Go na content

Go na a tra menu

Go na table of contents

Yehovah Kotoigi

Sranantongo

Studie-Waktitoren  |  yuni 2014

Yu e si den swakiwan leki fa Yehovah e si den?

Yu e si den swakiwan leki fa Yehovah e si den?

„Den pisi fu a skin di gersi fu de den moro swakiwan, na den wan di wi abi fanowdu.”1 KOR. 12:22.

1, 2. Fu san ede Paulus ben frustan fa swakiwan e firi?

WI ALAMALA e firi swaki son leisi. Wan hebi griep kan meki wi firi so swaki taki wi no man du den sani di wi gwenti du ala dei. Ma kon meki wi taki dati yu e firi swaki wan heri pisi ten, kande wan tu mun langa. Yu no ben o breiti te trawan e sori taki den e frustan fa yu e firi?

2 Na apostel Paulus ben sabi san a wani taki fu firi swaki te wi e kisi tesi dorosei fu a gemeente èn na ini a gemeente. Someni leisi a ben prakseri taki a no ben o man moro (2 Kor. 1:8; 7:5). Di Paulus prakseri a libi fu en nanga den furu problema di miti en leki Kresten, a taki: „Suma swaki èn mi no swaki?” (2 Kor. 11:29) A ben agersi den difrenti memre fu a gemeente nanga den pisi fu wan skin. A taki dati den wan di „gersi fu de den moro swakiwan, na den wan di wi abi fanowdu” (1 Kor. 12:22). Fu san ede a taki dati? Fu san ede wi musu si den sma di sori swaki leki fa Yehovah e si den? Sortu wini wi o kisi fu disi?

 FA YEHOVAH E SI DEN SWAKIWAN

3. San kan meki taki wi no denki bun fu wi brada nanga sisa na ini a gemeente?

3 Wi e libi na ini wan grontapu pe sma lobi strei nanga makandra èn nofo tron na den trangawan nanga den yonguwan e kisi bigi nen. Furu sma e du ala san den man fu kisi san den wani. Disi e meki taki nofo tron den e hati den firi fu trawan di moro swaki. Aladi wi no e feni disi bun, toku a kan pasa taki son leisi wi srefi no e denki bun fu sma di abi yepi fanowdu ibri tron baka, srefi efu na brada nanga sisa na ini wi gemeente. Toku wi kan leri fu si den leki fa Gado e si den.

4, 5. (a) Fa na agersitori na ini 1 Korentesma 12:21-23 e yepi wi fu frustan fa Yehovah e si den swakiwan? (b) Sortu wini wi e kisi te wi e yepi den swakiwan?

4 Te wi e luku na agersitori di Paulus skrifi na ini a fosi brifi gi den Korentesma, dan wi kan kon frustan moro bun fa Yehovah e si den swakiwan. Na ini kapitel 12, Paulus e memre wi taki srefi den pisi fu a skin di no moi so noso den pisi fu a skin di swaki, de prenspari. (Leisi 1 Korentesma 12:12, 18, 21-23.) Son sma di e bribi na ini na evolutie-leri e taki dati wan tu pisi fu wi skin no de fanowdu. Ma ondrosuku e sori taki den pisi fu a skin di sma ben denki fosi taki den de fu soso, na pisi di prenspari srefisrefi. * Fu eksempre, son sma aksi densrefi efu a pikin futufinga fu wi de fanowdu. Ma efu a pikin futufinga no de, dan wi no man tanapu bun.

5 Na agersitori fu Paulus e sori taki ala sma na ini a Kresten gemeente de fanowdu. Satan wani meki wi denki taki wi no warti noti. Ma gi Yehovah ala den futuboi fu en, sosrefi den swakiwan de „fanowdu” (Yob 4:18, 19). A sani disi musu yepi ibriwan fu wi fu firi bun fu di wi sabi taki wi de fanowdu na ini wi gemeente èn taki wi e du wan prenspari wroko na ini Gado en organisâsi na heri grontapu. Fu eksempre, kon meki wi taki dati yu langa yu anu gi wan owrusma fu a hori yu fu di a no man waka so bun. Kande yu no man waka so esi te yu e waka nanga en. A no de fu taki dati na owrusma o firi bun taki yu yepi en, ma yu srefi o firi bun tu, a no so? Iya, te wi e yepi sma di de na nowtu, wi e prisiri fu di wi du wan sani gi den. Disi e meki taki wi kisi moro pasensi nanga lobi èn taki wi tron lepi Kresten (Ef. 4:15, 16). Yehovah wani taki wi si den brada nanga sisa fu wi leki prenspari sma, srefi den wan di swaki. Te wi e si den na a fasi disi, dan wi no o fruwakti tumusi furu fu den èn ala sma na ini a gemeente o sori moro lobi gi makandra.

