Go na content

Go na a tra menu

Go na table of contents

Yehovah Kotoigi

Sranantongo

Studie-Waktitoren  |  yuli 2014

Den ben de klariklari fu go—Mikronesia

Den ben de klariklari fu go—Mikronesia

KATHERINE gro kon bigi na ini Amerkankondre èn di a ben abi 16 yari a teki dopu leki Yehovah Kotoigi. A ben e si a preikiwroko leki wan seryusu sani. Ma wan tu sma nomo ben e arki a Kownukondre boskopu na ini a kontren pe a ben e preiki. A e taki: „Mi leisi ondrofenitori fu sma di ben begi Gado fu seni wan sma kon fu yepi den sabi en moro bun. Nofo tron mi ben winsi tu taki mi ben kan feni so wan sma na ini a preikiwroko, ma noiti dati pasa.”

Baka di Katherine preiki omeni yari na ini a kontren fu en, a ben e prakseri fu froisi go na wan presi pe moro sma e arki a Kownukondre boskopu. Ma a ben aksi ensrefi efu a ben o man. Wan leisi nomo na ini en libi a go na wan tra presi sondro en famiri. Aladi dati ben de gi tu wiki nomo, toku a ben misi den ibri dei. Ma fu di a ben e angri fu kon sabi fa a de fu yepi sma fu kon sabi Yehovah, meki a bosroiti fu froisi. Di a luku den difrenti presi pe a ben o man froisi go, a skrifi go na a bijkantoro fu Gwam èn den fruteri en moro fini san a kan du. Na ini yuli 2007, di Katherine ben abi 26 yari, a froisi go na Saipan, wan èilanti na a Stille Oceaan, sowan 10.000 kilometer fu en kondre. Fa sani waka gi en?

TU BEGI DI KISI PIKI

Syatu baka di Katherine doro na ini a nyun gemeente, a miti Doris na ini a preikiwroko. Na uma disi ben abi sowan 45 yari èn a ben wani studeri Bijbel. Di Katherine kaba studeri den fosi dri kapitel fu a Bijbel leri-buku nanga en, a bigin broko en ede nanga wan sani. Katherine e taki: „Doris ben studeri Bijbel heri bun èn mi no ben wani pori a studie. Noiti ete mi ben doro so fara nanga wan Bijbelstudie. Mi ben feni taki wan sisa di abi moro ondrofeni, ben musu studeri nanga Doris, kande wan sma di ben owru leki en.” Katherine begi Yehovah meki a yepi en feni wan sisa di ben kan studeri nanga Doris. Baka dati a bosroiti fu taigi Doris taki a ben o aksi wan tra sisa fu studeri nanga en.

Katherine e taki: „Fosi mi ben man opo a tori, Doris taigi mi taki a ben wani taki nanga mi fu wan problema. Mi arki en, dan mi taigi en fa Yehovah yepi mi nanga wan srefi sortu problema. Ne Doris taki mi tangi.” Baka dati Doris taigi Katherine: „Yehovah e gebroiki yu fu yepi mi. A fosi dei di yu kon na mi oso, mi ben leisi Bijbel omeni yuru langa. Mi krei langalanga watra-ai di mi aksi Gado fu seni  wan sma kon fu yepi mi frustan Bijbel. Ne yu naki na tapu mi doro. Yehovah piki a begi fu mi.” Katherine ai e furu nanga watra te a e prakseri a dei dati. A e taki: „A sani di Doris taki, ben de a piki tapu mi begi. Yehovah sori mi taki mi ben man studeri go doro nanga Doris.”

Na ini 2010, Doris teki dopu èn now en srefi e studeri Bijbel nanga wan tu sma. Katherine e taki: „Mi breiti taki mi ben man yepi wan reti-ati sma tron wan futuboi fu Yehovah. Na disi mi ben wani du someni langa.” Now Katherine e dini leki wan spesrutu pionier na Kosraye, wan èilanti na a Stille Oceaan.

DRI SANI DI KAN MEKI EN MUILEK TE YU FROISI

Te nanga now, moro leki wán hondro brada nanga sisa (fu 19 te go miti 79 yari) fu tra kondre, dini na Mikronesia pe moro preikiman de fanowdu. Na ini 2006, Erica froisi go na Gwam di a ben abi 19 yari. Erica fruteri fa en e firi. A e taki: „A e gi furu prisiri fu pionier na ini wan kontren pe sma e angri fu kon sabi moro fu Bijbel. Mi breiti taki Yehovah yepi mi fu du a sortu diniwroko disi. Disi na a moro bun fasi fu libi!” Furu tra fayafaya preikiman e firi so tu. Now Erica breiti taki a man dini leki spesrutu pionier na Ebeye na den Marsyal-èilanti. Ma a no ala ten a makriki fu go preiki na wan tra kondre. Meki wi go luku dri sani di e meki en muilek son leisi fu du dati èn luku san brada nanga sisa di froisi go na Mikronesia, ben du.

Erica

A fasi fa yu gwenti libi. Na ini 2007, Simon di ben abi 22 yari, froisi go na a èilanti Palaw. Di a doro drape, a kon si taki a no ben man wroko so furu moni leki san a ben gwenti wroko na Ingrisikondre pe a komoto. „Mi ben musu leri fu no bai iniwan sani di mi wani. Now mi e go na difrenti wenkri fu feni den moro bunkopu sani.” A e fruteri tu taki te wan sani fu en broko, a no e lon go bai nyunwan, ma a e pruberi fu feni wan sma di kan yepi en fu meki en. Now di Simon abi soso den sani di de fanowdu na ini a libi, dan fa dati kenki en? A e taki: „A leri mi fu kon si san de prenspari trutru na ini a libi èn mi kon si tu taki mi no abi furu fanowdu. Mi ondrofeni furu leisi taki na Yehovah e sorgu mi. Na ini den seibi yari di mi dini dyaso, ala ten mi ben abi wan sani fu nyan èn wan presi fu sribi.” Iya, Yehovah e yepi den wan di e tyari kenki kon na ini den libi fu di den wani suku a Kownukondre fosi.Mat. 6:32, 33.

