Go na content

Go na a tra menu

Go na table of contents

Yehovah Kotoigi

Sranantongo

Studie-Waktitoren  |  yuli 2014

A pipel fu Yehovah e „drai baka gi kruktudu”

A pipel fu Yehovah e „drai baka gi kruktudu”

„Meki ala sma di e kari a nen fu Yehovah, drai baka gi kruktudu.”2 TIM. 2:19.

1. San de prenspari gi wi na ini wi anbegi?

NA DIFRENTI kondre yu kan feni a nen fu Yehovah na tapu gebow fu lanti noso na tapu tra sani di sma meki. Efu yu si disi wan leisi kaba, dan a no de fu taki dati yu ben breiti. Wi leki Kotoigi fu Yehovah, e si a nen fu Gado leki wan prenspari sani na ini wi anbegi. Nowan tra grupu sma de na grontapu na ini a ten disi di e gebroiki a nen fu Gado leki wi. Wi sabi taki a de wan grani fu tyari a nen fu Gado, ma a de wan bigi frantwortu sosrefi.

2. Sortu bigi frantwortu wi abi leki sma di e tyari a nen fu Gado?

2 Ma a no te wan sma e gebroiki a nen fu Gado, dan disi wani taki dati Yehovah o feni en bun. Wi musu tyari wisrefi tu soleki fa a wani. Dati meki Bijbel e memre wi taki Yehovah en pipel ’no musu du ogri moro’ (Ps. 34:14). Na apostel Paulus ben taki wan srefi sortu sani di a skrifi: „Meki ala sma di e kari a nen fu Yehovah, drai baka gi kruktudu.” (Leisi 2 Timoteyus 2:19.) Furu sma sabi taki wi leki Kotoigi fu Gado gwenti kari a nen fu Yehovah. Ma fa wi musu drai baka gi kruktudu?

 „KOMOTO NA INI A BIRTI” FU OGRIDU

3, 4. Sortu wortu hari a prakseri fu Bijbel sabiman èn fu san ede?

3 Luku fu san ede Paulus taki den sani di skrifi na ini 2 Timoteyus 2:19. A tekst disi e taki dati „Gado seti wan steifi fondamenti di no man seki” èn baka dati a e taki fu tu sani di stampu na tapu a fondamenti dati. A fosi sani na: „Yehovah sabi den sma di de fu en.” A de krin taki a pisi disi abi fu du nanga san skrifi na ini Numeri 16:5. (Luku a fosi artikel.) A di fu tu sani na: „Meki ala sma di e kari a nen fu Yehovah, drai baka gi kruktudu.” Langa ten kaba den wortu disi hari a prakseri fu Bijbel sabiman. Fu san ede?

4 Te yu luku san Paulus taki dyaso, dan a gersi leki a e taki wan sani di teki puru fu den Hebrew Buku fu Bijbel. Ma nowan tekst drape e taki a sani di Paulus skrifi. Soleki fa wi si kaba, dan a fosi sani di Paulus taki abi fu du nanga Numeri kapitel 16 pe wi e leisi fa Korak opo ensrefi teige Gado. Ma dan san Paulus ben abi na prakseri di a taki: „Meki ala sma di e kari a nen fu Yehovah, drai baka gi kruktudu”? A de so taki a sani disi abi fu du tu nanga a srefi situwâsi?

5-7. San Paulus ben abi na prakseri di a skrifi 2 Timoteyus 2:19? (Luku a prenki na a bigin fu na artikel.)

5 Bijbel e taki dati Datan nanga Abiram, di ben de manpikin fu Eliab, span anu makandra nanga Korak èn den teki fesi na ini a grupu sma di opo densrefi teige Moses nanga Aron (Num. 16:1-5). Sondro fu syen, den sori taki den no ben e lespeki Moses èn taki den ben e wisiwasi a frantwortu di Gado gi Moses. Den man disi ben de ete na mindri a pipel fu Yehovah èn den ben kan meki den tra futuboi fu Gado lasi bribi. Di a dei doro taki Yehovah srefi ben o sori suma na den tru anbegiman fu en èn suma na den sma di opo densrefi teige en, a taigi ala sma krin san den ben musu du.

