Go na content

Go na a tra menu

Go na table of contents

Yehovah Kotoigi

Sranantongo

Studie-Waktitoren  |  september 2014

No frigiti den wan di e du furuten diniwroko

No frigiti den wan di e du furuten diniwroko

„Noiti wi e frigiti a wroko di unu e du fu di unu abi bribi, nanga ala a muiti di unu e du fu di unu abi lobi.”1 TES. 1:3.

1. Fa Paulus ben e denki fu den wan di ben wroko tranga na ini a preikiwroko?

NA APOSTEL Paulus no ben frigiti den wan di ben wroko tranga fu prati a bun nyunsu. A ben skrifi: „Te wi de na fesi wi Gado èn Tata, dan noiti wi e frigiti a wroko di unu e du fu di unu abi bribi, nanga ala a muiti di unu e du fu di unu abi lobi èn a fasi fa unu e horidoro fu di unu e howpu tapu wi Masra Yesus Krestes” (1 Tes. 1:3). Yehovah no e frigiti den futuboi fu en tu èn a e warderi ala sani di den e du fu dini en, awinsi den e du furu noso awinsi den no man du so furu.Hebr. 6:10.

2. San wi o luku na ini na artikel disi?

2 Na ini owruten èn na ini a ten disi, Kresten libi furu sani na baka fu man du furuten diniwroko gi Yehovah. Meki wi luku san sonwan fu den ben e du na ini a ten fu den apostel. Wi o luku wan tu fasi tu fa sma e du furuten diniwroko na ini a ten disi èn fa wi kan yepi den lobi brada nanga sisa disi.

DEN KRESTEN NA INI A TEN FU DEN APOSTEL

3, 4. (a) Sortu wroko son Kresten ben e du na ini a ten fu den apostel? (b) Fa den ben e kisi den sani di den ben abi fanowdu?

3 Syatu baka di Yesus dopu, a bigin nanga wan wroko di ben o du na heri grontapu (Luk. 3:21-23; 4:14, 15, 43). Baka a dede fu en, den apostel ben e teki fesi na ini a preikiwroko èn den bigin  preiki gi moro sma (Tori 5:42; 6:7). Son Kresten soleki Filipus ben de preikiman nanga zendeling na ini Palestina (Tori 8:5, 40; 21:8). Paulus nanga tra brada ben e preiki na moro farawe presi (Tori 13:2-4; 14:26; 2 Kor. 1:19). Sonwan fu den soleki Selfanus (noso Silas), Markus nanga Lukas ben skrifi son Bijbel buku noso den ben de sekretarsi fu Bijbel skrifiman (1 Petr. 5:12). Den Kresten sisa ben e wroko makandra nanga den lepi brada disi (Tori 18:26; Rom. 16:1, 2). Na ini den Griki Buku fu Bijbel wi kan leisi den span ondrofenitori fu den Kresten dati. Den tori disi e sori wi taki Yehovah e warderi a wroko di den futuboi fu en e du èn taki a e sorgu gi den.

4 Fa den furuten dinari na ini a ten fu den apostel ben e feni moni fu bai den sani di den ben abi fanowdu? Fu di den no ben e fruwakti taki den tra brada nanga sisa ben musu yepi den, meki den ben e du wan wroko wanwan leisi fu feni wan pikin moni (1 Kor. 9:11-15). Ma son brada nanga sisa nanga son gemeente ben de klariklari fu yepi den tu. (Leisi Tori 16:14, 15; Filipisma 4:15-18.) Paulus nanga den tra brada di ben e go preiki na tra presi ben e du wan wroko wanwan leisi tu fu abi moni fu bai sani.

