Go na content

Go na a tra menu

Go na table of contents

Yehovah Kotoigi

Sranantongo

Studie-Waktitoren  |  september 2014

Aksi fu leisiman

Aksi fu leisiman

A de so taki den sani di David taki na Psalm 37:25 èn den sani di Yesus taki na Mateyus 6:33, e sori taki Yehovah no o gi pasi noiti taki wan Kresten mankeri nyanyan?

David ben skrifi taki ’a no si noiti taki Gado libi wan reti-ati sma en wawan èn taki den pikin fu so wan sma e waka suku nyanyan’. Dyaso David ben e taki san ensrefi ondrofeni. A ben sabi heri bun taki Gado e sorgu gi den futuboi fu en ala ten (Ps. 37:25). Ma a sani di David taki no wani taki dati noiti wan anbegiman fu Gado ben o pina.

Son leisi David ben de na ini situwâsi di ben muilek srefisrefi. Fu eksempre, wan leisi di a ben e lowe gi Saul, en nanga den man fu en no ben abi noti fu nyan. Dati meki a ben go aksi Priester Akimeilek brede (1 Sam. 21:1-6). Sobun, na a ten dati David ben e „suku nyanyan”. Toku a ben sabi taki Yehovah no ben gowe libi en na ini a muilek situwâsi dati. Fu taki en leti, nowan presi na ini Bijbel wi e leisi taki David ben musu begibegi sma nyanyan na strati fu kan tan na libi.

Na Mateyus 6:33 Yesus gi wi a dyaranti taki Gado o gi den futuboi fu en ala san den abi fanowdu te den e poti Kownukondre afersi na a fosi presi na ini den libi. Yesus e gi wi a deki-ati disi: „Fu dati ede, tan suku fosi a Kownukondre nanga Gado en retidu, dan unu o kisi ala den tra sani tu.” Disi wani taki dati Gado ben o sorgu taki wi abi nyanyan, dringi nanga krosi. Ma Yesus ben sori tu taki den „brada” fu en ben o de nanga angri son leisi fu di sma ben o frufolgu den (Mat. 25:35, 37, 40). Dati ben pasa nanga na apostel Paulus. Son leisi a no ben abi noti fu nyan noso dringi.2 Kor. 11:27.

Yehovah taigi wi taki wi ben o kisi frufolgu na difrenti fasi. Fu man sori taki Didibri na wan leiman, Yehovah kan gi pasi son leisi taki wi e mankeri son sani (Yob 2:3-5). Fu eksempre, na a ten di Hitler ben e tiri Doisrikondre, den ben e frufolgu den Kresten brada nanga sisa fu wi èn sonwan fu den ben e pina srefisrefi na ini den strafuman-kampu. Wan fu den ogri-ati sani di den ben e du fu meki den Kotoigi drai baka gi Yehovah, na taki den no ben e gi den nofo nyanyan. Den Kotoigi di ben lobi Yehovah trutru, tan gi yesi na en, èn Yehovah no gowe libi den. A gi pasi taki den kisi a tesi disi, neleki fa a e gi pasi taki ala Kresten e kisi tra sortu tesi. Ma wi kan de seiker taki Yehovah e yepi ala sma di e pina fu en nen ede, so taki den kan horidoro (1 Kor. 10:13). Meki wi hori na prakseri san skrifi na Filipisma 1:29. Drape skrifi: „Na unu kisi a grani fu no bribi nomo na ini Krestes, ma fu pina tu fu en ede.”

Yehovah pramisi taki a o de nanga den futuboi fu en. Fu eksempre, Yesaya 54:17 e taki: „Awinsi sortu fetisani sma meki fu feti nanga yu, a no o abi bun bakapisi.” Na ini a tekst disi èn na ini tra tekst Yehovah e pramisi taki a o kibri en pipel. Ma son leisi a kan pasa taki wan Kresten e kisi tesi di kan meki a lasi en libi srefi.