Go na content

Go na a tra menu

Go na table of contents

Yehovah Kotoigi

Sranantongo

Studie-Waktitoren  |  yuni 2014

Aksi fu leisiman

Aksi fu leisiman

A fiti gi Kresten fu bron wan sma te a dede?

Bijbel no e taki krin dati a de wan fowtu sani fu bron wan dedeskin.

Na ini Bijbel wi kan leisi fu wan tu okasi pe sma bron wan dedeskin noso den bonyo fu wan dedesma (Yos. 7:25; 2 Kron. 34:4, 5). Disi ben wani taki kande dati den sma disi no ben warti fu kisi wan bun beri. Ma a no ala leisi te sma ben e bron wan dedeskin, a ben wani taki dati a dedesma no ben warti fu den beri en.

Wi kan si disi te wi e leisi a tori fu a dede fu Kownu Saul nanga den dri manpikin fu en. Den fo man disi dede di den ben e feti nanga den Filisteasma. Wan fu den manpikin ben de Yonatan, wan bun mati fu David di ben e horibaka gi en ala ten. Di wan tu deki-ati Israel man fu Yabes-Gilead kon sabi san pasa, den go teki den fo dedeskin, dan den bron den èn baka dati den beri den bonyo. Bakaten David prèise den man dati fu san den du.1 Sam. 31:2, 8-13; 2 Sam. 2:4-6.

Bijbel e sori taki a howpu gi dedesma na taki den o kisi wan opobaka. Disi wani taki dati Gado o meki a sma kon na libi baka. Awinsi wan dedesma no beri, ma a bron, toku dati no e tapu Yehovah fu meki a sma kon na libi baka nanga wan nyun skin. Di Kownu Nebukadnesar taigi den dri Hebrew futuboi fu Gado taki den ben o dede na ini wan faya onfu, den no ben abi fu frede fu di Gado ben o man gi den wan opobaka (Dan. 3:16-18). Dati ben de so tu nanga den futuboi fu Yehovah di ben sabi taki den ben o dede na ini den strafuman-kampu fu den Nazisma èn taki sma ben o bron den bakaten. Tra futuboi fu Gado dede di wan bom sutu. Noso kande den dede fu di wan tra sani pasa di meki taki noti no tan abra fu den skin. Toku a de seiker taki den o kisi wan opobaka.Openb. 20:13.

Yehovah no abi fu seti a skin baka di a sma ben abi fosi, fu kan gi en wan opobaka. Dati wi e si te wi e luku a fasi fa Gado gi den salfu Kresten wan opobaka na hemel. Neleki fa Yesus ben „kon na libi leki wan yeye”, na so den salfu Kresten o opo baka leki yeye. Den o opo baka nanga den srefi prakseri èn nanga den srefi firi di den ben abi fosi den dede. Nowan pisi fu den skin e go nanga den na hemel.1 Petr. 3:18; 1 Kor. 15:42-53; 1 Yoh. 3:2.

Na opobaka howpu no abi fu du nanga san sma e du nanga wan dedeskin, ma a abi fu du nanga a bribi di wi abi taki Gado man du san a pramisi èn taki a wani du en tu (Tori 24:15). A tru taki wi no e frustan krin fa Yehovah ben meki sma kon na libi baka na ini owruten noso fa a o du dati na ini a ten di e kon. Ma wi e poti wi frutrow na ini en. Di a meki Yesus kon na libi baka, a sori taki wi „kan de seiker fu disi”.Tori 17:31; Luk. 24:2, 3.

Te Kresten o luku san den o du nanga wan dedeskin, dan den musu hori den sma na ini a kontren fu den na prakseri èn den musu luku tu san sma e denki fu a tori. Den musu luku sosrefi san lantiwet e taki fu a tori (2 Kor. 6:3, 4). Sobun, a de na wan sma srefi efu a wani taki den bron en noso den beri en te a dede. Noso famiriman fu a dedesma srefi musu bosroiti san den o du nanga en.