FURUTEN DINARI NA INI A TEN DISI

5. San wan trowpaar taki fu a furuten diniwroko di den e du?

5 Na ini a ten disi furu brada nanga sisa e meki muiti tu fu du furuten diniwroko gi Yehovah. (Luku a faki „ Difrenti sortu furuten diniwroko”.) Fa yu feni en taki den bosroiti fu du disi? Yu o kisi furu deki-ati efu yu aksi den fu san ede den bosroiti fu du a wroko disi. Wan brada ben go dini na ini wan tra kondre leki gewoon pionier, spesrutu pionier, zendeling èn na Betel. A taki: „Mi feni taki wan fu den moro bun bosroiti di mi teki, na fu du furuten diniwroko. Di mi ben abi 18 yari mi ben musu bosroiti san mi ben wani du nanga mi libi. A no ben makriki fu di mi ben musu luku efu mi ben o go na wan moro hei skoro, efu mi ben o du grontapuwroko, noso efu mi ben o pionier. Ondrofeni leri mi taki Yehovah no e frigiti den muiti di wi e meki fu du furuten diniwroko gi en. Mi ben man gebroiki den koni di Yehovah gi mi moro bun leki te mi ben o abi wan grontapuwroko.” En wefi taki: „Ibri leisi te wi ben kisi wan tra wroko fu du, mi bribi ben e kon moro tranga. Ibri tron baka wi si fa Yehovah kibri wi èn fa a tiri wi na difrenti fasi. Noiti wi ben o ondrofeni den sani disi efu wi ben tan na ini wi eigi kondre pe wi ben gwenti. Ibri dei mi e taki Yehovah tangi taki wi bosroiti fu gebroiki wi libi fu du furuten diniwroko.” Yu wani so wan libi tu?

6. Fa Yehovah e denki fu a wroko di wi e du gi en?

6 A no de fu taki dati a situwâsi fu son sma no e gi den pasi fu du furuten diniwroko now. Ma wi kan de seiker taki Yehovah e warderi a muiti di den e meki fu dini en nanga den heri ati. Prakseri den sma di Paulus kari na Fileimon 1-3 nanga ala den tra sma fu a gemeente na ini Kolose. (Leisi en.) Paulus ben abi warderi gi den èn Yehovah ben e warderi den tu. Na so wi Papa na hemel abi warderi tu gi a wroko di yu e du gi en. Ma fa wi kan yepi den wan di e du furuten diniwroko now?

FA WI KAN YEPI DEN PIONIER?

7, 8. San na a wroko fu gewoon pionier èn fa den tra brada nanga sisa na ini den gemeente kan yepi den?

7 Na ini a ten fu den apostel den fayafaya preikiman ben de wan trutru deki-ati gi den gemeente. Na so a de tu nanga den pionier na ini a ten disi. Furu fu den e preiki sowan 70 yuru ibri mun. Fa wi kan yepi den?

8 Wan pionier sisa di nen Shari taki: „A sori leki den pionier tranga, fu di den de na ini a preikiwroko ibri dei. Ma toku den abi deki-ati fanowdu” (Rom. 1:11, 12). Wan tra  sisa di ben man pionier wan tu yari langa taki fu den pionier na ini en gemeente: „Den e wroko tranga ala ten. Den de nanga tangi trutru te den brada nanga sisa e tyari den nanga wagi na ini a preikiwroko, te den e kari den fu kon nyan nanga den, te den e gi den wan olimoni, noso te den e yepi den na tra fasi. Te yu e du den sani disi, dan yu e sori taki yu e broko yu ede nanga den trutru.”

9, 10. San son sma du fu yepi den pionier na ini a gemeente fu den?

9 Wan tra fasi fa wi kan yepi den pionier, na fu wroko nanga den na ini a preikiwroko. Wan pionier sisa di nen Bobbi ben taki: „Wi abi moro yepi fanowdu te mindriwiki.” Wan tra pionier sisa na ini a srefi gemeente ben taki: „A no makriki fu feni sma di wani wroko nanga yu bakadina.” Wan sisa di e dini now na a Betel fu Brooklyn e memre a yepi di a ben kisi di a ben e pionier. A taki: „Wan sisa di ben abi wan wagi ben taigi mi: ’Solanga yu no abi wan sma fu wroko nanga yu na ini a preikiwroko, yu kan bel mi. Dan mi o go nanga yu.’ A yepi mi trutru fu tan pionier.” Shari taki wan prenspari sani: „Nofo tron baka a preikiwroko, den pionier di no trow de den wawan. Son leisi yu kan kari den brada nanga sisa disi di no trow fu kon na a Osofamiri Anbegi fu yu. Te yu e du tra sani makandra nanga den, dan dati kan gi den deki-ati.”

10 Wan sisa di du furuten diniwroko sowan 50 yari kaba, fruteri fa den brada nanga sisa yepi en nanga tra pionier sisa di no ben trow. A taki: „Ibri leisi, baka wan tu mun, den owruman ben e go luku den pionier. Den ben e aksi wi fa a de nanga a gosontu fu wi èn nanga a grontapuwroko fu wi. Den ben e aksi tu efu wi ben abi problema. Den ben e broko den ede nanga wi trutru. Den ben kon na wi oso fu luku efu wi ben abi yepi fanowdu.” Den owruman disi nanga tra brada de leki Oneisiforus. Boiti taki a ben musu sorgu en osofamiri, a ben e yepi Paulus tu.2 Tim. 1:18.