Te yu e bigin misi yu famiri. Erica e taki: „Mi lobi mi famiri èn mi ben frede taki mi no ben o man poti ala mi prakseri na a diniwroko te mi ben o bigin misi den.” San a du fu sreka ensrefi? „Fosi mi froisi, mi leisi wan tu artikel na ini A Waktitoren di ben sori san yu kan du te yu e misi yu famiri. Disi yepi mi trutru fu sreka misrefi gi dati. Na ini wan fu den artikel, wan mama sori en umapikin taki a kan de seiker taki Yehovah o sorgu gi en. A taki: ’Yehovah kan sorgu moro bun gi yu leki mi.’ A sani disi gi mi  furu deki-ati.” Hannah nanga en masra Patrick, e dini na Majuro na den Marsyal-èilanti. Te Hannah e poti prakseri na den brada nanga sisa na ini a gemeente, dan a no e misi en famiri so furu. A e taki: „Mi e taki Yehovah tangi ala ten taki wi abi so furu brada nanga sisa na heri grontapu, fu di den srefi na mi famiri tu. Efu den no ben horibaka gi mi, dan noiti mi ben o man go dini pe moro preikiman de fanowdu.”

Simon

Meki mati. Simon e taki: „Te yu e doro na ini wan tra kondre, dan ala sani de tra fasi. Son leisi mi e firi fruferi te mi e si taki sma no e frustan den lafutori fu mi.” Erica e taki: „Na a bigin mi no ben man meki mati. Ma dati yepi mi fu go denki fu san ede mi froisi. Mi no froisi fu kisi wini gi misrefi, ma fu du moro gi Yehovah.” A e taki moro fara: „Baka wan pisi ten mi kon feni bun mati èn mi lobi den trutru.” Simon meki muiti fu leri Palawantongo. Dati yepi en fu ’opo en ati moro’ gi den brada nanga sisa drape (2 Kor. 6:13). Fu di a meki so furu muiti fu leri a tongo, meki den brada nanga sisa kon lobi en. Iya, te brada nanga sisa di froisi go na wan tra kondre e wroko skinskin nanga den wan fu a kondre dati, dan den o tron bun mati fu makandra. Brada nanga sisa di de klariklari fu go dini na presi pe moro preikiman de fanowdu, e kisi tra blesi tu. Sortu blesi den e kisi?

DEN E „KOTI BOGOBOGO”

Na apostel Paulus ben taki: „A sma di e sai bogobogo o koti bogobogo tu” (2 Kor. 9:6). A deki-ati disi di Paulus gi, abi fu du nanga den wan di teki a bosroiti fu du moro na ini a diniwroko. Sortu bun bakapisi den abi na Mikronesia?

Patrick nanga Hannah

Na Mikronesia furu okasi de ete fu studeri Bijbel nanga sma. Yu man si fa den e leri den tru tori fu Gado Wortu, fa den e fiti dati na ini den libi èn fa den e go na fesi. Patrick nanga Hannah preiki tu na Angaur, wan pikin èilanti pe 320 sma e libi. Baka di den preiki drape tu mun langa, den miti wan mama di no abi masra. Wantewante a bigin studeri Bijbel èn a ben lobi san a leri. A tyari bigi kenki kon na ini en libi. Hannah e taki: „Ibri leisi te wi ben e rèi go na oso na tapu den baisigri fu wi baka a studie, dan wi ben e luku makandra èn wi ben taki: ’Yehovah, wi e taki yu tangi!’” Hannah e taki moro fara: „Mi sabi taki Yehovah ben o hari na uma disi kon na en, awinsi fa a no fa. Ma fu di wi go dini pe moro preikiman de fanowdu, meki wi ben man miti na uma disi èn wi ben man yepi en fu kon sabi Yehovah. Disi na a moro moi sani di wi ondrofeni na ini wi libi!” Erica e taki: „Te yu e yepi wan sma fu kon sabi Yehovah, dan yu e kisi bigi prisiri.”

YU KAN GO NA WAN PRESI TU PE MORO PREIKIMAN DE FANOWDU?

Na ini furu kondre, moro Kownukondre preikiman de fanowdu. Yu kan de wan fu den sma di e go yepi na so wan kondre? Aksi Yehovah na ini begi meki a gi yu deki-ati fu du moro na ini a diniwroko. Taki nanga den owruman na ini yu gemeente, nanga a kring-opziener noso nanga den sma di ben abi a grani fu dini na ini wan kondre pe moro yepi de fanowdu. Te yu e bigin sreka yusrefi fu go, dan skrifi a bijkantoro di e luku a kontren pe yu wani go dini. Aksi den fu fruteri yu moro fini san yu kan du. * Kande yu kan du moro, neleki den dusundusun brada nanga sisa di ben de klariklari fu froisi go na wan tra kondre, awinsi den yongu noso owru, awinsi den trow noso den no trow. Efu yu e du dati, yu o prisiri fu di yu o „koti bogobogo”.

^ paragraaf 17 Luku na artikel di nen „Yu man ’abra kon na Masedonia’?”, na ini Wi Kownukondre diniwroko fu augustus 2011.

Kon sabi moro

SUMA E DU A WANI FU YEHOVAH NA INI A TEN DISI?

Na sortu skoro den pionier kan go?

Sortu spesrutu skoro de gi den sma di e gebroiki ala den ten fu du a Kownukondre preikiwroko?