Go na content

Go na a tra menu

Go na table of contents

Yehovah Kotoigi

Sranantongo

Studie-Waktitoren  |  augustus 2014

’Meki yu bribi kon tranga baka èn tranga a bribi fu yu brada tu’

’Meki yu bribi kon tranga baka èn tranga a bribi fu yu brada tu’

PETRUS krei nanga bigi sari di a taki dati a no sabi Yesus. A no de fu taki dati a ben o abi fu meki furu muiti fu kisi ensrefi baka. Toku Yesus ben wani gebroiki en fu yepi trawan. Dati meki a taigi Petrus: „Te yu bribi kon tranga baka, dan yu musu meki a bribi fu den brada fu yu kon tranga tu” (Luk. 22:32, 54-62). Petrus tron wan fu den moro prenspari stonfutu fu a Kresten gemeente fu a fosi yarihondro (Gal. 2:9). Na so a kan pasa tu taki wan brada di ben e dini leki owruman fosi, kan kisi a frantwortu dati baka èn a kan prisiri baka fu tranga a bribi fu en Kresten brada nanga sisa.

Son brada di den puru leki owruman, kan kisi a firi taki den no bun nofo. Julio, * di ben de wan owruman na ini Zuid-Amerika moro leki 20 yari, e taki: „Mi ben gwenti fu sreka misrefi gi lezing èn fu go luku brada nanga sisa na ini a gemeente fu kan gi den deki-ati. Den sani disi ben de prenspari na ini mi libi. Fu di mi lasi den frantwortu disi wantronso, meki mi no ben abi furu fu du moro. A ten dati ben hebi gi mi trutru.” Ma now Julio na wan owruman baka.

„UN MUSU PRISIRI SREFISREFI”

A disipel Yakobus ben skrifi: „Un musu prisiri srefisrefi, mi brada, te ala sortu tesi e miti unu” (Yak. 1:2). Yakobus ben e taki fu den tesi di wi e kisi fu di wi na sondusma noso fu di sma e frufolgu wi. A ben e taki fu sma di e denki den eigi lostu, sma di lobi a wan sma moro a trawan èn den sortu sani disi (Yak. 1:14; 2:1; 4:1, 2, 11). A kan hati wi te Yehovah e piri-ai gi wi (Hebr. 12:11). Ma den tesi disi no musu meki wi lasi wi prisiri.

Srefi te wi lasi wi frantwortu na ini a gemeente, wi abi na okasi ete fu ondrosuku o tranga wi bribi de èn fu sori Yehovah taki wi lobi en. Wi kan  aksi wisrefi tu fu san ede wi ben wani dini leki owruman. Na fu di wi ben wani kisi wini gi wisrefi? Noso na suku wi ben e suku fu kisi a grani dati fu di wi lobi Gado, fu di wi e bribi taki a gemeente na fu en èn fu di wi sabi taki a gemeente abi sorgu fanowdu? (Tori 20:28-30) Te brada di ben e dini leki owruman fosi, e tan dini Gado nanga prisiri, dan den e sori ala sma, nanga Satan sosrefi, taki den lobi Yehovah trutru.

Di Kownu David du wan tu seryusu sondu, a kisi piri-ai. Ma a no mandi fu dati èn Gado gi en pardon. David singi: „Koloku fu a sma di kisi pardon, baka di a opo ensrefi teige Gado. Iya, koloku fu en, fu di Gado tapu den sondu fu en. Koloku fu a sma di Yehovah no krutu, baka di a meki fowtu. Koloku fu a sma di no e prakseri fu bedrigi trawan” (Ps. 32:1, 2). A bribi fu David kon moro tranga èn wi kan de seiker taki a tron wan moro bun skapuman fu Gado pipel.

Nofo tron te brada e tron owruman baka, dan den e tron moro bun skapuman leki fosi. Wan brada di e dini leki owruman baka, e taki: „Now mi e frustan moro bun fa fu sorgu gi sma di e meki wan fowtu.” Wan tra owruman ben taki: „Now mi e si a frantwortu di mi kisi fu dini den brada nanga sisa fu mi, leki wan moro bigi grani.”

YU BRIBI KAN KON TRANGA BAKA?

