noa nanga Moses du a wroko di Yehovah gi den fu du? (b) San na tu sani di e pasa ala ten te Gado gi libisma wan wroko fu du?

4 Srefi fosi Yesus kon na grontapu, libisma kisi wroko fu du di meki den firi bun. Aladi Adam nanga Eva no klari a wroko di Yehovah gi den, toku furu tra sma ben de di du san Gado aksi den fu du (Gen. 1:28). Gado taigi Noa finifini fa a ben musu bow na ark fu sorgu taki sma tan na libi te a bigi Frudu ben o kon. A du ala san Yehovah aksi en fu du. Wi na ini a ten disi de na libi fu di Noa du finifini san Yehovah taigi en fu du.Gen. 6:14-16, 22; 2 Petr. 2:5.

5 Gado taigi Moses finifini fa a ben musu bow a tabernakel èn fa a ben musu orga a wroko fu den priester. Moses du ala san Gado taigi en fu du (Eks. 39:32; 40:12-16). San wi e leri fu a tranga wroko di Moses du èn fu a fasi fa a gi yesi na Gado? Na apostel Paulus ben taki dati den sani disi di skrifi na ini a Wet ben e agersi „den bun sani di musu kon ete”.Hebr. 9:1-5, 9; 10:1.

6 Gado e gi den futuboi fu en difrenti sortu wroko so taki a kan du san a abi na prakseri. Son leisi a wroko fu den kan kenki. Ma awinsi sortu wroko den e kisi fu du, toku ala ten dati e gi Gado glori èn a e meki sma kisi furu wini. Na so den sani di Yesus du fosi a tron wan libisma èn bakaten di a ben de na grontapu, e gi Gado glori tu (Yoh. 4:34; 17:4). A wroko di wi kisi fu du na ini a ten disi e gi Yehovah glori tu. (Mat. 5:16; leisi 1 Korentesma 15:58.) Fu san ede dati de so?

TAN SI A WROKO FU YU NA A YOISTI FASI

7, 8. (a) Fruteri sortu wroko Kresten na ini a ten disi e kisi fu du. (b) San wi musu du te Yehovah e taigi wi san fu du?

7 Na wan bigi grani taki Yehovah aksi sondu libisma fu wroko makandra nanga en (1 Kor. 3:9). Son brada nanga sisa e du bow-wroko neleki Noa nanga Moses. Sonwan fu den e yepi bow kongreshal, Kownukondre zaal nanga bijkantoro. Awinsi wan sma e yepi meki wan owru Kownukondre zaal kon nyun baka noso a e du bow-wroko na a edekantoro fu wi na Warwick, New York, a musu si en leki wan bigi grani taki a man dini Gado na a fasi disi. (Luku a prenki na a bigin fu na artikel fu si fa a o tron.) Ala den sani disi na santa wroko. Aladi a no wi alamala man du den wroko dati, toku ala Kresten kisi a kari fu yepi bow na wan agersi fasi. Disi e gi Yehovah glori tu èn a e meki libisma kisi wini (Tori 13:47-49). Gado en organisâsi e gi wi bun rai di e sori wi fa fu du a wroko disi na a moro bun fasi. Son leisi disi wani taki dati wi e kisi wan nyun wroko fu du.

8 Futuboi fu Yehovah di gi yesi na en ben de klariklari ala ten fu du san a taki. (Leisi Hebrewsma 13:7, 17.) Kande wi no e frustan krin fu san ede wi kisi wan tra wroko fu du. Toku wi e du en fu di wi sabi taki na Yehovah tyari den kenki disi kon èn taki a o abi bun bakapisi.

9. Sortu bun eksempre den owruman na ini den gemeente e gi?

 9 A fasi fa den owruman e teki fesi na ini a gemeente e sori taki den e angri fu du a wani fu Yehovah (2 Kor. 1:24; 1 Tes. 5:12, 13). Den de klariklari fu wroko tranga èn fu gi yesi wantewante te sani e kenki. Den no e draidrai fu fiti densrefi na den nyun fasi fa a preikiwroko fu Gado Kownukondre e du. Na a bigin, sonwan fu den ben e tweifri kande fu orga sani gi a wroko fu preiki nanga yepi fu telefon, fu preiki na den presi pe boto de noso na den presi pe furu sma de. Toku den ben abi bun bakapisi di den du disi. Fu eksempre, fo pionier na ini Doisrikondre bosroiti fu go wroko na wan bisnis kontren pe den Kotoigi no ben preiki wan langa pisi ten. Michael e taki: „Furu yari langa wi no ben preiki na a fasi disi. Dati meki wi ben senwesenwe pikinso. A musu fu de taki Yehovah ben sabi disi, fu di a dei dati a gi wi wan heri moi mamanten na ini a preikiwroko. Wi ben breiti srefisrefi taki wi du san skrifi na ini Wi Kownukondre diniwroko èn taki wi frutrow na tapu Yehovah.” Yu wani pruberi preiki na wan nyun fasi na ini a kontren fu yu?

