Go na content

Go na a tra menu

Go na table of contents

Yehovah Kotoigi

Sranantongo

Studie-Waktitoren  |  september 2014

Tan dini Gado awinsi yu e kisi „furu banawtu”

Tan dini Gado awinsi yu e kisi „furu banawtu”

„Wi musu pasa furu banawtu fu man go na ini a Kownukondre fu Gado.”TORI 14:22.

1. Fu san ede den futuboi fu Gado e fruwakti taki den o kisi problema nanga tesi?

WI MUSU pasa „furu banawtu” fu man kisi têgo libi. Furu fu wi no e skreki fu a sani disi, awinsi o langa wi e dini Yehovah. Fu san ede? Fu di wi sabi taki problema nanga tesi na aladei sani na ini a grontapu fu Satan.Openb. 12:12.

2. (a) Sortu tra problema Kresten e kisi, boiti den problema di ala sondu libisma e kisi? (Luku a prenki na a bigin fu na artikel.) (b) Suma e meki taki wi e kisi frufolgu èn fa wi du sabi dati?

2 Boiti den problema di ala sondu libisma e kisi, Kresten e kisi tra problema tu (1 Kor. 10:13). Wan fu den tra problema, na taki sma e frufolgu den hebi fu di den e tan gi yesi na den wet fu Yehovah. Yesus ben taigi den bakaman fu en: „Wan srafu no bigi moro en masra. Efu den frufolgu mi, dan den o frufolgu unu tu” (Yoh. 15:20). Suma e meki taki den e kisi frufolgu? Satan. Bijbel e taki dati Didibri de leki „wan lew di e bari, fu di a e suku fu swari” den futuboi fu Gado (1 Petr. 5:8). Satan o du ala san a man fu meki den disipel fu Yesus drai baka gi Yehovah. Luku san ben pasa nanga na apostel Paulus.

 FRUFOLGU NA INI LISTRA

3. Sortu tesi miti Paulus na ini Listra?

3 Paulus ben kisi frufolgu furu tron fu en bribi ede (2 Kor. 11:23-27). Wan leisi a kisi frufolgu na ini Listra. Di a dresi wan man di ben lan sensi a gebore, den sma fu Listra bigin si en nanga Barnabas leki gado. Paulus nanga Barnabas ben abi fu begi den sma srefi fu no anbegi den leki gado! Ma syatu baka dati den Dyu kerki fesiman kon drape èn den bigin taki wan lo ogri fu Paulus nanga Barnabas. Ne den sma bigin bribi den. Dati meki den trowe ston na tapu Paulus teleki den ben denki taki a dede.Tori 14:8-19.

4, 5. Fu san ede den wortu fu Paulus gi den disipel deki-ati aladi a ben taki dati den ben o kisi moro tesi?

4 Baka di Paulus nanga Barnabas go na Derbe, „den drai go baka na Listra, na Ikoniyum, èn na Antiokia. Drape den tranga den disipel èn den gi den deki-ati fu tan bribi na ini Masra. Den taigi den: ’Wi musu pasa furu banawtu fu man go na ini a Kownukondre fu Gado’” (Tori 14:21, 22). Kande wan sma no ben o fruwakti taki Paulus ben o taki so wan sani. Te wan sma e taki dati wi musu pasa „furu banawtu”, dan dati ben o meki yu firi brokosaka, a no ben o gi yu deki-ati. Sobun, fa Paulus nanga Barnabas „tranga den disipel” di den taigi den taki den ben o kisi moro tesi?

5 Te wi e luku san Paulus taki moro fara, dan wi kan frustan fa den wortu fu en ben gi den disipel deki-ati. Paulus no ben taki nomo: „Wi musu pasa furu banawtu.” A ben taki: „Wi musu pasa furu banawtu fu man go na ini a Kownukondre fu Gado.” Sobun, a meki den poti prakseri na a moi grani di den ben o kisi te den ben o tan dini Gado te na a kaba. A grani disi a no wan dren. Yesus taki: „A sma di horidoro te na a kaba, o kisi frulusu.”Mat. 10:22.

6. Sortu blesi den wan di e horidoro kan kisi?

6 Te wi e horidoro, dan wi o kisi blesi tu. Den salfu Kresten o kisi libi na ini hemel pe den o tiri makandra nanga Yesus. Den „tra skapu” o libi fu têgo na ini wan grontapu pe „retidu o de” (Yoh. 10:16; 2 Petr. 3:13). Ma soleki fa Paulus taki, dan wi alamala o abi fu pasa furu banawtu fosi a ten dati doro. Meki wi poti prakseri na tu fasi fa Satan kan tesi wi.