A psalm skrifiman ben taki: „[Yehovah] no o tan suku fowtu na wi” (Ps. 103:9). Sobun, wi no musu denki taki Gado no o frutrow wan sma noiti moro te a meki wan seryusu fowtu. Baka di Ricardo dini leki owruman furu yari langa, a lasi a grani dati. A e taki: „Baka di mi meki a fowtu, mi firi brokosaka trutru. Wan heri pisi ten mi ben abi a firi taki mi no bun nofo èn dati ben tapu mi fu dini baka leki owruman. Mi ben denki taki mi no ben o man du en bun. Ma fu di mi lobi yepi trawan, meki mi ben man studeri Bijbel nanga sma, mi ben man gi brada nanga sisa deki-ati na ini a gemeente èn mi ben man preiki makandra nanga den. Dati yepi mi fu kon de seiker fu misrefi baka èn now mi e dini baka leki owruman.”

Yehovah yepi brada fu kon de nanga prisiri baka èn fu dini baka leki owruman

Te wan brada e hori trawan na ati, dan dati kan tapu en fu dini leki owruman. A moro bun fu de  leki Yehovah en futuboi David di ben abi fu lowe gi a dyarusu Kownu Saul. David no ben wani pai Saul ogri fu ogri, srefi di a kisi na okasi fu du dati (1 Sam. 24:4-7; 26:8-12). Di Saul dede na ini wan feti, David ben sari trutru. A kari Saul nanga Yonatan „den lobiwan di sma ben lobi” (2 Sam. 1:21-23). David no hori Saul na ati.

No hori sma na ati, te yu abi a firi taki den no frustan yu bun noso taki den krutu yu na wan fasi di no reti. Fu eksempre, baka di William dini sowan 30 yari leki owruman na ini Ingrisikondre, a lasi a grani dati. Dati meki a hori sonwan fu den owruman na ati. San yepi William fu kisi ensrefi baka? A taki: „Di mi leisi a buku fu Yob, a gi mi deki-ati. Efu Yehovah ben man yepi Yob fu kon bun baka nanga den dri mati fu en, dan a ben o man yepi mi tu fu kon bun baka nanga den owruman.”Yob 42:7-9.

GADO E BLESI DEN WAN DI E DINI BAKA LEKI OWRUMAN

Efu yu bosroiti fu no dini moro leki owruman, dan a ben o bun fu aksi yusrefi fu san ede yu du dati. Yu du en, fu di den problema fu yu ben moro yu? Tra sani ben kon de moro prenspari gi yu? Yu lasi-ati fu di yu poti prakseri na den fowtu fu tra sma? Awansi san ben de a problema, hori na prakseri taki di yu ben de owruman, yu ben abi moro okasi fu yepi trawan. Den lezing di yu ben hori, tranga a bribi fu den, na eksempre fu yu gi den deki-ati èn di yu go luku den fu tranga a bribi fu den, yu yepi den fu horidoro. Di yu ben e dini leki owruman, yu ben firi prisiri. Ma yu ben meki Yehovah en ati prisiri tu.Odo 27:11.

Sori taki yu lobi Yehovah, fu di yu e tan dini en nanga prisiri

Yehovah yepi brada fu kon de nanga prisiri baka èn fu kisi na angri fu dini baka leki owruman na ini a gemeente. Efu yu bosroiti fu no dini moro leki owruman, noso den puru yu leki owruman, dan yu kan ’suku fu tron wan sma baka di e teki fesi na ini a gemeente’ (1 Tim. 3:1). Paulus tan begi taki den Kresten na Kolose kon sabi a wani fu Gado moro fini. Na so den ben o man ’tyari densrefi na wan fasi di Yehovah feni bun, so taki den ben kan tan prisiri en dorodoro’ (Kol. 1:9, 10). Efu yu kisi a grani baka fu dini leki owruman, dan aksi Yehovah fu a gi yu krakti, pasensi nanga prisiri. Na ini den lasti dei disi, Gado pipel abi lobi-ati skapuman fanowdu fu gi den deki-ati. Yu man tranga a bribi fu yu Kresten brada nanga sisa èn yu de klariklari fu du dati?

^ paragraaf 3 Wi kenki wan tu nen.