6 A tori e taki: „Yehovah piki Moses: ’Taigi a pipel: „Un komoto na den tenti fu Korak, Datan, nanga Abiram!”’ Dan Moses opo go na Datan nanga Abiram èn den owru man fu Israel go nanga en tu. Ne Moses taigi a pipel: ’Mi e begi unu, komoto na den tenti fu den ogri man disi èn no fasi noti fu den, noso unu o dede makandra nanga den man disi di sondu.’ Wantewante den sma komoto na ini a birti fu a tenti fu Korak, Datan, nanga Abiram” (Num. 16:23-27). Baka dati Yehovah kiri ala den sma di opo densrefi teige en. Ma den wan di tan gi yesi na en, komoto drape èn na so den tan na libi fu di den drai baka gi kruktudu.

7 Di Paulus taki na ini 2 Timoteyus 2:19 dati „Yehovah sabi den sma di de fu en”, dan a ben abi Numeri 16:5 na prakseri. Baka dati a taki: „Meki ala sma di e kari a nen fu Yehovah, drai baka gi kruktudu.” Kande a ben e taki dyaso fu a srefi tori di skrifi na ini Numeri 16:23-27. Sobun, a kan taki ala tu sani di Paulus taki abi fu du nanga a srefi tori. San wi e leri fu disi? A e sori taki Yehovah sabi sma ati. A sabi suma na den sma di e gi yesi na en èn a no wani taki den musu bumui nanga den wan di e du ogri.

„NO GO NA INI ALA SORTU LAWLAW NANGA DONDON TAKITAKI”

8. Fu san ede a no nofo fu gebroiki a nen fu Yehovah, noso fu de wan memre fu a Kresten gemeente?

8 Di Paulus taki fu den sani di pasa na ini a ten fu Moses, a ben wani memre Timoteyus taki a musu du ala san a man fu no meki a matifasi di a abi nanga Yehovah kon pori. Neleki fa a no ben nofo gi sma na ini a ten fu Moses fu kari Yehovah nen, na so a no ben nofo fu de wan memre fu a  Kresten gemeente na ini a ten fu Paulus. Sobun, futuboi fu Gado musu sori krin taki den e drai baka gi kruktudu. San disi ben wani taki gi Timoteyus? San a pipel fu Yehovah na ini a ten disi kan leri fu a rai di Paulus gi Timoteyus?

9. San pasa na ini a Kresten gemeente fu fositen di sma kon nanga „ala sortu lawlaw nanga dondon takitaki”?

9 Na ini a brifi di Paulus skrifi gi Timoteyus a gi en koni rai di sori en fa a kan drai baka gi ogridu. Fu eksempre, Paulus taigi Timoteyus fu „no meki trobi fu wortu ede” èn fu „wai pasi gi lawlaw takitaki”. (Leisi 2 Timoteyus 2:14, 16, 23.) Son sma na ini a gemeente ben e kon nanga falsi leri. Trawan ben e kon nanga denki di ben e tyari trobi kon. Aladi Bijbel no ben krutu sonwan fu den denki dati, toku den no ben bun fu di den ben e meki sma haritaki fu wortu ede. Disi ben e tyari pratifasi kon na ini a gemeente. Dati meki Paulus gi Timoteyus deki-ati fu „no go na ini ala sortu lawlaw nanga dondon takitaki”.

10. San wi musu du te wi e kisi fu du nanga sma di drai baka gi a bribi?

10 A no e pasa so furu taki sma na ini a gemeente e drai baka gi a bribi. Ma toku son sma kan kon nanga denki di no e kruderi nanga san Bijbel e leri wi. A no abi trobi pe den denki disi komoto, ma wi musu drai baka gi den wantewante. A no ben o de wan koni sani fu go haritaki nanga sma di drai baka gi a bribi, awinsi wi e taki nanga den langalanga, tapu Internet noso na iniwan tra fasi. Srefi te yu wani yepi so wan sma, toku disi no ben o kruderi nanga a Bijbel rai di wi luku didyonsro. Wi leki Yehovah en pipel no wani abi noti fu du nanga sma di drai baka gi a bribi.