10. Sortu sani kenki na ini na organisâsi na ini den yari di pasa?

10 Son leisi sani e kenki na Betel. Fu eksempre, na ini den yari di pasa, den tapu wan tu pikin bijkantoro èn den froisi a wroko fu den go na moro bigi bijkantoro. Disi ben abi krakti na tapu den brada nanga sisa di e wroko na den bijkantoro dati. Den ben abi fu kenki a fasi fa den ben gwenti du sani. Ma bakaten den si den bun bakapisi fu dati (Preik. 7:8). Den brada nanga sisa disi di ben de klariklari fu tyari kenki kon, e prisiri fu si den bigi kenki na ini Yehovah en organisâsi na ini a ten disi.

11-13. Sortu muilek sani miti son brada nanga sisa, baka di sani kenki na ini na organisâsi?

11 Wi kan leri wan tu moi sani fu den sma di ben e wroko na den bijkantoro di tapu now. Sonwan fu den wroko drape furu yari langa. Den aksi wan trowpaar di ben e wroko na wan pikin Betel na ini Mindri-Amerika fu go wroko na Betel na Meksikow. Drape a Betelfamiri bigi 30 tron moro a wan pe den komoto. Rogelio e taki: „A hebi fu gowe libi famiri nanga mati.” Juan, wan tra brada di den aksi fu froisi go na Meksikow, e taki: „A gersi leki yu abi fu bigin yu libi ete wan tron. Yu musu suku nyun mati. Yu musu leri nyun gwenti èn yu musu leri fu si sani na wan tra fasi.”

12 Di wan tu bijkantoro na Europa ben musu froisi go na a bijkantoro fu Doisrikondre, dan den aksi furu fu den sma di ben e wroko drape fu froisi go na Doisrikondre tu. Fu di a muilek son leisi fu gowe libi a kondre pe yu kweki, meki a no ben makriki gi den brada nanga sisa disi. Sonwan fu den di ben e libi na Switserland e misi den moi Alp-bergi. Den wan fu Oostenrijk e misi a libi di den ben abi na ini wan pikin Betelfamiri.

13 Den sma di froisi go na wan tra kondre, musu kon gwenti wan nyun fasi fu libi, den musu wroko makandra nanga brada nanga sisa di den no sabi èn kande den musu leri wan tra sortu wroko. Den musu kon gwenti wan nyun gemeente tu, den musu preiki na ini wan nyun kontren èn kande na ini wan tra tongo srefi. Son leisi a muilek fu tyari den kenki disi kon. Toku furu sma fu Betel du a sani disi di no ben makriki. Fu san ede den du en?

14, 15. (a) Fa furu brada nanga sisa sori taki den e si en leki wan bigi grani fu wroko makandra nanga Yehovah awinsi sortu wroko den musu du? (b) Fa den de wan moi eksempre gi wi alamala?

14 Grethel e taki: „Mi teki a kari disi fu di dati ben de a fasi fa mi ben wani sori  Yehovah taki mi lobi en trutru awinsi mi abi fu gowe libi mi kondre, mi oso nanga den grani di mi ben abi.” Dayska e taki: „Mi hori na prakseri taki na Yehovah gi mi a kari. Dati meki mi ben breiti fu teki a kari disi.” André nanga Gabriela e agri èn den e taki: „Wi ben si disi leki wan okasi fu poti den sani di wisrefi wani du na wan sei, fu kan du moro gi Yehovah.” Den taki dati te Yehovah en organisâsi e tyari kenki kon, dan a moro bun fu fiti yusrefi na den kenki dati, leki fu sori taki yu no e agri nanga den.

