Go na content

Go na a tra menu

Go na table of contents

Yehovah Kotoigi

Sranantongo

Studie-Waktitoren  |  augustus 2014

Yere Yehovah en sten awinsi pe yu de

Yere Yehovah en sten awinsi pe yu de

„Nanga un eigi yesi unu o yere wan sten na un baka e taki: ’Disi na a pasi.’”YES. 30:21.

1, 2. Fa Yehovah e taki nanga den futuboi fu en?

NA INI a heri historia, Yehovah sori en pipel san den musu du. Na ini owruten, a gebroiki engel, fisyun noso dren fu sori den san ben o pasa bakaten noso fu taigi den sortu spesrutu wroko den ben musu du gi en (Num. 7:89; Esek. 1:1; Dan. 2:19). Son leisi Yehovah gebroiki libisma fu teki presi gi en èn fu taigi en pipel fa a wani taki den tyari densrefi. Awansi fa a pipel fu Yehovah ben yere a wortu fu en, den sma di ben e du san a taki, kisi blesi.

2 Na ini a ten disi, Yehovah e gebroiki Bijbel, en santa yeye nanga a gemeente fu tiri en pipel (Tori 9:31; 15:28; 2 Tim. 3:16, 17). A fasi fa Yehovah e sori wi san wi musu du, de so krin taki a gersi leki ’nanga wi eigi yesi wi e yere wan sten na wi baka e taki: „Disi na a pasi. Waka na tapu”’ (Yes. 30:21). Yehovah e gebroiki Yesus tu fu meki wi yere En sten. A poti Yesus fu tiri a gemeente nanga yepi fu „a koni srafu di de fu frutrow” (Mat. 24:45). Wi musu si den sani di Yehovah e taigi wi fu du leki seryusu sani, fu di soso te wi e gi yesi na en wi o kisi têgo libi.Hebr. 5:9.

3. San kan tapu wi fu du san Yehovah e taki? (Luku a prenki na a bigin fu na artikel.)

3 Satan Didibri sabi taki te wi e gi yesi na Yehovah wi o kisi libi. Dati meki a e du ala san a man fu no meki wi arki Yehovah.  Boiti dati, fu di wi ati e bedrigi wi, meki a kan kori wi fu no du ala san Yehovah e taki (Yer. 17:9). Fu dati ede, meki wi go luku san wi kan du te sani e tapu wi fu arki Gado sten. Meki wi go luku tu fu san ede wi musu tan arki Yehovah èn tan meki muiti fu taki nanga en na ini begi, efu wi wani abi wan bun matifasi nanga en awinsi san pasa.

NO MEKI SATAN KORI YU

4. Fa Satan e pruberi fu drai sma ede?

4 Fu di Satan e pruberi fu drai sma ede, meki a e panya leitori èn a e kon nanga ala sortu sani fu bedrigi den. (Leisi 1 Yohanes 5:19.) Na heri grontapu, sma kan kon sabi sani nanga yepi fu koranti, buku, tijdschrift, radio, telefisi nanga Internet. Aladi sma kan gebroiki den sortu sani disi fu kon sabi furu bun sani, toku den e taki tu fu wan lo tori di no e kruderi nanga den wet fu Yehovah (Yer. 2:13). Fu eksempre, nyunsu nanga tra programa na telefisi e taki dati a de wan gewoon sani te tu man noso tu uma e trow nanga makandra. Furu sma feni tu taki Bijbel strak tumusi te a abi fu du nanga homo-sekslibi.1 Kor. 6:9, 10.

5. San wi kan du fu no meki Satan drai wi ede?

5 San sma di lobi a retidu fu Gado, kan du fu no meki Satan kori den nanga den prakseri di a e panya? Fa den kan sabi san bun èn san no bun? ’Soso te den tan na ai, soleki fa Gado taki’ (Ps. 119:9). Bijbel abi rai na ini di kan yepi wi fu kon sabi san tru èn san no tru (Odo 23:23). Yesus taki dati sma musu libi „fu ibri wortu di Yehovah mofo taki” (Mat. 4:4). Dati meki wi musu leri fa fu du san Bijbel e taki. Fu eksempre, langa ten fosi Moses skrifi den wet fu Yehovah di e taki fu hurudu, a yonguman Yosef frustan taki te wan sma e du hurudu, dan a e sondu teige Gado. Di Potifar en wefi pruberi fu kori Yosef fu du wan sani di no bun, a no kon na ini Yosef ede srefi fu trangayesi Yehovah. (Leisi Genesis 39:7-9.) Aladi na uma disi pruberi fu dwengi Yosef wan heri pisi ten, toku Yosef bosroiti fu arki a sten fu Yehovah, na presi fu arki a sten fu na uma. Na ini a ten disi, wi srefi musu arki a sten fu Yehovah, na presi fu arki den prakseri di Satan e panya ala ten baka.