11. San na a wroko fu spesrutu pionier?

11 Wan tra sortu furuten diniwroko, na a spesrutu pionierwroko. Furu spesrutu pionier e preiki sowan 130 yuru ibri mun. Fu di den e gebroiki someni ten fu du a preikiwroko èn fu yepi a gemeente na tra fasi,  meki nofo tron den no e du grontapuwroko. Fu dati ede a bijkantoro e gi den wan pikin moni ibri mun fu bai den sani di den abi fanowdu. Na so den spesrutu pionier kan poti ala prakseri na a preikiwroko.

12. Fa den owruman nanga tra brada nanga sisa kan yepi den spesrutu pionier?

12 Fa wi kan yepi den spesrutu pionier? Wan brada di e wroko na wan bijkantoro èn di taki nanga furu spesrutu pionier, taki: „Den owruman musu taki nanga den fu kon sabi a situwâsi fu den. Na so den o kon sabi fa den kan yepi den. Son Kotoigi denki taki spesrutu pionier no abi yepi fanowdu, fu di a bijkantoro e gi den moni kaba. Ma toku furu fasi de fa den brada nanga sisa na ini a gemeente kan yepi den.” Neleki den gewoon pionier, den spesrutu pionier breiti te tra brada nanga sisa wani wroko nanga den na ini a preikiwroko. Yu kan yepi den na a fasi dati?

FA WI KAN YEPI DEN KRING-OPZIENER?

13, 14. (a) Sortu sani fu den kring-opziener nanga den wefi fu den wi no musu frigiti? (b) San yu kan du fu yepi den kring-opziener nanga den wefi fu den?

13 Den kring-opziener nanga den wefi fu den na lepi brada nanga sisa di abi wan tranga bribi èn di e gi wi deki-ati. Ma wi no musu frigiti taki den abi deki-ati fanowdu tu. Den lobi en te brada nanga sisa wani wroko nanga den na ini a preikiwroko. Èn den breiti te brada nanga sisa e kari den kon fu du wan prisiri sani nanga den. Te kring-opziener noso den wefi fu den de na ati-oso noso te den siki, wi kan go luku den èn yepi den. Na dati Lukas ben du. A ’lobi-ati brada disi di ben de wan datra’, ben yepi Paulus nanga den tra brada di ben e go luku den difrenti gemeente.Kol. 4:14; Tori 20:5–21:18.

14 Kring-opziener nanga den wefi fu den abi bun mati fanowdu di e gi den deki-ati. Wan kring-opziener ben skrifi: „Den mati fu mi sabi o ten mi abi deki-ati fanowdu. Den sabi sortu aksi den musu poti èn disi e yepi mi fu taki fu den broko-ede fu mi. Son leisi na arki den e arki nomo, dan dati de wan bigi yepi gi mi kaba.” Kring-opziener nanga den wefi fu den de nanga tangi te brada nanga sisa wani sabi trutru fa a e go nanga den.

FA WI KAN YEPI DEN WAN DI E WROKO NA BETEL?

15, 16. Fu san ede a wroko di den brada nanga sisa e du na Betel èn na den kongreshal prenspari? Fa wi kan horibaka gi den?

15 Na heri grontapu den brada nanga sisa di e wroko na Betel èn na den kongreshal e du prenspari wroko fu horibaka gi a preikiwroko. Efu yu gemeente noso kring abi sma di e wroko na Betel, dan fa yu kan sori taki yu no e frigiti den?

16 Te wan brada noso sisa froisi go tan na Betel, dan a kan taki a e misi den famiri nanga den mati fu en na ososei. Den brada nanga sisa disi breiti srefisrefi te den tra sma na Betel èn na ini a nyun gemeente fu den tron mati fu den (Mark. 10:29, 30). Aladi den e wroko na Betel, den man go na den gemeente konmakandra èn na ini a preikiwroko ibri wiki. Ma son leisi den musu du moro wroko na Betel. A bun te den brada nanga sisa na ini a gemeente e frustan disi èn e sori taki den abi warderi gi a wroko di den sma na Betel e du.Leisi 1 Tesalonikasma 2:9.