FRUFOLGU

7. San na wan fu den fasi fa Satan kan tesi wi?

7 Yesus ben taki: „Sma o tyari unu go na den krutu-oso, den o fon unu na ini den snoga èn den o tyari unu go na fesi granman nanga kownu” (Mark. 13:9). Den wortu disi e sori taki son Kresten ben o kisi banawtu fu di sma ben o frufolgu den. Kande kerki fesiman noso politiek man ben o gi sma deki-ati fu du disi (Tori 5:27, 28; 2 Petr. 3:13). Ma san yu denki taki Paulus du di frufolgu miti en? A no ben frede srefisrefi.Leisi Tori 20:22, 23.

8, 9. (a) Fa Paulus sori taki a ben o horidoro awinsi san pasa? (b) Fa son brada nanga sisa fu wi sori taki den teki a srefi bosroiti leki Paulus?

8 Na wan deki-ati fasi Paulus kakafutu gi a tesi disi fu Satan. A taki: „Mi no e si mi libi leki wan prenspari sani. A wan-enkri sani di mi wani na fu lon a streilon te na a kaba èn fu klari a wroko di Masra Yesus gi mi fu du. A wroko dati na fu preiki finifini fu a bun nyunsu taki Gado e sori sma bun-ati” (Tori 20:24). A de krin taki Paulus no ben frede fu kisi frufolgu. Na presi fu dati a ben teki a bosroiti taki a ben o horidoro awinsi san pasa. A moro prenspari sani gi en ben de fu „preiki finifini” awinsi a ben o kisi frufolgu son leisi.

9 Na ini a ten disi furu brada nanga sisa fu wi teki a srefi bosroiti leki Paulus. Fu eksempre, na ini wan kondre son Kotoigi de na strafu-oso pikinmoro 20 yari kaba fu di  den no wani teki prati na den politiek afersi fu a kondre. A tori fu den noiti no go na fesi krutu fu di nowan wet fu a kondre e horibaka gi sma di no wani teki prati na politiek. Den famiri fu den no mag go luku den na strafu-oso. Den fon son strafuman èn den pina trawan na ala sortu ogri-ati fasi srefi.

10. Fu san ede wi no musu frede te tesi miti wi wantronso?

10 Son leisi tesi e miti den brada nanga sisa fu wi wantronso. No frede te dati pasa nanga yu. Memre san pasa nanga Yosef. Den ben seri en leki srafu, ma Yehovah „puru en na ini ala den banawtu fu en” (Tori 7:9, 10). Yehovah kan du a srefi sani gi yu. No frigiti noiti taki „te tesi miti den sma di e dini Gado fayafaya, dan Yehovah sabi fa fu frulusu den” (2 Petr. 2:9). Nofo buweisi de taki yu kan frutrow tapu Yehovah èn taki yu man horidoro sondro fu frede. Tan abi a frutrow taki Yehovah o frulusu yu fu na ogri grontapu disi èn taki a o gi yu têgo libi.1 Petr. 5:8, 9.

TESI DI WI NO E SI WANTEWANTE

11. Na sortu tra fasi Satan kan tesi wi èn fu san ede wi musu luku bun nanga dati?

11 Son leisi te wi de na ini banawtu, wi no man si wantewante taki na tesi Satan e tesi wi. Fu san ede wi musu luku bun nanga a sani disi? Frufolgu de leki wan bigi winti di e wai kon na ini wan foto èn di e pori wan oso wantronso. Ma den tesi di wi no man si wantewante, de leki uduloso di e nyan na udu fu wan oso safrisafri teleki na oso kon swaki èn a e broko fadon. Te wan sma e kisi den sortu tesi disi, dan kande a no sabi srefi taki a de na ini problema teleki a lati tumusi.

12. (a) San na wan fu den tesi fu Satan di wi no e si wantewante èn fu san ede Satan e gebroiki en furu tron? (b) Fa Paulus ben e firi son leisi èn fu san ede?