A moro bigi grani di wi abi na fu du a wroko fu Yehovah

15 Fu di son bijkantoro froisi go na tra bijkantoro, meki den seni sonwan fu den sma di ben e wroko na den bijkantoro dati go na ini a pionierwroko. Na dati pasa nanga furu brada nanga sisa di ben e wroko na den Betel fu Deinsikondre, Noorwegen nanga Sweden di tyari kon na wán èn di tron a Skandinafia Bijkantoro now. Tu fu den sma dati ben de Florian nanga Anja. Den e taki: „Aladi a no makriki fu du a nyun wroko di wi kisi fu du, toku wi e si en leki wan span sani. Wi breiti taki Yehovah wani gebroiki wi, awinsi pe wi e dini. Wi kan taki nanga wan krin ati taki wi e kisi furu blesi.” Kande furu fu wi noiti o abi fu tyari den sortu kenki dati kon. Ma toku wi kan teki na eksempre fu den brada nanga sisa disi di ben de klariklari fu poti a Kownukondre na a fosi presi na ini den libi (Yes. 6:8). Ala ten Yehovah e blesi den wan di e si en leki wan bigi grani fu wroko makandra nanga en awinsi pe dati de.

TAN PRISIRI NANGA A GRANI DI YU ABI FU WROKO MAKANDRA NANGA YEHOVAH!

16. (a) San Galasiasma 6:4 e taigi wi fu du? (b) San na a moro bigi grani di wan sma kan abi?

16 Sondu libisma abi a gwenti fu teki densrefi gersi nanga trawan. Ma Gado Wortu e fruteri wi taki wi musu tan poti prakseri na san wisrefi man du. (Leisi Galasiasma 6:4.) Furu fu wi no abi bigi frantwortu na ini na organisâsi. Boiti dati, a no ala sma man de wan pionier noso zendeling, noso wroko na Betel. A tru taki disi na moi grani. Ma noiti wi musu frigiti taki a moro bigi grani di wan sma kan abi na a wan di wi alamala abi. Dati na fu wroko  makandra nanga Yehovah leki preikiman fu a bun nyunsu. Wi musu si a grani dati leki wan bigi sani.

17. Sortu situwâsi no o kenki solanga a grontapu fu Satan de ete, ma fu san ede disi no musu meki wi lasi-ati tumusi?

17 Solanga a grontapu fu Satan de ete, wi no o man du ala san wi wani du gi Yehovah. Kande wi abi osofamiri frantwortu, noso wi abi problema nanga wi gosontu, noso a kan taki wi de na ini wan tra situwâsi. Ma disi no musu meki wi lasi-ati tumusi. Noiti wi musu frigiti san wi man du te wi e wroko makandra nanga Gado leki sma di e tyari en nen èn di e preiki fu en Kownukondre na ibri okasi. A moro prenspari sani na taki yu e wroko makandra nanga en so bun leki yu man èn taki yu e begi en fu meki a blesi yu brada nanga sisa di man du moro leki yu. Hori na prakseri taki Yehovah e si ibri sma di e prèise en nen leki wan sma di warti gi en.

18. San wi o man du na ini a ten di e kon, ma sortu grani wi abi nownow kaba?

18 Aladi wi swaki èn wi na sondusma, toku Yehovah breiti fu gi wi na okasi fu wroko makandra nanga en. Na ini den lasti dei disi, wi e si en leki wan bigi grani fu wroko makandra nanga a Gado fu wi. Wi e prakseri a ten te wi o abi „a trutru libi”. Na a ten dati wi o prisiri fu di wi o du iniwan sani di wi no man du now. Sobun, wi musu de klariklari fu poti wi eigi sani na wan sei fu di wi sabi taki na ini a nyun grontapu fu Yehovah, a o meki wi prisiri fu „a trutru libi”. Dyonsro Yehovah o blesi wi nanga têgo libi na ini wan nyun grontapu pe ala sma o de koloku èn pe freide o de.1 Tim. 6:18, 19.

Yu e si en leki wan bigi grani fu dini Yehovah? (Luku paragraaf 16-18)

19. San Yehovah e pramisi wi gi a ten di e kon?

19 Now di wi de fu go na ini a nyun grontapu, wi musu denki san Moses taigi den Israelsma leti fosi den go na ini a Pramisi Kondre. A taki: „Yehovah un Gado o gi unu bun furu blesi” (Deut. 30:9). Te Armagedon pasa kaba, dan den sma di ben wroko makandra nanga Gado, o go na ini a paradijs di a pramisi den. Dan wi o poti prakseri na wan nyun wroko di Gado o gi wi fu du: Wi o meki grontapu tron wan moi paradijs!