Go na content

Go na a tra menu

Go na table of contents

Yehovah Kotoigi

Sranantongo

Studie-Waktitoren  |  augustus 2014

Fa Yehovah e kon krosibei na wi

Fa Yehovah e kon krosibei na wi

„Kon krosibei na Gado èn a o kon krosibei na unu.”YAK. 4:8.

1. Sortu mati ala libisma abi fanowdu èn suma kan de so wan mati gi den?

ALA libisma abi bun mati fanowdu. Den e taki dati sma „e tron mati te den lobi makandra trutru èn te den sabi makandra heri bun”. Wi e firi koloku te wi abi famiri nanga mati di lobi wi, di e warderi wi èn di e frustan den firi fu wi. Ma a sma di musu de a moro bun mati fu wi, na wi Gran Mekiman.Preik. 12:1.

2. San Yehovah e pramisi wi, ma fu san ede furu sma e denki taki disi no man?

2 Na ini en Wortu, Yehovah e gi wi deki-ati fu „kon krosibei” na en èn a e pramisi taki efu wi du dati, „a o kon krosibei” na wi (Yak. 4:8). Te wi sabi disi, dan a e meki wi firi koloku. Ma furu sma no e bribi taki Gado wani de wan mati fu den. Den e denki taki den no bun nofo fu kon krosibei na en, noso taki a fara tumusi fu sma kon krosibei na en. Wi man kon krosibei na Yehovah trutru?

3. San wi musu sabi fu Yehovah?

3 Iya, wi man kon sabi Yehovah fu di a „no de fara fu nowan fu wi” èn fu di a wani taki wi feni en. (Leisi Tori fu den apostel 17:26, 27; Psalm 145:18.) Awinsi wi na sondusma,  toku Gado wani taki wi kon krosibei na en. A de klariklari fu teki wi leki en mati (Yes. 41:8; 55:6). Fu di a psalm skrifiman ondrofeni disi, meki a taki: „Yu na a sma di e arki begi. Na yu ala sortu sma o kon suku yepi. Koloku fu a sma di yu e kari fu kon krosibei na yu” (Ps. 65:2, 4). A Bijbel tori di e taki fu Kownu Asa fu Yuda e sori fa wan sma kan kon krosibei na Gado èn fa Gado kan kon krosibei en. *

LERI FU WAN EKSEMPRE FU OWRUTEN

4. Fa Kownu Asa ben de wan eksempre gi a pipel fu Yuda?

4 Kownu Asa ben de fayafaya gi a tru anbegi. Dati meki a yagi ala den sma gowe di ben abi seks nanga trawan na ini a tempel èn a puru ala den falsi gado di ben de na ini a kondre (1 Kow. 15:9-13). Fu di Asa srefi ben kon krosibei na Yehovah èn a ben gi yesi na den wet fu Gado, meki a ben man gi a pipel deki-ati fu „anbegi Yehovah, a Gado fu den afo fu den èn fu hori den wèt nanga den komando fu en”. Yehovah blesi den fosi tin yari di Asa ben e tiri. Dati meki sani ben e waka bun gi en. San Asa taki fu disi? A taigi a pipel: „A kondre na fu wi. Fu di wi suku yepi na Yehovah wi Gado, meki nowan sma no o man tapu wi fu bow. Wi suku yepi na Gado èn a meki ala sani waka bun gi wi” (2 Kron. 14:1-7). Luku san pasa baka dati.

5. Fa Asa sori taki a ben e frutrow na tapu Gado èn san ben de a bakapisi?

5 Kon meki wi taki dati yu ben de Kownu Asa. Now wan Etiopia man di nen Sera kon nanga 1.000.000 srudati nanga 300 fetiwagi fu feti nanga Yuda (2 Kron. 14:8-10). San yu ben o du te yu si so wan bigi legre e broko kon na ini yu kondre? Yu sabi taki a legre fu yu abi soso 580.000 srudati èn taki den feanti abi tu tron so furu srudati leki yu. Kande yu e aksi yusrefi fu san ede Gado meki feanti broko kon na ini a kondre. Yu ben o pruberi fu du sani na yu fasi na ini a muilek situwâsi disi? A sani di Asa du e sori taki a ben de krosibei fu Yehovah èn taki a ben e frutrow na tapu en. A begi fayafaya: „Yehovah wi Gado, mi e begi yu, yepi wi fu di na ini yu wi poti bribi èn na ini yu nen wi hari kon feti nanga a bigi legre disi. Ke Yehovah, yu na wi Gado. Mi e begi yu fu no gi libisma okasi fu wini yu.” San Gado du di a yere a fayafaya begi fu Asa? „Yehovah . . . wini den Etiopiasma.” Nowan fu den feanti tan na libi!2 Kron. 14:11-13.