12 Satan wani taki wi no de mati fu Yehovah moro. Fu dati ede a e meki wi kisi frufolgu noso a e du tra ogri nanga wi. A e gebroiki tra sani tu di wi no e si wantewante leki tesi, fu di a sabi taki den sani dati kan swaki wi bribi safrisafri. Wan fu den sani di a e gebroiki furu tron, na lasi-ati. Na apostel Paulus ben taki krin dati son leisi a ben e firi brokosaka. (Leisi Romesma 7:21-24.) Ma kande yu e prakseri: ’Fa wan man leki Paulus ben kan firi brokosaka?’ A tru taki a ben de wan mati fu Yehovah èn soleki fa a sori, a ben de wan fu den brada di ben e teki fesi na ini Yerusalem. Ma aladi a ben e du ala muiti fu du san reti, toku a ben e meki fowtu son leisi fu di a ben de wan sondu sma. Na a sani disi ben meki a firi brokosaka. Sobun, efu na so yu e firi ten na ten, dan a o de wan trowstu gi yu fu sabi taki na apostel Paulus srefi ben e feti nanga den firi disi.

13, 14. (a) San kan meki taki son fayafaya futuboi fu Yehovah soleki Deborah e firi so brokosaka? (b) Suma wani taki wi lasi bribi èn fu san ede a wani dati?

13 Furu brada nanga sisa e firi brokosaka ten na ten, den de nanga broko-ede, noso den e firi son leisi taki den no warti noti. Fu eksempre, wan fayafaya pionier sisa di wi sa kari Deborah, taki: „Ibri tron baka mi e denki a fowtu di mi ben meki èn ibri tron disi e meki mi firi brokosaka moro nanga moro. Te mi e prakseri ala den sani di mi no du bun, mi e firi son leisi taki noiti wan sma kan lobi mi, srefi Yehovah no kan du dati.”

14 San kan meki taki son fayafaya futuboi fu Yehovah soleki Deborah e firi so brokosaka? Difrenti sani kan meki taki den e firi so. Sonwan fu den e denki takru fu densrefi èn fu a libi fu den (Odo 15:15). Tra sma e denki takru fu densrefi ala ten fu di den abi wan siki di e meki taki den e firi so. Ma efu yu e firi brokosaka ala ten,  dan hori na prakseri taki wan sma de di wani meki den firi disi tron wan tesi gi yu. Prakseri a sani disi: Suma wani taki wi lasi-ati so te, taki wi no wani dini Yehovah moro? A no de fu taki dati na Satan. A no abi nowan howpu fu di a sabi taki a o dede. A wani taki yu srefi denki taki nowan howpu de gi yu (Openb. 20:10). A wani taki wi broko wi ede tumusi, noso taki wi firi brokosaka ala ten, so taki wi no o dini Yehovah fayafaya moro. A o meki sma frufolgu wi noso a o gebroiki tra sani fu tesi wi, fu di a wani nomonomo taki wi musu tapu fu dini Yehovah. No frigiti noiti taki Gado pipel de na ini wan feti, iya, den abi fu feti fu tan dini Yehovah ala ten.

15. Fa wi kan sori taki wi no o meki lasi-ati swaki wi bribi?

15 Du ala muiti fu no gi abra. Hori na prakseri sortu moi blesi wi o kisi. Paulus ben skrifi gi den Kresten na ini Korente: „Wi no e gi abra. Srefi efu a skin fu wi e kon swaki moro nanga moro, toku a sma di wi de fu inisei e kisi nyun krakti dei fu dei. A banawtu di wi e kisi, de fu wan syatu pisi ten nomo èn a no hebi, ma a e meki taki wi e kisi bun bigi blesi di e tan fu têgo.”2 Kor. 4:16, 17.

SREKA NOW GI TEN FU BANAWTU

Ala Kresten, yonguwan nanga owruwan, e leri fu taki fu a bribi fu den sondro fu frede (Luku paragraaf 16)

16. Fu san ede a prenspari fu sreka nownow gi ten fu banawtu?

16 Soleki fa wi si kaba, dan Satan e kon nanga wan lo „triki” (Ef. 6:11). Ibriwan fu wi musu teki a rai di skrifi na 1 Petrus 5:9: „Kakafutu gi en èn abi wan tranga bribi.” Fu man du dati, wi musu sreka wi frustan nanga ati nownow kaba fu du san reti. Fu eksempre, langa ten fosi wan feti kon, wan legre e oefen hebi kaba èn den e sreka sani na fesi. Na so a musu de nanga wi tu. Wi no sabi sortu feti wi o abi fu feti na ini a ten di e kon. Fu dati ede, meki wi sreka  wisrefi nownow gi moro muilek ten. Paulus ben skrifi gi den Kresten fu Korente: „Tan ondrosuku efu unu de na bribi. Tan buweisi sortu sma unu de.”2 Kor. 13:5.