Luku bun fu no haritaki nanga sma di drai baka gi a bribi (Luku paragraaf 10)

11. San kan tyari „ala sortu lawlaw takitaki” kon na ini a gemeente èn sortu bun eksempre Kresten owruman kan gi?

11 Boiti den sma di drai baka gi a bribi, yu abi tra sani tu di kan tyari pratifasi kon na ini a gemeente. Fu eksempre, kande brada nanga sisa abi difrenti denki fu sani di Kotoigi kan du fu meki prisiri na wan fasi di fiti. Ma te den e dwengi trawan fu si sani leki fa den e si sani, dan dati kan tyari „ala sortu lawlaw nanga dondon takitaki” kon. Aladi Kresten owruman no wani haritaki nanga trawan, toku den no musu frede fu taki nanga wan sma di e gi trawan deki-ati fu meki prisiri na wan fasi di no e kruderi nanga san Yehovah feni bun (Ps. 11:5; Ef. 5:3-5). Ma owruman musu luku bun taki den no e kon nanga den eigi denki. Den e teki a rai di Bijbel gi owruman: „Luku den skapu fu Gado di a gi unu fu sorgu. . . . No prei basi tu gi den wan di de wan gudu fu Gado, ma tron eksempre gi den skapu.”1 Petr. 5:2, 3; leisi 2 Korentesma 1:24.

12, 13. (a) Fa Yehovah Kotoigi e bosroiti san na wan bun fasi fu meki prisiri èn sortu Bijbel rai kan yepi den? (b) Fa den Bijbel rai di wi luku na ini paragraaf 12 kan yepi wi na ini situwâsi pe ibri sma musu teki en eigi bosroiti?

12 Na organisâsi fu wi no e kari nen fu felem, video game, buku noso poku di no bun gi wan Kresten. Fu san ede? Bijbel e gi ibri sma deki-ati fu leri gebroiki en ’frustan fu man si sani krin, so taki a kan sabi san bun èn san no bun’ (Hebr. 5:14). Wi kan gebroiki Bijbel rai fu teki koni bosroiti di abi fu du nanga a fasi fa wi musu meki prisiri. Na ini ala san wi e du na ini wi libi, wi musu ’sorgu ala ten taki wi sabi san Masra feni bun’ (Ef. 5:10). Bijbel e sori taki osofamiri-edeman abi a frantwortu fu luku na osofamiri fu den. Sobun, den kan bosroiti sortu fasi fu meki prisiri bun gi den osofamiri èn sortu fasi no bun.1 Kor. 11:3; Ef. 6:1-4. *

 13 Den Bijbel rai di wi luku didyonsro no abi fu du nomo nanga a fasi fa wi e meki prisiri. A kan pasa tu taki sma na ini a gemeente e haritaki fu sani soleki a fasi fa wi leki Kotoigi musu weri krosi, fa wi musu meki modo, san wi musu du fu tan gosontu, noso tra sani di ibri sma musu bosroiti gi ensrefi. Ma solanga wan Kresten no e du sani di de teige Bijbel, dan a no de wan koni sani fu haritaki fu den sortu tori disi, fu di „wan srafu fu Masra no musu meki trobi, ma a musu sori switifasi gi ala sma”.2 Tim. 2:24.

LUKU BUN NANGA TAKRU KOMPE!

14. Sortu agersitori Paulus gebroiki fu sori taki wi musu luku bun nanga takru kompe?

14 Na sortu tra fasi den „sma di e kari a nen fu Yehovah, [kan] drai baka gi kruktudu”? Te den e luku bun nanga takru kompe. A moi fu si taki, baka di Paulus taki dati „Gado seti wan steifi fondamenti di no man seki”, a kari wan agersitori. A taki fu „wan bigi oso” di abi „difrenti patu pe sma e poti sani na ini. Yu abi patu di meki fu gowtu noso fu solfru, ma yu abi sosrefi den wan di meki fu udu noso fu tokotoko. Sonwan fu den na fu du wan prenspari wroko, ma trawan na fu du wan lagi wroko” (2 Tim. 2:20, 21). Baka dati a gi Kresten a rai fu ’no fasi’ den patu di de gi wan „lagi wroko”. Iya, den ben musu tan farawe fu den sortu patu disi.

15, 16. San wi kan leri fu na agersitori di e taki fu „wan bigi oso”?

15 San na agersitori disi wani taki? Paulus e agersi a Kresten gemeente nanga „wan bigi oso” èn ibri memre fu a gemeente a e agersi nanga „patu” na ini na oso. Son leisi sma abi krin patu na ini den oso, ma fu di den poti sani na ini di pori, meki den patu kon doti. Efu den ben o gebroiki den patu dati, dan den kan kon siki. Dati meki den no o moksi den doti patu disi nanga krin wan, soleki den wan di den e gebroiki fu bori.