6, 7. San wi musu du efu wi no wani meki a takru rai di Satan e gi, kori wi?

6 Na ini a ten disi, someni sortu kerkileri de di no e kruderi nanga makandra. Dati meki furu sma e denki taki nowan sma man kon sabi san na a tru anbegi. Ma efu wi wani gi yesi na Yehovah, dan a e meki en makriki gi wi fu kon sabi den tru tori fu en. Fu di a muilek fu arki tu sma na a srefi ten, meki wi musu bosroiti suma wi wani arki. Neleki fa skapu sabi a sten fu a skapuman fu den, na so wi musu sabi a sten fu Yesus di de a Skapuman di Yehovah poti fu tiri wi.Leisi Yohanes 10:3-5.

7 Yesus ben taki: „Arki bun san unu e yere” (Mark. 4:24). Yehovah e gi rai di krin èn di bun. Ma wi musu sreka wi ati fu kan poti prakseri na den rai disi èn fu kan arki den. Te wi no e luku bun, dan a kan pasa  taki wi e arki den takru rai di Satan e gi, na presi fu arki a rai di Gado e gi fu di a lobi wi. Noiti wi musu meki grontapu poku, video, telefisi programa, buku, sma di wi sabi, leriman, noso sma di e kari densrefi sabiman, tiri a libi fu wi.Kol. 2:8.

8. (a) Fa wi ati kan meki en moro makriki gi Satan fu kori wi? (b) San kan pasa te wi no de na ai?

8 Satan sabi taki wi na sondu libisma. Te a e pruberi fu kori wi fu du wan sani di no bun, dan a kan hebi gi wi fu tai hori na Yehovah (Yoh. 8:44-47). San wi kan du fu no meki disi pasa? Luku san e pasa te wan sma e meki so furu prisiri taki te fu kaba a e go du wan ogri di noiti a ben denki taki a ben o du (Rom. 7:15). Fa disi du kon? Kande fu di safrisafri a no e poti prakseri na a sten fu Yehovah moro. A kan taki a no e si den sani di e sori en taki en ati bigin kori en, noso a kan taki a no wani si den srefi. Fu eksempre, kande a no e begi moro, a no e go na ini a preikiwroko moro noso a e misi konmakandra. Te fu kaba, a no man hori ensrefi moro èn a e du wan sani di no bun. Te wi tan poti prakseri na ala pikinpikin sani di e sori wi taki a no e go bun nanga wi èn wi e pruberi fu du wan sani na dati wantewante, dan a kan yepi wi fu no meki den sortu bigi fowtu dati. Efu wi e arki a sten fu Yehovah, dan wi no o poti prakseri tu na a denki fu sma di drai baka gi a bribi.Odo 11:9.

9. Fu san ede a prenspari fu sabi frukufruku kaba sortu sondu firi kan meki wi go du ogri?

9 Te wan sma kon sabi frukufruku kaba taki a abi wan siki, dan dati kan kibri en libi. Na so a de tu taki te wi sabi frukufruku kaba sortu sondu firi kan meki wi go du ogri, dan disi kan yepi wi fu wai pasi gi problema. Te wi e si dati, dan wi musu du wan sani wantewante, fosi Satan ’kisi wi libilibi fu du a wani fu en’ (2 Tim. 2:26). San wi musu du te wi e kon si taki a denki nanga den firi fu wi no e kruderi moro nanga san Yehovah wani fu wi? Wi musu abi sakafasi èn suku yepi na en wantewante. Meki wi arki a rai fu en èn meki wi gi yesi na en nanga wi heri ati (Yes. 44:22). Wi musu kon si taki te wi e teki wan bosroiti di no bun, dan dati kan abi furu takru bakapisi gi wi. A moro bun fu tan krosibei fu Yehovah ala ten, na presi fu du wan sani di no bun.

Te yu e tan meki muiti fu tranga yu bribi, dan fa dati kan yepi yu fu no meki Satan kori yu? (Luku paragraaf 4-9)

LUKU BUN NANGA HEIMEMRE ÈN NANGA BIGI-AI

10, 11. (a) Fa wi kan sabi taki wi abi heimemre? (b) San a takru eksempre fu Korak, Datan nanga Abiram e leri wi?