6. Fa wi kan teki na eksempre fu Asa?

6 Fu san ede Asa ben de seiker taki Gado ben o kibri en èn taki a ben o sori en san fu du? Bijbel e taki dati „Asa du ala sani di Yehovah feni bun” èn taki „Asa dini Yehovah nanga en heri ati” (1 Kow. 15:11, 14). Wi srefi musu dini Gado nanga wi heri ati tu. A prenspari fu du disi efu wi wani abi wan bun matifasi nanga en now èn na ini a ten di e kon. Wi musu breiti taki Yehovah fosi bigin du sani fu hari wi kon na en èn fu yepi wi tan abi wan bun matifasi nanga en. Luku tu fasi fa Gado hari wi kon na en.

YEHOVAH HARI WI KON KROSIBEI NA EN NANGA YEPI FU A LUSU-PAIMAN

7. (a) San Yehovah du fu hari wi kon na en? (b) San na a moro prenspari fasi fa Gado hari wi kon na en?

7 Yehovah sori taki a lobi libisma fu di a meki wan moi grontapu gi den. Te nanga now, a sori taki a lobi wi fu di a e sorgu taki wi abi ala san wi abi fanowdu ibri dei fu tan na libi (Tori 17:28; Openb. 4:11). A moro prenspari sani na taki a e sorgu  taki wi kan abi wan tranga bribi (Luk. 12:42). A e gi wi a dyaranti tu taki na en e arki den begi fu wi (1 Yoh. 5:14). Ma a moro prenspari fasi fa Gado e hari wi kon na en de nanga yepi fu a lusu-paiman di a gi wi fu sori taki a lobi wi. (Leisi 1 Yohanes 4:9, 10, 19.) Yehovah seni en „wan-enkri Manpikin” kon na grontapu fu frulusu wi fu sondu nanga dede.Yoh. 3:16.

8, 9. Fa Yehovah e gebroiki Yesus fu meki den prakseri fu en kon tru?

8 Yehovah seti sani taki srefi den sma di ben libi fosi a ten fu Krestes, man kisi wini fu a lusu-paiman. Sensi a ten di Yehovah fruteri taki wan sma ben o kon fu frulusu libisma, dan gi en a ben de neleki a lusu-paiman pai kaba, fu di a ben sabi taki san a abi na prakseri ben o kon tru nomonomo (Gen. 3:15). Hondrohondro yari baka dati, na apostel Paulus taki Gado tangi gi „a lusu-paiman di Krestes Yesus pai èn di e tyari frulusu kon”. Paulus taki tu dati „[Gado] sori pasensi èn a gi sma pardon fu den sondu di den du na ini a ten di pasa” (Rom. 3:21-26). Sobun, sondro Yesus wi no man kon krosibei na Gado.

9 Sma di abi sakafasi kan kon sabi Yehovah èn den kan de wan bun mati fu en soso nanga yepi fu Yesus. San Bijbel e taki fu a tru tori disi? Paulus ben skrifi: „Gado sori wi taki a lobi wi fu di a meki Krestes dede gi wi, aladi wi ben de sondari ete” (Rom. 5:6-8). A no fu di wi ben abi reti na tapu meki Gado sorgu taki Yesus gi en libi leki wan frulusu-ofrandi, ma na fu di Gado lobi wi. Yesus taki: „Nowan sma kan kon na mi, efu a Tata di seni mi kon no e hari en kon.” Na wan tra okasi a taki tu: „Nowan sma kan kon na a Tata sondro mi” (Yoh. 6:44; 14:6). Fa Yehovah e hari sma kon na en nanga yepi fu Yesus? Fa a e yepi den fu tan lobi en so taki den kan kisi têgo libi? A e gebroiki en santa yeye fu yepi den. (Leisi Yudas 20, 21.) Luku wan tra fasi fa Yehovah e hari wi kon na en.