 16 Na so a de tu taki Yehovah en pipel na ini a ten disi e meki muiti fu libi wan krin libi èn den e luku bun nanga sma na ini a gemeente di e weigri fu gi yesi na den rai fu Yehovah. (Leisi 1 Korentesma 15:33.) Efu wi musu luku bun nanga son sma na ini a gemeente, dan a moro prenspari srefi fu luku bun nanga sma na dorosei fu a gemeente. Furu fu den sma dati ’lobi moni. Den e trangayesi papa nanga mama. Den no e tai hori na trawan. Den e fruteri ogri-ati lei fu trawan. Den e du ogri-ati sani. Den no lobi san bun. Den e tori trawan. Den lobi prisiri na presi taki den lobi Gado’.2 Tim. 3:1-5.

YEHOVAH E BLESI WI TE WI E TAI HORI NA EN

17. Fa den Israelsma di tan gi yesi na Yehovah, sori krin taki den drai baka gi kruktudu?

17 Bijbel e taki krin san den Israelsma du di Yehovah taigi den fu „komoto na den tenti fu Korak, Datan, nanga Abiram”. A tori e taki dati „wantewante den sma komoto” drape (Num. 16:24, 27). Nowan sma ben e draidrai. A tekst e sori tu taki den ben sabi san den ben musu du èn den no ben tweifri fu dati. Ala sma di gi yesi na Yehovah „komoto na ini a birti fu a tenti fu Korak, Datan, nanga Abiram” fu di den no ben wani lasi den libi. Den gi yesi na Yehovah nanga den heri ati. Den sori krin taki den ben teki a sei fu Yehovah èn taki den ben drai baka gi kruktudu. San wi kan leri fu na eksempre disi?

18. San Paulus ben abi na prakseri di a gi Timoteyus a rai fu „wai pasi gi den lostu di yongu sma abi”?

18 A matifasi di wi abi nanga Yehovah na wan warti sani gi wi. Dati meki wi musu wai pasi wantewante gi iniwan sani di kan pori a matifasi dati. Na dati Paulus ben abi na prakseri di a gi Timoteyus a rai fu „wai pasi gi den lostu di yongu sma abi” (2 Tim. 2:22). Kande Timoteyus ben pasa 30 yari kaba. Ma „den lostu di yongu sma abi” no e go ala ten nanga a yari fu wan sma. Te Timoteyus ben o kisi den lostu disi, dan a ben musu „wai pasi” gi den. Dati wani taki dati a ben musu „drai baka gi kruktudu”. Yesus ben taki wan srefi sortu sani: „Efu yu ai e meki yu sondu, dan diki en puru èn trowe en gowe” (Mat. 18:9). Kresten di wani teki a rai disi èn di wani tan de bun mati fu Gado, no musu draidrai fu puru iniwan sani na pasi di kan pori a matifasi dati.

19. San son sma du fu wai pasi gi sani di kan pori a matifasi di den abi nanga Yehovah?

19 Son sma ben gwenti dringi furu sopi. Ma di den tron Kotoigi, den teki a bosroiti fu no dringi nowan sopi moro. Aladi son fasi fu meki prisiri no fowtu kande, toku yu abi sma di e luku bun nanga dati, fu di a kan meki den kisi takru lostu (Ps. 101:3). Luku na eksempre fu wan brada fu wi. Fosi a tron wan Kotoigi, a ben lobi go na dansi pe sma ben e du ala sortu morsu sani. Baka di a leri sabi Gado, a bosroiti fu no dansi moro, srefi te a ben de na wan fesa fu Kotoigi. A bosroiti dati fu di a no ben wani kisi den takru lostu noso denki fu fosi. Aladi Bijbel no e taki dati Kresten no mag dringi sopi, dansi noso du tra sani di no fowtu, toku wi no musu draidrai fu wai pasi gi sani di kan pori a matifasi di wi abi nanga Yehovah.

20. Kande a no makriki fu „drai baka gi kruktudu”, ma san kan trowstu wi?

20 A grani di wi abi fu tyari a nen fu Gado na wan bigi frantwortu. Wi musu „drai baka gi kruktudu” èn wi ’no musu du ogri moro’ (Ps. 34:14). A no ala ten a makriki fu du disi. Ma na wan bigi trowstu fu sabi taki Yehovah o tan lobi „den sma di de fu en” èn di e tan du san a e aksi fu wi.2 Tim. 2:19; leisi 2 Kroniki 16:9a.

^ paragraaf 12 Luku www.jw.org/nl pe yu kan leisi na artikel „Verbieden jullie bepaalde films, boeken of muziek?” na a pisi di nen OVER ONS > VEELGESTELDE VRAGEN.