6. Fa Paulus ben e gebroiki a wortu „swaki” nanga a wortu „tranga” son leisi?

6 A moi fu si taki na ini a brifi di Paulus skrifi gi den Korentesma, a gebroiki a wortu „swaki” fu sori fa sma di no de na bribi ben e si den Kresten na ini a fosi yarihondro. A ben wani sori tu fa a ben e si ensrefi (1 Kor. 1:26, 27; 2:3). Di Paulus taki fu sma di „tranga”, dan a no du dati fu meki son Kresten denki taki den bun moro trawan (Rom. 15:1). Na presi fu dati, a ben e taki dati Kresten di abi moro ondrofeni, musu abi pasensi nanga den wan di no abi so wan tranga bribi ete.

WI MUSU KENKI A FASI FA WI E DENKI FU SMA?

7. San kan tapu wi fu yepi sma di de na nowtu?

7 Yehovah e yepi „den mofinawan” èn a breiti te a e si taki wi e du dati tu (Ps. 41:1; Ef. 5:1). A tru taki son leisi te wi no e denki bun fu sma di de na nowtu, dan dati kan tapu wi fu yepi den. Kande wi no sabi tu  san wi musu taki èn dati kan meki wi firi syen so taki wi no yepi wan sma di abi problema. Cynthia * na wan sisa di en masra gowe libi en. A e taki: „Efu brada nanga sisa e wai pasi gi yu, noso den no e yepi yu soleki fa bun mati e yepi makandra, dan dati kan hati yu. Te sani no e go bun, dan yu abi sma fanowdu di e horibaka gi yu.” Na so a ben hati Kownu David tu di en mati ben e wai pasi gi en.Ps. 31:12.

8. San kan yepi wi fu frustan den firi fu wi brada nanga sisa?

8 San kan yepi wi fu frustan den firi fu wi brada nanga sisa di abi yepi fanowdu? Hori na prakseri taki sonwan fu den e siki, trawan lasi-ati èn sonwan e firi brokosaka fu di den e libi na ini wan osofamiri pe sma no de na bribi. Kande wan dei wi srefi o de na ini so wan situwâsi tu. Prakseri a ten di den Israelsma ben de na Egepte. Den ben pôti èn den ben swaki. Ma fosi den go na ini a Pramisi Kondre, Yehovah memre den fu „abi sari-ati” gi tra Israelsma di ben de na nowtu. A ben wani taki den si den pôtiwan leki sma di ben warti fu kisi yepi.Deut. 15:7, 11; Lef. 25:35-38.

9. San na a fosi sani di wi musu du te wi wani yepi den wan di abi problema? Gi wan eksempre.

9 Na presi fu krutu den wan di de na ini muilek situwâsi noso fu denki takru fu den, wi musu trowstu den (Yob 33:6, 7; Mat. 7:1). Luku wan eksempre: Kon meki wi taki dati wan man naki nanga a brom fu en èn den lon tyari en go na ati-oso. Yu denki taki den datra nanga den zuster drape o lasi ten fu aksi en efu na en ben fowtu? Kwetikweti. Den o gi en datrayepi wantewante. Na so a de tu taki te wan brada noso sisa kon swaki fu di a abi problema, dan a fosi sani di wi musu du na fu gi en deki-ati.Leisi 1 Tesalonikasma 5:14.

10. Fa son Kresten sori taki den abi wan tranga bribi, aladi a gersi leki den swaki?

10 Te wi e denki a situwâsi fu wi brada nanga sisa, dan dati o yepi wi fu si den swakifasi fu den tra fasi. Prakseri den sisa di de omeni yari kaba na ini wan osofamiri pe sma e gens den. Sonwan fu den sori swaki, ma toku den abi wan tranga bribi èn den abi a krakti fu horidoro. A no e naki yu ati fu si a bribi fu wan mama di e kon na den konmakandra ibri wiki makandra nanga en pikin, aladi a no abi masra? Fa a de nanga den yonguwan di e tan dini Yehovah, aladi den abi en muilek na skoro? Den alamala lobi Yehovah nanga den heri ati èn den no e meki noti tapu den fu tan dini en. Te wi e prakseri ala sani di den brada nanga sisa fu wi e du fu dini Yehovah, dan dati o yepi wi fu si den leki sma di abi wan tranga bribi, srefi efu a gersi leki den swaki.Yak. 2:5.