YEHOVAH E HARI WI KON NA EN NANGA YEPI FU EN WORTU

10. Fa Bijbel e yepi wi fu kon moro krosibei na Gado?

10 Te nanga now wi si noso leisi tekst fu 14 difrenti Bijbel buku. Efu wi no ben o abi Bijbel, dan fa wi ben o man sabi dati wi kan krosibei na wi Mekiman? Sondro Bijbel wi no ben o man leri san na a lusu-paiman èn fa wi kan kon krosibei na Yehovah nanga yepi fu Yesus. Yehovah meki sma skrifi Bijbel nanga yepi fu en santa yeye. Na so wi kon sabi suma na en èn san na den bigi sani di a abi na prakseri fu du. Fu eksempre, na Eksodes 34:6, 7 Yehovah taigi Moses dati en na „wan Gado di abi sari-ati nanga switifasi. En ati no e bron esi, a abi bun-ati pasa marki, èn ala ten a e du san a e taki. A e du bun gi dusundusun sma, èn a e gi sma pardon te den meki fowtu, te den du ogri, èn te den du sondu.” Yu no ben o wani tron wan mati fu so wan sma? Yehovah sabi taki o moro wi e leri fu en te wi e leisi Bijbel, o moro a o tron wan trutru sma gi wi èn o moro wi o kon krosibei na en.

11. Fu san ede wi musu meki muiti fu kon sabi fa Gado de èn fa a e du sani? (Luku a prenki na a bigin fu na artikel.)

11 A bigin fu a buku Kon krosibei na Yehovah e taki fa wi kan tron wan bun mati fu Gado. Drape skrifi: „We, ala ten a de so taki wi e tron mati fu wan sma te wi sabi en bun, te wi lobi fa a sma de, èn te wi lobi den maniri fu a sma dati. Sobun, a de tumusi prenspari fu ondrosuku san Bijbel e taki fu a fasi fa Gado de èn fu a fasi fa a e  du sani.” Dati meki wi kan breiti taki Yehovah skrifi Bijbel na wan fasi di libisma man frustan bun.

12. Fu san ede Yehovah gebroiki libisma fu skrifi Bijbel?

12 Yehovah ben kan meki engel skrifi a Wortu fu en. Wi sabi taki engel wani sabi fa a e go nanga wi èn san wi e du (1 Petr. 1:12). Dati meki den ben o sabi heri bun fa fu skrifi a boskopu fu Yehovah gi libisma. Ma den ben o man si sani soleki fa libisma e si en? Den ben o man frustan san wi abi fanowdu, san na den swakifasi fu wi èn san wi e fruwakti? Nôno. Yehovah sabi taki engel no man frustan den sani disi. Fu dati ede a meki libisma skrifi Bijbel. Te wi e leisi fa den sma dati noso tra sma ben lasi-ati, fa den ben e tweifri noso fa den ben e frede èn sortu fowtu den meki, dan wi kan frustan den firi fu den. Te wi e leisi fa den ben e prisiri, dan wi e prisiri tu. Ala Bijbel skrifiman ben abi „den srefi firi leki wi”, neleki fa a ben de nanga a profeiti Elia.Yak. 5:17.

Te yu e prakseri den sani di Yehovah du gi Yona nanga Petrus, dan fa dati e yepi yu fu kon moro krosibei na en? (Luku paragraaf 13, 15)

13. Fa yu e firi te yu e prakseri a begi fu Yona?

13 Fu eksempre, aksi yusrefi efu wan engel ben o man fruteri krin fa Yona ben e firi di a lowe, baka di Gado gi en wan prenspari wroko fu du. A bun taki Yehovah meki Yona srefi skrifi san miti en èn fa a begi Gado fayafaya di a fisi swari en. Yona taki: „Di mi ben kon swaki srefisrefi, Yehovah ben de a sma di mi memre.”Yona 1:3, 10; 2:1-9.

14. Fu san ede yu man frustan san Yesaya skrifi fu ensrefi?

14 Luku tu san Yehovah meki a profeiti Yesaya skrifi fu ensrefi. Baka di a kisi wan fisyun pe a si a glori fu Gado, a kon frustan taki en na wan sondusma trutru. A taki: „Helu fu mi! Bika na dede mi o dede now. Mi na wan man di no abi wan krin  mofo èn mi e tan na mindri sma di no abi krin mofo tu. Ma toku mi si Kownu Yehovah di e tiri den legre, nanga mi eigi ai!” (Yes. 6:5) Wan engel ben o man taki den sani disi? Yesaya ben man du dati èn wi kan frustan fa a ben firi.