10 Wi musu hori na prakseri taki wi ati kan kori wi fu no dini Yehovah moro. Den  sondu firi fu wi kan abi furu krakti na wi tapu. Teki heimemre nanga bigi-ai fu eksempre. Luku fa den sani disi kan tapu wi fu arki a sten fu Yehovah èn fa dati kan abi takru bakapisi gi wi. Wan sma di abi heimemre kan denki taki a prenspari. Kande a e denki taki a kan du ala san a wani èn taki nowan sma musu kon taigi en san a musu du. A kan denki srefi taki nowan Kresten brada noso sisa, noso owruman musu kon gi en rai. Kande a no wani teki rai moro fu Gado en organisâsi. A de so fara fu Yehovah taki a no man yere En sten srefi.

11 Di den Israelsma ben e waka na ini a sabana, Korak, Datan nanga Abiram opo densrefi teige Moses nanga Aron. Fu di den sma di opo densrefi teige en ben abi heimemre, meki den seti sani fu anbegi Yehovah na den eigi fasi. San Yehovah du? A kiri den (Num. 26:8-10). A tori disi e leri wi wan prenspari sani. Te wi e opo wisrefi teige Yehovah, dan dati o abi takru bakapisi gi wi. Meki wi hori na prakseri tu taki „bigimemre e kon bifo wan sma fadon”, soleki fa Bijbel e sori.Odo 16:18; Yes. 13:11.

12, 13. (a) Gi wan eksempre di e sori fa bigi-ai kan abi takru bakapisi. (b) Fruteri fa bigi-ai kan tron wan problema esi-esi efu wi no dwengi wisrefi.

12 Luku sosrefi san e pasa te wan sma abi bigi-ai. Nofo tron so wan sma kan denki taki den rai fu Yehovah no de gi en. Kande a e denki taki a kan teki sani di no de fu en. Fu eksempre, di Naman, a legre-edeman fu Siria kon betre fu a gwasi fu en, a ben wani gi a profeiti Elisa kado, ma Elisa no ben wani den. Ma Gehasi, a futuboi fu Elisa ben gridi gi den kado dati. Dati meki a taki: „Neleki fa a de seiker taki Yehovah de na libi, na so a de seiker taki mi o lon go na baka Naman fu aksi en wan fu den sani.” Sondro fu Elisa sabi, a lon go na baka Naman, dan a lei gi en. A aksi en „dritenti na fo kilo nanga tu hondro gran solfru nanga tu krosi”. San pasa nanga Gehasi di a du a sani disi èn di a lei gi a profeiti fu Yehovah? We, gridi Gehasi kisi a gwasi fu Naman!2 Kow. 5:20-27.

13 Kande bigi-ai e bigin nanga wan pikin sani. Ma efu wi no e feti nanga a takru fasi disi, dan esi-esi a kan tron wan bigi problema èn te fu kaba a e meki wi go du ogri. A Bijbel tori fu Akan e sori san bigi-ai kan meki wan sma du. Luku san pasa nanga Akan. A taki: „Di wi ben e teki den gudu fu den feanti, mi si wan krosi fu Sineyar di ben moi srefisrefi. A krosi ben de fu wan heihei man. Mi feni tu kilo nanga tu hondro aititenti gran solfru tu nanga wán pisi gowtu fu feifi hondro seibitenti gran. Di mi si den sani disi, mi ben wani den. Ne mi teki den.” Na presi taki Akan feti nanga a takru lostu fu en, a fufuru den sani disi èn a kibri den na ini en tenti. Di sma kon sabi san Akan du, Yosua taigi en taki Yehovah ben o tyari rampu kon na en tapu. A srefi dei dati den ston Akan nanga en osofamiri kiri (Yos. 7:11, 21, 24, 25). Bigi-ai na wan takru fasi di kan pori wi libi. Fu dati ede, meki wi ’tan na ai èn luku bun taki wi no kisi bigi-ai na nowan fasi’ (Luk. 12:15). Wanwan leisi a kan pasa taki wi e denki wan sani di no bun noso di abi fu du nanga hurudu. Toku a prenspari fu dwengi wisrefi èn fu no meki sani kon so fara taki wi du wan sondu.Leisi Yakobus 1:14, 15.