FA WI KAN YEPI FURUTEN DINARI DI E WROKO NA INI TRA KONDRE?

17, 18. Sortu wroko den furuten dinari di e dini na ini tra kondre e du?

17 Son leisi te furuten dinari musu go wroko na ini wan tra kondre, den musu nyan tra sortu nyan, den musu leri wan tra tongo èn den musu kon gwenti wan tra fasi fu libi. Fu san ede den de klariklari fu du disi?

18 Sonwan fu den na zendeling. Nofo  tron den e go na wan tra kondre fu preiki drape. Den kisi leri fu de bun preikiman nanga bun leriman, èn den e leri tra sma na ini a gemeente san den leri. A bijkantoro e sorgu taki den abi wan presi fu tan èn den e kisi wan moni fu bai san den abi fanowdu. Tra furuten dinari di e dini na ini wan tra kondre e wroko na bijkantoro noso den e yepi bow bijkantoro, Kownukondre zaal, kongreshal nanga vertaal kantoro di no de na a bijkantoro. A bijkantoro noso brada nanga sisa fu a gemeente e sorgu taki den abi nyanyan nanga wan presi fu tan. Neleki a Betelfamiri, den furuten dinari disi e go doronomo na den konmakandra èn na ini a preikiwroko. A gemeente e leri furu fu den furuten dinari disi di abi furu ondrofeni.

19. Fa yu kan yepi den furuten dinari di kon dini na ini a kondre fu yu?

19 Fa yu kan yepi den furuten dinari di e dini na ini a kondre fu yu? Hori na prakseri taki spesrutu na ini a bigin, den no gwenti nyan son sani. Yu kan hori disi na prakseri te yu o kari den fu kon nyan na yu oso. Kande yu kan aksi den fosi san den lobi nyan noso efu den wani nyan wan sani di den no nyan ete. Abi pasensi nanga den te den e leri taki a tongo fu yu èn te den musu gwenti nanga a fasi fa sma na ini a kondre e libi. A kan teki wan langa ten fosi den e frustan ala san yu e taki, ma yu kan yepi den fu taki a tongo bun. Den wani leri trutru!

20. Fa wi kan yepi furuten dinari èn den papa nanga mama fu den?

20 Furuten dinari e kon owru èn den papa nanga mama e kon owru tu. A no de fu taki dati den papa nanga mama di de Kotoigi, wani taki den pikin fu den tan du furuten diniwroko (3 Yoh. 4). Wi sabi taki furuten dinari o du ala san den man fu sorgu gi den papa nanga mama èn den e go luku den so furu leki den man. Ma den brada nanga sisa di e tan krosibei kan yepi tu fu sorgu den papa nanga mama fu den furuten dinari. Na a fasi disi den de wan bigi yepi gi den furuten dinari. Wi no musu frigiti taki furuten dinari e wroko tranga fu horibaka gi a preikiwroko di de a moro prenspari wroko na ini a ten disi (Mat. 28:19, 20). Yu nanga den tra brada nanga sisa fu a gemeente kan yepi den papa nanga mama fu furuten dinari?

21. Fa den furuten dinari feni en te trawan e yepi den èn e gi den deki-ati?

21 Furu sma e wroko tranga fu di den wani kon gudu. Ma den sma di bosroiti fu du furuten diniwroko e wroko tranga fu di den wani du ala san den man gi Yehovah èn fu di den wani yepi trawan. Dati meki den de nanga tangi te trawan e yepi den. Wan sisa di e dini na ini wan tra kondre taki: „Srefi te sma skrifi wan syatu brifi fu sori taki den e warderi a wroko di mi e du, dan dati e sori mi taki den e prakseri mi èn taki den breiti nanga san mi e du.”

22. Fa yu feni a furuten diniwroko?

22 Den brada nanga sisa di e du furuten diniwroko e libi wan koloku libi èn den e ondrofeni furu moi sani. Disi na a moro bun fasi fa wan sma kan libi na ini a ten disi. Furuten dinari e leri fu abi bun fasi èn den e leri tra prenspari sani tu. Den e kisi wini fu disi now èn den o kisi wini fu disi na ini a nyun grontapu. Heri esi ala futuboi fu Yehovah o du wroko di e gi den prisiri ibri dei. Fu dati ede, noiti wi musu frigiti ’a wroko di furuten dinari e du fu di den abi bribi, nanga a muiti di den e du fu di den abi lobi’.1 Tes. 1:3.