SI SANI LEKI FA YEHOVAH E SI DEN

11, 12. (a) San o yepi wi fu si sani leki fa Yehovah e si den te den brada nanga sisa fu wi e meki fowtu? (b) Fu san ede Yehovah gi Aron pardon èn san wi kan leri fu dati?

11 Wi musu si den brada nanga sisa fu wi leki fa Yehovah e si den, srefi te den e meki fowtu. Eksempre na ini Bijbel o yepi wi fu kon sabi fa Yehovah e si den futuboi fu en. (Leisi Psalm 130:3.) Fu eksempre, kon meki wi taki dati yu ben de drape nanga Moses di a yere Aron fruteri en ala sortu sani fu san ede a meki a pikin kaw fu gowtu. San yu ben o denki fu Aron? (Eks. 32:21-24) Fa yu ben o firi te yu ben o si taki Aron teki a sei fu en sisa Meriam di ben krutu Moses taki a trow nanga wan uma fu wan tra pipel? (Num. 12:1, 2) Noso kon meki wi taki dati yu ben de na Meriba di Yehovah gi a pipel watra nanga yepi fu wan wondru. San yu ben o du te yu si taki Aron  nanga Moses no gi Yehovah grani fu a wondru disi?Num. 20:10-13.

12 Na ala den okasi disi, Yehovah ben kan strafu Aron wantewante. Ma a si taki Aron no ben de wan takru sma. Soleki fa a sori, dan Aron meki fowtu fu di a ben de na ini muilek situwâsi èn fu di a arki sma di trangayesi Gado. Ma di Yehovah sori Aron sortu fowtu a meki, a teki a rai fu Gado (Eks. 32:26; Num. 12:11; 20:23-27). Yehovah si a bribi fu Aron èn a fasi fa a sori berow. Hondrohondro yari baka dati, sma ben e si Aron nanga den bakapikin fu en ete leki sma di ben abi lespeki gi Yehovah.Ps. 115:10-12; 135:19, 20.

13. San wi kan du fu kenki a fasi fa wi e denki fu trawan? Gi wan eksempre.

13 Fu kan si sani soleki fa Yehovah e si den, wi musu ondrosuku fa wi e denki fu sma di sori swaki (1 Sam. 16:7). Fu eksempre, prakseri wan yonguwan di no e tyari ensrefi bun. Kande a no e teki bun bosroiti te a abi fu du nanga prisiriten. Na presi taki wi e krutu en tumusi, a ben o bun fu luku san wi kan du fu yepi en tron wan lepi Kresten. Teki ten fu leri en fa fu teki koni bosroiti. Te wi e yepi trawan na a fasi disi, dan wi o leri fu abi moro pasensi nanga den èn a lobi di wi abi gi den o kon moro tranga.

14, 15. (a) Fa Yehovah ben firi di Elia lasi-ati wan pisi ten? (b) San wi kan leri te wi e luku na ondrofenitori fu Elia?

14 Fa Yehovah e si den sma di lasi-ati? Luku fa a yepi wan fu den futuboi fu en di ben e firi so. A futuboi disi na a profeiti Elia di no ben frede fu sori den 450 profeiti fu Bâal suma na a tru Gado. Ma di a kon sabi taki na Umakownu Iseibel ben wani kiri en, a lowe gi en. A waka sowan 150 kilometer go na Berseiba èn baka dati a waka go bun fara na ini a sabana. Fu di a son ben  faya srefisrefi, meki a profeiti ben kon weri èn a go sidon na ondro wan bon. Drape a „aksi Gado fu dede”.1 Kow. 18:19; 19:1-4.

Yehovah ben hori na prakseri taki Elia ben swaki èn dati meki a seni wan engel go na en fu gi en deki-ati (Luku paragraaf 14, 15)

15 Fa Yehovah ben firi di a si taki a profeiti fu en di ben tan dini en, firi brokosaka? A drai baka gi a futuboi fu en fu di a ben lasi-ati wan pisi ten èn fu di a no ben abi so furu deki-ati? Kwetikweti! Yehovah hori na prakseri taki Elia ben kon swaki èn dati meki a seni wan engel go na en. Tu tron na engel gi Elia deki-ati fu nyan. Efu a no ben o nyan, ’a no ben o man waka a pasi’ go moro fara. (Leisi 1 Kownu 19:5-8.) Iya, srefi fosi Yehovah taigi Elia san fu du, a arki san a profeiti ben abi fu taki èn a du sani fu yepi en.