14. San wi musu du te wi e si taki wi e bigin kisi heimemre nanga bigi-ai?

14 Heimemre nanga bigi-ai kan abi takru bakapisi. Efu wi prakseri san o pasa baka te wi du wan ogri, dan dati o yepi wi fu tan arki a sten fu Yehovah (Deut. 32:29). Na ini Bijbel, a tru Gado no e taigi wi  nomo san na a yoisti sani fu du, ma a e fruteri wi tu sortu wini wi o kisi te wi e tyari wisrefi na a yoisti fasi èn a e sori wi san kan pasa te wi du wan sani di no bun. Efu heimemre noso bigi-ai e gi wi a firi fu go du wan ogri, dan a ben o de wan koni sani fu prakseri sortu bakapisi dati kan abi gi wi nanga wi famiri èn sortu krakti dati kan abi na tapu a matifasi di wi abi nanga Yehovah.

TAN MEKI MUITI FU TAKI NANGA YEHOVAH NA INI BEGI

15. San wi kan leri fu na eksempre fu Yesus?

15 Yehovah wani taki sani go bun nanga wi (Ps. 1:1-3). Na a yoisti ten, a e fruteri wi fa wi kan tyari wisrefi na wan fasi di fiti. (Leisi Hebrewsma 4:16.) Aladi Yesus no ben de wan sondusma, toku a ben abi a gwenti fu taki nanga Yehovah èn a ben e begi fayafaya. Yehovah ben horibaka gi Yesus èn na wan tu moi fasi a sori en san fu du. A seni engel kon fu yepi Yesus, a gi Yesus en santa yeye fu horibaka gi en èn a yepi en fu feni den 12 apostel. Sma yere srefi di Yehovah taki komoto fu hemel fu sori taki a e horibaka gi Yesus èn taki a feni en bun (Mat. 3:17; 17:5; Mark. 1:12, 13; Luk. 6:12, 13; Yoh. 12:28). Neleki Yesus, wi musu fruteri Gado ala san de na tapu wi ati (Ps. 62:7, 8; Hebr. 5:7). Te wi e begi, dan wi abi na okasi fu taki nanga Yehovah ala ten èn wi o man tyari wisrefi na wan fasi di o gi en grani.

16. Fa wi kan meki Yehovah yepi wi fu yere en sten moro bun?

16 Yehovah no e dwengi wi fu teki a rai fu en. Ma efu wi wani a rai disi, dan a e sorgu taki wi man feni en makriki. Te wi aksi en fu gi wi en santa yeye, dan a o gi wi en nanga en heri ati. (Leisi Lukas 11:10-13.) Toku a prenspari fu ’luku bun fa wi e arki’ (Luk. 8:18). Fu eksempre, fa wi kan aksi Yehovah fu yepi wi fu no du hurudu, efu wi e tan luku porno noso felem di e sori hurudu? Disi ben o sori taki wi no wani a yepi fu en trutru. Te wi wani taki Yehovah yepi wi, dan wi musu sorgu taki ala ten wi de na presi noso na ini den situwâsi pe en yeye kan de. Wi sabi taki en yeye de na den gemeente konmakandra. Furu futuboi fu Yehovah ben man wai pasi gi problema fu di den arki en sten na den konmakandra. A bakapisi ben de taki den ben man si sortu takru lostu ben opo kon na ini den ati èn den meki muiti fu puru den takru lostu dati.Ps. 73:12-17; 143:10.

TAN MEKI MUITI FU ARKI A STEN FU YEHOVAH

17. Fu san ede a no bun fu frutrow na tapu wi eigi denki?

17 Luku na eksempre fu Kownu David fu Israel. Di David ben yongu, a wini a langa Filistea man Goliat. Baka dati David tron wan srudati èn wan kownu. A ben musu kibri den Israelsma èn a ben musu teki bosroiti gi den. Ma di David bigin frutrow na tapu en eigi denki, en ati kori en èn a du wan seryusu sondu nanga Batseiba. A seti sani srefi fu kiri Uria, a masra fu Batseiba. Di David kisi piri-ai, a ben abi sakafasi. A agri taki a meki wan fowtu èn a tron Yehovah mati baka.Ps. 51:4, 6, 10, 11.

18. San kan yepi wi fu tan arki a sten fu Yehovah?

18 Meki wi poti prakseri na a rai na 1 Korentesma 10:12 èn no frutrow tumusi furu na tapu wisrefi. Bijbel e sori krin taki wi no man ’taki pe wi o poti wi futu’. Dati meki a kan pasa taki wi arki a sten fu Yehovah, noso taki wi arki a sten fu Satan (Yer. 10:23). Fu dati ede a prenspari fu tan begi Gado èn fu du san en santa yeye e sori wi. Iya, meki wi tan arki a sten fu Yehovah ala ten.