17. Fu sortu aksi wi kan prakseri te wi wani ondrosuku wisrefi?

17 Wan sani di wi musu du fu man teki a rai fu Paulus, na fu ondrosuku wisrefi. Aksi yusrefi: ’Mi e begi doronomo? Te sma wani dwengi mi fu du wan sani di no bun, mi e gi yesi na Gado na presi fu libisma? Mi e go na den Kresten konmakandra doronomo? Mi abi a deki-ati fu fruteri sma fu a bribi fu mi? Mi de klariklari fu gi mi brada noso sisa pardon leki fa mi wani taki den gi mi pardon? Mi e gi yesi na den owruman na ini mi gemeente èn den brada di e teki fesi na ini wi organisâsi na heri grontapu?’

18, 19. Fa yonguwan kan sreka densrefi fu man taki fu a bribi fu den te den de na skoro?

18 Soleki fa wi si, dan wi no musu frede fu taki fu wi bribi èn wi no musu meki sma dwengi wi fu du sani di no bun. Furu fu den yonguwan fu wi musu du dati na skoro. Den leri fu no syen noso frede fu taki fu a bribi fu den. Na presi fu dati den e taki nanga deki-ati. Na ini den tijdschrift fu wi, wi kisi wan tu rai di kan yepi den yonguwan nanga a tori disi. * Fu eksempre, te wan pikin na skoro e aksi: „Fu san ede yu no e bribi na ini evolutie?”, dan den yonguwan fu wi kan piki: „Fu san ede mi musu bribi na ini evolutie? Srefi den sabiman no man agri taki ala sani kon fu densrefi, aladi na den musu sabi moro fu a tori disi!” Papa nanga mama, no frigiti fu oefen den sortu takimakandra disi nanga yu pikin, so taki den kan de srekasreka te den sortu sani disi e miti den na skoro.

19 A tru taki a no ala ten a makriki fu taki fu a bribi fu wi noso fu du san Yehovah wani. Son leisi baka te wi komoto na wroko, wi weri srefisrefi èn wi abi fu dwengi wisrefi fu go na a konmakandra fu a dei dati. Son leisi wi e sribi so switi èn wi musu du muiti fu opo mamanten fu go na ini a preikiwroko. Ma hori disi na prakseri ala ten: Te yu abi a gwenti fu du den sani disi doronomo, dan yu o de srekasreka te yu o kisi moro bigi tesi na ini a ten di e kon.

20, 21. (a) Te yu e prakseri a lusu-paiman, dan fa dati kan yepi yu fu no firi brokosaka ala ten? (b) San wi musu tan du awinsi wi e kisi tesi?

20 Fa a de nanga den tesi di wi no man si wantewante? Fu eksempre, san wi kan du fu no firi brokosaka ala ten? Wan fu den sani di kan yepi wi trutru, na fu prakseri a lusu-paiman. Na dati yepi na apostel Paulus. Son tron a ben e firi brokosaka. Ma a ben sabi taki Krestes dede gi sondusma, a no dede gi sma di no abi sondu. Paulus ben de wan sondu sma. Dati meki a skrifi: „A libi di mi e libi now . . . na fu di mi e bribi na ini a Manpikin fu Gado di lobi mi èn di gi en libi fu mi ede” (Gal. 2:20). Iya, Paulus ben e bribi na ini a lusu-paiman. A ben sabi taki Krestes pai a lusu-paiman gi en tu.

21 Te yu e hori na prakseri taki a lusu-paiman na wan kado di Yehovah gi yu, dan dati o yepi yu fu no firi brokosaka ala ten. Ma disi no wani taki dati wantewante a firi disi o gowe. Son sma o abi fu feti nanga den firi disi ten na ten, teleki a nyun grontapu kon. Ma hori na prakseri: Na soso den wan di no gi abra o kisi blesi. Ibri dei a ten pe Gado Kownukondre o kon tiri grontapu, e kon moro krosibei. Te dati pasa freide o de na grontapu èn nowan libisma o abi sondu moro. Fu dati ede, awinsi yu o kisi furu tesi, tan horidoro teleki a Kownukondre kon.

^ paragraaf 18 Luku A Waktitoren fu 15 december 2010, bladzijde 3-5 èn na Ontwaakt! fu yuli 2009, bladzijde 24-27.