16, 17. Fa wi kan teki na eksempre fu a fasi fa Yehovah sorgu gi Elia?

16 Fa wi kan teki na eksempre fu wi lobi-ati Gado? Wi no musu de tumusi gaw fu gi sma rai (Odo 18:13). A ben o moro bun fu teki ten fosi fu sori sari-ati gi den wan di e si densrefi leki sma „di no de so prenspari” fu di den de na ini wan muilek situwâsi (1 Kor. 12:23). Te wi du dati, dan a o moro makriki gi wi fu gi den a yepi di den abi fanowdu trutru.

17 Fu eksempre, prakseri Cynthia di wi ben taki fu en kaba. Di en masra gowe libi en nanga den tu umapikin fu en, den ben abi a firi taki den ben de den wawan. San wan tu brada nanga sisa du di a sani disi pasa? Cynthia e taki: „Di wi bel den fu taigi den san pasa, dan baka 45 miniti den ben de na wi oso kaba. Den ai ben furu nanga watra. Den fosi tu noso dri dei wi no tan wi wawan. Fu di wi no ben e nyan bun èn wi ben e sari trutru, meki den aksi wi fu kon tan nanga den wan pisi ten.” Kande a tori disi e meki yu prakseri san Yakobus skrifi: „Efu wan brada noso wan sisa no abi krosi èn efu a no abi nofo nyanyan gi a dei, ma toku wan fu unu e taigi den: ’Tan bun, hori un skin waran, sorgu taki unu nyan un bere furu’, ma unu no e gi den san den abi fanowdu fu tan na libi, dan sortu bun unu e du? Na so a de tu nanga bribi. Efu wan sma e taki dati a abi bribi, ma a no e du sani fu sori a bribi fu en, dan a bribi dati na wan dede sani” (Yak. 2:15-17). Fu di brada nanga sisa na ini a gemeente fu Cynthia yepi en na a ten di a ben abi disi fanowdu, meki en nanga den umapikin fu en kisi krakti baka. Sowan siksi mun baka di a sari sani disi pasa nanga den, den tron yepipionier.2 Kor. 12:10.

FURU SMA E KISI WINI

18, 19. (a) Fa wi kan yepi den wan di swaki wan pisi ten? (b) Suma e kisi wini te wi e yepi den wan di e firi swaki?

18 Kande yu ondrofeni kaba taki di yu ben abi wan hebi siki, a teki ten fu kisi yusrefi baka. Na so a de tu taki te wan Kresten kon swaki fu di a ben abi wan problema noso fu di a ben de na ini wan muilek situwâsi, dan a kan teki ten fu kisi ensrefi baka. A tru taki a musu studeri, begi èn go na den konmakandra fu meki en eigi bribi kon tranga. Ma a de so taki wi o abi pasensi nanga en teleki a kisi ensrefi baka? San wi o du te wi si taki a e meki a muiti dati? Wi o tan sori taki wi lobi en? San wi o du fu yepi wi brada nanga sisa di swaki wan pisi ten? Wi du sani fu meki den firi warti baka èn fu meki den firi taki wi lobi den?2 Kor. 8:8.

19 No frigiti taki te wi e yepi den brada nanga sisa fu wi, dan wi srefi kan firi prisiri fu di wi e gi trawan san den abi fanowdu. Wi e leri moro bun tu fa fu sori sari-ati nanga pasensi gi trawan. Ma a no dati wawan. Ala sma na ini a gemeente o firi moro lobi gi makandra. Boiti dati, wi e teki na eksempre fu Yehovah di taki dati ibriwan sma warti gi en. Iya, a bun taki wi alamala meki muiti fu „yepi den swakiwan”.Tori 20:35.

^ paragraaf 4 Charles Darwin skrifi na ini a buku fu en taki wan tu pisi fu a skin de „fu soso” (The Descent of Man). Tra sma di e bribi tu na ini na evolutie-leri taki dati furu pisi na ini wi skin, soleki den amandra na ini wi gorogoro, no de fanowdu.

^ paragraaf 7 Wi kenki a nen.