15, 16. (a) Fu san ede wi kan frustan fa tra libisma ben e firi? Gi wan eksempre. (b) San o yepi wi fu kon moro krosibei na Yehovah?

15 Yu denki taki engel ben o man taki dati den „no warti” noti, neleki fa Yakob ben taki dati? Yu denki taki den ben o man taki dati den na „sondu sma” neleki fa Petrus ben si ensrefi? (Gen. 32:10; Luk. 5:8) Yu denki taki den engel ben „frede” neleki den bakaman fu Yesus? Noso fa a ben o de te engel ben o preiki a bun nyunsu èn sma ben o frufolgu den? Den ben o abi „deki-ati” fanowdu, neleki Paulus nanga den trawan? (Yoh. 6:19; 1 Tes. 2:2) Nôno. Engel hei moro libisma èn den no abi den swakifasi di wi abi. Ma te sondusma e taki fa den e firi, dan wi e frustan den wantewante fu di wi srefi na sondu libisma tu. Te wi e leisi Gado Wortu, dan wi kan ’prisiri trutru nanga sma di e prisiri èn krei nanga sma di e krei’.Rom. 12:15.

16 Te wi e denki dipi fu san Bijbel e taki fu den sani di Yehovah du gi den futuboi fu en na ini a ten di pasa, dan wi o leri furu moi sani fu en. Wi o leri taki a ben abi pasensi èn taki a ben de wan mati fu den sondusma dati fu di a ben lobi den. Na so wi o kon sabi Yehovah heri bun èn wi o man lobi en nanga wi heri ati. Disi o meki taki wi o man kon moro krosibei na en.Leisi Psalm 25:14.

KISI WAN BUN MATIFASI NANGA GADO

17. (a) Sortu bun rai Asaria gi Asa? (b) Fa Asa sori taki a no ben wani arki a rai fu Asaria èn san ben de a bakapisi?

17 Baka di Kownu Asa wini a legre fu Etiopia, Gado en profeiti Asaria taigi en nanga a pipel wan tu moi sani fu gi den deki-ati. Asaria taki: „Yehovah o de nanga unu, solanga unu de nanga en. Efu unu suku en, a o meki unu feni en. Ma efu unu gowe libi en, a o gowe libi unu” (2 Kron. 15:1, 2). Ma di Asa kon moro owru, a no teki a bun rai disi. Di a Kownukondre Israel na noordsei ben wani kon feti nanga en, Asa go suku yepi na den Siriasma. Na presi taki Asa bari kari Yehovah fu a yepi en, a go suku yepi na sma di no ben e dini Gado. Dati meki Asaria taigi Asa: „Fu di yu du a don sani disi, meki tra kondre o opo kon feti nanga yu now.” Sensi a ten dati, legre fu tra kondre kon feti nanga Asa ibri leisi baka (2 Kron. 16:1-9). San wi e leri fu disi?

18, 19. (a) San wi musu du efu wan sani pasa di meki taki wi no de wan bun mati fu Gado moro? (b) Fa wi kan kon moro krosibei na Yehovah?

18 Noiti wi musu gowe libi Yehovah. Efu wi du sani di meki taki wi no de wan bun mati fu Gado moro, dan wi musu du san skrifi na Hosea 12:6. Drape wi e leisi: „Un musu drai go baka na un Gado. Un musu abi bun-ati èn un musu du san reti. Un musu howpu tapu un Gado doronomo.” Sobun, meki wi du ala san wi man fu sori warderi gi a lusu-paiman èn meki wi studeri Gado Wortu fayafaya. Dati o yepi wi fu kon moro krosibei na Yehovah.Leisi Deuteronomium 13:4.

19 A psalm skrifiman ben taki: „A bun gi mi fu kon krosibei na Gado” (Ps. 73:28). Meki wi alamala tan leri nyun sani fu Yehovah. Dati o meki taki wi o lobi en moro nanga moro. Te wi o kon moro krosibei na Yehovah, dan a o kon moro krosibei na wi na ini a ten disi èn na ini a ten di o kon.

^ paragraaf 3 Luku na artikel di e taki fu Asa èn di nen „Gado o blesi unu gi den sani di unu du”, na ini A Waktitoren fu 15 augustus 2012.